Olosapo 26:1-28
26 Ndeci ocikokoto kotembo yondombo kuenda ombela kotembo yoku ungula,Esumbilo ka li sesamẽla keveke.+
2 Ndeci ongungu yi kuete esunga lioku tila kuenda omapia yi kuete esunga lioku palãla,Haico ci kasi okuti, esiñalo ka liya ño okuti ka li kuata esunga limue.*
3 Osikote yi kasilili okavalu kuenda olelia yi kasilili ocimbulu,+Kuenje ombueti oyo yoku veta onyima yomunu eveke.+
4 Ku ka tambulule eveke ndomo ci likuata luveke waye,Oco ku ka lisoke laye.
5 Tambulula eveke ndomo ci likuata luveke waye,Oco ka ka sime okuti, eye ukualondunge.+
6 Ndeci omunu a li lemẽha komãhi oco a linge ocilema,*Haico ci kasi omunu o kundika ovina viaye keveke.
7 Ndeci ovolu a hongua* vocilema,Haico ci kasi olusapo vomẽla waveke.+
8 Ndeci oku kutila ewe kepipili,Haico ci kasi oku eca esumbilo komunu eveke.+
9 Ndocikũla cimue colosongo peka lioholua,Haico ci kasi olusapo vomẽla waveke.
10 Ndeci ukualohonji a lemẽha vosi,Haico ci kasi una o pañinya eveke ale vana va kasi oku pita onjila.
11 Ndeci ci kasi ombua yi tiukila vali kolosanjo viayo,Eveke li pitulula uveke waye.+
12 Wa muile ale omunu umue o sima okuti, eye ukualondunge?+
Kuli vali elavoko keveke okuti, kokuaye ci sule.
13 Ukuawesi o popia hati: “Vetapalo muli ohosi yimue yumalẽhe,Muli ohosi yimue vokololo!”+
14 Ndeci epito li ñuala ñuala kolondevaliso vialio,Haico ci kasi ukuawesi una amamako pula waye.+
15 Ukuawesi o kapa eka liaye vetiyela,Pole, eye o kava calua poku kapa vali eka liaco komẽla waye.+
16 Ukuawesi o sima okuti, eye wa velapo vali kolondungeOkuti omanu epanduvali va eca etambululo liolondunge va sule.
17 Ndeci ci kasi omunu umue o kuata katũi ombua yimue,Haico ci kasi omunu o pita onjila kuenje o tema* omo liema limue okuti, haliayeko.+
18 Ndeci ci kasi eyui limba ovimãleho viuyaki via taima kuenda ovisongo vi ponda,
19 Haico ci kasi omunu o kemba omunu a lisungue laye kuenje o popia hati: “Nda kala ño oku papala!”+
20 Apa ka pali olohũi ondalu yima,Kuenda apa ka pali ukualundi ema li imũha.+
21 Ndeci ci kasi akala volutukuta kuenda olohũi vondalu,Haico ci kasi omunu onjaki o sosuiya ema.+
22 Olondaka viukualundi vi kasi ndovilia vi pepa;*Ovio vi iniwa lulelu kuenda vi enda toke vimo.+
23 Ndeci ci kasi opalata ya lañiwa kocimuanyuila cimue conata,Haico ci kasi olondaka viocisola vi tunda vomẽla womunu o kuete utima ũvi.+
24 Wosi o suvuka vakuavo, o viaviaya esuvu liaco lomẽla waye,Pole, eye o soleka elimbi vutima waye.
25 Ndaño okuti eye o vangula lumbombe, ku ka kolele kokuaye,Momo vutima waye muli ovisimĩlo epanduvali vĩvi.*
26 Ndaño okuti esuvu liaye lia selekiwa lelimbi,Ũvi waye u ka situluiwa kovaso yomanu.
27 Wosi o fẽla ocitunu o ka kupukilamo,Kuenda wosi o tiñulula ewe limue, olio li ka tiukila kokuaye loku u lundika.+
28 Elimi liuhembi li suvuka vana va talisiwa lalio ohali,
Kuenda omẽla wesanda u koka enyõleho.+
Atosi Pombuelo
^ Ale pamue, “Haico ci kasi okuti, esiñalo omunu ka sesamẽla, ka li tẽlisiwa.”
^ Lit., “o nyua ungangala.”
^ Ale, “a seluka.”
^ Ale pamue, “o litenga.”
^ Ale “ndovina vi iniwa lonjongole yalua.”
^ Ale “Momo utima waye wa suvukiwa calua.”
