Anga hẽ Usoma wa Suku Ocina Cimue ci Kasi Vutima Wove?

SIKA

Etambululo Liembibmbiliya

Sio, Usoma wa Suku hekalo limueko vutima Wakristão. a Embimbiliya li tukula ocitumãlo ku sangiwa Usamo waco poku popia hati, “usoma wo kovailu.” (Mateo 4:17) Kũlĩhĩsa ndomo Embimbiliya li lekisa okuti Usoma, uviali umue u kasi kilu.

Usoma wa Suku u kuete olombiali, olonungi, ovihandeleko kuenda ocimãho coku tẽlisa ocipango ca Suku kilu kuenda palo posi.—Mateo 6:10; Esituluilo 5:10.
Uviali ale Usoma wa Suku, u ka viala ‘omanu vosi olofeka kuenda omanu vakualimi a litepa’ voluali. (Daniele 7:13, 14) Unene waco ka wa tundile komanu, pole, wa tunda ku Suku.—Osamo 2:4-6; Isaya 9:7.
Yesu wa popia okuti ovapostolo vaye vakuekolelo va laikele oku likongela kokuaye Vusoma wo kilu oco va ‘tumãle kovialo.’—Luka 22:28, 30.
Usoma u kuete ovanyãli, pole, u ka va nyõla vosi.—Osamo 2:1, 2, 8, 9; 110:1, 2; 1 Va Korindo 15:25, 26.

● Embimbiliya ka li longisa okuti Usoma wa Suku u kasi vovitima vietu poku lekisa okuti owo u pondola oku viala vutimwa womunu. Pole, olio li lekisa okuti, “esapulo Liusoma” ale “Olondaka viwa Viusoma,” vi pondola oku vetiya utima wetu.—Mateo 13:19; 24:14.

Olondaka viokuti “Usoma wa Suku u kasi pokati kene” vi lomboloka nye?

Limue pokati kesunga lieci omanu va kuetele atatahãi a tiamẽla oku ku sangiwa Usoma wa Suku, onjila ndomo Ambimbiliya amue a pongolola ocisonehua ci sangiwa kelivulu lia Luka 17:21. Ndeci, Embimbiliya li Kola li popia ndoco: “Usoma wa Suku u kasi pokati kene.” Oco tu kuate elomboloko liovinimbu evi, tu sukila oku kuata elomboloko liulandu waco.

Usoma wa Suku ka wa kaile vovitima viovanyãli va Yesu vakuacipululu haivo olomondi.

Yesu wa kala oku vangula locimunga cimue ca va Fariseu asongui vetavo, okuti va kala ovanyali vaye vana va sokiyile oku u ponda. (Mateo 12:14; Luka 17:20) Anga hẽ ca sunguluka oku sima okuti Usoma wa Suku wa kala muẽle vovitima via va Fariseu vaco vakuanya? Yesu wa va sapuila hati: “Vokati weyuki ombambe kuenda ovina ka vi likuata locihandeleko.”—Mateo 23:27, 28.

Ambimbiliya akuavo a pongolola lonjila ya suapo olondaka Yesu a popia vi sangiwa kelivulu lia Luka 17:21 viokuti: “Usoma wa Suku u kasi pokati kene.” Usoma wa Suku wa kala la va Fariseu ale ‘pokati’ kavo lonjila yimue yokuti, Yesu wa nõliwa la Suku oco a kale Osoma, wa kala kovaso yavo.—Luka 1:32, 33.

a Atavo alu a longisa okuti, usoma wa Suku u kasi vutima womunu lomunu. Ndeci, ko Estados Unidos etavo lio Batista do Sul, lilongisa okuti “Usoma wa Suku uviali u kasi vutima kuenda komuenyo womunu.” Lonjila yimuamue, Papa Bento XVI velivulu liaye losapi, Jesus de Nazaré wa soneha ndoco: “Usoma wa Suku wiya vutima womanu vana va yevelela.”