Yeremiya 19:1-15
19 Ca popia Yehova ceci hati: “Kuende, ka lande esanga limue liotuma kukuakutalavaya lotuma.+ Ambata akulu vamue vomanu kuenda akulu vamue vovitunda,
2 kuenje kuende Kocimbota Comõla a Hinome+ koku iñilila Kuombundi Yoviyo. Kuenda sandekako olondaka ndu ku sapuila.
3 O ka popia hati: ‘Yeveleli ondaka ya Yehova ene alosoma vio Yuda kuenda alonungi vio Yerusalãi. Ca popia Yehova ukualohoka Suku ya Isareli ceci hati:
“‘“Ndopo ndi nena ohali yimue kocitumãlo cilo kuenda vovatũi a vana va ka ci yeva, mu ka ñoña.
4 Ndi ci linga momo ovo va njanduluka+ kuenda va pongolola ocitumãlo eci okuti ka ci limbukiwa.+ Oko ovo va kasi oku ecela ovilumba kolosuku vikuavo, vina ovo kumue la vakukululu yavo lolosoma vio Yuda, ka via kũlĩhĩle kuenda va yukisa ocitumãlo caco losonde ya vana ka va kuete eko.+
5 Ovo va tunga ovitumãlo via lepa via Baale oco va timĩhe omãla vavo vondalu ndovilumba vioku pia elisi ku Baale+ okuti, ocina cimue sia handelekele ale oku ci sapula kuenda lalimue eteke ceyile vutima wange.”’*+
6 “‘“Omo liaco, tala! oloneke vi kasi oku iya oco Yehova a popia, “eci ocitumãlo cilo ka ci ka tukuiwa vali okuti, o Tofete ale Ocimbota Comõla a Hinome, pole, ci tukuiwa hati, Ocimbota Coku Ponda.+
7 Ndi ka tateka asokiyo o Yuda kuenda o Yerusalãi kocitumãlo eci kuenje ndi ka va kokela oku kupuka losipata kovaso yovanyãli vavo kuenda povaka a vana va sandiliya oku va ponda. Kuenje ndi ka eca atimba avo ndokulia kolonjila viovailu kuenda kovinyama vio kilu lieve.+
8 Kuenje ndi ka lingisa olupale olu ocikuata coku yokoka kuenda ocina cimue coku sika ovilua. Omunu wosi o pita ocipepi lawo o ka lu vanja loku yokoka kuenda o ka sika ovilua omo liafengi alio osi.+
9 Kuenje ndi ka va lisa ositu yomãla vavo valume leyi yomãla vavo vakãi kuenje omunu lomunu o ka lia ositu yomunu a lisungue laye, omo lioku ñualiwa ocingonja kuenda ohali yavo eci va ka ñualiwa lovanyãli vavo kumue la vana va sandiliya oku va ponda.”’+
10 “Noke tetuila esanga kovaso yomanu vana va ka enda love,
11 kuenje va sapuila okuti: ‘Ca popia Yehova ukualohoka ceci hati: “Ndi ka teya omanu ava kuenda olupale lulo, ndeci omunu a tetula esanga liotuma okuti, lalimue eteke li semũlũiwa vali; kuenje ovo va ka kenda ovivimbi ko Tofete toke eci ka ku kala vali ocitumãlo coku va kenda.”’+
12 “‘Eci oco ndi ka linga locitumãlo eci,’ oco Yehova a popia kuenda kolonungi vialio, oco ndi lingise olupale olu ndo Tofete.
13 Kuenje olonjo vio Yerusalãi lolonjo violosoma vio Yuda, vi ka vĩha ndocitumãlo eci okuti, o Tofete,+ ocili, olonjo viosi okuti valusoka aco va lumbilamo ovilumba kolohoka viosi viovailu+ kuenda kuna va pesila ovilumba vioku nyua kolosuku vikuavo.’”+
14 Eci Yeremiya a tiuka oku tunda ko Tofete kuna Yehova o tumile oku imba owanji eye wa talama vocitali conjo ya Yehova kuenje wa sapuila omanu vosi hati:
15 “Ca popia Yehova ukualohoka Suku ya Isareli ceci hati: ‘Ñasi oku nena volupale olu kuenda kovaimbo alio osi, ohali yosi yina nda tukula yatiamẽla kokualio, momo ovo lesino va likala* oku pokola kolondaka viange.’”+
