Ulandu ukuaĩmo u lekisa okuti vamanji vatãlo va kala vokiye va tipuiwa calua ko Orenburg, ko Rusia, vepuluvi liaco vamanji vo kolupale luaco va endako oco va ka kuatise vamanji vaco va tipuiwa. Vamanji va kasi vokayike vava, Aleksey Budenchuk, Gennadiy German, Roman Gridasov, Feliks Makhammadiyev kuenda Aleksey Miretskiy vo ko Saratov okuti yi kasi ocinãla ci soka 800 kolokilometulu lo Orenburg.

Keteke 15 ya Kayovo wo 2020, asapulo o internet a lekisa okuti olondavululi vio vokayike ko Kolonia Penal No. 1 ko Orenburg via tipula lolombueti vamanji vatãlo vo ko Saratov. Noke yoku tanga esapulo liaco, ocimunga cimue ca vamanjetu ca linga ungende toke ko kolonia penal. Ovo lutõi walua va li lekisa Ndolombangi Via Yehova loku kapa kohele elianjo liavo. Vamanji vaco va pinga kakuenje velombe oco va va sapuile ndomo vamanji vatãlo va kasi. Omo okuti asapulo a lekisile okuti manji Makhammadiyev wa lemehiwile calua kuenda wa kala kosipitali, vamanji vo ko Orenburg va yonguile oku kũlĩha nda eye o kasi lomuenyo ale sio. Ombangulo va kuata lakuenje velombe ya tumãla olowola vivali.

Vamanji ko Orenburg va sokiyavo ocimunga cimue ca vamanji oco camameko oku kuatisa vamanji va kasi vokayike lakãi vavo kuenda vana va kasi oku tata ocitangi cavo. Vamanji ko Orenburg olonjanja vialua va enda oku soneha ovikanda vievetiyo ku vamanji va kala ko kolonia penal kuenda va enda oku eca olombongo oco vi kuatise koku landa okulia kumue kuwa okuti ka ku sangiwa vokayike.

Ocisola kuenda alikolisilo vamanjetu va linga, via eca uvangi unene kolonalavayi vio ko kolonia penal. Ovo va lete ndomo Olombangi Via Yehova vi kasi oku tata vamanjavo ndaño vana okuti lalimue eteke va lisangele.

Ci sanjuisa calua oku yeva esapulo liokuti vamanjetu va kasi oku kuama onumbi Yembimbiliya yi sangiwa ku Va Heveru 13:3 ku popia hati: “Ko ka ivaliko vana va kasi vokayike, ndu okuti wa kalivo vokayike kumue lavo kuenda la vana va tatiwa lãvi, momo vu kasi kumue lavo vetimba limuamue.”