Saulu wa linga osoma yatete ya va Isareli. Pole Yehova ko sanjukilile kuenje wa nõla Daviti oco a viale pomangu yaye. Vonepa eyi tu ka lilongisa ovina vialua viatiamẽla ku Daviti. Eci eye a kala umalẽhe wa liyaka la Goliata. Noke wa suvukiwile la Soma Saulu. Avigaile wo kuatisa oku yuvula oku linga eci cĩvi.

Noke tu ka lilongisavo ovina viatiamẽla ku Salomone omõla a Daviti. Salomone weya oku viala va Isareli pomangu ya Daviti. Olosoma vitatu viatete via va Isareli, vosi yavo omunu lomunu wa vialele eci ci soka akũi akuãla kanyamo. Noke yoku fa kua Salomone, ofeka ya Isareli ya tepiwa volosoma vivali. Yimue konano yikuavo kombuelo.

Usoma wo konano wapata ekũi, wa kala eci ci soka 257 kanyamo osimbu handi ka wa nyõliwile la va Asuria. Eci pa pita 133 kanyamo, usoma wo kombuelo wapata avali, lawovo wa nyõliwa. Noke va Isareli va tualiwa kumandekua ko Bavulono. Onepa YAKUÃLA yi lombolola ulandu wotembo yi soka 510 kanyamo watiamẽla kovina via pita kosimbu ndomo tu ka ci mola.