KALIYE tala Kaini la Havele. Cilo kavali kavo, va kula ale. Kaini wa linga ongunja yoku lima apako kuenda ovikũla.

Havele wa kala ungombo wolomeme. Eye wa solaile calua oku tata otumeme. Eci olomeme viaco via kula, ocunda ca lingavo cinene. Kuenje Havele wa kala lupange walua woku lava ocunda caco.

Ceya okuti, eteke limue Kaini la Havele veya oku eca ovilumba ku Suku. Kaini wa nena ovaima aye ovepia. Havele wa nenavo otumeme tumue tua velapo vocunda caye. Yehova wa sanjukila Havele locilumba caye. Pole ka sanjukilile Kaini locilumba caye. Ove hẽ wa kũlĩha esunga liaco?

Yehova ka sanjukilile lika Havele omo liocilumba caye ca velapo okuti ca Kaini ci sule. Eye wa sanjukilile Havele omo okuti wa kala ukuesunga. Havele wa solele Yehova kuenda wa solelevo huvaye. Kaini wa kala ondingaĩvi kuenda ka kuatele ocisola la manjaye.

Suku wa sapuilile Kaini oco apongolole ocituwa caye. Pole Kaini ka tavele. Eye wa temẽle calua omo okuti Suku wa solele calua Havele. Eteke limue Kaini wa popia la Havele hati: ‘Tuende kepia.’ Osimbu va kala lika liavo vepia, Kaini wondumuhĩla manjaye Havele kuenje woponda. Ocili okuti, Kaini wa linga ocina cimue ka ca sungulukile.

Noke yoku fa kua Havele, Yehova wa amamako oku lungula Kaini oco a pongoloke. Havele wa kala omunu umue ukuesunga kuenje Yehova lalimue eteke a ka ivala omanu ndava. Eye wa likuminya oku ka pindula Havele oco a kale lomuenyo otembo ka yi pui. Ove hẽ ku yongola oku kũlĩha omanu vamue vawa ndeci Havele?

Yehova ka sole omanu vãvi va soka nda Kaini. Eci Kaini a ponda manjaye, Yehova wo fetuluinya poku u kapa ocipãla lepata liaye. Eci Kaini a enda oku ka tunga kocitumãlo cikuavo, eye wambata umue manjaye ukãi kuenje wa linga ukãi waye.

Vokuenda kuotembo Kaini kuenda ukãi waye, va fetika oku kuata omãla. Vamue pokati komãla vaco, va fetikavo oku kuela kuenje va citavo omãla vavo. Noke omanu va fetika oku lua kilu lieve. Tu konomuisi ovolandu amue atiamẽla komanu vaco..