Oco. Suku wa kapako afendeli vaye vana va kasi oku vela. Catiamẽla kufendeli umue ukuekolelo, Embimbiliya li popia hati: “Yehova u kolisa eci a kasi pula loku vela.” (Osamo 41:3) Nda o kasi oku liyaka luvei umue ka u kuete esaku, olonumbi evi vitatu vi pondola oku ku kuatisa.

1.   Pinga ongusu vohutililo oco o pandikise. Ove o pondola oku tambula “ombembua ya Suku yina ya piãla olondunge viosi” okuti, yi tepulula asakalalo ove kuenda yi ku kuatisa oku pandikisa.—Va Filipoi 4:6, 7.

2.   Kuata ovisimĩlo via sunguluka. “Utima wa sanjuka ovihemba viwa; utima wa nyumãla u kukutisa akepa.” (Olosapo 17:22) Lilongisa oku kuata esanju, momo esanju ka li ku kuatisa lika eci o kasi oku liyaka lovitangi, pole, li pondolavo oku ku kuatisa kuhayele wove.

3.   Pamisa elavoko liove lio kovaso yoloneke. Elavoko limue lia kolapo li pondola oku ku kuatisa oku kuata esanju ndaño o kasi loku liyaka lovovei ka a kuete esaku. (Va Roma 12:12) Embimbiliya li lombolola eci catiamẽla kotembo yimue okuti, “layimue onungi yi popia yiti: ‘Ndi vela.’” (Isaya 33:24) Suku o ka sakula ovovei ana ka a kuete esaku okuti, laumue uloño woluali u pondola oku u sakula. Embimbiliya li lombolola okuti vana va kuka va ka kala vali amalẽhe kuenda va ka kuata uhayele poku popia hati: “Etimba liaye li tumbuluke vali, li kuate ongusu ndeyi yovutila. Olohõlo viaye vi lisoke vali levi a kaile lavio eci a kala umalẽhe.”—Yovi 33:25.

 Kũlĩhĩsa: Ndaño okuti olombangi Via Yehova vi tava okuti Suku eca ekuatiso, pole, ovio vi sandiliyavo ovihemba vioku sakula ovovei ana ka a kuete esaku. (Marko 2:17) Etu ka tu eci onumbi yovihemba vimue vilikasi; pole, tua nõlapo okuti omunu lomunu o sukila oku nõla eye muẽle onjila ya sunguluka yatiamẽla koku sakuiwa.