Apata osi a kuete olonumbi vimue ndeci, elivala lioku pĩtila konjo, otembo va sukila oku talavaya lotelefone ale oku kuata ovituwa viwa.

 Nye o linga nda kua pokuile konumbi yimue yepata? Ocili okuti ku pondola oku pongolola ovina via pita pole, o pondola oku yuvula oco ocitangi ka ci ka livokiye. Ocipama cilo ci ka lekisa ndomo o ci linga.

•  Ceci ku sukila oku linga

•  Ove o pondola oku linga eci ca velapo

•  Ceci amalẽhe vakuavo va popia

•   Nda olonjali viove ka via kũlĩhĩle okuti kua pokuile konumbi yimue yepata, o pondola oku setekiwa oku limbika eci wa linga.

•   Nda olonjali viove via limbuka okuti, kua pokuile konumbi yimue yepata, ove o pondola oku setekiwa oku lisandela esunga ale oku kapa eko komunu ukuavo.

 Layimue pokati kolonjila evi via sunguluka. Momo lie? Momo oku limbika eci wa linga ale oku lisandela esunga, ovituwa viomunu ka tẽla oku tepisa pokati keci ciwa leci cĩvi. Eci ci ka lekisa kolonjali viove okuti, handi o kuete ovina vialua vioku lilongisa komuenyo wove.

 “Oku kemba lalimue eteke ku potolola ocitangi. Vokuenda kuotembo, olonjali viove vi ka limbuka ocili kuenda onima yaco yi ka livokiya calua okuti, nda wa popele ocili nda hĩse.”—Diana.

•   Tava okuti wa lueya. Embimbiliya li popia okuti: “Wosi o limbika akandu aye ka ka litunda ciwa.” (Olosapo 28:13) Olonjali viove via kũlĩha okuti ove kua lipuile, pole, vi lavoka okuti o koleliwa.

   “Nda ove wa vangula ocili lolonjali viove, vi lekisa ohenda kokuove. Nda wa vangula ovina via pita love, ovio vi ku kolela.”—Olivia.

•   Pinga ongecelo. Embimbiliya li popia okuti: “Omunu akale lukuavo lumbombe.” (1 Petulu 5:5) Ove o sukila oku kala embombe oco o pinge “ongecelo” okuti ku lisandela esunga.

   “Omunu wosi okuti otembo yosi o lisandela esunga omo liovina vĩvi a linga, ka kuata vali ohele. Olonjanja vimue o pitĩla petosi liokuti oku linga ovina vĩvi kokuaye ca sunguluka.”—Heather.

•    Tava ovitangi vi yililako. Embimbiliya li popia okuti: “Yeveleli epindiso.” (Olosapo 8:33) Ku ka lisiõsiõle, pole, tava kepindiso li tunda kolonjali viove.

   “Nda ove o lisiõsiõla omo liepindiso wa tambula, o ka kuata ovitangi. Ca velapo oku tava kepindiso liaco okuti oku tiamisila utima kovina wa pumba hakoko.”—Jason.

•   Tumbulula ekolelo olonjali viove vi ku kuetele. Embimbiliya li popia okuti: “Ene wa longisiwi oku lula omunu wosimbu, una wa tiamẽla kovituwa viene viosimbu.” (Va Efeso 4:22) Nda olonjali viove via limbuka okuti o kasi oku likolisilako oku nõla olonjila via sunguluka, vi ku kolela.

   “Vokuenda kuotembo nda wa nõla olonjia via sunguluka kuenda ku pitulula vali akulueya ove, olonjali viove vi ka ku kolela calua.”—Karen.

 ONUMBI: Likolisilako oku linga ovina viwa oco o lekise okuti wumunu umue wa koleliwa. Eci ci ku kuatisa oku tumbulula ekolelo o va kuetele. Nda olonjali viove via ku sapuila elivala o sukila oku pitĩla konjo, likolisilako oku ci linga. Va tieñela selo poku va sapuila okuti o kasi ale oku enda konjo ndaño wa cilua. Nda wa ci linga olonjali viove vi kolela kokuove.