Oviluvo viosi viaspiritu via pangiwa la Yehova via kala viwa. Tunde opo, ungelo umue walilingisa ũvi. U eye Satana, Eliapu. Satana wa yonguile okuti omanu kilu lieve vofendela eye okuti Yehova haiyeko. Tala capita ndomo:

Vocumbo ce Edene, muakala oviti vialua via imaima apako awa. Yehova wa popia ku Adama lukãi waye, Heva okuti va pondola okulia. Pole kua kala uti umue una Suku a va handeleka okuti ka ci tava okuliako. Eye wa popia hati nda wa liko, haico vufa.— Efetikilo 2:9, 16, 17.

Eteke limue, Heva wakala lika waye eci onyoha yimue ya vangula laye. Ocili muẽle, ka ca kale onyoha yakala loku vangula; puãi cakala Satana, Eliapu, okuti camõlehele soketi onyoha ya vangula. Satana wa popia ku Heva hati, nda eye wa lile kepako lia patãliwa, eye nda wa pongoloka ukualondunge nda Suku. Wa popia okuti eye nda ka file. Alomboluilo a kavali ka-o akala ovohembi. Ndaño oco, Heva wa tava ku Satana noke walia epako. Noke yaco, waecavo limue ku Adama, eye waliavo.— Efetikilo 3:1-6.

Lesapulo eli liomuenyo wocili, tua sala loku ci kũliha okuti Satana cimue ocisuanji kuenda yimue ohembi. Eye wa popia ku Heva hati, nda eye wa sinilile Suku, nda ka file. Eci ca kala uhembi. Vocili, eye wa fa, Adama layevo wa fa. Satana ka file kevelo lina, ndaño okafa kovaso mekonda lioku linga ekandu. Vokati kotembo eyi, handi, eye okasi lomuenyo loku tuĩhinya oku konyuisa omanu. Eye lopo ohembi, kuenje osandiliya okulinga okuti omanu va tomba ovihandeleko via Suku.— Yoano 8:44.

Noke yaco, ovangelo vakuavo va pongoloka vãvi. Ovangelo ava va lavulula omãla vakãi va fina palo posi noke valinga lavo ukahonga. Lonjila eyi okuti veya palo posi, loku wala atimba omanu ndalume. Tunde opo, vali nolela ovo muẽle akãi. Eci cilipatãla locipango ca Suku.— Efetikilo 6:1, 2; Yuda 6.

Canenavo esumuo lialua komanu. Akãi vavo vacita omãla, puãi omãla ava ka va kale vamue vasokamo. Valinga vakueviho olongangala haivo ovindululu. Vokuenda kuotembo, oluali lueyuka to levĩho, okuti Yehova wa popia hati ndi nyõla omanu vãvi letande linene. Omanu lika va supulukapo Ketande ukuesunga Noha lepata liaye.— Efetikilo 6:4, 11; 7:23.

Ovangelo vãvi, pole, va tiukila vuviali waspiritu; ovo ka va file. Pole va yambuiwa. Ka va vaecelele oku tiukila vepata lia Suku musangiwa ovangelo vakuesunga. Handi vali, Yehova ka vaecelele oku wala vali atimba omanu. Noke kovaso ovo va kafa kesombiso linene.— 2 Petulu 2:4; Yuda 6.

Ndopo eci vocita cetu, kilu kua kala uyaki. Embimbiliya kelivulu lie Esituluilo lilombolola eci ca pita: “Kuenje kilu kueya ovita. Mingeli [u wa pinduiwa Yesu Kristu] lovangelo vaye [vawa] va liyaka locinyõha [Satana]. Ociyonha lovangelo vaco [vãvi] va tamalala, puãi va yuliwa, lapa va kala vali kilu ka pa molehele. Kuenje ocinyoha caco cinene ca takumuiwa, haico onyoha yosiahũlu, yina ya tukuiwa eliapu, haeye Satana, una endaenda okukemba oluali luosi, haeye wa imbiwa kilu lieve, lovangelo vaye [vãvi] va imbiwa kumosi laye.”

Esulilo liaco lia kala ndati? Elomboluilo liamamako: “Oco yoleli, ailu lene wa tungimo.” Ovangelo vawa nda va sanjuka mekonda Satana lovangelo, ale aspiritu, ãvi ka va sangiwile vali kilu. Oco hẽ komanu vana vakasi voluali? Embimbiliya liti: “Puãi ove a ngongo, love a kalunga, ngongo yene! Momo eliapu lia lokila kokuene lonyeño ya lua, omo lia limbuka okuti oloneke vialio vitito.”— Esituluilo 12:7-9, 12.

Oco, Satana lakamba vaye vãvi va kemba omanu kilu lieve kuenda vava kokela olohali vialua. Ovangelo ava vãvi va tukuiwa olo-demónio. Ovanyãli va Suku. Vosi yavo olondingaĩvi.