7-تەتقىق ماقالىسى
مۇقەددەس كىتابنى ئوقۇشنىڭ كۆپرەك پايدىسىنى كۆرۈڭ
«ئوقۇغانلىرىڭنى قانداق چۈشىنىسەن؟»—لۇقا 10:26.
48-ناخشا ھەر كۈنى يەھۋا بىلەن يۈر!
بۇ ماقالىدە a
1. ئەيسا ئۈچۈن مۇقەددەس يازمىلارنىڭ مۇھىم بولغانلىقىنى نېمە كۆرسىتىپ بېرىدۇ؟
ئەيسانىڭ بەرگەن تەلىملىرىگە قۇلاق سېلىپ ئولتۇرغانلىقىڭىزنى تەسەۋۋۇر قىلىپ كۆرۈڭ. ئۆزىڭىزنى قانداق ھېس قىلغان بولاتتىڭىز؟ ئۇ مۇقەددەس يازمىلاردىن پات-پات ئايەتلەرنى نەقىل كەلتۈرگەن. ئەمەلىيەتتە، ئۇ سۇغا چۆمۈلدۈرۈلگەندىن كېيىن ۋە ئۆلۈشتىن بۇرۇن قىلغان بەزى سۆزلىرىدە، مۇقەددەس كىتابتىكى ئايەتلەرنى نەقىل كەلتۈرگەن b (تەكرار. قا 8:3؛ زەبۇر 31:5؛ لۇقا 4:4؛ 23:46). چۆمۈلدۈرۈلگەن ۋە ئۆلۈشتىن ئاۋۋالقى ئۈچ يېرىم يىل جەريانىدا، ئەيسا دائىم كۆپچىلىك ئالدىدا مۇقەددەس يازمىلارنى ئوقۇغان ۋە ئۇلاردىن نەقىل كەلتۈرۈپ، شۇلارنى چۈشەندۈرگەن ئىدى.—مەتتا 5:17، 18، 21، 22، 27، 28؛ لۇقا 4:16–20.
ئەيسا ھاياتى داۋامىدا ئۆزىنىڭ مۇقەددەس يازمىلارنى ياخشى كۆرىدىغانلىقىنى ۋە ئۇلارنىڭ ئىش-ھەرىكەتلىرىگە تەسىر قىلىشىغا يول قويغانلىقىنى كۆرسەتكەن (2-ئابزاسىغا قاراڭ)
2. ئەيسانىڭ يېشىنىڭ چوڭىيىشىغا ئەگىشىپ، ئۇنىڭ مۇقەددەس يازمىلارنى ياخشى بىلىشىگە نېمە ياردەم بەرگەن؟ (مۇقاۋىدىكى رەسىمگە قاراڭ)
2 ئۇ ۋەز خىزمىتىنى باشلاشتىن خېلى يىللار بۇرۇن، خۇدانىڭ سۆزىنى قايتا-قايتا ئوقۇغان ۋە ئاڭلىغان. بەلكىم، ئۇ ئۆيىدە مەريەم بىلەن يۈسۈپنىڭ پاراڭلىرىدىن دائىم مۇقەددەس كىتابنى نەقىل كەلتۈرگەنلىكىنى ئاڭلىغان c (تەكرار. قا 6:6، 7). شۇنىڭغا ئىشىنىمىزكى، ئەيسا ھەر شەنبە كۈنى ئائىلىسىدىكىلەر بىلەن بىللە ئىبادەتخانىغا بارغان (لۇقا 4:16). ئۇ يەردە مۇقەددەس يازمىلار ئوقۇلغاندا، ئەيسا چوقۇم دىققەت بىلەن قۇلاق سېلىپ ئاڭلىغان بولۇشى مۇمكىن. ۋاقتى كەلگەندە، ئەيسا ئۆزى مۇقەددەس يازمىلارنى ئوقۇشنى ئۆگەنگەن. نەتىجىدە، ئەيسا مۇقەددەس يازمىلارنى ياخشى بىلىپلا قالماي، يەنە ئۇلارنى قەدىرلىگەن ۋە شۇ ئۆگەنگەنلىرىنىڭ ھاياتىغا تەسىر قىلىشىغا يول قويغان. مەسىلەن، ئەيسا ئەمدىلا 12 ياشقا كىرگەندە، ئىبادەتخانىدا يۈز بەرگەن بىر ۋەقەنى ئەسلەپ باقايلى. مۇسا پەيغەمبەرنىڭ قانۇنلىرىنى پىششىق بىلىدىغان ئۇستازلار ئەيسانىڭ چۈشەندۈرۈشلىرى ۋە جاۋابلىرىغا ھەيران قېلىشقان.—لۇقا 2:46، 47، 52.
3. بۇ ماقالىدە، نېمىنى مۇھاكىمە قىلىمىز؟
3 بىزمۇ مۇقەددەس كىتابنى دائىم ئوقۇغىنىمىزدا، خۇدانىڭ سۆزىنى ياخشىراق بىلەلەيمىز ۋە ئۇنى تېخىمۇ سۆيىمىز. بىراق، ئوقۇغانلىرىمىزنىڭ پايدىسىنى كۆرۈش ئۈچۈن نېمە قىلالايمىز؟ ئەيسانىڭ سۆزلىرىدىن نېمە ئىش قىلىشنى ئۆگىنەلەيمىز؟ مەسىلەن، ئۇ قانۇنلارنى ياخشى بىلىدىغان تەۋرات ئۇستازلىرى، پەرىسىيلەر ۋە سادۇقىيلارغا ئېيتقان سۆزلىرىدىن نېمە قىلىشنى ئۆگىنەلەيمىز؟ ئاشۇ دىنىي يېتەكچىلەر دائىم مۇقەددەس يازمىلارنى ئوقۇغان، بىراق ئوقۇغانلىرىنىڭ پايدىسىنى كۆرەلمىگەن. ئەيسا، بۇ كىشىلەر مۇقەددەس كىتابنى ئوقۇپ، پايدىسىنى كۆرەلمىگەنلىكىنىڭ ئۈچ سەۋەبىنى تەكىتلىگەن. ئۇنىڭ ئۇلارغا قىلغان سۆزى مۇنۇ ئۈچ جەھەتتىن ئوقۇش ئىقتىدارىمىزنى ئۆستۈرۈشىمىزگە ياردەم بېرىدۇ: (1) ئوقۇغانلىرىمىزنى چۈشىنىش (2) ئوقۇغانلىرىمىزدىن روھىي خەزىنىلەرنى ئىزدەش ۋە (3) خۇدانىڭ سۆزىنىڭ بىزنى شەكىلگە كەلتۈرۈشىگە يول قويۇش.
ئوقۇغانلىرىڭىزنى چۈشىنىشكە تىرىشىڭ
4. لۇقا 10:25–29 ئايەتلەر، خۇدانىڭ سۆزىنى ئوقۇش ھەققىدە بىزگە نېمىنى ئۆگىتىدۇ؟
4 بىز خۇدانىڭ سۆزىدە ئوقۇغانلىرىمىزنىڭ مەنىسىنى چۈشىنىشنى خالايمىز. بولمىسا ئۇنى ئوقۇشنىڭ بىز ئۈچۈن ھېچقانداق پايدىسى بولماسلىقى مۇمكىن. مەسىلەن، ئەيسانىڭ تەۋرات قانۇنىنى پىششىق بىلىدىغان ئادەم بىلەن قىلغان سۆھبىتىگە دىققەت قىلىپ باقايلى (لۇقا 10:25–29-نى ئوقۇڭ). ئۇ كىشى مەڭگۈلۈك ھاياتلىققا ئېرىشىش ئۈچۈن ئۆزىنىڭ نېمە قىلىشى كېرەكلىكىنى سورىغاندا، ئەيسا ئۇنىڭدىن: «تەۋراتتا نېمە يېزىلغان؟ ئوقۇغانلىرىڭنى قانداق چۈشىنىسەن؟»— دەپ سورىغان. كىشى مۇقەددەس كىتابتىن نەقىل كەلتۈرۈپ، خۇدانى ۋە قوشنىسىنى سۆيۈشى كېرەكلىكىنى ئېيتىپ توغرا جاۋاب بەرگەن (لاۋى. 19:18؛ تەكرار. قا 6:5). بىراق، ئۇنىڭ نېمە دېگەنلىكىگە دىققەت قىلىڭ: «ئۇنداقتا، مېنىڭ قوشنام كىم؟». بۇ كىشى ئوقۇغانلىرىنىڭ ھەقىقىي مەنىسىنى چۈشەنمەيدىغانلىقىنى كۆرسەتكەن ئىدى. نەتىجىدە، ئۇ ئوقۇغانلىرىنى ھاياتىدا قانداق ئەمەلىي قوللىنىشنى بىلمىگەن.
بىز ئوقۇغانلىرىمىزنى چۈشىنىشنى ئۆگىنەلەيمىز
5. دۇئا قىلىش ۋە ئاستا ئوقۇش ئوقۇغانلىرىمىزنى چۈشىنىشىمىزگە قانداق ياردەم بېرىدۇ؟
5 ياخشى ئوقۇش ئادىتىنى يېتىلدۈرۈش ئارقىلىق خۇدانىڭ سۆزىنى چۈشىنىش ئىقتىدارىمىزنى ئاشۇرالايمىز. بۇ يەردە بىزگە ياردەم بېرەلەيدىغان بىرقانچە مەسلىھەتلەر بار. ئوقۇشنى باشلاشتىن بۇرۇن دۇئا قىلىڭ. بىز مۇقەددەس كىتابنى چۈشىنىش ئۈچۈن يەھۋانىڭ ياردىمىگە مۇھتاج. شۇڭا، زېھىنىمىزنى يىغىش ئۈچۈن ئۇنىڭدىن مۇقەددەس روھنى سورىيالايمىز. ئاندىن كېيىن، ئاستىراق ئوقۇشقا ھەرىكەت قىلىڭ. بۇ ئوقۇغانلىرىڭىزنى چۈشىنىشىڭىزگە ياردەم بېرىدۇ. يۇقىرى ئاۋازدا ئوقۇش ياكى مۇقەددەس يازمىلارنىڭ ئاۋازلىق ئوقۇشلىرىغا ئەگىشىش سىز ئۈچۈن پايدىلىق بولۇشى مۇمكىن. ئەگەر بىر تەرەپتىن ئاۋازلىق ئوقۇشنى ئاڭلىسىڭىز ۋە يەنە بىر تەرەپتىن مۇقەددەس كىتابقا قارىسىڭىز، بۇ ئوقۇغانلىرىڭىزنى چۈشىنىشىڭىزگە، ئۇنى ئېسىڭىزدە ساقلىشىڭىزغا ۋە كۆپرەك نەرسىلەرنى ئۆگىنىشىڭىزگە ياردەم بېرىدۇ (يەشۇ. 1:8). مۇقەددەس كىتابنى ئوقۇشنى تاماملىغاندىن كېيىن، بۇ قىممەتلىك سوۋغات ئۈچۈن يەھۋاغا قايتا دۇئا قىلىپ، مىننەتدارلىقىڭىزنى بىلدۈرۈڭ ۋە ئوقۇغانلىرىڭىزنى ئەمەلىي قوللىنىش ئۈچۈن ئۇنىڭدىن ياردەم سوراڭ.
نېمە ئۈچۈن خاتىرە يېزىش ئوقۇغانلىرىڭىزنى چۈشىنىشىڭىزگە ۋە ئۇنى ئەستە ساقلىشىڭىزغا ياردەم بېرەلەيدۇ؟ (6-ئابزاسقا قاراڭ)
6. مۇقەددەس يازمىلارنى ئوقۇغاندا، ئۆز-ئۆزىڭىزدىن سوئاللارنى سوراش ۋە قىسقىچە خاتىرىلەرنى يېزىپ قويۇش سىزگە قانداق ياردەم بېرەلەيدۇ؟ (رەسىمگە قاراڭ)
6 مۇقەددەس كىتابنى تېخىمۇ ياخشىراق بىلىشكە ياردەم بېرىدىغان يەنە ئىككى مەسلىھەت بار. ئوقۇغانلىرىڭىز ھەققىدە ئۆز-ئۆزىڭىزدىن سوئاللارنى سوراڭ. مەلۇم بىر ئۈزۈندە ئۈستىدە ئويلانغاندا، ئۆزىڭىزدىن مۇنداق سورىسىڭىز بولىدۇ: ئاساسلىق شەخسلەردىن كىملەر بار؟ كىم سۆز قىلىۋاتىدۇ؟ كىمگە سۆز قىلىۋاتىدۇ ۋە نېمە ئۈچۈن؟ بۇ ئىشلار قەيەردە ۋە قاچان يۈز بەرگەن؟ شۇنداق سوئاللارنى سوراش، ئۈزۈندىدىكى ئاساسىي مەزمۇنلارنى چۈشىنىپ مېڭىشىڭىزغا ياردەم بېرىدۇ. ئۇنىڭدىن باشقا، ئوقۇغان ۋاقتىڭىزدا قىسقىچە خاتىرىلەرنى يېزىپ قالدۇرۇڭ. يازغىنىڭىزدا، شۇلار ھەققىدە كۆپرەك ئويلايسىز. بۇ ياخشىراق چۈشىنىشىڭىزگە ياردەم بېرىدۇ. يېزىش يەنە ئوقۇغانلىرىڭىزنى ئەستە ساقلىشىڭىزغا ياردەم بېرىدۇ. سوئاللارنى، ئىزدىنىشنىڭ نەتىجىلىرىنى، ئاساسىي نۇقتىلارنى، ئوقۇغانلىرىڭىزنى قانداق ئىشلىتەلەيدىغانلىقىڭىزنى ياكى ئۆز ھېس-تۇيغۇلىرىڭىزنى ئاددىيلا يېزىپ قويسىڭىز بولىدۇ. بۇنداق خاتىرىلەرنى يېزىپ قويسىڭىز، خۇدا ئۆز سۆزى ئارقىلىق شەخسەن سىزگە كۆڭۈل بۆلۈۋاتقانلىقىنى ھېس قىلىشىڭىز مۇمكىن.
7. قانداق قابىلىيەتكە مۇھتاج بولىمىز ۋە نېمە ئۈچۈن؟ (مەتتا 24:15)
7 خۇدانىڭ سۆزىنى ئوقۇغاندا، ئۇنى چۈشىنىشىمىز ئۈچۈن زۆرۈر بولغان پەرقلەندۈرۈش قابىلىيىتىنىڭ مۇھىملىقىنى ئەيسا ئېنىق كۆرسەتكەنىدى (مەتتا 24:15-نى ئوقۇڭ). پەرقلەندۈرۈش دېگەن نېمە؟ بۇ بىر ئوي-پىكىر بىلەن يەنە بىر ئوي-پىكىر ئارىسىدا قانداق باغلىنىش ياكى پەرق بارلىقىنى چۈشىنىش ۋە نېمە ئېنىق ئوتتۇرىغا قويۇلمىغانلىقىنى دەرھال كۆرۈپ يېتىش ئىقتىدارى. ئەيسا ئېيتىپ ئۆتكەندەك، بىز مۇقەددەس كىتابتىكى بېشارەتلەرنى ئەمەلگە ئاشۇرىدىغان ۋەقەلەرنى پەرقلەندۈرۈش ئۈچۈن ئەقىل-ئىدراكقا مۇھتاج. شۇنىڭدەك، مۇقەددەس كىتابتىن ئوقۇغانلىرىمىزنىڭ تولۇق پايدىسىنى كۆرۈش ئۈچۈن ھەم بۇنداق ئىقتىدارغا مۇھتاج بولىمىز.
8. ئەقلىڭىزنى ئىشلىتىپ، پەرقلەندۈرۈپ ئوقۇش ئۈچۈن نېمە قىلالايسىز؟
8 يەھۋا ئۆز خىزمەتچىلىرىگە ئەقىل-ئىدراك بېرىدۇ. شۇڭا، ئۇنىڭغا دۇئادا يالۋۇرۇپ، بۇ قابىلىيەتنى ئۆستۈرۈش ئۈچۈن ياردەم سوراڭ (پەند. نە 2:6). دۇئايىڭىزغا ماس يەنە نېمە قىلالايسىز؟ ئوقۇغانلىرىڭىز ئۈستىدە كۆڭۈل قويۇپ چوڭقۇر مۇلاھىزە قىلىڭ ۋە بۇنىڭ سىز بىلىدىغان باشقا ئىشلار بىلەن قانداق باغلىنىشى بارلىقىغا دىققەت قىلىڭ. كۆپرەك ياردەمگە ئېرىشىش ئۈچۈن «يەھۋا گۇۋاھچىلىرىنىڭ يول كۆرسەتكۈچى»گە ئوخشاش مۇقەددەس كىتابنى تەتقىق قىلىش قوراللىرىنى ئىشلىتىپ كۆرۈڭ. بۇ قوراللار مۇقەددەس كىتابتىكى بىر ئۈزۈندىنى چۈشىنىشىڭىزگە ۋە ھاياتىڭىزدا ئەمەلىي قوللىنىدىغان ئۇسۇللارنى كۆرۈپ يېتىشىڭىزگە ياردەم بېرىدۇ (ئىبرانىي. 5:14). ئەقلىڭىزنى ئىشلىتىپ، پەرقلەندۈرۈپ ئوقۇسىڭىز، مۇقەددەس كىتابقا بولغان ئىشەنچىڭىز تېخىمۇ كۈچىيىدۇ.
روھىي خەزىنىلەرنى تېپىش ئۈچۈن ئوقۇڭ
9. سادۇقىيلار مۇقەددەس كىتابتىكى قايسى مۇھىم ھەقىقەتنى قوبۇل قىلمىغان؟
9 سادۇقىيلار ئىبرانىي يازمىلارنى، يەنى مۇقەددەس كىتابنىڭ ئالدىنقى بەش كىتابىنى، پىششىق بىلگەن. ئەمما، ئۇلار خۇدانىڭ بۇ سۆزلىرىدىكى مۇھىم ھەقىقەتلەرنى قوبۇل قىلمىغان. مەسىلەن، سادۇقىيلار قايتا تىرىلىش ھەققىدە ئەيسادىن سورىغاندا، ئۇنىڭ قانداق جاۋاب بەرگەنلىكىنى ئويلاپ كۆرەيلى. ئۇ ئۇلاردىن شۇنداق سورىغان: «مۇسا پەيغەمبەرنىڭ كىتابىدىكى تىكەنلىكنىڭ كۆيۈشى ھەققىدىكى باياننى سىلەر ئوقۇمىدىڭلارمۇ؟ خۇدا مۇساغا: «مەن ئىبراھىمنىڭ خۇداسى، ئىسھاقنىڭ خۇداسى ۋە ياقۇپنىڭ خۇداسى»،— دېگەن» (ماركۇس 12:26). گەرچە سادۇقىيلار بۇ مەزمۇننى نۇرغۇن قېتىم ئوقۇغان بولسىمۇ، ئەيسانىڭ سوئالى ئۇلارنىڭ مۇقەددەس كىتابتىكى مۇھىم بىر ھەقىقەتنى، يەنى قايتا تىرىلىش تەلىمىنى، قوبۇل قىلمىغانلىقىنى ئاشكارىلىغان.—ماركۇس 12:27؛ لۇقا 20:38 d.
10. ئوقۇغاندا چوقۇم نېمىگە دىققەت قىلىشىمىز كېرەك؟
10 بۇنىڭدىن نېمىنى ئۆگىنەلەيمىز؟ مۇقەددەس كىتابنى ئوقۇغان ۋاقتىمىزدا بىر ئايەت ياكى ئۈزۈندىنىڭ مەزمۇنىدىن نېمىلەرنى ئۆگىنەلەيدىغانلىقىمىزغا ئالاھىدە دىققەت قىلىشىمىز كېرەك. پەقەت ئاساسىي تەلىماتلارنى ئەمەس، بەلكى بەزى يوشۇرۇن ھەقىقەتلەرنى ۋە پرىنسىپلارنى كۆرۈپ يېتىشنى خالايمىز.
11. 2-تىموتىي 3:16، 17-ئايەتلەر، مۇقەددەس كىتابتىن روھىي خەزىنىلەرنى تېپىشىڭىزغا قانداق ياردەم بېرەلەيدۇ؟
11 مۇقەددەس كىتابنى ئوقۇغاندا، روھىي خەزىنىلەرنى قانداق تاپالايسىز؟ 2-تىموتىي 3:16، 17-ئايەتلەردە، نېمە يېزىلغانلىقىغا دىققەت قىلىڭ (ئوقۇڭ). دىققەت قىلسىڭىز، پۈتۈن يازمىلار خۇدا تەرىپىدىن روھلاندۇرۇلغان ۋە (1) تەلىم بېرىش ئۈچۈن، (2) ئاشكارىلاش ئۈچۈن، (3) تۈزىتىش ئۈچۈن، ۋە (4) ھەققانىيلىقتا تەربىيىلەش ئۈچۈن پايدىلىقتۇر. مۇقەددەس كىتابتىكى ئادەتتە كۆپ قوللانمايدىغان كىتابلاردىنمۇ بۇ تۆت جەھەتتىن پايدىغا ئېرىشەلەيمىز. بۇ ئوقۇغان ئۈزۈندىلەر يەھۋا، ئۇنىڭ مەقسىتى ياكى قائىدە-پرىنسىپلىرى ھەققىدە نېمىلەرنى ئۆگىتىدىغانلىقىنى ئويلاپ كۆرۈڭ. قانداق تەنبىھ بېرىدىغانلىقى توغرىسىدا مۇلاھىزە قىلىڭ. ئايەتلەرنىڭ سىزگە خاتا خاھىش ياكى كۆزقاراشلارنى بايقاش ۋە ئۇلارنى رەت قىلىش، شۇنداقلا سادىقلىق بىلەن توغرا يولدا مېڭىشىڭىزغا قانداق ياردەم بېرەلەيدىغانلىقىغا دىققەت قىلىڭ. مەسىلەن، شۇ ئوقۇغان ئۈزۈندىلەر ۋەز خىزمەتتە ئۇچراتقان بىرىنىڭ خاتا كۆز قارىشىنى توغرىلىشىڭىزغا، ھەمدە سىزنى تەربىيىلەپ، يەھۋانىڭ ئوي-پىكىر قىلىش ئۇسۇلىنى ئۆگىنىشىڭىزگە قانداق ياردەم بېرىدىغانلىقىنى كۆرۈپ يېتىڭ. مۇشۇ تۆت جەھەتتىكى پايدىنى ئېسىڭىزدە تۇتسىڭىز، مۇقەددەس كىتابنى ئوقۇش روھىي خەزىنىلىرىڭىزنى كۆپەيتىشكە ياردەم بېرىدۇ.
ئوقۇغانلىرىڭىزنىڭ سىزنى شەكىلگە كەلتۈرۈشىگە يول بېرىڭ
12. نېمە ئۈچۈن ئەيسا پەرىسىيلەردىن «سىلەر ئوقۇمىدىڭلارمۇ؟» دەپ سورىغان؟
12 ئەيسا پەرىسىيلەرنىڭ مۇقەددەس كىتابقا بولغان كۆز قارىشىنىڭ خاتا ئىكەنلىكىنى ئاشكارىلاش ئۈچۈن، «سىلەر ئوقۇمىدىڭلارمۇ؟» دېگەن سوئالنى سورىغان (مەتتا 12:1–7) e. پەرىسىيلەر بىر قېتىم ئەيسانىڭ شاگىرتلىرىنىڭ دەم ئېلىش كۈنىگە خىلاپلىق قىلغانلىقىنى ئوتتۇرىغا قويغان. ئەيسا جاۋاب بېرىپ، مۇقەددەس كىتابتىكى ئىككى مىسالنى تىلغا ئالغان. ئۇ ھوشىيا كىتابىدىن بىر ئايەتنى نەقىل كەلتۈرۈپ، پەرىسىيلەرنىڭ دەم ئېلىش كۈنىنىڭ ھەقىقىي مەنىسىنى چۈشەنمەي، مېھىر-شەپقەت كۆرسەتمىگەنلىكىنى ئېيتقان. نېمە ئۈچۈن بۇ كىشىلەر خۇدانىڭ سۆزىنى ئوقۇسىمۇ، ئاشۇ سۆزلەر ئۇلارغا تەسىر قىلمىغان؟ چۈنكى، ئۇلار ئۆزىگە ئەمەس، باشقىلارغا تەنبىھ بېرىش ۋە ئۆز-ئۆزىنى كۆرسىتىش ئۈچۈن ئوقۇغان. ئۇلارنىڭ كۆز قارىشى ئۇلارنى ئوقۇغانلىرىنى چۈشىنىشتىن توسۇپ قويغان.—مەتتا 23:23؛ يۇھاننا 5:39، 40.
13. مۇقەددەس كىتابنى قانداق كۆز قاراش بىلەن ئوقۇشىمىز كېرەك ۋە نېمە ئۈچۈن؟
13 ئەيسانىڭ سۆزىدىن بىز مۇقەددەس كىتابنى توغرا كۆز قاراش بىلەن ئوقۇشىمىز كېرەكلىكىنى ئۆگىنىمىز. پەرىسىيلەردىن پەرقلىق بولۇش ئۈچۈن، چوقۇم سەمىمىي ۋە ئۆگىنىشكە تەييار بولۇشىمىز لازىم. چوقۇم خۇدا سۆزىنىڭ قەلبىمىزگە تېرىلىشىنى مۇلايىملىق بىلەن قوبۇل قىلىشىمىز كېرەك (ياقۇپ 1:21). ئەگەر مۇلايىم بولساق، قەلبىمىزگە تېرىلغان خۇدا سۆزىنىڭ چوڭقۇر يىلتىز تارتىشىغا يول قويىمىز. باشقىلارنى تەنقىدلەش ياكى مەغرۇرلۇق روھىدىن ساقلانساق، مۇقەددەس روھنىڭ ياردىمىدە رەھىم-شەپقەتلىك، كۆيۈمچان، سۆيگۈ-مۇھەببەتلىك كىشى بولالايمىز.
خۇدا سۆزىنىڭ بىزنى شەكىلگە كەلتۈرۈشىگە يول قويغان-قويمىغانلىقىمىزنى قانداق ئېنىقلىيالايمىز؟ (14-ئابزاسقا قاراڭ) f
14. مۇقەددەس كىتابنىڭ شەكىلگە كەلتۈرۈشىگە يول قويغان-قويمىغانلىقىمىزنى قانداق بىلەلەيمىز؟ (رەسىملەرگە قاراڭ)
14 باشقىلارغا قانداق مۇئامىلىدە بولۇشىمىز خۇدا سۆزىنىڭ بىزنى شەكىلگە كەلتۈرۈشىگە يول قويغان-قويمىغانلىقىمىزنى كۆرسىتىپ بېرەلەيدۇ. پەرىسىيلەر خۇدا سۆزىنىڭ تەسىر قىلىشىغا يول قويمىغاچ، نەتىجىدە بىگۇناھ كىشىلەرنى ئەيىبلىگەن (مەتتا 12:7). خۇددى شۇنىڭغا ئوخشاش، بىزنىڭ باشقىلارغا قانداق كۆز قاراشتا بولۇشىمىز، خۇدا سۆزىنىڭ بىزنى شەكىلگە كەلتۈرۈشىگە يول قويغان-قويمىغانلىقىمىزنى كۆرسىتىپ بېرىدۇ. مەسىلەن، بىز باشقىلارنىڭ ياخشى تەرەپلىرىنى كۆرگەندە، ئۇلارنى تىلغا ئېلىشقا تەييارمۇ ياكى ئۇلارنىڭ كەمچىلىكىنى دەرھال كۆرسىتىشكە ئالدىرايمىزمۇ؟ بىز رەھىمدىل ۋە كەچۈرۈمچان بولۇشقا تەييارمۇ ياكى ئاچچىقلىنىپ، باشقىلارنى تەنقىدلەيمىزمۇ؟ مۇشۇ سوئاللارغا بەرگەن جاۋابىمىز، مۇقەددەس كىتابتىن ئوقۇغانلىرىمىزنىڭ ئۆز ئوي-پىكىرلىرىمىزنى، ھېس-تۇيغۇلىرىمىزنى ۋە ئىش-ھەرىكەتلىرىمىزنى شەكىلگە كەلتۈرۈشىگە يول قويغان-قويمىغانلىقىمىزنى كۆرسىتىپ بېرىدۇ.—1-تىموت. 4:12، 15؛ ئىبرانىي. 4:12.
خۇدانىڭ سۆزىنى ئوقۇش شاد-خۇراملىققا ئېرىشتۈرىدۇ
15. ئەيسا مۇقەددەس يازمىلارغا قانداق كۆز قاراشتا بولغان؟
15 ئەيسا مۇقەددەس يازمىلارنى ئوقۇشنى ياخشى كۆرگەن ۋە ئۇنىڭ ھېس-تۇيغۇلىرى زەبۇر 40:8-ئايەتتىكى سۆزلەر بىلەن مۇنداق ئىپادىلەنگەن: «ئەي خۇدايىم، ئىرادەڭنى ئورۇنداش خۇشاللىقىمدۇر، يېزىلغان قانۇننىڭ قەلبىمگە چوڭقۇر». ئەيسا مۇقەددەس يازمىلارنى ئوقۇشنى ياخشى كۆرگەچ، شاد-خۇراملىق ئىچىدە، خۇداغا ئوڭۇشلۇق خىزمەت قىلالىغان. ئەگەر خۇدا سۆزىنى قەلبىمىزگە تەسىر قىلدۇرۇش ئۈچۈن تىرىشساق، بىزمۇ خۇشاللىقتىن ۋە مۇۋەپپەقىيەتتىن بەھرىمەن بولالايمىز.—زەبۇر 1:1–3.
16. خۇدا سۆزىنى ئوقۇشنىڭ تېخىمۇ كۆپرەك پايدىسىنى كۆرۈش ئۈچۈن نېمە قىلماقچىسىز؟ (« ئەيسانىڭ سۆزلىرى ئوقۇغانلىرىڭىزنى چۈشىنىشىڭىزگە ياردەم بېرىدۇ» دېگەن رامكىغا قاراڭ)
16 ئەيسانىڭ سۆزى ۋە ئۈلگىسىگە ماس مۇقەددەس كىتابنى ئوقۇش ماھارىتىمىزنى ئۆستۈرەيلى. دۇئا قىلىش، ئاستىراق ئوقۇش، سوئاللارنى سوراش ۋە قىسقىچە خاتىرە يېزىش ئارقىلىق مۇقەددەس كىتابتىكى ئۈزۈندىلەرنى چۈشىنىش ماھارىتىمىزنى ئۆستۈرەلەيمىز. بىز مۇقەددەس كىتابقا ئاساسلانغان نەشرىي ماتېرىياللارنىڭ ياردىمىدە ئوقۇغانلىرىمىزنى ئىخلاس بىلەن چوڭقۇر مۇلاھىزە قىلىش ئارقىلىق پەرقلەندۈرۈش قابىلىيىتىمىزنى ئىشلىتەلەيمىز. ھەتتا كۆپ قوللانمىغان مۇقەددەس كىتابتىكى ئۈزۈندىلەردىن روھىي خەزىنىلەرنى ئىزدەپ ئوقۇساق، مۇقەددەس يازمىلارنى تېخىمۇ ياخشىراق قوللىنىشنى ئۆگىنەلەيمىز. ئوقۇغاندا توغرا كۆز قاراشنى ساقلاشقا تىرىشساق، خۇدا سۆزىنىڭ بىزنى شەكىلگە كەلتۈرۈشىگە يول قويالايمىز. بۇ ئۇسۇللارنى قوللانساق، مۇقەددەس كىتابنى ئوقۇشنىڭ تېخىمۇ كۆپرەك پايدىسىنى كۆرىمىز ۋە يەھۋاغا تېخىمۇ يېقىنلىشالايمىز.—زەبۇر 119:17، 18؛ ياقۇپ 4:8.
43-ناخشا ھوشيار تۇر، چىڭ تۇر ۋە قەيسەر بول!
a بىز يەھۋانىڭ خىزمەتچىلىرى، ھەر كۈنى ئۇنىڭ سۆزىنى ئوقۇشقا تىرىشىمىز. نۇرغۇنلىغان باشقا كىشىلەرمۇ مۇقەددەس كىتابنى ئوقۇيدۇ. بىراق، ئۇلار ئوقۇغانلىرىنى چۈشەنمەيدۇ. ئەيسا ياشىغان زاماندىمۇ بەزى كىشىلەر شۇنداق ئىدى. خۇدا سۆزىنى ئوقۇغانلار ھەققىدە ئەيسانىڭ ئېيتقانلىرىنى مۇھاكىمە قىلىپ، مۇقەددەس كىتابنى ئوقۇشنىڭ تېخىمۇ كۆپرەك پايدىسىنى كۆرۈشكە ياردەم بېرىدىغان بەزى نەرسىلەرنى ئۆگىنىمىز.
b ئەيسا چۆمۈلدۈرۈلگەن ۋە مۇقەددەس روھ بىلەن مەسىھ قىلىنغان ۋاقىتتا، ئۇنىڭ ئىنسان سۈپىتىدە يەرگە كېلىشتىن بۇرۇنقى ھاياتى ئېسىگە كەلگەن.—مەتتا 3:16.
c مەريەم مۇقەددەس يازمىلارنى ئوبدان بىلگەن ۋە ئۇلارنى پات-پات نەقىل كەلتۈرگەن (لۇقا 1:46–55). يۈسۈپ بىلەن مەريەمنىڭ مۇقەددەس يازمىلارنى سېتىۋېلىشقا پۇلى يوق بولغان بولۇشى مۇمكىن. ئۇلار خۇدانىڭ سۆزى ئىبادەتخانىدا ئوقۇلغاندا، چوقۇم ئەستايىدىل ئاڭلىغان. شۇڭا، كېيىن ئۇلار ئۇنى ئېسىگە ئالالىغان.
d «كۈزىتىش مۇنارى»، 2013-يىل، 1-فېۋرال سانىدىكى «خۇداغا يېقىنلىشىڭ—ئۇ تىرىكلەرنىڭ خۇداسىدۇر» (باشقا تىلدا) ناملىق ماقالىنى ئوقۇڭ.
e مەتتا 19:4–6-ئايەتلەرنىمۇ ئوقۇڭ. بۇ ئايەتلەردە، ئەيسا پەرىسىيلەردىن: «سىلەر ئوقۇمىدىڭلارمۇ؟»— دەپ سورىغان. گەرچە ئۇلار يارىتىلىش توغرۇلۇق ئوقۇغان بولسىمۇ، ئەمما ئوقۇغانلىرى خۇدانىڭ نىكاھقا بولغان كۆز قارىشى توغرىسىدا نېمىلەرنى ئۆگىتىدىغانلىقىنى نەزەرگە ئالمىغان.
f سۈرەتتە: ئىبادەت يىغىلىشى جەريانىدا، ئاۋازنى تەڭشەش ياكى فىلىم قويۇشقا مەسئۇل بۇرادەرلەردىن بىرى بىرنەچچە قېتىم خاتا قىلىپ قويغان بولسىمۇ، بۇرادەرلەر ئۇنىڭ خاتالىقىغا دىققەت قاراتماي، يىغىلىشتىن كېيىن كۆرسەتكەن تىرىشچانلىقى ئۈچۈن ئۇنى ماختىدى.
