Ukundi 7:1-29
7 Onduko yiwa* ya velapo okuti, ulela uwa u sule+ kuenda eteke lioku fa, lia velapo okuti, eteke lioku citiwa li sule.
2 Ca velapo oku enda konjo yonambi okuti, konjo yocipito ci sule,+ momo olofa esulilo liomanu vosi kuenda ava va kasi lomuenyo va ci kape kutima.
3 Ca velapo esumuo okuti, oku yola ci sule,+ momo ocipala ca sumua ci sanjuisa utima.+
4 Utima wukualondunge u kasi konjo yonambi, pole, utima weveke u kasi konjo yonjolela.*+
5 Ca velapo oku yevelela epindiso liukualondunge+ okuti, oku yevelela ocisungo caveke ci sule.
6 Momo ndeci ci kasi oku yuela kuolosongo vi kasi oku pia vemẽhi liombia, haico ci kasi oku yola kueveke;+ kuenje eci lacovo esanda.
7 Pole, oku kangisiwa ku pondola oku kokela ukualondunge oku kala eyui kuenda ovitukiko vi yapuisa utima.+
8 Esulilo liocina cimue lia velapo okuti, efetikilo liaco li sule. Ca velapo oku kala ukuepandi okuti, oku kala ukuepela ci sule.+
9 Ku ka teme lonjanga,* momo oku tema+ kua tunga volonũlo viaveke.*+
10 Ku ka pule hati: “Momo lie oloneke viosiahũlu via velelepo okuti, oloneke vilo vi sule?” Momo halondungeko vi ku vetiya oku ci pula.+
11 Olondunge vi kuamiwa locipiñalo, ocina cimue ciwa kuenda vi kuete esilivilo kuava va kasi lomuenyo.*
12 Olondunge vi teyuila+ ndeci olombongo vi teyuila,+ pole, esilivilo liukũlĩhĩso lieli: Olondunge vi teyuila omuenyo wa una o vi kuete.+
13 Sokolola upange wa Suku yocili, momo helie o tẽla oku pengulula eci eye a lulika okuti ca penga?+
14 Keteke limue liwa, lekisa uwa wove,+ pole, keteke liohali ivaluka okuti, Suku wa panga umue ndeci a panga ukuavo,+ omo liaco, omanu ka va pondola oku kũlĩha* eci ci ka pita lavo kovaso yoloneke.+
15 Vokuenda kuomuenyo wange wesanda,+ nda mola ovina viosi oku upisa kukuesunga una o fila vesunga liaye+ toke kondingaĩvi yi kala komuenyo otembo yalua ndaño levĩho liaye.+
16 Ku ka kaile enene ukuesunga,+ ndaño oku kala calua ukualondunge.+ Momo lie o likokelela ove muẽle enyõleho?+
17 Ku ka kaile calua ongangala, ndaño oku kala eveke.+ Momo lie o fila osimbu otembo yove ka ya pitĩlile?+
18 Ca velapo oku kapako elungulo limue okuti, ku yuvula elungulo likuavo;+ momo una wa sumbila Suku o ka kapako alungulo aco osi.
19 Olondunge vi lingisa okuti omunu ukualondunge o kuata vali unene okuti, alume ekũi va pama va lava olupale lumue va sule.+
20 Momo ka kuli omunu laumue ukuesunga kilu lieve okuti, o linga ovina viwa otembo yosi kuenje lalimue eteke a linga ekandu.+
21 Handi vali, ku ka kape vutima olondaka viosi omanu va vangula;+ sanga o ka yeva ukuenje wove okuti, o kasi oku ku popia lãvi;*
22 momo ove wa kũlĩha ciwa vutima wove okuti olonjanja vialua wa siatavo oku popia lãvi vakuene.+
23 Ovina evi viosi ame nda vi seteka lolondunge kuenje nda popia siti: “Ndi ka linga ukualondunge.” Pole, sia kuatele epondolo liaco.
24 Ovina via pita ale, vi kasi kupãla kuenda via longa calua. Helie o pondola oku kuata elomboloko liavio?+
25 Nda nõlapo oku kũlĩha loku kũlĩhĩsa kuenda oku sandiliya olondunge kumue lesunga li kasi konyima yovina oco ndi kuate elomboloko lievĩho liuveke kuenda uveke wuyui.+
26 Noke nda limbuka eci: Ukãi una o kasi ndowanda woku yeva, o lula vali okuti olofa vi sule, una okuti, utima waye u sokisiwa lawanda kuenda ovaka aye a sokisiwa lalienge. Una o sanjuisa Suku yocili o ka puluka kukãi waco,+ pole, ukuakandu o kuatiwa laye.+
27 “Tala, eci nda limbuka ceci,” oco ukundi a popia.+ “Nda konomuisa ocina cimue noke liocina cikuavo, oco ndi sange elomboluilo,
28 pole, ocina ndamamako oku sandiliya sia ci sangele. Nda sanga ulume umosi* pokati keci ci soka ohulukãi, pole, sia sangelepo ukãi laumue.
29 Eci oco lika nda limbuka: Suku yocili wa panga omanu lonjila yimue ya suñama,+ pole, ovo va kuama asokiyo avo muẽle.”+
Atosi Pombuelo
^ Ale “Oluhimo luwa.” Lit., “Onduko.”
^ Ale “yolomapalo.”
^ Ale pamue, “ondimbukiso yeveke.”
^ Lit., “ku ka teme lonjanga vespiritu liove.”
^ Okuti, ku vana va mola ocinyi cekumbi.
^ Ale “oku limbuka.”
^ Lit., “oku ku siñala.”
^ Ale “ulume wa suñama.”
