Noke yoku pita olosãi vivali tunde eci va Isareli va tunda Kegito, ovo va pitĩla Komunda Sinai kuenje va tunga ocilombo. Yehova wa tuma Mose oco a londe komunda yaco kuenje wo sapuila hati: ‘Ame nda yovola va Isareli. Nda va ndi pokola, loku lava ovihandeleko viange, ovo va linga omanu vange va likasi.’ Mose wa loka komunda kuenje wa lomboluila va Isareli olondaka viosi Yehova o sapuila. Omanu va tambulula ndati? Ovo va tambulula vati: “Cosi Yehova a popia tu ci linga.”

Mose wa londa vali Komunda Sinai. Komunda yaco Yehova wa popia hati: ‘Noke yoloneke vitatu, njiya vali oku sapela love. Lungula omanu oco ka va ka seteke oku lamanela Komunda Sinai.’ Mose wa loka komunda kuenje wa sapuila va Isareli oco va liangiliyile oku yeva ondaka ya Yehova.

Noke yoloneke vitatu, va Isareli va mola oviliakulo kuenda elende limue li tekãva komunda. Ovo va yevavo onjuela yocikẽlu kuenda oku sika kuolumbeta. Kuenje Yehova wa lokila komunda vondalu. Va Isareli va kala lusumba kuenje va luluma calua. Omunda yosi ya luluma calua kuenda yeyukile owisi. Ocileñi columbeta camamako oku livokiya. Omo liaco, Suku wa popia hati: ‘Ame ndi Yehova. Ku ka fendele olosuku viñi.’

Mose wa londa vali komunda kuenje Yehova wo wĩha ovihandeleko vi lekisa ndomo omanu va sukila oku u fendela kuenda ovituwa va sukila oku lekisa. Mose wa soneha ovihandeleko viaco kuenje wa vi tangela va Isareli. Ovo va likuminya vati: ‘Ovina viosi Yehova a popia tu vi linga.’ Ovo va linga ohuminyo yimue ku Suku. Anga hẽ va laikele muẽle oku yi tẽlisa?