OCIPAMA 6
Daviti ka Kuatele Usumba
Nye o linga eci o kuata usumba?— Pamue enda ku ina yove, kuenda ku isiove, oco a ku kuatisevo. Pole, kuli omunu ukuavo o pondola oku ku kuatisa. Eye o kuete unene wa velapo okuti, womanu vakuavo u sule. Ove hẽ, wa kũlĩha omunu waco?— Ocili. Yehova Suku. Tu konomuisi eci catiamẽla kumalẽhe umue Embimbiliya li tukula hati, Daviti. Eye ka kuatele usumba, momo wa kũlĩhĩle okuti, Yehova u kuatisa.
Daviti omo okuti olonjali viaye vio longisa oku sola Yehova tunde vutila, co kuatisa oku yuvula usumba ndaño poku liyaka lovina vi koka ohele. Daviti wa kũlĩhĩle okuti Yehova ekamba liaye, kuenda o pondola oku u kuatisa. Eteke limue eci Daviti a kala oku lisa olomeme, kua molẽha ohosi yimue ya pama, kuenje ya kuata omeme yimue! Ove hẽ, wa kũlĩha eci Daviti a linga? Wa lupukila kohosi yaco kuenje, wa yi ponda lovaka aye! Vepuluvi likuavo, eci okanyani ka kuata omeme, Daviti wa ka pondavo! Helie o sima okuti eye wa kuatisa Daviti?— Yehova eye wo kuatisa.
Kua kalavo eteke limue Daviti a sukilile oku lekisa utõi. Va Isareli va kala oku linga uyaki la va Filisiti. Pokati ka va Filisiti, pa kala esualali limue lia lepele calua, hailio ocindululu! Onduko yaye Goliata. Ocindululu caco ca enda oku yola epembe asualali a va Isareli kuenda Yehova. Goliata wa enda oku laleka asualali a va Isareli oco va liyake laye. Pole, va Isareli vosi va kuatele usumba woku yaka laye. Eci Daviti a yeva ondaka yaco, wa sapuila Goliata hati: ‘Ndi yaka love! Yehova o ndi kuatisa, kuenda ndi ka ku yula!’ Ove hẽ, o sima okuti Daviti wa kala ukuotõi?— Ocili okuti, wa kala ukuotõi. O yongola oku kũlĩha eci ca pita noke?
Daviti wa kuata epipili liaye kuenda ovawe atãlo atito kuenje, wa enda oco a yake locindululu. Eci Goliata a limbuka okuti Daviti wa kala utito, wo yola epembe. Pole, Daviti wo sapuila ndoco: ‘Wiya kokuange losipata, pole, ame ndiya kokuove vonduko ya Yehova!’ Noke, wa kapa ewe vepipili liaye kuenje, wa lupukila ku Goliata loku limba kokuaye. Ewe liaco lia veta Goliata vupolo! Noke, wa kupukila posi, kuenje wa fa! Omo liaco, va Filisiti vosi va tila. Umãlehe Daviti wa tẽla ndati oku yula ocindululu?— Yehova wo kuatisa momo, unene waye wa velapo okuti, wocindululu, u sule!
Daviti ka kuatele usumba, momo wa kũlĩhĩle okuti Yehova u kuatisa
Nye o pondola oku lilongisa kulandu wa Daviti?— Yehova o kuete unene wa velapo okuti womanu u sule. Yehova ekamba liove. Omo liaco, ivaluka okuti, onjanja yosi o yeva usumba, Yehova o pondola oku ku kuatisa oco o kuate utõi!
