Yeremiya 12:1-17
12 A Yehova, ove wukuesunga+ eci ndi liyeyela kokuove asakalalo ange,Eci ndu ku sapuila catiamẽla kovitangi viesunga.
Pole, momo lie onjila yolondingaĩvi ya siatela oku litunda ciwa+Kuenda momo lie vakuelimbi ka va sakalalele?
2 Ove wa va tuika kuenda ovo va tunda olombombo.
Ovo va kula kuenda va ima apako.
Ovo olonjanja viosi va ku tukula, pole, utima wavo u kasi ocipãla love.+
3 Pole, ove wa ndi kũlĩha ciwa A Yehova,+ ove o ndi lete;Ove wa kũlĩhĩsa utima wange kuenda wa limbuka okuti, owo u likuete omunga love.+
Va tepa ndomeme yi laika oku pondiwa,Va soleka toke keteke lioku pondiwa.
4 Toke otembo yipi ofeka eyi yi ka amamako oku honguaKuenda ovikũla viovapia osi vi ka kukuta?+
Omo lievĩho lia vana va tungamo,Ovinyama kuenda olonjila, ka vi kasiko vali.
Momo ovo va popia vati: “Eye ka lete eci ci ka pita letu.”
5 Nda ove o kava eci o lupuka lalume va endela posi,O ka tẽla ndati oku lupuka lolokavalu?+
Ndaño okuti ove wa kolapo vofeka yombembua,O ka kala ndati pokati kusenge woviti via pulika ocipepi lo Yordão?
6 Momo ndaño muẽle vamanjove, vakuanjo ya isiove muẽle,Va ku lingila usuanji.+
Ovo va ku kalukila calua.
Ku ka va kolele,Ndaño okuti ovo va ku sapuila ovina viwa.
7 “Nda yanduluka onjo yange;+ nda siapo ocipiñalo cange.+
Ame nda eca una ndi sole peka liovanyãli vaye.+
8 Ocipiñalo cange ca ndi lingila ndohosi yimue yi kasi vusenge.
Oco, ca ndi komẽla.
Omo liaco, nda fetika oku ci suvuka.
9 Ocipiñalo cange ca ndi lingila ndonjila yimue ya tema yi kuete avala alua;*Olonjila vikuavo via tema vi ci ñuala ocingonja kuenda vi ci katukila.+
Enjui, liongololi, ene vosi avinyama viovusenge,Enjui oco vu li.+
10 Angombo valua va nyõla ocumbo cange cayuva;+Ovo va kosa onepa yange yofeka.+
Ovo va pongolola onepa yange ya soliwa yofeka oco yi linge ekalasoko.
11 Oyo ya linga ekalasoko.
Oyo yowuka;*
Ya linga upolokoso kovaso yange,+Ofeka yosi ya linga upolokoso,Pole, lomue wa yi kapa kutima.+
12 Vakuakunyõla veya poku tundilila kolonjila viosi viekalasoko,Momo osipata ya Yehova yi kasi oku lia oku upisa kesulilo limue liofeka toke kesulilo likuavo liofeka.+
Ka kuli ombembua komunu laumue.*
13 Va kũla otiliku, pole, vongula olosongo.+
Va likavisa ovo muẽle, pole, ka ca va kuatisile.
Va ka kuata osõi yovaima avo
Omo lionyeño yalua ya Yehova.”
14 Ca popia Yehova catiamẽla komanu vosi vãvi va lisungue lame, vana va lamba kocipiñalo nda eca komanu vange va Isareli oco va ci piñale ceci hati:+ “Ame ndi kasi oku va tukũla vofeka yavo+ kuenda ndi ka tukũla onjo ya Yuda pokati kavo.
15 Pole, noke yoku va tukũla, ndi ka lekisa vali ohenda kokuavo kuenda ndi ka nena vali omunu lomunu kocipiñalo caye kuenda vofeka yaye.”
16 “Kuenje nda ovo va likapelako muẽle oku lilongisa onjila yomanu vange loku lisinga vonduko yange, poku popia vati: ‘Ndeci Yehova a kasi lomuenyo!’ ndeci va longisa omanu vange oku lisinga ku Baale, ovo va ka tunga pokati komanu vange.
17 Pole, nda ovo va likala oku pokola, ame ndi ka tukũlavo ofeka yaco, ndi yi tukũla loku yi nyõla,” oco Yehova a popia.+
