OVE hẽ wa kũlĩha onduko yukãi o lete ndeti vociluvialuvia cilo? Onduko yaye Rebeka. Ulume o kasi loku ñualehela laye onduko yaye, Isake. Rebeka o linga ukãi wa Isake. Ndamupi ca lingiwa?

Avirahama wa yonguile okuti omõlaye Isake o kuela ukãi umue wa sunguluka. Eye ka yonguile okuti Isake o kuela akãi va Kanana momo omanu vaco va enda oku fendela olosuku viesanda. Omo liaco, Avirahama wa vilikiya ukuenje waye kuenje wa popia laye hati: ‘Kuende kepata liange ko Harane, ka vanje ukãi oco va likuele lomõlange Isake.’

Noke ukuenje wa Avirahama wambata ekũi liolongamelo kuenje wa enda. Eci a pitila ocipepi limbo liaco wa talama pocisimo covava. Omo okuti ca kala kowola yokekumbi, akãi vovimbo veya oku tapa ovava pocisimo caco. Ukuenje wa Avirahama wa likutilila ku Yehova hati: ‘Ufeko wosi ndi pinga ovava oku nyua kuenda ovinyama viange, ndi limbuka okuti eye ove wa nõla ha lingi ukãi wa Isake.’

Osimbu a kala oku likutilila, Rebeka weya oku tapa ovava. Ukuenje wa Avirahama wo pinga ovava. Ufeko wa eca ovava kokuaye kuenje wa tapelakovo olongamelo toke via tẽla oku nyua. Ocili okuti, Rebeka wa linga upange wocili momo olongamelo vinyua ovava alua.

Eci Rebeka amãla oku tapela ovava olongamelo, ukuenje wa Avirahama wo pula onduko ya Isiaye. Eye wo pulavo nda okuti ci tava oku lala konjo yavo. Ufeko wa kumbulula hati: ‘Isia yange Betuele kuenda ci tava oku lala konjo yetu.’ Ukuenje wa Avirahama wa kũlĩhile okuti Betuele wa kala omõla a Nahore manji a Avirahama. Noke ukuenje wa Avirahama wa kekama kolongolo wa likutilila ku Yehova. Eye wa eca olopandu kokuaye omo lioku u songuila kepata lia Avirahama.

Vuteke waco, ukuenje wa Avirahama wa sapela la Betuele kuenda Lavane manji a Rebeka. Wa va sapuila eci catiamẽla kungende waye. Vosi yavo va litava pokati okuti Rebeka enda laye oco a linge ukãi wa Isake. Eci Rebeka a puliwa wa tavavo kondaka yavo. Eci kuaca omẽle, va katuka kuenje va wila kolongamelo oku enda ko Kanana.

Eci va pitila ko Kanana, ca kala ale kowola yokekumbi. Poku petula ovaso aye, Rebeka wa mola Isake wa kala loku tunda vusenge. Isake wa sanjukile calua poku mola Rebeka. Kotembo yaco ndaño okuti pa pitile ale anyamo atatu tunde eci inaye Sara a fa, Isake wa sumuile calua. Kuenje weya oku kuata esanju lialua poku mola Rebeka.