1, 2. Pi tu sanga ocitililo koloneke vilo?

 SOKOLOLA okuti o kasi vungende veteke limue okuti ombela ya tekãva calua. Oviliakulo kuenda ovikẽlu vi fetika oku li vokiya. Noke ombela yi fetika oku loka. Lesakalalo lia lua, o lupukila apa oka wunda. Noke eci wamako kovaso, o sanga okacipundo kamue konele yonjila okuti kaka lokiwa. Ove nda kua sanjukilile hẽ okacipundo kaco?

² Etu tu kasi kotembo yohali. Ũvi voluali u kasi oku livokiya. Pole, kuli ocivundilo cimue ci tu teyuila kũvi waco. Ocivundilo caco hẽ cipi? Vembimbiliya tu sangamo olondaka via linga hati: “Nukula Yehova siti, Eye ocikolo cange, haeye ombonge yange. Eye Suku yange, ndu kolela.”—Osamo 91:2.

3. Yehova o kala ndati ocitililo cetu?

³ Sokolola ño handi! Yehova Ululiki wetu haeye Ombiali ya velapo, citava okuti o kala ocitililo cetu. Eye o pondola oku tu teyuila. Omo okuti unene waye wa velapo, lacimue  cĩvi ci tu veta okuti ka tẽla oku ci mãlako. Yehova o kala ndati ocitililo cetu? Tu sukila oku kolela kokuaye. Eli olio esunga lieci Embimbiliya li tu vetiyila hati: “Kali vocisola ca Suku.” (Yuda 21) Etu tu sukila oku kala vocisola ca Suku, oco tu amameko oku pamisa ukamba wetu la Isietu wokilu. Noke ci tava oku kolela okuti eye oka tu teyuila. Oco hẽ tu pamisa ndati ukamba waco?

4, 5. Ovina vipi vi lekisa ocisola Yehova a tu kuetele?

⁴ Oco tu amameko oku kala vocisola ca Suku, tu sukila oku limbuka ndomo Yehova a lekisa ocisola caye kokuetu. Sokolola ño handi alongiso amue Embimbiliya ove wa lilongisa lekuatiso lielivulu lilo. Ululiki wetu Yehova Suku, wa tu ĩha ilu lieve oco tu kalemo. Wa kapamo okulia kualua, ovava, ovokuasi oposi lovinyama kuenda ovina vikuavo via posoka. Vondaka yaye, Suku o tu sapuila onduko yaye kuenda ovituwa viaye. Embimbiliya li tu sapuilavo okuti eye wa tumĩle Omõlaye osoliwe palo posi. Kuenje wa talisiwa ohali noke wa tu fila. (Yoano 3:16) Ombanjaile yaco eyi hẽ yi lomboloka nye kokuetu? Oyo yi tu ĩha elavoko liovina viwa kovaso.

⁵ Suku wa linga vali cimue cikuavo catiamẽla kelavoko lietu liokovaso. Yehova wa tumbika uviali wokilu, u tukuiwa hati, Usoma wa Mesiya. Usoma waco uka mãlako ohali yosi, kuenje uka pongolola ilu lieve oco li kale ofeka yelau. Sokolola ño handi! Etu tuka kuata ombembua kuenda esanju ka lipui. (Osamo 37:29) Osimbu handi otembo yaco ka yeyile, Suku o tu ĩha olonumbi vi tu kuatisa oku ambata omuenyo uwa cilo. Eye wa tu ĩhavo epuluvi lioku likutilila kokuaye. Evi vimue ño pokati kovina vi lekisa ocisola Yehova a kuetele omanu vosi kuenda ocisola a ku kuetele ove.

6. O tambuluiya ndati kocisola Yehova a lekisa kokuove?

⁶ Epulilo limue li kuete esilivilo o sukila oku kũlĩhĩsa lieli:  Ndi ka tambuluiya ndati kocisola ca Yehova? Vamue pamue va tambulula hati, “Ame ndi sukila oku solavo Yehova.” Eci hẽ ocovo ocisimĩlo cove? Yesu wa popele hati, ocihandeleko ca velapo pokati kovihandeleko viosi ceci: “Sola Ñala [Yehova] Suku yove lutima wove wosi lomuenyo wove wosi lolondunge viove viosi.” (Mateo 22:37) Ove o kuete esunga lialua lioku sola Yehova Suku. Anga hẽ vocisola caco o kuetele Yehova mua kongela oku u sola lutima wove wosi, lomuenyo wove wosi kuenda lolondunge viove viosi?

7. Voku sola Suku mua kongela nye? Ci lombolola.

⁷ Ndomo ca lekisiwa Vembimbiliya, voku sola Suku mua kongela calua, hesanjuko ño tu yeva vutima. Ndaño okuti oku kuatela Yehova ocisola ci kuete esilivilo, eci efetikilo ño liocisola cocili tu sukila oku lekisa kokuaye. Oco tu kuate uti wima apako, tu sukila ombuto yaco. Ove nda o yongola okulia omasã o sanjuka hẽ nda umue wa ku ĩha ño ombuto yaco? Ocili okuti nda kua sanjukile. Cimuamue haico catiamẽla koku kuatela ocisola Yehova Suku. Oku u kuatela ocisola vutima, efetikilo ño. Embimbiliya li tu sapuila hati: “Oku sola Suku kua lomboloka oku pokola kovihandeleko viaye. Ovihandeleko viaye ka vi lemi.” (1 Yoano 5:3) Ocisola tu kuetele Suku oco ci lekisiwe okuti cocili, tu sukila oku ci lekisila kovilinga.—Tanga Mateo 7:16-20.

8, 9. Tu lekisa ndati ocisola cetu kuenda olopandu ku Suku?

⁸ Tu lekisa ocisola cetu ku Suku poku pokola kovihandeleko viaye kuenda kolonumbi viaye. Eci ka ca tĩlile oku ci linga. Momo ovihandeleko via Yehova ka vi lemi. Ovio via tumbikiwila oku tu kuatisa oku ambata omuenyo umue wesanju. (Isaya 48:17, 18) Poku kuama olonumbi via Yehova komuenyo wetu, tu lekisa ku Isietu wokilu okuti tua sanjukila ovina viosi eye a siata oku tu lingila. Pole, vatito  voluali lulo va siata oku lekisa ocituwa caco. Etu ka tu yongola oku kala vakualutukãi ndomanu vamue va kala kotembo ya Yesu. Yesu wa sakuile omanu ekũi va kala lovilundu. Pole, umosi lika pokati kavo wa tiuka oku eca olopandu ku Yesu. (Luka 17:12-17) Etu tu yongola oku kala nda una wa tiukile oku eca olopandu. Ka tu yongola oku kala nda vana ecea vakualutukãi.

⁹ Ovihandeleko vipi via Yehova tu sukila oku pokola? Tua lilongisa ale vialua velivulu lilo. Pole, tu konomuisiko vimue. Oku pokola kovihandeleko via Suku cika tu kuatisa oku amamako oku endela vocisola ca Suku.

10. Lombolola esunga lieci ci kuetele esilivilo oku amamako oku lilongisa ovina viatiamẽla ku Yehova Suku.

¹⁰ Oku lilongisa eci catiamẽla ku Yehova oyo onjila yiwa yoku livala ukamba laye. Elinga liaco ka li sulila. Nda wa kaile posamua vuteke umue wombambi nda wa ecelela hẽ okuti ondalu yima? Sio, ove nda wa siakãlela  oco ondalu ka yi kaime. Momo omuenyo wove nda wa kala kohele. Ndeci olohuĩ vi siakãlela ondalu, “ukũlĩhiso wa Suku” u pamisa ocisola cetu ku Yehova.—Olosapo 2:1-5.

11. Olondonge via Yesu via liyeva ndati eci a va situluila ovisonehua?

¹¹ Yesu o yongola okuti olondonge viaye vi pamisa ocisola cavo va kuetele Yehova. Kuenda va vokiya ocisola va kuetele ocili va lilongisa Vembimbiliya. Eci Yesu a pinduka, wa vangula lolondonge viaye vivali catiamẽla kovitumasuku via sonehiwa Kovisonehua vio Heveru via tẽlisiwa vokuaye. Ovo va liyevele hẽ ndati? Ovo va popia hati: “Ovitima vietu ka via tokotele hẽ osimbu a vangula letu vonjila, cina a tu situluila ovisonehua?”—Luka 24:32.

12, 13. (a) Pokati komanu voluali koloneke vilo, ocisola cavo ku Suku kuenda Kembimbiliya ci kasi ndati? (b)Nye tu sukila oku linga oco ocisola cetu ka cika pole?

¹² Eci wa fetika oku lilongisa Embimbiliya, wa yevavo okuti utima wove wa tokotelua lesanju, lombili kuenda locisola okuetele Suku? Valua va siata oku liyeva ndoco. Ocina ca tĩla, oku pamisa ocisola caco kuenda oku ci vokiya. Etu ka tuka kuama ocituwa coluali lulo. Momo Yesu wa popele hati: “Ocisola comanu va lua ci pola.” (Mateo 24:12) Oco hẽ nye o sukila oku linga oco ocisola okuetele Yehova kuenda ocisola okuetele ocili wa lilongisa Vembimbiliya ka cika pole?

¹³ Amamako oku lilongisa ovina viatiamẽla Yehova Suku kuenda ku Yesu Kristu. (Yoano 17:3) Sokolola lutate eci wa lilongisa Vembimbiliya. Noke lipula ndoco: ‘Eci ci ndongisa nye catiamẽla ku Yehova Suku? Esunga lipi eci ci nyiha lioku sola Yehova lutima wange wosi, lomuenyo wange wosi, kuenda lolondunge viange viosi?’ (Tanga 1 Timoteo 4:15.) Oku sokolola kapulilo aco cika ku kuatisa oku pamisa ocisola cove ku Yehova.

14. Ohutililo yi tu kuatisa ndati oku pamisa ocisola cetu ku Yehova?

¹⁴ Onjila yikuavo yoku pamisa ocisola cove ku Yehova oco ka cika pole, oku likutilila olonjanja viosi kokuaye.  (1 Va  Tesalonike 5:17) Vocipama 17 celivulu lilo, tua lilongisa okuti ohutililo ombanjaile Suku a tu ĩha. Ndeci ukamba pokati komanu u livokiya nda pali oku livanguisa, ukamba wetu la Yehova u pamisiwavo nda tua likutilila kokuaye otembo yosi. Ka tu ka eceleli okuti olohutililo vietu vi kala vioku pitolola olondaka vimuamue okuti ka vi tundi kutima. Tu sukila oku vangula la Yehova ndomõla o vangula la isiaye u sole. Tu sukilavo oku vangula lesumbilo, lutima wetu wosi kuenda oku popia ocili. (Osamo 62:8) Oku lilongisa Embimbiliya pokolika kuenda oku linga olohutililo lutima wosi, ci sukiliwa calua kefendelo lietu. Kuenda ci tu kuatisa oku amamako oku endela vocisola ca Suku.

15, 16. Momo lie tu tendela upange woku kunda Usoma ndesumũlũho limue linene kuenda ndukuasi?

¹⁵ Oku lilongisa Embimbiliya pokolika kuenda oku likutilila, ovilinga vimue viatiamẽla kefendelo lietu tu sukila oku lingila pokolika. Pole, tu kũlĩhĩsi onepa yimue yatiamẽla kefendelo lietu tu pondola oku lingila powiñi. Onepa yaco oku sapuilako vakuetu eci catiamẽla ketavo lietu. Ove wa siata hẽ oku sapuilako vakuẽle eci catiamẽla kocili wa lilongisa Vembimbiliya? Nda oco, o kuete esumũlũho limue linene. (Luka 1:74) Eci tu sapuilako vakuetu ocili tua lilongisa catiamẽla ku Yehova, tu kasi oku tẽlisa ocikele cimue cinene ca eciwa Kakristão vosi. Ocikele caco, oku kunda olondaka viwa Viusoma wa Suku.—Tanga Mateo 24:14; 28:19, 20.

¹⁶ Upostolo Paulu wa tukuile ocikele caye coku kunda hati, ukuasi. (2 Va  Korindo 4:7) Oku sapuilako omanu catiamẽla ku Yehova kuenda kocipango caye, owo upange wa velapo tu sukila oku linga. Upange waco tu u lingila Cime umue wa sunguluka. Kuenda u nena asumũlũho alua. Poku linga upange waco, ove o kuatisa omanu vakuotima wa sunguluka oku livala ukamba la Isietu wokilu kuenda oku va  kuatisavo oku endela vonjila yomuenyo. Kuli vali hẽ upange ukuavo u sanjuisa? Handi vali, oku kunda eci catiamẽla ku Yehova kuenda Kondaka yaye, ci vokiya ekolelo liove kuenda ci pamisa ocisola cove kokuaye. Yehova o sanjukila calua alikolisilo ove. (Va Heveru 6:10) Oku kuata ombili  kupange waco, ci ku kuatisa oku amamako oku endela vocisola ca Suku.—Tanga 1 Va Korindo 15:58.

17. Momo lie ocikele Cakristão coku kunda ci sukilila onjanga koloneke vilo?

¹⁷ Tu sukila oku ivaluka okuti upange woku kunda Usoma wonjanga. Embimbiliya li tu vetiya hati: “Kunda ondaka. Kolisako.” (2 Timoteo 4:2) Momo lie oku kunda ku sukilila onjanga? Embimbiliya li tu sapuila hati: ‘Eteke linene lia Yehova li li ocipepi; li li ocipepi muẽle, li yayulako.’ (Sofoniya 1:14) Otembo Yehova a ka mãlako evĩho liosi voluali yi li ocipepi. Omanu va sukila oku lunguiwa. Ovo va sukila oku kũlĩha okuti yilo oyo otembo yoku nõla Yehova Ndombiali yavo. Esulilo liya muẽle ka ‘li cilua.’—Havakuki 2:3.

18. Momo lie tu sukilila oku fendela Yehova kumosi lavakuetu Akristão vocili?

¹⁸ Yehova oyongola okuti tu u fendelela kumosi la vakuetu Akristão vocili. Eli olio esunga lieci Ondaka yaye yi tu vetiyila hati: “Tu sokololi ndomo tu tẽla oku livetiya pokati oku kala locisola lovilinga viwa. Ka tu ka liweki oku ongoloka ndomo vamue va lingainga, puãi tu likuatisi pokati lalungulo, ca piãla vali omo vu lete okuti eteke liaco li kasi ocipepi.” (Va Heveru 10:24, 25) Eci tu liongolola la vamanjetu Akristão, tu kuata epuluvi lioku sivaya kuenda oku fendelela kumosi Suku yetu ukuacisola. Pole, tu livetiyavo pokati kuenda tu likolisa.

19. Tu likolisilako ndati oku pamisa ocisola cetu la vamanji vekongelo?

¹⁹ Eci tu liongolola kumosi lavakuetu afendeli va Yehova, tu pamisa ocisola cetu kuenda ukamba wetu la vamanji vekongelo. Ciwa okuti tu vanja kovituwa viwa via vakuetu ndeci Yehova a vanja eci ciwa kokuetu. Kuka lavoke oku lipua ku vamanjove u fendeleli kumosi. Ivaluka okuti vosi va kasi vakalo a litepa kueci catiamẽla koku kula kespiritu kuenda va kuakulueya. (Tanga Va Kolosai 3:13.) Sandiliya oku  livala ukamba la vana va sole muẽle ocili Yehova. Kuenje oka limbuka okuti ove oka kulavo kespiritu. Oku fendela Yehova kumosi la vamanjove kespiritu, cika ku kuatisa oku amamako oku endela vocisola ca Suku. Yehova o sumũlũisa ndati vana vo fendela locili kuenda vamamako oku endela vocisola caye?

20, 21. “Omuenyo wocili” upi? Kuenda momo lie elavoko liaco li tu sanjuisila?

²⁰ Yehova o sumũlũisa vana vo fendela locili loku va ĩha omuenyo. Omuenyo waco hẽ upi? Pamue tu tambulula okuti omuenyo waco ulo muẽle tu kasi lawo ndeti. Momo tu kasi oku fuima, tua siata okulia loku nyua, omo tu kasi lomuenyo. Kapuluvi esanju tua siata oku popia hati “Owu owo omuenyo wocili.” Pole, Embimbiliya li lekisa okuti, lomue o kuete handi omuenyo wocili.

²¹ Ondaka ya Suku yi tu vetiya oku kakatela ‘komuenyo wocili.’ (1 Timoteo 6:19) Olondaka evi vi lekisa okuti ‘omuenyo wocili’ u laika oku iya kovaso. Eci tu ka lipua, oco tu ka kuata omuenyo wocili. Momo tu ka kala ndeci Suku a yonguile kefetikilo. “Omuenyo wocili” ale omuenyo ko pui, tu ka u kuata lika voluali luokaliye. Momo tu ka kuata uhayele wasuapo, lombembua kuenda esanju. (1 Timoteo 6:12) Eli hẽ helavokoko limue liwa?

22. O tẽla ndati oku kuata ‘omuenyo wocili’?

²² Oco hẽ, tu kakatela ndati ‘komuenyo wocili’? Upostolo Paulu wa vetiya Akristão ‘oku linga ohenda’ kuenda oku kuata ‘ovilinga viwa.’ (1 Timoteo 6:18) Eci tu tẽla lika oku ci linga nda tua kapako olonumbi tua lilongisa Vembimbiliya. Anga hẽ upostolo Paulu wa yonguile oku popia okuti tu lavoka “omuenyo wocili” omo lioku litumbika kovilinga viwa? Sio. Elavoko liaco, lika tẽlisiwa lika omo ‘liocali’ ca Suku. (Va Roma 5:15) Yehova o sanjukila calua oku eca onima kuava vo vumba locili. Eye oyongola okuti ove o kuata  “omuenyo wocili.” Omuenyo waco ko pui, wombembua lesanju, u kasilili lika vana vamamako oku endela vocisola ca Suku.

23. Momo lie ci kuetele esilivilo oku amamako oku endela vocisola ca Suku?

²³ Omunu lomunu pokati ketu o sesamẽla oku lipula ndoco: ‘Ñasi muẽle oku fendela Suku ndomo eye a imba onumbi Vembimbiliya?’ Nda tua kũlĩhĩsa okuti eteke leteke, etambululo kepulilo eli ‘oco’, ci tava oku popia okuti tu kasi vonjila ya suñama. Ci tava oku kolela okuti Yehova o linga muẽle ocitililo cetu. Eye oka popela omanu vaye vo kolela koloneke vilo via tĩla violuali lulo. Yehova oka tu yovola kuenje oka tu iñisa voluali luokaliye lu kasi ale ocipepi. Cika tu sanjuisa calua oku mola otembo yaco. Ci tu sanjuisavo oku limbuka okuti tua nõla oku endela vonjila ya sunguluka koloneke vilo via sulako. Nda wamamako oku endela vonjila wa nõla ndeti, oka kuata “omuenyo wocili” una Yehova Suku a likuminya votembo yenda ño hũ!