Yehosafata soma yoko Yuda wa nyõla ovotala a Baale kuenda oviteka vofeka. Eye wa yonguile okuti omanu va kũlĩha ovihandeleko via Yehova. Omo liaco, eye wa tuma olombuale kuenda va Lewi kovaimbo osi o ko Yuda oco va longise ovihandeleko via Yehova komanu.

Olofeka via kala ocipepi via kuata usumba woku liyaka la va Yuda momo ovo va kũlĩhĩle okuti Yehova wa kala lomanu vaye. Toke muẽle ovo va enda oku nena olombanjaile ku soma Yehosafata. Pole, va Moavi la va Amoni kuenda vana va kala vofeka yo Seire, veya oku liyaka la va Yuda. Yehosafata wa kũlĩhĩle okuti eye o sukila ekuatiso lia Yehova. Kuenje eye kumue lalume vosi, akãi kuenda omãla va liongoluila vo Yerusalãi. Kovaso yomanu vaco vosi, Yehosafata wa likutilila hati: ‘A Yehova, nda kua tu ĩhile ekuatiso liove ka tu yuli. Tu sapuile eci tu linga.’

Yehova wa tambulula ohutililo yavo poku popia hati: ‘Ko ka kuati usumba. Ame ndu ku kuatisi. Kuendiko, ka talameli ño ha vu mõli ndomo ndu popeli.’ Yehova wa va popela ndati?

Omẽle ya kuamamo, Yehosafata wa nõla olonjimbi kuenje wa va sapuila oco va pite kovaso yolohoka. Ovo va tunda ko Yerusalãi toke kocitumãlo cimue cuyaki ci tukuiwa hati, Tekoa.

Osimbu olonjimbi via kala oku sivaya lesanju lolondaka violukandi, Yehova wa yakelako afendeli vaye. Eye wa lingisa okuti va Amoni la va Moavi va litatamisa kuenje va fetika oku likatukila omunu lukuavo kuenda lomue pokati kavo wa supapo. Pole, Yehova wa teyuila omanu vo ko Yuda, asualali kuenda ovitunda. Omanu vosi vo kolofeka vi lisungue va yeva ovina Yehova a linga kuenda va kũlĩhĩle okuti Yehova handi wa kala oku teyuila afendeli vaye. Yehova o popela ndati afendeli vaye? O ci linga volonjila via litepa. Eye poku ci linga, ka sukila ekuatiso liomanu.