Esekiele 20:1-49
20 Kunyamo wepanduvali, kosãi yatãlo, keteke liekũi liosãi yaco, vamue pokati kakulu vo Isareli veya kokuange kuenda va tumãla kovaso yange oco va kũlĩhĩse Yehova.
2 Noke ondaka ya Yehova yeya kokuange yiti:
3 “A mõlomunu, sapela lakulu vo Isareli poku va sapuila hati: ‘Ca popia Ñala Tõlo Yehova ceci hati: “Anga hẽ weyi kokuange oku ndi kũlĩhĩsa? ‘Ndeci ame ndi kasi lomuenyo, si ka tambulula epulilo liene,’+ oco Ñala Tõlo Yehova a popia.”’
4 “Ove hẽ wa lipongiya oco o va pise?* Ove hẽ wa lipongiya oco o va sombise, a mõlomunu? Va kuatisa oku limbuka ovina viumbondo vakukululu yavo va linga.+
5 Va sapuila ndoco: ‘Ca popia Ñala Tõlo Yehova ceci hati: “Keteke nda nõla Isareli okuti,+ ocitumbulukila* conjo ya Yakoba, nda linga lavo ocisila* cimue kuenje nda li situlula ame muẽle kokuavo kofeka Yegito.+ Ocili, nda lisila kokuavo kuenje nda popia siti: ‘Ame ndi Yehova Suku yene.’
6 Keteke liaco, nda lisila okuti, ndi ka vopa kofeka Yegito oku va tuma kofeka yina nda va nõlela, yi tumõha asenjele lowiki.+ Oyo ya kala ofeka yimue ya finile* calua pokati kolofeka viosi.
7 Noke nda va sapuila siti: ‘Omunu lomunu pokati kene o sukila oku inasi ovina viumbondo vina vi kasi kovaso yene; ko ka li vĩhisi loviteka via vĩha* vio Kegito.+ Ame ndi Yehova Suku yene.’+
8 “‘“Pole, ovo va ndi sinĩla kuenda ka va yonguile oku ndi yevelela. Ovo ka va inasile ovina viumbondo via kala kovaso yavo kuenda ka va silepo oviteka via vĩha vio Kegito.+ Omo liaco, nda likuminya okuti, oku tema kuange ku va wengukila kuenda onyeño yange yosi yi va katukila kofeka Yegito.
9 Pole, ame nda ci linga omo lionduko yange oco oyo ka yi ka sepuiwe kovaso yolofeka vina ovo va kala.+ Momo ame nda li situlula kokuavo* kovaso yolofeka viaco, eci nda vopa kofeka Yegito.+
10 Omo liaco, nda vopa kofeka Yegito kuenda nda va songuila vekalasoko.+
11 “‘“Noke nda va ĩha oviholo viange kuenda nda ecelela okuti va kũlĩha ovisila viange oco okuti,+ omunu wosi o vi kuama o kuata omuenyo omo liovina viaco.+
12 Nda ecavo kokuavo asambata ange+ ndondimbukiso pokati kange lavo,+ oco va kũlĩhe okuti ame ndi Yehova, ame una o va kolisa.
13 “‘“Pole, onjo ya Isareli ya ndi sinĩla vekalasoko.+ Ovo ka va endelele voviholo viange kuenda va likala ovisila viange vina okuti, nda omunu o vi kuama o kala lomuenyo omo liavio. Ovo va sepula asambata ange osi. Omo liaco, nda likuminya okuti onyeño yange yi va wengukila vekalasoko, oco va nyõliwe.+
14 Ame nda ci linga omo lionduko yange muẽle, oco oyo ka yi ka sepuiwe kovaso yolofeka vina via mola ndomo nda va* yovola.+
15 Nda linga lavo ocisila vekalasoko okuti, si ka va tuala vofeka nda ecele kokuavo+ okuti, ofeka yi tumõha asenjele lowiki,+ haiyo ofeka ya finile calua* pokati kolofeka viosi,
16 momo va likala ovisila viange, ovo ka va endelele voviholo viange kuenda va sepula asambata ange, momo ovitima viavo via kuama oviteka viavo via vĩha.+
17 “‘“Pole, nda* va kuatela ohenda kuenda sia va kunduile; sia va nyõlele vekalasoko.
18 Ame nda sapuila omãla vavo vekalasoko+ siti: ‘Ko ka endeli voviholo via vakukululu yene+ ale oku pokola kasombiso avo pamue oku li vĩhisa ene muẽle loviteka viavo via vĩha.
19 Ame ndi Yehova Suku yene. Endeli voviholo viange loku kakatela kovisila viange kuenda oku vi kapako.+
20 Kuenje kolisi asambata ange+ kuenda a ka linga ndondimbukiso pokati kange lene oco vu kũlĩhi okuti, ame ndi Yehova Suku yene.’+
21 “‘“Pole, omãla va fetika oku ndi sinĩla.+ Ovo ka va endelele voviholo viange kuenda ka va vi pokuile ale oku kapako ovisila viange vina okuti, nda omunu o vi kuama o kala lomuenyo omo liavio. Va sepula asambata ange. Omo liaco, nda likuminya okuti oku tema kuange ku va wengukila kuenda onyeño yange yosi yi va katukila vekalasoko.+
22 Pole, nda likandangiya+ kuenda nda ci lingila omo lionduko yange+ muẽle oco okuti, ka yi sepuisiwa kovaso yolofeka vina nda va* yovuila.
23 Nda lingavo ocisila lavo vekalasoko muna nda va sanduila pokati kolofeka loku va sanduila pokati kovaimbo,+
24 momo ka va kapeleko ovisila viange kuenda va likala oviholo viange,+ va sepula asambata ange kuenda va kuama* oviteka via vĩha via vakukululu yavo.+
25 Ame nda ecelela okuti va kuama oviholo ka via sungulukile kuenda ovisila vina ka vi va kuatisa oku kuata omuenyo.+
26 Nda ecelela okuti ovo va li vĩhisa lovilumba viavo muẽle, eci ovo va yoka olonuñulu viavo viosi vondalu+ ndocilumba* okuti, va siala upolokoso, oco va kũlĩhe okuti ame ndi Yehova.”’
27 “Omo liaco, A mõlomunu popia lonjo ya Isareli kuenda va sapuila hati: ‘Eci oco Ñala Tõlo Yehova a popia hati: “Lonjila eyi, vakukululu yene va popia kokuange etonãi, poku ndingila ovina ka via sungulukile.
28 Nda va nena vofeka nda lisilile oku eca kokuavo.+ Eci ovo va mola oviwulu viosi via lepa kuenda oviti via pulika,+ va fetika oku eca ovilumba viavo via vĩha. Va eca ovilumba vielemba liwa viovilumba viavo kuenda va pesilako ovilumba viavo vioku nyua.
29 Omo liaco, nda va pula siti: ‘Nye ci lomboloka ocitumãlo eci ca lepa vu kasi oku enda? (Oco ci tukuiwa okuti Ocitumãlo ca Lepa toke etaili.)’”’+
30 “Kaliye sapuila onjo ya Isareli hati: ‘Ñala Tõlo Yehova wa popia hati: “Ene vu kasi hẽ oku li vĩhisa ene muẽle, ndeci vakukululu yene va linga, poku kuama oviteka viavo via vĩha, oco vu lingi lavio upuepue konepa yespiritu?+
31 Ene vu kasi hẽ oku amamako oku li vĩhisa ene muẽle toke etaili poku eca ovilumba koviteka viosi via vĩha, poku yoka omãla vene vondalu ndocilumba?*+ Anga hẽ ndi sukila oku tambulula epulilo liene, Anjo ya Isareli?”’+
“‘Ndeci ame ndi kasi lomuenyo,’ oco Ñala Tõlo Yehova a popia, ‘Si ka tambulula epulilo liene.+
32 Kuenje kũlĩhi vovisimĩlo* viene okuti eci vu popia hati: “Linga tu lingi ndolofeka, ndapata olofeka vikuavo, vina vi fendela* uti kuenda ewe,”+ eci lalimue eteke ci ka pita.’”
33 “‘Ndeci ame ndi kasi lomuenyo,’ oco Ñala Tõlo Yehova a popia, ‘Ndi ka viala ndosoma kokuene leka liange lia pama, lokuoko kuange kuolõha kuenda lonyeño yange ya wenguka.+
34 Ndi ko vupi pokati komanu kuenda ndi kongoluili pamosi pokati kolofeka vina wa sanduiwili leka liange lia pama, lokuokuo kuange kuolõha kuenda lonyeño yange ya wenguka.+
35 Ndi ka vu tuali vekalasoko liomanu kuenda omo ndi ka vu sombisili polo la polo.+
36 “‘Ndeci nda sombisa vakukululu yene vekalasoko liofeka Yegito, haico ndi ka vu sombisi,’ oco Ñala Tõlo Yehova a popia.
37 ‘Ndi ka vu pitisi vemẽhi liohunya+ kuenda vu ka kisikiwa oku* tẽlisa ocisila.
38 Pole, ndi ka tundisa pokati kene vakuesino kuenda vana va ndi lueyela.+ Momo ame ndi ka va tundisa pokati kolofeka viñi, pole, ka va ka iñila vofeka yo Isareli;+ kuenje vu ka kũlĩha okuti, ame ndi Yehova.’
39 “Catiamẽla kokuene, Anjo ya Isareli, Ñala Tõlo Yehova wa popia hati: ‘Omunu lomunu a ende kuenda a fendele oviteka viaye via vĩha.+ Pole, nda ene ka wa njeveli ka vu pondola vali oku sepula onduko yange yi kola lovilumba viene kuenda oviteka viene via vĩha.’+
40 “‘Momo komunda yange yi kola okuti, komunda yimue ya lepa yo Isareli,’+ oco Ñala Tõlo Yehova a popia, ‘oko onjo yosi ya Isareli, okuti vosi yavo va ka ndi vumbila vofeka.+ Oko ndi ka lekisila esanju liange kokuavo kuenda ndi ka pinga olombanjaile viene kuenda apako ene atete a velapo okuti, ovina viene viosi.+
41 Omo lielemba liwa, ame ndi ka vu sanjukili eci ndi ka vupi pokati komanu kuenda oku vu kongeli pokati kolofeka vina ene wa sanduiwili;+ kuenje ndi ka kolisiwa pokati kene kovaso yolofeka.’+
42 “‘Kuenje ene vu ka kũlĩha okuti ame ndi Yehova+ eci ndu tuali vofeka yo Isareli,+ vofeka yina ame nda lisila oku eca ku vakukululu yene.
43 Vofeka yaco, omo vu ka ivalukila ovilinga viene lovituwa viene viosi wa li vĩhisi lavio+ kuenda vu ka kuata onyanya yene muẽle* omo liovina viosi wa lingi.+
44 Noke vu ka kũlĩha okuti, ame ndi Yehova eci ndi ka vu tati omo lionduko yange okuti,+ si ka ci linga ndomo ci likuata lovituwa viene vĩvi ale lovilinga viene viovitukiko, Anjo ya Isareli,’ oco Ñala Tõlo Yehova a popia.”
45 Ondaka ya Yehova yeya vali kokuange yiti:
46 “A mõlomunu, imba ovaso konele yombuelo kuenda imba oluiya kombuelo loku imbila owanji vusenge wo konele yo kombuelo.
47 Sapuila usenge wo kombuelo hati: ‘Yeveleli ondaka ya Yehova. Eci oco Ñala Tõlo Yehova a popia hati: “Ñasi oku tamisa ondalu yimue kokuene kuenda oyo yi ka lia oviti viosi viamẽla a talala kuenda viamẽla a kukuta kokuene.+ Ulienge wondalu yaco, ka u ka imiwa kuenda omanu vosi va ka kakuka lulienge waco,+ oku upisa konele yombuelo toke konele yo konano.
48 Kuenje omanu vosi* va ka limbuka okuti ame muẽle ndi Yehova, ame nda tuma ondalu, oco okuti oyo ka yi ka ima.”’”+
49 Kuenje nda popia siti: “Avoyo we! A Ñala Tõlo Yehova! Ovo va kasi oku popia catiamẽla kokuange vati: ‘Eye ka kasi hẽ oku vangula lika alusapo?’”*
Atosi Pombuelo
^ Ale “oco ku tukuiwe esombiso kokuavo?”
^ Lit., “nda katula eka liange.”
^ Lit., “ombuto.”
^ Ale “ya posokele.”
^ Ondaka yaco kelimi lio Heveru citava okuti, yi tiamisiwila kondaka “aniña” kuenda ya enda oku tukuiwavo ndondaka yoku nyehũla.
^ Okuti, Isareli.
^ Okuti, Isareli.
^ Ale “ya posokele.”
^ Lit., “iso liange.”
^ Okuti, Isareli.
^ Lit., “ovaso avo a kuama ko.”
^ Lit., “oku pitisa vondalu.”
^ Lit., “oku pitisa vondalu.”
^ Lit., “espiritu.”
^ Ale “oku vumba.”
^ Lit., “oku kala vomunga yo.”
^ Lit., “ovipala viene.”
^ Lit., “ositu yosi.”
^ Ale “olondaka vialusapo?”
