Esekiele 36:1-38
36 “Catiamẽla kokuove a mõlomunu, imba owanji watiamẽla kolomunda vio Isareli kuenda popia hoti: ‘Alomunda vio Isareli, yeveleli ondaka ya Yehova.
2 Ca popia Ñala Tõlo Yehova ceci hati: “Unyãli wa popia eci catiamẽla kokuene hati: ‘Ndaño muẽle ovitumãlo via lepa vio kosimbu, via linga ocipiñalo cetu!’”’+
3 “Omo liaco, imba owanji kuenda popia hoti: ‘Ca popia Ñala Tõlo Yehova ceci hati: “Omo okuti vo kunduli kuenda vo katukili kolonele viosi, oco vu kali ocipiñalo cava va puluka* pokati kolofeka kuenda omanu va kasi oku amamako oku popia catiamẽla kokuene loku vu lundili,+
4 omo liaco, Alomunda vio Isareli, yeveleli ondaka ya Ñala Tõlo Yehova! Eci oco ca popia Ñala Tõlo Yehova kolomunda, koviwulu, kolondui, kovimbota, kovingululu via linga alunda+ kuenda kalupale a siala upolokoso ana a pundiwa ao a sepuiwa la vana va supapo kolofeka vi lisungue lavo;+
5 kokuavo Ñala Tõlo Yehova wa popia hati: ‘Vonyeño yange yalua,+ ndi ka pisa ovisupe violofeka kuenda oku katukila o Edome yosi vana okuti, lesanju lialua kuenda lepembulo+ va popia okuti ofeka yange ocipiñalo cavo, oco va tambule ovisenge vioku lisila oviunda kuenda oku vi punda.’”’+
6 “Omo liaco, imba owanji watiamẽla kofeka yo Isareli kuenda sapuila olomunda, oviwulu, olondui kuenda ovimbota hati: ‘Ca popia Ñala Tõlo Yehova ceci hati: “Tala! Ndi ka vanguila vonyeño yange yalua, momo wa kutisiwi osõi lolofeka.”’+
7 “Kuenje ca popia Ñala Tõlo Yehova ceci hati: ‘Ndi votola eka liange loku lisinga okuti, olofeka vi lisungue vi ka kutisiwa osõi yavio muẽle.+
8 Pole, ene Alomunda vio Isareli, vu ka yova ovianja kuenda vu ka ima apako omanu vange va Isareli,+ momo ovo ndopo va ka tiuka.
9 Momo ame ñasi lene kuenda ndi ka tiamisila utima wange kokuene kuenje vu ka limiwa loku wayiwa ombuto.
10 Ndi ka luisa omanu vene, onjo yosi ya Isareli okuti, vosi yayo kuenje alupale a ka tungiwa+ kuenda ovingululu vi ka tumbuluiwa.+
11 Ocili muẽle, ndi ka luisa omanu vene loviunda viene;+ kuenje vi ka livokiya kuenda vi ka lua. Kuenje ndi ka ecelela okuti ene vu ka tungiwa ndeci wa kaili kosimbu+ kuenda ndi ka lingisa okuti vu livokiya vali okuti kosimbu ci sule;+ kuenje ene vu ka kũlĩha okuti, ame ndi Yehova.+
12 Ndi ka ecelela okuti omanu, omanu vange va Isareli, va tunga kilu liene kuenda va ka tambula ocipiñalo cene.+ Ene vu ka kala ocipiñalo cavo kuenda ene lalimue eteke vu ka va sia vali okuti ka va kuata omãla.’”+
13 “Ca popia Ñala Tõlo Yehova ceci hati: ‘Omo okuti ovo va kasi oku vu sapuili vati: “Ene vufeka yimue yi lia omanu kuenda vu sia olofeka okuti ka mu kala omãla,”’
14 ‘omo liaco, ene ka vu ka lia vali omanu ale oku sia olofeka okuti ka mu kala omãla,’ oco Ñala Tõlo Yehova a popia.
15 ‘Si ka ecelela vali okuti vu popiwa lavĩ lolofeka ale oku vu sepuli pokati komanu+ kuenje ene ka vu ka kokela vali olofeka ocilondokua,’ oco Ñala Tõlo Yehova a popia.”
16 Kuenje ondaka ya Yehova yeya vali kokuange yiti:
17 “A mõlomunu, eci onjo ya Isareli ya kala oku tungiwa vofeka yavo, ovo va yi vĩhisa lolonjila viavo kuenda lovilinga viavo.+ Olonjila viavo kokuange via kala ndevĩho lioloneke viocituwa.+
18 Omo liaco, nda sukumuĩla onyeño yange kokuavo omo liosonde ovo va pesela vofeka+ kuenda omo lioku lingisa okuti, ofeka yi vĩha loviteka viavo via vĩha.*+
19 Omo liaco, nda va sanduila pokati kolofeka kuenda nda va sanduila pokati kovaimbo.+ Nda va sombisa ndomo ci likuata lolonjila viavo kuenda lovilinga viavo.
20 Pole, eci ovo va pitĩla kolofeka viaco, omanu va vĩhisa onduko yange+ poku popia vati: ‘Ava omanu va Yehova, pole, ovo va sukilile oku tunda vofeka yaye.’
21 Omo liaco, ndi ka lekisa ndomo nda kapako onduko yange yi kola, yina onjo ya Isareli ya vĩhisa pokati kolofeka kuna ovo va enda.”+
22 “Omo liaco, sapuila onjo ya Isareli hati: ‘Ca popia Ñala Tõlo Yehova ceci hati: “Si kasi oku linga ovina evi omo liene, Anjo ya Isareli, pole, ñasi oku ci lingila omo lionduko yange yi kola yina ene wa sepuli pokati kolofeka kuna wa endi.”’+
23 ‘Ame ndi ka sivaya muẽle onduko yange yinene+ yina ya sepuiwa pokati kolofeka, yina ene wa sepuli pokati kavio; kuenje olofeka vi ka kũlĩha okuti, ame ndi Yehova,’+ oco Ñala Tõlo Yehova a popia, ‘eci ame ndi ka sivayiwa pokati kene kovaso avo.
24 Ndi ka vupi pokati kolofeka loku vu ongololi vali pokati kolofeka viosi kuenda oku vu neni vofeka yene.+
25 Ndi ka vu nyĩli ovava a yela kuenda ene vu ka yela;+ ndi ka vu yelisi kevĩho liene liosi+ kuenda koviteka viene viosi via vĩha.+
26 Ndi ka eca kokuene utima wokaliye+ kuenda ame ndi ka kapa vokuene espiritu liokaliye.+ Kuenje ndi kopa vatimba ene utima wewe+ kuenda ndi ka eca kokuene utima wositu.*
27 Ndi ka kapa espiritu liange vokuene kuenda ndi ka ecelela okuti wendeli voviholo viange+ kuenje vu ka kapako loku tẽlisa olonumbi viange.
28 Kuenje ene vu ka tunga vofeka nda ecele ku vakukululu yene kuenda vu ka kala omanu vange kuenje ame ndi ka kala Suku yene.’+
29 “‘Ame ndi ka vu yovoli kevĩho liene liosi kuenda ndi kongolola olomema loku vi lingisa okuti vi lua kuenje si ka nena onjala kokuene.+
30 Ndi ka luisa apako oviti kuenje ovaima ovapia a ka livokiya oco okuti, ene lalimue eteke vu kutisiwa vali osõi omo lionjala pokati kolofeka.+
31 Kuenje ene vu ka ivaluka olonjila viene vievĩho kuenda ovilinga viene ka via sungulukile kuenje vu ka kuata onyanya ene muẽle omo lieko liene kuenda ovilinga viene viumbondo.+
32 Pole, kũlĩhi okuti: Si kasi oku linga ovina viaco mekonda liene,’+ oco Ñala Tõlo Yehova a popia. ‘Handi vali kuati osõi kuenda liketisi omo liolonjila viene, Anjo ya Isareli.’
33 “Ca popia Ñala Tõlo Yehova ceci hati: ‘Keteke ndi vu yelisi keko liene liosi, ndi ka ecelela okuti alupale a tungiwa+ kuenda ovingululu vi tumbuluiwa.+
34 Imbo lina lia siala elunda okuti lia kala elunda komanu vosi va pitamo, li ka limiwa.
35 Kuenje omanu va ka popia vati: “Ofeka ya kala alunda ya linga ndocumbo Cedene+ kuenda alupale a kala ovingululu lalunda ao a nyõlehele, kaliye a pamisiwa kuenda a tungiwa.”+
36 Kuenje olofeka vina via ku ñuali okuti via supapo, vi ka kũlĩha okuti ame muẽle ndi Yehova, ame nda tumbulula eci ca nyõlehele kuenda ame nda kũla vofeka yina ya kala elunda. Ame muẽle ndi Yehova, ame nda ci popia kuenda ame nda ci linga.’+
37 “Ca popia Ñala Tõlo Yehova ceci hati: ‘Ame ndi ka ecelela okuti onjo ya Isareli yi pinga kokuange oku va lingila eci: Ndi ka luisa omanu vavo ndocunda cimue.
38 Ndocunda ca vana va kola, ndocunda co ko Yerusalãi* vokuenda kuovipito vialio,+ alupale ana a kala ovingululu a ka yuka loviunda viomanu;+ kuenje ovo va ka kũlĩha okuti ame ndi Yehova.’”
Atosi Pombuelo
^ Lit., “ocisupe; vana va supapo.”
^ Ondaka yaco kelimi lio Heveru citava okuti, yi tiamisiwila kondaka “aniña” kuenda ya enda oku tukuiwavo ndondaka yoku nyehũla.
^ Okuti, umue wa kapako olonumbi via Suku.
^ Ale pamue, “Ndoviunda violomeme vio ko Yerusalãi via pongiyiwila oku eciwa ndovilumba.”
