مۇقاۋىدىكى ماۋزۇ | مۇقەددەس كىتاب بىزگە قانداق يېتىپ كەلگەن؟
بۇنى بىلىش مۇھىممۇ؟
مۇقەددەس كىتاب باشقا دىنىي كىتابلاردىن كۆپ پەرقلىنىدۇ. تارىختىن بۇيان، باشقا ھېچقانداق كىتاب ئىنسانلارنىڭ ئىمان-ئېتىقادىغا شۇ قەدەر كۈچلۈك تەسىر قىلالمىغان. باشقا تەرەپتىن، ھېچبىر كىتاب ئۇ كەبى ئىنچىكە تەتقىق قىلىنىپ تەكشۈرۈلمىگەن ۋە قاتتىق تەنقىد قىلىنمىغان.
مەسىلەن، بەزى ئالىملار بۈگۈنكى كۈندىكى مۇقەددەس كىتابنىڭ ئىشەنچىلىك ئىكەنلىكىدىن گۇمانلىنىدۇ. بىر پروفېسسور بۇ ئوي-پىكىرنى چۈشەندۈرۈپ، مۇنداق دېگەن: «بىز ئەسلى نۇسخىسىنى توغرا ئەسلىگە كەلتۈرەلىگەنلىكىمىزگە ئىشەنچ قىلىپ كېتەلمەيمىز. قولىمىزدا پەقەت خاتالىقلارغا تولغان نۇسخىلىرى بار. ئۇلارنىڭ كۆپىنچىسى ئەسلى قوليازما نۇسخىسى يېزىلىپ، يۈزلىگەن يىللار ئۆتكەندىن كېيىن پەيدا بولغان ۋە ئۇلارنىڭ ئىچىدە مىڭلىغان خاتالىقلار بار».
باشقىلار بولسا، ئۆز دىنىي كۆزقارىشى سەۋەبلىك، مۇقەددەس كىتابنىڭ ئىشەنچىلىك ئىكەنلىكىدىن گۇمانلىنىدۇ. مەسىلەن، فايزېل ئىسىملىك كىشى مۇقەددەس كىتاب ئاللادىن كەلگەنلىكىنى، لېكىن ئۇ ئۆزگەرتىلگەنلىكىنى ئۆگەنگەن. ئۇ مۇنداق دەيدۇ: «نەتىجىدە، مېنىڭ بىلەن مۇقەددەس كىتاب ھەققىدە سۆزلەشمەكچى بولغان ئادەملەرگە گۇمان بىلەن قارايدىغان بولدۇم. نېمە دېمىگەن بىلەن، ئۇلارنىڭ قولىدا مۇقەددەس كىتابنىڭ ئەسلى نۇسخىسى يوق، ئۇ ئۆزگەرتىلگەن!»
مۇقەددەس كىتاب ئۆزگەرتىلگەن ياكى ئۆزگەرتىلمىگەنلىكىنى بىلىش مۇھىممۇ؟ ئويلاپ كۆرۈڭ: ئەگەر مۇقەددەس كىتاب ئۆزگەرتىلگەن بولسا، ئۇنىڭدا يېزىلغان ئاجايىپ كېلەچەك ھەققىدىكى ۋەدىلەرگە ئىشىنىشكە بولامدۇ؟ (رىملىقلارغا 15:4). مۇقەددەس كىتابنىڭ ھازىر بار نۇسخىلىرى خاتالىقلارغا تولغان بولسا، ئىش، ئائىلە، خۇداغا ئىبادەت قىلىش دېگەندەك ھاياتتىكى مۇھىم ساھەلەردە ئۇنىڭ پرىنسىپلىرىنى ئىشلىتىپ، قارار چىقىرامسىز؟
گەرچە مۇقەددەس كىتابنىڭ ئەسلى قوليازما نۇسخىسى ساقلىنىپ قالمىغان بولسىمۇ، ئۇنىڭ قەدىمقى نۇسخىلىرى، يەنى مىڭلىغان قوليازما كۆچۈرمىلىرى بار. بۇ قوليازمىلار ئەسىرلەر بويى ۋاقىتنىڭ سىنىقى، مەنئىي قىلىنىش ۋە كەمسىتىلىش ۋە تېكىستىنى ئۆزگەرتىشكە ئۇرۇنۇش قاتارلىق تۈرلۈك ھۇجۇملارغا دۇچ كەلگەن بولسىمۇ، ئۇ قانداق بولۇپ كۈنلىرىمىزگىچە ساقلىنىپ قالغان؟ ئۇنىڭ ساقلىنىپ قالغانلىقى ھازىر قولىمىزدا بار مۇقەددەس كىتابقا بولغان ئىشەنچىمىزنى قانداق كۈچەيتىدۇ؟ بۇ سوئاللارنىڭ جاۋابلىرىنى كېيىنكى ماقالىدىن بىلەلەيسىز.
