Yehosua 9:1-27
9 Eci olosoma viosi vina via kala konele yutakelo wo Yordão+ via yeva ovina via pita, vina via kala kovaimbo a kasi kolomunda, ko Sefela, kolohulo viosi Viokalunga Kanene*+ kuenda kovaso yo Levanone okuti va Hiti, va Amori, va Kanana, va Perisi, va Hivi kuenda va Yevusi,+
2 va liongolola oco va linge uyaki la Yehosua kuenda Isareli.+
3 Olonungi vio Giveone+ via yevavo ovina Yehosua a linga lo Yeriko+ kuenda lo Hai.+
4 Omo liaco, ovo va lekisa atutu kuenda va kapa okulia volonjeke via kuka loku vi kapa kovimbulu viavo kuenda volonjeke viovipa via kuka viovinyu vina via tuika haivio via kapiwa alamendo;
5 ovo va walelevo olohaku via pua haivio via kapiwa alamendo kuenda va walele ovowalo a toka toka. Olombolo viosi ovo vambatele via kukuta kuenda via linga olosĩsĩ.
6 Noke ovo va enda toke ku Yehosua vocilombo ko Giligali+ kuenje va vangula laye kuenda lalume va Isareli vati: “Tua tunda kofeka yimue ocipãla. Cilo, linga letu ocisila cimue.”
7 Pole, alume va Isareli va sapuila va Hivi vati:+ “Pamue ene vu kasi ocipepi letu. Omo liaco, tu linga ndati ocisila cimue lene?”+
8 Ovo va kumbulula Yehosua vati: “Etu tuakuenje* vove.”
Noke Yehosua wa va sapuila hati: “Ene velie kuenda pi wa tundi?”
9 Kuenje vo tambulula vati: “Akuenje vove va tunda kofeka+ yimue ocipãla calua omo lionduko ya Yehova Suku yene, momo tua yeva eci catiamẽla koluhimo luaye kuenda ovina viosi a linga Kegito+
10 kuenda ovina viosi a linga kolosoma vivali via va Amori vina via kala konele yikuavo* yo Yordão, Soma Sihoni+ wo ko Hesibone kuenda Soma Oge+ wo ko Basiane, una wa kala ko Asitarote.
11 Omo liaco, akulu vetu kuenda olonungi viosi vio kofeka yetu va tu sapuila vati: ‘Pongiyi okulia oco vu lingi ungende kuenda ka lisangi lavo. Va sapuili hoti: “Tu linga akuenje vene;+ cilo, lingi ocisila cimue letu.”’+
12 Eci tuambata ombolo eyi oco yi linge okulia kuetu, handi ya tokotele keteke etu tua tunda kolonjo vietu oku iya kulo kokuene. Cilo, ene vu pondola oku mola okuti ya kukuta kuenda ya linga olosisi.+
13 Kuenje olonjeke evi viovipa, via kala viokaliye eci tua vi yukisa, pole, kaliye via tuika.+ Ovowalo etu lolohaku vietu via pua omo liungende walua tua linga.”
14 Omo liovina va lombolola, alume va Isareli va tikula onepa yimue yokulia kuavo oco va yi kũlĩhĩse, pole, ka va pulisile Yehova.+
15 Kuenje Yehosua wa linga ombembua lavo+ kuenda wa linga ocisila cimue lavo, oco va kale lomuenyo kuenda asongui vomanu* va lisila oku tẽlisa ondaka yavo.+
16 Noke lioku pita oloneke vitatu, tunde eci va linga ocisila caco, va yeva okuti ovo va kala ocipepi lavo kuenda va lisunguile.
17 Noke va Isareli va enda kuenda va pitĩla valupale avo keteke liatatu; alupale avo a kala o Giveone,+ o Kefira, o Berote kuenda o Kiriyata-Yeari.+
18 Pole, va Isareli ka va va katukilile, momo asongui vomanu va lingile ocisila lavo kovaso a Yehova+ Suku ya Isareli. Omo liaco, omanu vosi va fetika oku lisiõsuĩla asongui.
19 Kuenje asongui va sapuila omanu vosi vati: “Omo okuti tua linga lavo ocisila cimue vonduko ya Yehova Suku ya Isareli, ka tu pondola oku linga cimue civĩ kokuavo.
20 Eci oco tu linga: Tu va ecelela oku kala lomuenyo oco onyeño ya Suku ka yi ka tu wengukile omo liocisila tua lisila lavo.”+
21 Handi vali, asongui vamisako vati: “Va kale lomuenyo, pole, va eceleli okuti, va linga vakuakutiaña olohũi kuenda vakuakutapa ovava vomanu vosi.” Eci oco asongui va likuminya kokuavo.
22 Yehosua wa va kovonga kuenje wa popia lavo hati: “Momo lie wa tu kembeli loku popia hati: ‘Tua tunda kocitumãlo cimue ocipãla lene,’ osimbu okuti wa tungi pokati ketu?+
23 Oku upisa etaili, ene vu siñaliwi+ kuenda vu linga apika otembo ka yi pui poku linga upange woku tiaña olohũi kuenda oku tapa ovava o vonjo ya Suku yange.”
24 Ovo va tambulula Yehosua vati: “Tua ci lingila omo okuti, akuenje vove va va sapuila okuti, Yehova Suku yene wa handelekele Mose ukuenje waye oco a ece kokuene ofeka yosi kuenda oku kundula olonungi viosi vi kasi kovaso yene.+ Omo liaco, tua kuata usumba lovimuenyo vietu omo liene+ kuenje eli olio esunga lieci tua ci lingila.+
25 Kaliye, tu kasi povaka ove. Linga letu eci ciwa haico ca sunguluka kokuove.”
26 Eci oco a linga lavo; eye wa va popela povaka a va Isareli kuenda ovo ka va va pondele.
27 Pole, keteke liaco, Yehosua wa va lingisa vakuakutiaña olohũi, vakuakutapa ovava vomanu vosi+ kuenda ovava o kutala wa Yehova kocitumãlo Eye a ponduile oku nõla+ kuenje vamamako oku ci linga toke etaili.+
Atosi Pombuelo
^ Okuti, o Mediterraneo.
^ Ale “apika.”
^ Okuti, konele yutundilo.
^ Lit., “vohongele.”
