46-تەتقىق ماقالىسى
يەھۋا يەر يۈزى جەننەتكە ئايلىنىدىغانلىقىغا كاپالەت بېرىدۇ
«كىمكى يەر يۈزىدە ئۆزى ئۈچۈن بەرىكەت تىلىسە، ھەقىقەتنىڭ خۇداسى ئۇنى بەرىكەتلەر».—يەشايا 65:16.
152-ناخشا كۈچىمىز، ئۈمىدىمىز ۋە يار-يۆلىگىمىز
بۇ ماقالىدە: a
1. يەشايا پەيغەمبەر ئىسرائىللارغا قانداق پەيغەمبەرلىك سۆزلەر ئېيتقان؟
يەشايا پەيغەمبەر يەھۋانـى «ھـەقىقەتنىـڭ خۇداسى» دەپ تەسۋىرلىگەن. «ھەقىقەت» دەپ تەرجىمە قىلىنغان سۆزنىڭ سۆزمۇ-سۆز مەنىسى «ئامىن» (يەشايا 65:16). «ئامىن» سۆزى «شۇنداق بولسۇن» ياكى «ئەلۋەتتە شۇنداق» دېگەننى بىلدۈرىدۇ. مۇقەددەس كىتابتا «ئامىن» سۆزى يەھۋا ياكى ئەيسا ھەققىدە سۆز بولغاندا، بىر نەرسىنىڭ راستلىقىغا كاپالەت بەرگەن. شۇڭا، يەشايانىڭ ئىسرائىللارغا قىلغان سۆزى ناھايىتى ئېنىق ئىدى: يەھۋانىڭ ئالدىن ئېيتقانلىرى ھەمىشە ئىشەنچىلىك. يەھۋا ئۆزىنىڭ ھەربىر ۋەدىسىنى ئەمەلگە ئاشۇرۇش ئارقىلىق بۇ ھەقىقەتنى ئىسپاتلىغان.
2. يەھۋانىڭ كېلەچىكىمىزگە مۇناسىۋەتلىك ۋەدىلىرىگە نېمە ئۈچۈن ئىشىنىمىز ۋە قايسى سوئاللارنى مۇھاكىمە قىلىمىز؟
2 بىزمۇ يەھۋانىڭ كېلەچىكىمىز ھەققىدە بەرگەن ۋەدىلىرىگە ئىشەنچ قىلالايمىزمۇ؟ يەشايا پەيغەمبەرنىڭ زامانىدىن تەخمىنەن 800 يىل ئۆتكەندىن كېيىن، ئەلچى پاۋلۇس يەھۋانىڭ ۋەدىلىرى نېمە ئۈچۈن ھەردائىم ئىشەنچىلىك ئىكەنلىكىنى چۈشەندۈرگەن. ئۇ: «خۇدا يالغان ئېيتالمايدۇ» دەپ يازغانىدى (ئىبرانىي. 6:18). خۇددى بىر بۇلاق ھەم تاتلىق ھەم تۇزلۇق سۇنى چىقىرالمىغاندەك، ھەقىقەتنىڭ مەنبەسى بولغان يەھۋا خۇدامۇ يالغان سۆزلىمەيدۇ. شۇڭا، بىز يەھۋا خۇدانىڭ ئېيتقان بارچە سۆزلىرىگە، يەنى كېلەچىكىمىز توغرۇلۇق ئېيتقان بارلىق ۋەدىلىرىگە تولۇق ئىشەنچ قىلالايمىز. بۇ ماقالىدە، مۇنۇ سوئاللار ھەققىدە مۇھاكىمە قىلىمىز: يەھۋا كېلەچىكىمىز ھەققىدە نېمىلەرنى ۋەدە قىلغان؟ ئۇ ئۆزىنىڭ ۋەدىسىنى ئەمەلگە ئاشۇرىدىغانلىقى ھەققىدە قانداق كاپالەت بېرىدۇ؟
يەھۋا قانداق ۋەدىلەرنى بەرگەن؟
3. (1) خۇدانىڭ خىزمەتچىلىرى قايسى ۋەدىلەرنى ياخشى كۆرىدۇ؟ (ۋەھىيلەر 21:3، 4) (2) مۇشۇ ۋەدە توغرۇلۇق باشقىلارغا ئېيتقاندا، بەزىلەر قانداق جاۋاب قايتۇرىدۇ؟
3 ھازىر خۇدا خىزمەتچىلىرى تۆت كۆزى بىلەن تەشنا بولۇۋاتقان ۋەدە توغرىسىدا مۇھاكىمە قىلىمىز (ۋەھىيلەر 21:3، 4-نى ئوقۇڭ). يەھۋا «ئۆلۈم يەنە بولمايدۇ، نە ماتەم، نە پەرياد ۋە ئازاب-ئوقۇبەت باشقا بولمايدۇ» دەپ ۋەدە بەرگەن. نۇرغۇنلىرىمىز باشقىلارغا ۋەز قىلغاندا، كىشىنى ھاياجانغا سالىدىغان جەننەت ھەققىدىكى مۇشۇ ئايەتنى ئوقۇيمىز. بەزى كىشىلەر بۇنىڭغا قانداق ئىنكاس قايتۇرىدۇ؟ ئۇلار: «ئۇ قۇلاققا ھەقىقەتەن خۇش ياقىدىغان، ئەمما ئەمەلگە ئاشمايدىغان ئىشلار»،— دېيىشى مۇمكىن.
4. (1) يەھۋا نېمىلەرنى بىلگەن ۋە نېمە ئىش بولىدىغانلىقىنى ئالدىن كۆرگەن؟ (2) ۋەدە بېرىشتىن باشقا، يەھۋا يەنە نېمە قىلغان؟
4 ئەلچى يۇھاننا جەننەت توغرۇلۇق بۇ ۋەدىنى يازغاندا، يەھۋا خۇدا بۈگۈنكى كۈندە بىزنىڭ پادىشاھلىق خۇش خەۋىرىنى ئېيتقاندا، ئادەملەرگە بۇ ئۈمىد ھەققىدە سۆزلەيدىغانلىقىمىزنى بىلگەن. ئۇنىڭدىن باشقا، يەھۋا يەنە «يېڭى ئىشلار» توغرىسىدىكى بۇ ۋەدىگە، نۇرغۇن كىشىلەرنىڭ ئىشىنىشى قىيىن بولىدىغانلىقىنى ئالدىن كۆرگەن ئىدى (يەشايا 42:9؛ 60:2؛ 2-كورىنت. 4:3، 4). ئۇنداقتا، بىز ۋەھىيلەر 21:3، 4-ئايەتلەردە تىلغا ئېلىنغان بەرىكەتلەرنىڭ ئەمەلگە ئاشىدىغانلىقىغا باشقىلارنى ۋە ئۆزىمىزنى قانداق ئىشەندۈرەلەيمىز؟ يەھۋا بۇ ئاجايىپ ۋەدىلەرنى بېرىپلا قالماي، يەنە ئۇنىڭغا ئىشىنىشىمىزگە ياردەم بېرىدىغان دەلىل-ئىسپاتلارنى تەمىنلەپ بەرگەن. بۇ قانداق دەلىل-ئىسپاتلار؟
يەھۋا ۋەدىلىرىنى ئەمەلگە ئاشۇرىدىغانلىقىغا كاپالەت بېرىدۇ
5. خۇدانىڭ جەننەت توغرىسىدىكى ۋەدىسىگە ئىشىنىشىمىزنىڭ قانداق سەۋەبلىرى بار ۋە ئۇلارنى نەدىن تاپالايمىز؟
5 تۆۋەندىكى ئايەتلەردىن، يەھۋانىڭ جەننەت توغرىسىدا قىلغان ۋەدىسىگە ئىشىنىشىمىزنىڭ بەزى سەۋەبلىرىنى تاپىمىز. «تەختتە ئولتۇرغۇچى مۇنداق دېدى: ‹مانا، مەن ھەممە نەرسىلەرنى يېڭىلاۋاتىمەن›. ئۇ يەنە: ‹يېزىپ قويغىن، چۈنكى بۇ سۆزلەر ئىشەنچىلىك ۋە ھەقتۇر›،— دېدى. يەنە ئۇ ماڭا: ‹ئۇلار ھەممىسى ئەمەلگە ئاشتى! مەن ئالفا ۋە ئومېگا؛ باش ۋە ئاخىردۇرمەن›».—ۋەھىي. 21:5، 6.
6. نېمە ئۈچۈن ۋەھىيلەر 21:5، 6-ئايەتلەردە خاتىرىلەنگەن كاپالەتلەر خۇدانىڭ ۋەدىسىگە بولغان ئىشەنچىمىزنى كۈچەيتىدۇ؟
6 نېمە ئۈچۈن مۇشۇ سۆزلەر خۇدانىڭ ۋەدىسىگە بولغان ئىشەنچىمىزنى كۈچەيتىدۇ؟ بۇ ئايەتلەردە، يەھۋا خۇدانىڭ قىلغانلىرىنى ئۇنىڭ بەرگەن ۋەدىلىرىنى چوقۇم ئورۇنلايدىغانلىقىغا كاپالەت بېرىپ، ھۆججەتكە ئىمزا قويغانلىقىغا ئوخشىتىشقا بولىدۇ. خۇدانىڭ ۋەدىسى ۋەھىيلەر 21:3، 4-ئايەتلەردە يېزىلغان. بىراق، 5 ۋە 6-ئايەتلەردە يەھۋا ئۆز ئىمزاسىنى قويغان، يەنى ۋەدىسىنىڭ راستلىقى ۋە ئۇنى چوقۇم ئەمەلگە ئاشۇرىدىغانلىقىغا كاپالەت بەرگەن. نېمە ئۈچۈن يەھۋانىڭ سۆزلىرىگە ئىشىنەلەيمىز؟
7. ۋەھىيلەر 21:5-ئايەت قانداق سۆزلەر بىلەن باشلىنىدۇ ۋە نېمە ئۈچۈن بۇ ئالاھىدە؟
7 5-ئايەت، «تەختتە ئولتۇرغۇچى مۇنداق دېدى» دېگەن سۆزلەر بىلەن باشلىنىدۇ (ۋەھىي. 21:5). مۇشۇ سۆزلەر ئىنتايىن ئالاھىدە، چۈنكى بۇ ۋەھىي كىتابىدا يەھۋا ئۆزى سۆزلىگەن ئۈچ ۋەزىيەتتىن بىرى. شۇڭا، بۇ كاپالەتنى كۈچلۈك بىر پەرىشتە، ھەتتا ئۆلۈمدىن تىرىلگەن ئەيسا مەسىھ ئەمەس، بەلكى يەھۋا خۇدا ئۆزى بەرگەن. مۇشۇ ھەقىقەت كېيىنكى سۆزلەرنىڭ ئىشەنچىلىك ئىكەنلىكىنى كۆرسىتىدۇ. نېمە ئۈچۈن؟ چۈنكى، يەھۋا «يالغان ئېيتالمايدىغان خۇدا» (تىتۇس 1:2). بۇ ۋەھىيلەر 21:5، 6-ئايەتتە ئوقۇغان سۆزلەرنىڭ ئىشەنچىلىك ئىكەنلىكىنى تەستىقلايدۇ.
«مانا، مەن ھەممە نەرسىلەرنى يېڭىلاۋاتىمەن»
8. يەھۋا ۋەدىسىنىڭ توغرا ئىكەنلىكىنى قانداق تەكىتلەيدۇ؟ (يەشايا 46:10)
8 ھازىر «مانا» دېگەن سۆزنى مۇھاكىمە قىلىپ كۆرەيلى (ۋەھىي. 21:5). گرېكچە «مانا» دەپ تەرجىمە قىلىنغان سۆز ۋەھىي كىتابىدا قايتا-قايتا ئىشلىتىلگەن. بىر تەتقىق كىتابىدا مۇنداق يېزىلغان: «بۇ ئوقۇرمەنلەرنىڭ دىققىتىنى كېيىنكى ئىشلارغا قارىتىش ئۈچۈن قوللىنىدىغان سۆز». كېيىن، خۇدانىڭ مۇنۇ سۆزلىرى يېزىلغان: «مەن ھەممە نەرسىلەرنى يېڭىلاۋاتىمەن». يەھۋا كېلەچەكتىكى ئۆزگۈرۈشلەر ھەققىدە سۆزلەۋاتىدۇ، بىراق بۇ ۋەدىنى چوقۇم ئەمەلگە ئاشۇرىدىغانلىقى ئۈچۈن، ئۇ ۋەقەلەرنى خۇددى ئاللىقاچان ئەمەلگە ئاشۇرۇپ بولغاندەك سۆزلەيدۇ.—يەشايا 46:10-نى ئوقۇڭ.
9. (1) «ھەممە نەرسىلەرنى يېڭىلاۋاتىمەن» دېگەن سۆزلەر يەھۋانىڭ قايسى ئىككى ھەرىكىتىنى كۆرسىتىدۇ؟ (2) ھازىرقى «ئاسمان» ۋە «يەر»گە نېمە بولىدۇ؟
9 ھازىر ۋەھىيلەر 21:5-ئايەتتىكى «ھەممە نەرسىلەرنى يېڭىلاۋاتىمەن» دېگەن سۆزلەرنى مۇھاكىمە قىلىپ كۆرەيلى. مۇقەددەس كىتابنىڭ بۇ بابىدا، يەھۋا خۇدا ئىككى نەرسىنى قىلىدۇ. بىرىنچى، بۇ دۇنيانىڭ كونا تۈزۈلمىسىنى يوقىتىدۇ. ئىككىنچى، يېڭى تۈزۈلمىنى ئورنىتىدۇ. ۋەھىيلەر 21:1-ئايەتتە، مۇنۇ سۆزلەرنى ئوقۇيمىز: «ئاۋۋالقى ئاسمان ۋە يەر ئاللىقاچان يوقالغانىدى ۋە دېڭىزمۇ يوق بولدى». «ئاۋۋالقى ئاسمان» شەيتان ۋە ئۇنىڭ جىنلىرىنىڭ تەسىرىگە ئۇچرىغان سىياسىي ھۆكۈمەتلەرنى بىلدۈرىدۇ (مەتتا 4:8، 9؛ 1-يۇھاننا 5:19). مۇقەددەس يازمىلاردا «يەر» دېگەن سۆز يەردە ياشىغان ئادەملەرنى بىلدۈرىدۇ (يارىت. 11:1؛ زەبۇر 96:1). شۇڭا، «ئاۋۋالقى يەر» بۈگۈنكى كۈندىكى رەزىل ئىنسانىيەت جەمئىيىتىنى بىلدۈرىدۇ. يەھۋانىڭ مەقسىتى — ھازىرقى مەۋجۇت «ئاسمان» بىلەن «يەرنى» ياخشىلاپ ئۆزگەرتىش ئەمەس، ئەكسىچە ئۇلارنى پۈتۈنلەي يوق قىلىپ، ئورنىغا باشقا «يېڭى بىر ئاسمان ۋە يېڭى بىر يەرنى»، يەنى يېڭى بىر ھۆكۈمەت ۋە يېڭى بىر ئىنسانلار جەمئىيىتىنى ئالماشتۇرۇشتۇر.
10. يەھۋا نېمىنى يېڭىلايدۇ؟
10 ۋەھىيلەر 21:5-ئايەتتە، يەھۋا يېڭىلايدىغان نەرسىلەر ھەققىدە ئېيتقان سۆزلىرىنى ئوقۇيمىز. دىققەت قىلساق، ئۇ «مەن بارلىق يېڭى نەرسىلەرنى يارىتىۋاتىمەن» دېمىگەن، ئەكسىنچە «مەن ھەممە نەرسىنى يېڭىلاۋاتىمەن» دېگەن. يەھۋا يەر ۋە ئىنسانىيەتنى قانداق قىلىپ يېڭىلايدۇ؟ ئۇ يەرنى ۋە ئىنسانلارنى ساقايتىپ، مۇكەممەل ھالەتكە كەلتۈرىدۇ. يەشايا ئالدىن ئېيتقاندەك، يەھۋا پۈتكۈل يەر يۈزىنى خۇددى ئېرەم بېغىغا ئوخشاش گۈزەل بىر ماكانغا ئايلاندۇرىدۇ. توكۇر، قارىغۇ، گاسلار ساقايتىلىدۇ، ھەتتا ئۆلۈكلەر تىرىلدۈرۈلىدۇ.—يەشايا 25:8؛ 35:1–7.
«بۇ سۆزلەر ئىشەنچىلىك ۋە ھەقتۇر. ئۇلار ئەمەلگە ئاشتى»
11. يەھۋا يۇھانناغا نېمە قىلىشنى بۇيرۇغان ۋە نېمە ئۈچۈن؟
11 خۇدا بىزنىڭ ئۇنىڭغا ئىشىنىشىمىز ئۈچۈن كاپالەت بەرگەندىن باشقا يەنە نېمە دېگەن؟ يەھۋا ئەلچى يۇھانناغا مۇنداق دېگەن: «يېزىپ قويغىن، چۈنكى بۇ سۆزلەر ئىشەنچىلىك ۋە ھەقتۇر» (ۋەھىي. 21:5). يەھۋا پەقەت «يېزىپ قويغىن» دەپ قويماي، يېزىپ قويۇشنىڭ سەۋەبىنى ئېيتقان. ئۇ: «چۈنكى بۇ سۆزلەر ئىشەنچىلىك ۋە ھەقتۇر»،— دېگەن. دېمەك، خۇدانىڭ سۆزى ئىشەنچىلىك ۋە توغرىدۇر. بىز يۇھاننانىڭ «يېزىپ قويغىن» دېگەن بۇيرۇققا بويسۇنغانلىقىدىن مىننەتدارمىز. چۈنكى، ھازىر خۇدانىڭ جەننەت ھەققىدە بەرگەن ۋەدىسىنى ئوقالايمىز ۋە بىزنى كۈتۈۋاتقان ئاجايىپ بەرىكەتلەر ھەققىدە چوڭقۇر ئويلىنالايمىز.
12. نېمە ئۈچۈن يەھۋا «ئۇلار ھەممىسى ئەمەلگە ئاشتى!» دەپ ئېيتالايدۇ؟
12 ئۇنىڭدىن كېيىن، خۇدا: «ئۇلار ھەممىسى ئەمەلگە ئاشتى!»— دېگەن (ۋەھىي. 21:6). مۇشۇ جۈملىدە، ۋەدە قىلىنغان جەننەت ھەققىدىكى ئىشلارنىڭ ھەممىسىنى، يەھۋا ئاللىقاچان يۈز بېرىپ بولغاندەك سۆزلەيدۇ، چۈنكى ئۇنىڭ مەقسىتىنى ئەمەلگە ئاشۇرۇشقا ھېچقانداق نەرسە توسالغۇ قىلالمايدۇ. ئۇ ئۆز ۋەدىلىرىنىڭ چوقۇم ئەمەلگە ئاشىدىغانلىقى ھەققىدە بىزگە كاپالەت بېرىدۇ. ئۇ يەنە نېمە دېگەن؟
«مەن ئالفا ۋە ئومېگا»
13. يەھۋا نېمە ئۈچۈن «مەن ئالفا ۋە ئومېگا» دەپ بايان قىلدى؟
13 يۇقىرىدا تىلغا ئېلىپ ئۆتكىنىمىزدەك، يۇھاننا يازغان ۋەھىيدە يەھۋا ئۈچ قېتىم ئۆزى سۆز قىلغان (ۋەھىي. 1:8؛ 21:5، 6؛ 22:13). ھەربىر ۋەزىيەتتە، ئۇ ئوخشاش سۆزنى قىلغان: «مەن ئالفا ۋە ئومېگا». «ئالفا» گرېك تىلى ئېلىپبەسىنىڭ باشلىنىش ھەرىپى، «ئومېگا» ئاخىرلىشىش ھەرىپى. يەھۋا «ئالفا ۋە ئومېگا» دېگەن تەسۋىرلەشنى قوللىنىپ، مەلۇم ئىشنى باشلىغاندا، ئۇنى چوقۇم ئاخىرغىچە ئورۇنلايدىغانلىقىنى كۆرسەتكەن.
يەھۋا بىر ئىشنى باشلىغاندا، ئۇنى ئاخىرغىچە قىلىدۇ (14–17-ئابزاسلارغا قاراڭ)
14. (1) يەھۋا خۇدا قايسى ۋاقىتتا «ئالفا» ۋە «ئومېگا» بولىدىغانلىقىنى چۈشەندۈرۈڭ. (2) يارىتىلىش 2:1–3-ئايەتلەردە قانداق كاپالەت بار؟
14 يەھۋا ئادەم-ئاتا بىلەن ھاۋا-ئانىنى ياراتقاندا، ئۆزىنىڭ دەسلەپكى مەقسىتىنى ئىپادىلىگەن. مۇقەددەس كىتاب مۇنداق دەيدۇ: «خۇدا ئۇلارنى بەرىكەتلەپ: «سىلەر پەرزەنتلىك بولۇپ كۆپىيىڭلار، يەر يۈزىنى تولدۇرۇپ، ئۇنى بويسۇندۇرۇڭلار» (يارىت. 1:28). يەھۋا بۇ مەقسىتىنى ئېيتقاندا، ئۇ «ئالفا» بولغان. ئادەم-ئاتا بىلەن ھاۋا-ئانىنىڭ ئەۋلادلىرى يەر يۈزىنى تولدۇرۇپ، مۇكەممەل ۋە ئىتائەتچان ئىنسانلار پۈتكۈل يەر يۈزىنى جەننەتكە ئايلاندۇرغان ۋاقىتتا، يەھۋا ئۆزى ئېيتقاندەك، ئۇ «ئومېگا» بولىدۇ. «ئاسمانلار بىلەن يەر ۋە ئۇلاردىكى بارچە مەۋجۇداتلار» يارىتىلىپ بولغاندىن كېيىن، يەھۋا بىر كاپالەت بەرگەن. بۇ توغرۇلۇق يارىتىلىش 2:1–3-ئايەتلەردىن ئوقالايمىز (ئوقۇڭ). يەھۋا يەتتىنچى كۈننى ئۆزى ئۈچۈن مۇقەددەس كۈن قىلىپ بەلگىلىگەن. بۇ نېمىنى بىلدۈرىدۇ؟ بۇ يەھۋانىڭ ئىنسانىيەت ۋە يەر يۈزى ئۈچۈن قىلغان مەقسىتىنى يەتتىنچى كۈننىڭ ئاخىرىدا چوقۇم تولۇق ئەمەلگە ئاشۇرىدىغانلىقىنى بىلدۈرىدۇ.
15. نېمە ئۈچۈن شەيتان خۇدانىڭ ئىنسانىيەت ئۈچۈن قىلغان مەقسىتىگە توسقۇنلۇق قىلغاندەك كۆرىنىدۇ؟
15 ئادەم-ئاتا بىلەن ھاۋا-ئانا ئىسىيان كۆتەرگەندىن كېيىن گۇناھكار بولغان ۋە گۇناھ بىلەن ئۆلۈمنى ئۆزلىرىنىڭ ئەۋلادلىرىغا ئۆتكۈزگەن (رىملىقلار 5:12). نەتىجىدە، شەيتان قارىماققا خۇدانىڭ مۇكەممەل ۋە ئىتائەتچان كىشىلەر بىلەن يەر يۈزىنى تولدۇرۇش مەقسىتىنى ئەمەلگە ئاشۇرۇشىغا توسالغۇ بولۇپ، يەھۋانىڭ ئۆزىنى «ئومېگا» دەپ ئاتىشى مۇمكىن ئەمەستەك كۆرۈنگەن. بەلكىم، شەيتان يەھۋانى ئۆز سۆزىدە تۇرمايدۇ دەپ ئويلىغان. ئۇ ئىنسانىيەت ئۈچۈن قىلغان مەقسىتىنى ئەمەلگە ئاشۇرۇش ئۈچۈن ئادەم-ئاتا بىلەن ھاۋا-ئانىنى يوقىتىپ، باشقا بىر مۇكەممەل ئەر-ئايالنى يارىتىدۇ دەپ ئويلىغان بولۇشى مۇمكىن. ئەگەر خۇدا شۇنداق قىلغان بولسا، ئىبلىس ئۇنى يالغانچى دەپ ئەيىبلىگەن بولاتتى. نېمە ئۈچۈن؟ چۈنكى، يارىتىلىش 1:28-ئايەتتە خاتىرىلەنگەندەك، يەھۋا ئادەم-ئاتا بىلەن ھاۋا-ئانىغا ئۇلارنىڭ ئەۋلادلىرى يەر يۈزىنى تولدۇرىدىغانلىقىنى ئېيتقان ئىدى.
16. نېمىشقا شەيتان يەھۋانى مەغلۇبىيەتچى دەپ ئەيىبلەشنى ئويلىغان بولۇشى مۇمكىن؟
16 شەيتان يەنە نېمە ئويلىغان بولۇشى مۇمكىن؟ بەلكىم، شەيتان شۇنداق ئويلىغان: يەھۋا ئادەم-ئاتا بىلەن ھاۋا- ئانىغا ھەرگىزمۇ مۇكەممەل بولۇشىغا ئىمكانىيىتى يوق نامۇكەممەل ئەۋلادلارنى كۆپەيتىشىگە يول قويىدۇ (ۋەز 7:20؛ رىملىقلار 3:23). شۇنداق بولغاندا، شەيتاننىڭ ياراتقۇچى يەھۋانى مەغلۇبىيەتچى دەپ ئەيىبلىشى شەك-شۈبھىسىز ئىدى. نېمە ئۈچۈن؟ چۈنكى، بۇ تاللاش خۇدانىڭ ئەسلى مەقسىتىنى ئەمەلگە ئاشۇرالمايتتى، يەنى يەر يۈزى جەننەتنى ئادەم-ئاتا بىلەن ھاۋا-ئانىنىڭ مۇكەممەل ۋە ئىتائەتچان ئەۋلادلىرى بىلەن تولدۇرۇش مۇمكىن بولمايتتى.
17. يەھۋا خۇدا ئىسىيانچى شەيتان ۋە تۇنجى بىر جۈپ ئىنساننىڭ ئىسىيانىنى قانداق بىر تەرەپ قىلغان ۋە نەتىجىدە نېمە بولىدۇ؟ (رەسىمگە ھەم قاراڭ)
17 شەيتان ھەرگىزمۇ يەھۋانىـڭ نېمـە قىلالايدىغانلىقىنى تەسەۋۋۇر قىلالمىغان ئىدى. گەرچە شەيتان، ئادەم-ئاتا ۋە ھاۋا-ئانا ئىسىيان كۆتەرگەن بولسىمۇ، يەھۋا ئۆزىنىڭ مەقسەتلىرىنى ئەمەلگە ئاشۇرۇشنىڭ ئەڭ ياخشى ئۇسۇلىنى قوللانغان (زەبۇر 92:5). ئادەم-ئاتا بىلەن ھاۋا-ئانىنىڭ پەرزەنتلىك بولۇشىغا يول قويۇش ئارقىلىق يەھۋا ئۆزىنىڭ يالغانچى ئەمەس، بەلكى ئىشەنچىلىك ئىكەنلىكىنى ئىسپاتلىغان. ئۇ ئادەم-ئاتا بىلەن ھاۋا-ئانىنىڭ ئىتائەتچان ئەۋلادلىرىنى قۇتقۇزىدىغان بىر ئەۋلادنى ئەۋەتىش ئارقىلىق ئۆز مەقسىتىنىڭ ئەمەلگە ئېشىشى ھەققىدە كاپالەت بەرگەن. شۇنداق قىلىپ مەغلۇبىيەتچى ئەمەس، غەلبە قازانغۇچى ئىكەنلىكىنى ئىسپاتلىغان. ئىنسانىيەتنى قۇتقۇزۇش ئۈچۈن ئۆز جېنىنى تۆلەم سۈپىتىدە بېرىدىغان «ئەۋلادنى» ئوتتۇرغا چىقىرىپ، خۇدا ئۆز ئىرادىسىنى ئەمەلگە ئاشۇرماقچى بولغان (يارىت. 3:15؛ 22:18). شەيتان بۇنداق بىر ئامالنىڭ تېپىلىدىغانلىقىنى ھەرگىزمۇ كۈتمىگەنىدى. چۈنكى، بۇ چارە-تەدبىر سۆيگۈ-مۇھەببەتكە ئاساسلانغان ئىدى (مەتتا 20:28؛ يۇھاننا 3:16). شەيتاننىڭ ھەرگىزمۇ بۇنداق پەزىلىتى يوق. ئۇ بىر شەخسىيەتچى. ئۇنداقتا، تۆلەم ئارقىلىق قانداق ئىش ئەمەلگە ئاشۇرۇلاتتى؟ مەسىھنىڭ مىڭ يىللىق پادىشاھلىقى ئاخىرلاشقاندا، ئادەم-ئاتا بىلەن ھاۋا-ئانىنىڭ مۇكەممەل، ئىتائەتچان ئەۋلادلىرى يەھۋا ئەسلى مەقسەت قىلغاندەك يەر يۈزىدىكى جەننەتتە ياشايدۇ. شۇ ۋاقىتتا يەھۋا ئۆزىنىڭ «ئومېگا» ئىكەنلىكىنى ئېيتىدۇ.
يەھۋانىڭ ۋەدىسىگە بولغان ئىشەنچىمىزنى قانداق كۈچەيتەلەيمىز؟
18. خۇدا بىزگە قانداق ئۈچ كاپالەتنى بېرىدۇ؟ (« يەھۋانىڭ ۋەدىسىگە ئىشىنىشنىڭ ئۈچ سەۋەبى» دېگەن رامكىغىمۇ قاراڭ)
18 بۇ ماقالىدە، كېلەچەكتە يەر يۈزىنىڭ جەننەتكە ئايلىنىدىغانلىقىغا نېمە ئۈچۈن ئىشەنچ قىلالايدىغانلىقىمىز توغرۇلۇق مۇھاكىمە قىلدۇق. بۇ ۋەدىلەر چوقۇم ئەمەلگە ئاشىدىغانلىقىغا باشقىلارنى ئىشەندۈرۈش ئۈچۈن، باشقىلارغا نېمە دېسەك بولىدۇ؟ بىرىنچى، بۇ ۋەدىنى يەھۋا ئۆزى بەرگەن. ۋەھىي كىتابىدا مۇنداق دېيىلگەن: «تەختتە ئولتۇرغۇچى مۇنداق دەيدۇ: ‹مەن ھەممە نەرسىلەرنى يېڭىلاۋاتىمەن›». ئۇنىڭ ئۆز ۋەدىسىنى ئەمەلگە ئاشۇرۇش ئۈچۈن، ئەقىل-پاراسىتى، كۈچ-قۇدرىتى ۋە ئارزۇسى بار. ئىككىنچى، ئۇنىڭ ۋەدىسىنىڭ ئەمەلگە ئېشىشى شۇقەدەر ئېنىقكى، يەھۋانىڭ كۆزىدە ئۇ ئاللىقاچان يۈز بېرىپ بولغان. شۇڭا، ئۇ ئىشەنچ بىلەن: «بۇ سۆزلەر ئىشەنچىلىك ۋە ھەقتۇر. … ئۇلار ھەممىسى ئەمەلگە ئاشتى!»— دەپ ئېيتالايدۇ. ئۈچىنچى، يەھۋا بىر ئىشنى قىلىشقا باشلىغاندا، ئۇنىڭغا ھېچنەرسە توسالغۇ بولالمايدۇ. يەھۋا خۇدا ئۆزى ھەققىدە: «مەن ئالفا ۋە ئومېگا»،— دېگەن. ئەمەلىيەتتە، يەھۋا شەيتاننىڭ يالغانچى ۋە مەغلۇبىيەتچى ئىكەنلىكىنى ئىسپاتلايدۇ.
19. خۇدانىڭ جەننەت توغرىسىدىكى ۋەدىسىدىن گۇمانلانغان كىشىلەرگە قانداق ياردەم بېرەلەيسىز؟
19 ئېسىڭىزدە بولسۇنكى، ۋەز خىزمىتىدە كىشىلەرگە خۇدانىڭ بەرگەن كاپالىتى توغرىسىدا ئېيتقاندا، يەھۋانىڭ ۋەدىسىگە بولغان ئىشەنچىڭىزنى تېخىمۇ كۈچەيتىسىز. شۇڭا، كېيىنكى قېتىم ۋەھىيلەر 21:4-ئايەتتىن، كېلەچەك جەننەت توغرىسىدىكى ئاجايىپ ۋەدىلەرنى ئوقۇغىنىڭىزدا، بىرى: «بۇ ئەپسانىۋى چۆچەككە ئوخشايدۇ» دېسە، نېمە قىلالايسىز؟ ئۇلارغا 5، 6-ئايەتلەرنى ئوقۇپ چۈشەندۈرۈپ بېرىڭ. يەھۋانىڭ ئۆز ۋەدىسىنى ئەمەلگە ئاشۇرىدىغانلىقى ھەققىدە بەرگەن كاپالەتكە ئىمزا قويغانلىقىنى كۆرسىتىپ بېرىڭ.—يەشايا 65:16.
19-ناخشا خۇدا ۋەدە قىلغان جەننەت
a بۇ ماقالىدە، يەھۋانىڭ جەننەت ھەققىدىكى ۋەدىسىنى ئەمەلگە ئاشىدىغانلىقىغا كاپالەت بېرىدىغانلىقى توغرۇلۇق مۇھاكىمە قىلىمىز. ھەر قېتىم بۇ كاپالەتنى باشقىلار بىلەن ئورتاقلاشقاندا، يەھۋانىڭ ۋەدىسىگە بولغان ئىشەنچىمىزنى كۈچەيتەلەيمىز.
