Yesu wa kuatele akamba vamue vatatu va kala ko Betania. Akamba vaco, Lasaru kuenda vamukãi vaye okuti, Maria la Marta. Eteke limue, osimbu Yesu a kala kesinya likuavo lio Yordão, Maria la Marta va tuma esapulo limue lionjanga kokuaye liti: ‘Lasaru o vela calua. Linga ohenda, enju lonjanga!’ Pole, Yesu ka endele vepuluvi liaco. Eye wamisapo vali oloneke vivali kuenje wa sapuila olondonge viaye hati: ‘Tu endi ko Betania. Lasaru wa pekela, pole, ame ngendako oco ndu ko pasule.’ Ovapostolo va popia vati: ‘Nda Lasaru wa pekela, eci cu kuatisa oku kala ciwa.’ Omo liaco, Yesu wa va sapuila elomboloko liaco hati: ‘Lasaru wa fa.’

Eci Yesu a pitĩla ko Betania, wa sanga okuti Lasaru o kasi ale veyambo oloneke vikuãla. Omanu valua veya oku lembeleka Marta la Maria. Eci Marta a yeva okuti Yesu weya, wa lupukilako oco a lisange laye. Eye wa popia hati: “A Ñala, nda wa kaile kulo mume wange nda ka file.” Yesu wo sapuila hati: ‘Mume wove o kala vali lomuenyo. Ove hẽ wa ci kolela?’ Marta wa popia hati: ‘Nda kolela okuti eye o ka pinduka kepinduko lia sulako.’ Yesu wo sapuila hati: “Ame ndipinduko haime ndimuenyo.”

Noke Marta wa enda ku Maria kuenda wo sapuila hati: ‘Yesu o kasi kulo.’ Maria wa lupukila ku Yesu kuenje owiñi wo kuama. Eye wa kekamẽla kolomãhi via Yesu kuenda ka tẽlele oku likandangiya oku lila. Kuenje wa popia hati: ‘A Ñala nda wa kaile kulo, manjetu nda ka file!’ Yesu wa mola okuti Maria wa kala oku lila calua kuenje wa fetikavo oku lila. Eci omanu va mola asuelela a Yesu va popia vati: ‘Tali ño, ndomo Yesu a solele calua Lasaru.’ Pole, vamue va kala oku lipula vati: ‘Momo lie ka popelele ekamba liaye?’ Nye Yesu a laikele oku linga noke?

Yesu wa enda keyambo kuna kua kala ewe limue linene lia sitikiwile keleva. Eye wa handeleka hati: ‘Ewe liupiko.’ Marta wa popia hati: ‘Pa pita ale oloneke vikuãla tunde eci a fa! Etimba liaye li kasi ale oku lẽha.’ Noke vopako ewe kuenje Yesu wa likutilila hati: ‘A Tate, ndu ku pandula omo wa njeva. Nda kũlĩha okuti olonjanja viosi o njeva njeva, pole, ñasi oku vangula lolukandi oco omanu ava va kolele okuti  ove wa numa.’ Noke wa vilikiya londaka yimue yolukandi hati: “A Lasaru, tundamo!” Kuenje kua pita ocina cimue ci komõhisa okuti: Lasaru wa tunda veyambo kuenda wa iñiwa lolonanga. Noke Yesu wa popia hati: “U kutululi kuenda a ende.”

Omanu vana va mola ovina viaco va lekisa ekolelo ku Yesu. Pole, vamue pokati kavo va tunda, kuenje va ka ci sapuilile va Fariseo. Vepuluvi liaco, va Fariseo va yonguile oku ponda Lasaru kuenda Yesu. Umue pokati 12 kovapostolo, okuti Yuda Isikariote, vuyombeki wa enda ku va Fariseo kuenje wa va pula hati: ‘Ciñami vu ndi feta nda okuti nda ku kuatisi oku sanga Yesu?’ Ovo va likunda oku u feta 30 kolopalata kuenje oku upisa opo, Yuda wa fetika oku sandiliya epuluvi liwa lioku pakula Yesu ku va Fariseo.