Esapulo 50: Akãi Vavali Vakuotõi
ECI va Isareli va fetika oku kuata ovitangi, veya oku pinga ekuatiso ku Yehova. Yehova wa va tambulula kuenje wa va ĩha asongui vakuavo oco va kuatisiwe. Embimbiliya li tukula asongui vaco hati, olonganji. Yehosua eye wa kala onganji yatete kofeka ya va Isareli. Noke liaye, kueya Otiniyele, Ehudi, kuenda Siamigara. Pole kua kalavo akãi vamue vavali va kuatisa va Isareli. Akãi vaco Devora kuenda Yaele.
Devora wa kala uprofeto. Yehova wa ecele ku Devora alomboluilo amue atiamẽla koviyaneke. Kuenje eye wa lomboluila omanu ovina viosi Yehova o sapuila. Devora wa kalavo onganji. Eye wa enda loku tumãla vemi liuti weva kolomunda. Kuenje omanu valua va enda loku iya kokuaye oku pinga ekuatiso liovitangi viavo.
Kotembo yaco, Yavini eye wa kala soma yo Kanana. Eye wa kuata eci ci soka 900 kakãlu uyaki. Olohoka viaye via pamele calua kuenje vamue va Isareli veya oku linga apika vaye. Kesongo kolohoka via Yavini onduko yaye Sisera.
Eteke limue Devora wa tuma oku vilikiya Baraka onganji. Kuenje wa popia laye hati: Yehova wa popia hati: ‘Kuende komunda ya Tavore. Ambata ekũi liolohũlũkãi kalume. Sisera kuenda olohoka viaye, ndi vieca peka liove.’
Baraka wa popia la Devora hati: ‘Nda ove wenda kumue lame, ngenda.’ Devora wa katuka kuenje wa enda kumue la Baraka pole wa popia laye hati: ‘Ungende o linga ndeti, ka u ku muisa ekẽmalo, momo Yehova oka eca Sisera peka liukãi.’ Kuenje haico ca lingiwa.
Baraka wa tunda Komunda Tavore oku ka lisanga lolohoka via Sisera. Vocipikipiki Yehova wa kundula lovava olohoka viosi via Sisera. Pole Sisera wa puluka lekãlu liaye kuenje wa tila.
Noke Sisera weya vombalaka ya Yaele. Yaele wo laleka kuenje wo nyuisa asenjele. Eci eye a nyua asenjele aco wa fetika oku suñila kuenje wa pekela. Osimbu a kala loku pekela, Yaele wo valela kutue ombambo yombalaka toke a fa. Eci Baraka eya, Yaele wo lekisa kokuaye. Ocili okuti, olondaka via Devora vieya oku tẽlisiwa muẽle.
Noke Soma Yavini weyavo oku pondiwa. Kuenje va Isareli va kuata ombembua vokuenda kuoloneke vimue.
Olonganji 2:14-22; 4:1-24; 5:1-31.
Apulilo
- Velie va kala olonganji? Kuenda helie wa kala onganji yatete?
- Ocikele cipi ca velapo Devora a kuatele? Kuenda nye ca kongelele vocikele caco?
- Eci Yehova a ecele va Isareli peka lia Soma Yavini la kesongo kaye Sisera uvangi we Yehova a tumile ku Devora oku sapuila Baraka? Kuenda helie a tukula okuti eye oka ci tẽlisa?
- Nye Yaele a linga ci lekisa okuti eye wa kala ukãi umue ukuotõi?
- Nye ca pita eci Soma Yavini a fa?
Apulilo akuavo
- Tanga Olonganji 2:14-22.
Nye va Isareli va lingile okuti ceya oku temisa Yehova? Kuenda tu lilongisalako nye? (Olong. 2:20; Olosap. 3:1, 2; Esek. 18:21-23)
- Tanga Olonganji 4:1-24.
Devora la Yaele va lekisa ekolelo lutõi. Ongangu ye va sila akãi Akristão vokoloneke vilo? (Olong. 4:4, 8, 9, 14, 21, 22; Olosap. 31:30; 1 Va Kor. 16:13)
- Tanga Olonganji 5:1-31.
Ocisungo ca Baraka la Devora ci sokisiwa ndati lohutililo yoku lavoka uyaki wo Harmagedo wa laika oku iya? (Olong. 5:3, 31; 1 Asa. 16:8-10; Esit. 7:9, 10; 16:16; 19:19-21)
