Epata lia Yakoba Kegito lieya oku kũlĩhĩwa okuti va Isareli. Eci Yakoba kumue la Yosefe va fa, kua fetika oku viala osoma yikuavo yokaliye yi tukuiwavo hati, Fareo. Eye wa kala lusumba wokuti va Isareli va pama vali okuti va Egito ci sule. Kuenje Fareo wa kapa va Isareli kupika. Omo liaco, wa va kisika oco va pange olondopi kuenda oku talavaya calua kupange waco. Pole, osimbu va Isareli va kala oku kisikiwa la va Egito oku talavaya calua, ovo vamamako oku livokiya. Fareo ka solele ovina viaco kuenje wa handeleka okuti omãla vosi valume va va Isareli okuti va citiwa ndopo, va pondiwa. O pondola oku sokolola esakalalo va Isareli va kuata vepuluvi liaco?

Ukãi umue u Isareli o tukuiwa hati, Yokevede wa kuatele oñaña yimue yulume ya fina calua. Oco a popele oñaña yaco, eye wa yi kapa vekualu kuenje wa yi soleka voloneva vi kasi kohulo Yolui Nilu. Manjaco ukãi okuti Miriama, wa kala ocipepi oco a lavulule eci ci pondola oku pita loñaña.

Omõla ukãi wa Fareo wa enda oco a ka yue volui kuenje wa mõla ekualu. Eci a tuvula ekualu liaco, wa sangamo oñaña ya kala oku lila kuenje wa yi  kuatela ohenda. Miriama wa pula hati: ‘Citava hẽ okuti ngenda ndi ka sandiliya ukãi umue o pondola oku ku nyamisilako oñaña?’ Eci omõla wa Fareo a tambulula hati, kuende, Miriama wa enda oku kovonga inaye Yokevede. Omõla wa Fareo wa sapuila Yokevede hati: ‘Ambata oñaña eyi, yi nyamisa kuenje ame ndu ku feta.’

Eci oñaña ya kula, Yokevede wa yeca komõla ukãi wa Fareo, una wo luka hati, Mose kuenje wo tekula ndomõlaye muẽle. Mose wa kala ndomunu wa velapo Kegito kuenda wa ponduile oku kuata ovina viosi a yonguile. Pole, Mose lalimue eteke a ivaleleko Yehova. Eye wa kũlĩhĩle okuti wa kala u Isareli kuenda ka kaile u Egito. Omo liaco, wa nõlapo oku fendela Yehova.

Eci Mose a tẽlisa 40 kanyamo, wa nõlapo oku kuatisa vakuepata liaye. Kuenje eci a mola okuti umue u Egito wa kala oku veta upika umue u Isareli, Mose wa veta ulume waco u Egito longusu yalua toke eci a fa. Noke wa soleka etimba liaco veseke. Eci Fareo a ci yeva, wa seteka oku ponda Mose.Mose poku ci yeva, wa tilila kofeka yo Midiane kuenje Yehova wo lava osimbu a kala vofeka yaco.