Yehosua 10:1-43
10 Eci soma Adonisedeke wo ko Yerusalãi a yeva okuti, Yehosua wa yula o Hai kuenda wa yi kundula poku linga lo Hai losoma yaco+ ndeci a linga lo Yeriko losoma yaco+ kuenda ndomo olonungi vio ko Giveone via linga ombembua lo Isareli+ loku amamako oku kala pokati kavo,
2 eye wa kuata usumba walua+ momo o Giveone ya kala olupale lumue lunene ndeci lumue pokati kalupale anene a vialiwa losoma yimue. Lua kala olupale lumue lunene okuti, o Hai+ yi sule kuenda alume vosi va kala asualali.
3 Omo liaco, Adonisedeke soma yo Yerusalãi wa tuma esapulo ku Hohama soma yo Hevirone,+ ku Pirama soma yo Yarimuti, ku Yafiya soma yo Lakisi kuenda ku Deviri soma yo Egilone liokuti:+
4 “Enjui oco vu ndi kuatisi kuenda tu katukili o Giveone, momo ya linga ombembua la Yehosua kuenda va Isareli.”+
5 Kuenje olosoma viaco vitãlo via va Amori+ okuti, soma yo Yerusalãi, soma yo Hevirone, soma yo Yarimuti, soma yo Lakisi kuenda soma yo Egilone, via liongoluila pamosi kumue lolohoka viavo kuenje va enda oco va linge uyaki lo Giveone kuenda va yi ñuala ocingonja.
6 Noke alume vo ko Giveone va tuma esapulo ku Yehosua vocilombo co Giligali vati:+ “Ku ka yanduluke* apika vove.+ Enju lonjanga! Tu popele loku tu kuatisa! Olosoma viosi via va Amori vina via tunga kovaimbo a kasi kolomunda, via likongela oco vi liyake letu.”
7 Kuenje Yehosua wa tunda ko Giligali kumue lalume vosi vakuavita kuenda olohoka via pama.+
8 Yehova wa sapuila Yehosua hati: “Ku ka va kuatele usumba,+ momo nda va eca peka liove.+ Lomue pokati kavo o ka tẽla oku tamalãla love.”+
9 Yehosua wa va katukila ocipikipiki noke yoku linga ungende vokuenda kuteke wosi, eci a tunda ko Giligali.
10 Yehova wa va kapa vombuanja kuenje Isareli+ wa fetika oku va katukila poku va nenela ekundu limue linene vo Giveone kuenda wa va landula vonjila yi lamanela ko Bete-Horone kuenje wa va pondela volonjila viosi toke ko Aseka kuenda ko Makeda.
11 Osimbu ovo va kala oku tila Isareli kuenda va kala vociloka co Bete-Horone, Yehova wa va lowila ovawe anene ociwe oku upisa kilu toke ko Aseka kuenje ovo va kunduiwa. Omo liaco, valua va fa omo liociwe okuti, ava va fa losipata ya va Isareli ci sule.
12 Eteke Yehova a kundula va Amori kovaso a va Isareli, Yehosua wa popia la Yehova kovaso a Isareli hati:
“Ekumbi, talama+ kilu lio Giveone,+Kuenda asãi, talama Vocimbota* co Ayalone!”
13 Kuenje ekumbi lia talama kuenda osãi ka ya lisengele toke eci ofeka ya tẽla oku fetuluinya ovanyãli vavo. Ovina evi ka via sonehiwile hẽ velivulu lia Yasiare?+ Ekumbi lia talama vokati kilu kuenda ka lia yayuileko oku iñila vokuenda kueteke liosi.
14 Ka kua la kala eteke limue lia lisoka ndeli ndaño kosimbu ndaño koloneke via kuamamo, eci Yehova a yevelela ondaka yulume umue,+ momo Yehova wa kala oku yakelako Isareli.+
15 Noke liovina viaco, Yehosua kumue lo Isareli yosi va tiukila kocilombo ko Giligali.+
16 Vepuluvi liaco, olosoma vitãlo via tila kuenda via salama veleva lio ko Makeda.+
17 Noke Yehosua vo sapuila hati: “Olosoma vitãlo va vi sanga okuti, via salama veleva ko Makeda.”+
18 Kuenje Yehosua wa popia hati: “Tiñuluili ovawe anene puvelo weleva kuenda nõli alume oco va va lave.
19 Pole, vakuavo pokati kene ka va ka talame, landuli ovanyãli vene kuenda va katukili.+ Ko ka va eceleli okuti, va iñila valupale avo, momo Yehova Suku yene wa va eca povaka ene.”
20 Yehosua kuenda va Isareli va kokela ekundu limue linene kokuavo toke eci va puako okuti, pa supa lika vana va puluka kuenje va iñila valupale a kuete oviteyuilo,
21 alume vosi va tiukila ciwa ku Yehosua leyulo vocilombo co ko Makeda. Laumue ulume wa tẽla oku popia ondaka* yimue yĩvi ku va Isareli.
22 Noke Yehosua wa popia hati: “Yikuli uvelo weleva kuenda neni kokuange olosoma vitãlo vi kasimo.”
23 Kuenje ovo va nena kokuaye olosoma vitãlo via kala veleva okuti: soma yo Yerusalãi, soma yo Hevirone, soma yo Yarimuti, soma yo Lakisi kuenda soma yo Egilone.+
24 Eci ovo va nena olosoma viaco ku Yehosua, eye wa kovonga alume vosi va Isareli kuenje wa sapuila va kesongo kalume vakuavita vana va endele laye hati: “Ameli kulo. Kapi olomãhi viene konyima yolosingo violosoma evi.” Omo liaco, ovo vamako kuenje va kapa olomãhi viavo konyima yolosingo viavo.+
25 Noke Yehosua wa va sapuila hati: “Ko ka kuati usumba ale oku yokoka.+ Kuati utõi kuenda pami, momo eci oco Yehova a ka linga kovanyãli vene vosi vana ene vu kasi oku liyaka lavo.”+
26 Kuenje Yehosua wa va katukila loku va ponda kuenda wa va pateka koviti vitãlo kuenje vamamako oku patekiwa koviti viaco toke koñolosi.
27 Koku iñila kuekumbi Yehosua wa handeleka okuti, ovo vopiwa koviti+ kuenje va imbiwa veleva muna ovo va salamele. Noke ovawe anene a kapiwa puvelo weleva kuenda oko a kasi toke etaili.
28 Yehosua wa tambula o Makeda+ keteke liaco kuenda wa yi kundula losipata. Eye wa kundula osoma yaco kuenda vosi va kalamo, ka supisilemo omunu laumue.+ Eye wa linga losoma yo Makeda+ ndeci a lingile losoma yo Yeriko.
29 Noke Yehosua kumue lo Isareli yosi va tunda ko Makeda kuenda va enda ko Livina kuenje va liyaka lo Livina.+
30 Yehova wa ecavo olupale luaco kuenda osoma yaco+ peka lio Isareli kuenje ovo va yi kundula kuenda va kundulavo vosi va kalamo losipata, ka va supisilepo omunu laumue. Ovo va linga losoma yaco ndeci va linga losoma yo Yeriko.+
31 Noke Yehosua kumue lo Isareli yosi va tunda ko Livina kuenda va enda ko Lakisi+ kuenje omo va tungila ocilombo kuenda va yaka layo.
32 Yehova wa eca o Lakisi peka lio Isareli kuenje ovo va yi tambula keteke liavali. Ovo va yi kundula kuenda va kundulavo vosi va kalamo losipata,+ ndeci va linga lo Livina.
33 Kuenje Horama soma yo Gesere+ wa enda oku ka kuatisa o Lakisi, pole, Yehosua wo kundula kuenda wa kundulavo omanu va Horama toke eci ka pa supile vali omunu laumue.
34 Noke Yehosua kumue lo Isareli yosi, va tunda ko Lakisi kuenda va enda ko Egilone+ kuenje omo va tungila ocilombo kuenda va yaka layo.
35 Ovo va yi tambula keteke liaco kuenda va yi kundula losipata. Ovo va kundula vosi va kalamo keteke liaco, ndeci va linga lo Lakisi.+
36 Kuenje Yehosua kumue lo Isareli yosi va tunda ko Egilone kuenda va enda ko Hevirone+ kuenje va yaka layo.
37 Ovo va yi tambula kuenda va yi kundula losipata, ci kaile olosoma viaco, alupale aco kuenda vosi va kalamo okuti, ka pa supile vali omunu laumue. Ndeci a linga lo Egilone, eye wa yi kundula kuenda wa kundulavo vosi va kalamo.
38 Oku sulako, Yehosua kumue lo Isareli yosi va enda ko Deviri+ kuenje va yaka layo.
39 Eye wa yi tambula kumue losoma yaco kuenda ovaimbo aco osi kuenje wa yi kundula losipata kuenda wa kundulavo vosi va kalamo okuti,+ ka pa supile vali omunu laumue.+ Eye wa linga lo Deviri kuenda losoma yaco ndeci a linga lo Hevirone kuenda lo Livina kumue losoma yaco.
40 Yehosua wa yula ofeka yosi yovaimbo a kasi kolomunda ndeci, o Negeve, o Sefela+ kuenda oviwulu kumue lolosoma vialio viosi okuti, ka supisilepo laumue; eye wa kundula ovina viosi vi fuima+ ndeci Yehova Suku ya Isareli a handelekele.+
41 Yehosua wa va yula oku upisa ko Kadesi-Barnea+ toke ko Gasa+ kuenda kofeka yosi yo Gosene+ toke ko Giveone.+
42 Yehosua wa tambula olosoma viaco viosi kuenda ofeka yavo vonjanja yimuamue, momo Yehova Suku ya Isareli eye wa kala oku yakelako o Isareli.+
43 Noke Yehosua wa tiukila kumue lo Isareli yosi kocilombo ko Giligali.+
Atosi Pombuelo
^ Lit., “ku ka ecelele eka liove oku leñela.”
^ Ale “Vetapi Lia Vomba.”
^ Lit., “wa lepika elimi liaye.”
