VAKUAVISONEHUA LA VA FARISEO poku popia okuti, Yesu ka kasi oku tundisa olondele lunene wa Suku, va kasi oku popia etonãi espiritu sandu. Konele yipi va tiamẽla, ku Suku ale ku Satana? Yesu o popia hati: ‘Ene vumanu nda vu kũla uti umue uwa, wima apako awa, ale nda vu kũla uti umue ũvi, wima apako ãvi, uti waco u limbukiwila kapako ao.’—Mateo 12:33.

Oku sima okuti, Yesu o tundisa lika olondele omo lioku vumba Satana, ci lekisa ekambo liolondunge. Ndomo Yesu a ci lombolola vohundo a lingila komunda, nda okuti epako liwa, uti waco uwavo, ha ũviko. Epako lia va Fariseo okuti, alundi va lingila Yesu li lekisa nye? Li lekisa okuti, ovo apako ãvi. Yesu o va sapuila hati: “Ambuto yolonyõha, vu popia ndati ovina viwa osimbu ene vulondingaĩvi? Eci ci kasi vutima, oco omela u popia.”—Mateo 7:16, 17; 12:34.

Olondaka vietu ovio vi lekisa eci ci kasi vutima wetu, kuenda tu sombisiwa omo liolondaka viaco. Omo liaco, Yesu o popia hati: “Ndu sapuili siti, ondaka yosi yĩvi omunu a vangula, o ka sombisiwa Keteke Liekanga; ove o ka tendiwa ndukuesunga omo liolondaka viove kuenda o ka pisiwa omo liolondaka viove.”—Mateo 12:36, 37.

Ndaño okuti Yesu wa linga ale ovopange alua a komõhisa, pole, vakuavisonehua la va Fariseo vo kisika oco a linge vali ovikomo vikuavo poku u sapuila hati: “Olongisi, tu yongola oku mola ondimbukiso yimue.” Ndaño okuti ovo ka va muĩle ovikomo via Yesu, pole, omanu valua va mola ovina Yesu a linga. Omo liaco, Yesu o sapuila asongui va va Yudea hati: “Ocitumbulukila colondingaĩvi haico vakahokolo ci sandiliya ondimbukiso, pole, ka ku eciwa ondimbukiso layimue, te lika ondimbukiso yuprofeto Yona.”—Mateo 12:38, 39.

Noke Yesu o tukula elomboloko liaco hati: “Ndeci Yona a kala vimo liombisi yinene ovotanya atatu lovoteke atatu, Mõlomunu o ka kala vutima wongongo ovotanya atatu lovoteke atatu.” Yona wa iniwa lombisi yimue yinene, pole, noke wa tundamo kuenje ca kala ndu okuti wa pinduiwa. Yesu o kasi oku lombolola okuti o laika oku fa kuenje o ka pinduka keteke liatatu. Eci ovina viaco vi tẽlisiwa, asongui va va Yudea va likala “ondimbukiso ya Yona,” kuenje ka va tava oku likekembela kuenda oku pongoloka kovituwa. (Mateo 27:63-66; 28:12-15) Pole, “omanu vo ko Ninivei” va likekembela eci Yona a va kundila. Omo liaco, omanu ava va ka pisa ocitumbulukila cilo. Yesu o lombololavo okuti ovilinga via nasoma ya Seva vi ka va pisavo. Eye wa yonguile  oku yevelela olondunge via Salomone kuenje wa komõha calua. Cilo Yesu o popia hati, “palo pali eci ca velapo okuti Salomone o sule.”—Mateo 12:40-42.

Yesu o sokisa ekalo liocitumbulukila eci ca vĩha lulume wa tundisiwa ondele ya vĩha. (Mateo 12:45) Omo okuti ulume waco ka tiamisilile utima kovina viwa, ondele yi tiuka lolondele epanduvali via vĩhapo vali, okuti eyi ya tete yi sule kuenje viñila vetimba liulume. Cimuamue haico okuti, epata lia Isareli lia yelisiwa kuenda lia pongoluiwa ndeci ulume wa tundisiwa ondele. Pole, epata lia Isareli lia likala ovaprofeto va Suku kuenda lia suvuka Yesu, una o kuete espiritu lia Suku. Eci ci lomboloka okuti ekalo liepata eli, lia vĩhapo vali okuti, ekalo liatete li sule.

Osimbu Yesu a kasi oku vangula, inaye kuenda vamanjaye va pitĩla kuenje va kala ocipepi lowiñi. Omanu vamue va tumãla ocipepi laye, vo sapuila hati: “Ina yove la vamanjove va kasi posamua, va yongola oku ku mola.” Kuenje Yesu o lekisa okuti, o kuete vali ukamba lolondonge viaye, vana va kasi nda vamanjaye alume lakãi kuenda va inaye. Oku olõla eka loku ilika olondonge viaye, o popia hati: “Ina yange la vamanjange, vana va yeva ondaka ya Suku kuenje va yi pokola.” (Luka 8:20, 21) Omo liaco, eye o lekisa okuti ndaño ukamba u kasi pokati kepata u kuete esilivilo, pole, ukamba lolondonge viaye, wa velapo vali. Kuenje ci kavuluisa oku kuata ukamba la vamanjetu vekolelo, ca piãla enene eci vamue va tu pembula ale ceci va sepula upange wetu!