Olonjanja vivali vosemana, Olombangi Via Yehova via siata oku linga olohongele kovitumãlo viavo viefendelo vi tukuiwa okuti Olonjango Viusoma. Nyi ca siata oku pita kolohongele viaco? Momo lie ci kuetele esilivilo oku kala kolohongele viaco?

•  Nye ci lingiwa Vonjango Yusoma?

•  Momo lie ci kuetele esilivilo oku enda kolohongele viaco?

•  Ceci amalẽhe vakuavo va popia

 Onjango yusoma ocitumãlo cimue omanu va liongoluila oco va lilongise ndomo Embimbiliya li pondola oku tu kuatisa eteke leteke. Kolohongele vietu ove o pondola:

•   Oku lilongisa ocili catiamẽla ku Suku.

•   Oku kũlĩha ovina vi kasi oku koka ovitangi vio koloneke vilo.

•   Oku kala omunu uwa

•    Oku sanga akamba vawa.

 Wa ci kũlĩha? Ovitumãlo violohongele Violombangi Via Yehova vi tukuiwa Olonjango Viusoma momo Usuma wa Suku ulandu umue u vanguiwamo calua.—Mateo 6:9, 10; 24:14; Luka 4:43.

 Eci o ka lilongisamo ci kuete esilivilo lialua. Olonumbi Viembimbilila vi konomuisiwa kolohongele Violombangi Via Yehova, vi ka kuatisa oku “kuata olondunge.” (Olosapo 4:5) Eci ci lomboloka okuti Embimbiliya li pondola oku kuatisa oku nõla olonjila viwa komuenyo. Li pondolavo oku ku kuatisa oku kũlĩha a tambululo a kuete esilivilo komuenyo, ndeci:

•   Omuenyo u Kuete Ocimãho Cipi?

•   Suku o Kuete Eko Liohali Yetu?

•   Nye ci pita letu eci tu fa?

 Olosapi vikuãimo vimue pokati kolohundo vi lingiwa kolohongele vietu kesulilo lio semana

•   Momo Lie o Sukilila Oku Songuiwa Lembimbiliya?

•   Pi o Pondola Oku Sanga Ekuatiso Kotembo Yovitangi?

•   Nye Usoma wa Suku u Kasi Oku tu Lingila Cilo?

 “Eteke limue omunu tu tangela kumosi weya kohongele yimue. Eye wa tumãla kumosi lepata liange kuenda tua eca alivulu etu kokuaye. Noke wa ndi sapuila okuti wa komõha calua atambululo vamanji va eca kohongele. Handi vali wa popia okuti etavo liaye ka likuete ovimalẽho vioku lilongisa ndeci etu.— Brenda.

 Wa ci kũlĩha? Ka ku pingiwa olombongo Vonjango Yusoma.

 O ka pamisiwa calua. Embimbiliya li popia okuti vimue pokati kovimãho viakristão lioku liongolola oku ‘li pamisa pokati.’ (Va Heveru 10:24, 25) Oku kala lomanu va pitisa kovaso ocipango ca Suku kuenda comanu va kuavo ci ka vuluisa voluali lulo lueyuuka epela.

 Noke lieteke ndi yeva ekavo lialua, pole, omanu Vonjango Yusoma olonjanja viosi va ñuatisa oku liyeva ciwa. Eci ndi tiuka konjo, ndi yeva esanju loku li pongiyila eteke likuavo.”—Elisa.

 Wa ci kũlĩha? Kuli eci ci pitahãla 120.000 kakongelo Olombangi Via Yehova va liongoluila kueci ci pitahãla 60.000 kolonjango Viusoma voluali luosi. Vocosi cisoka 1500 Kolonjango Viusoma via siata oku tungiwa anyamo osi oco mu liongoluile omanu valua. a