Yosefe la Maria va kala ko Nasara kumue la Yesu kuenda omãla vavo vakuavo valume lava vakãi. Yosefe wa tekula epata liaye poku linga upange wukalupindelu kuenda wa va longisa eci catiamẽla ku Yehova Lovihandeleko viaye. Epata lia Yosefe lia endaenda kosunangonga olonjanja viosi oco va ka fendele Suku kuenda unyamo lunyamo va enda oku linga ungende woku enda ko Yerusalãi kocipito co Paskua.

Eci Yesu a tẽlisa 12 kanyamo, epata liaye lia linga ungende unene woku enda ko Yerusalãi ndocituwa cavo. Olupale luaco lueyukile lomanu vana veyile kocipito co Paskua. Noke Yosefe la Maria, va linga ungende woku tiukila konjo. Ovo va sima okuti Yesu wa kala oku lingila ungende kumosi locimunga. Pole, eci vo sandiliya pokati kepata liavo, ka va tẽlele oku u sanga.

Ovo va tiukila ko Yerusalãi kuenje va sandiliya omõlavo vokuenda kuoloneke vitatu. Oku sulako va enda vonembele. Kuenje va sanga okuti, Yesu o kasi pokati kalongisi oku va yevelela loku va linga apulilo  a sunguluka. Alongisi vaco va komõha calua Yesu kuenje va fetika oku linga apulilo alua kokuaye. Ovo va komõha omo liatambululo aye. Alongisi va limbuka okuti eye wa kuata elomboloko Liovihandeleko via Yehova.

Yosefe la Maria va sakalalele calua. Maria wa popia hati: ‘Amõlange, etu tua kala oku ku sandiliya kovitumãlo viosi! Pi wa kala?’ Yesu wa popia hati: ‘Ka wa kũlĩhĩli okuti ndi sukila oku kala kulo konjo ya Isiange?’

Yesu wa enda konjo lolonjali viaye ko Nasara. Yosefe wa longisa Yesu ndomo a linga upange wukalupindelu. Ove o sima okuti Yesu lutunga wumalẽhe wa kala omunu upi? Eci Yesu a kula, wamamako kolondunge loku soliwa la Suku kuenda lomanu.