42-تەتقىق ماقالىسى
42-ناخشا ئاجىزلارغا ياردەم بەر
«ھەدىيەلەر سۈپىتىدە» بېرىلگەن ئىنسانلارغا مىننەتدارلىق بىلدۈرۈڭ
«ئۇ ئېگىزلىككە كۆتۈرۈلگەندە، … ھەدىيەلەر سۈپىتىدە ئىنسانلارنى بەردى».—ئەفەس. 4:8.
مەركىزى ئىدىيە
ياردەمچى خىزمەتچىلەر، ئاقساقاللار ۋە رايونغا مەسئۇل ئاقساقاللارنىڭ بىزگە قانداق ياردەم بېرىدىغانلىقى ۋە مۇشۇ ساداقەتمەن كىشىلەرنىڭ قىلىۋاتقان ئىشلىرى ئۈچۈن مىننەتدارلىقىمىزنى قانداق بىلدۈرەلەيدىغانلىقىمىزنى ئۆگىنىمىز.
1. ئەيسا مەسىھ سېخىيلىق بىلەن بىزگە قانداق سوۋغاتلارنى بەرگەن؟
ھېچقانداق بىر ئىنسان ئەيساغا ئوخشاش سېخىي بولۇپ باقمىغان. ئۇ يەر يۈزىدە بولغاندا، دائىم مۆجىزىلەرنى كۆرسىتىپ، ئادەملەرگە ياردەم بەرگەن (لۇقا 9:12–17). ئۇ ئۆز جېنىنى بىز ئۈچۈن پىدا قىلىپ، بىزگە قىممەتلىك سوۋغاتنى بەرگەن (يۇھاننا 15:13). ئەيسا مەسىھ تىرىلدۈرگەندىن كېيىن، ئۇ داۋاملىق سېخىيلىق قىلىپ كېلىۋاتىدۇ. ئۇ ۋەدە قىلغىنىدەك، تەلىم ۋە تەسەللى بېرىش ئۈچۈن يەھۋادىن مۇقەددەس روھىنى ئەۋەتىشنى سورىغان (يۇھاننا 14:16، 17؛ 16:13). ئەيسا جامائەت يىغىلىشلىرىمىز ئارقىلىق دۇنيانىڭ جاي-جايلىرىدا شاگىرتلارنى يېتىشتۈرۈش خىزمىتى ئۈچۈن بىزنى تولۇق قوراللاندۇرۇشنى داۋاملاشتۇرۇۋاتىدۇ.—مەتتا 28:18–20.
2. ئەفەسلىكلەر 4:7، 8-ئايەتلەردە تىلغا ئېلىنغان «ھەدىيەلەر سۈپىتىدە» بېرىلگەن ئىنسانلار كىملەرنى ئۆز ئىچىگە ئالىدۇ؟
2 ئەيسا مەسىھ بەرگەن ھەدىيەلەردىن بىرىنى كۆرۈپ چىقايلى. ئەلچى پاۋلۇس ئەيسا مەسىھ ئاسمانغا كۆتۈرۈلگەندىن كېيىن، «ھەدىيەلەر سۈپىتىدە ئىنسانلارنى» بەرگەنلىكىنى يازغان (ئەفەسلىكلەر 4:7، 8-نى ئوقۇڭ). پاۋلۇس ئەيسانىڭ ھەدىيەلەرنى بېرىشتىكى مەقستىنى جامائەتنى ھەر تۈرلۈك يوللار بىلەن قوللاپ-قۇۋۋەتلەش ئۈچۈن دەپ چۈشەندۈرگەن (ئەفەس. 1:22، 23؛ 4:11–13). بۈگۈنكى كۈندە «ھەدىيەلەر سۈپىتىدە» بېرىلگەن ئىنسانلار بولسا، ياردەمچى خىزمەتچى، ئاقساقاللار ۋە رايونغا مەسئۇل ئاقساقاللارنى ئۆز ئىچىگە ئالىدۇ a. ئەلۋەتتە، ئۇلار نامۇكەممەل بولغاچ، خاتالىقلارنى ئۆتكۈزىدۇ (ياقۇپ 3:2). لېكىن، ھەزرىتىمىز ئەيسا مەسىھ شۇ ھەدىيەلەرنى ئىشلىتىپ، بىزگە ياردەم بېرىپ كەلمەكتە.
3. «ھەدىيەلەر سۈپىتىدە» بېرىلگەن ئىنسانلارنى ھەممىمىز قانداق قوللاپ-قۇۋۋەتلىيەلەيدىغانلىقىمىزنى تەسۋىرلەپ بېرىڭ.
3 ئەيسا «ھەدىيەلەر سۈپىتىدە» بەرگەن بۇ كىشىلەر مەسىھنىڭ تېنى بولغان جامائەتنى مۇستەھكەملەش ئۈچۈن تەيىنلىگەن (ئەفەس. 4:12). بىراق، ھەربىرىمىز ئۇلارنىڭ بۇ مۇھىم ۋەزىپىسىنى ئورۇنلىشىغا ياردەم بېرەلەيمىز. مەسىلەن، بەزىلىرىمىز ئىبادەت زالى قۇرۇلۇش ئىشلىرىغا قاتنىشىمىز. يەنە بەزىلىرىمىز قۇرۇلۇشتا ئىشلەۋاتقان قېرىنداشلارنى ماشىنا بىلەن ئاپىرىپ-ئەكېلىش، ئۇلارغا يېمەك-ئىچمەكلەرنى تەييارلاش ۋە باشقا ئۇسۇللار ئارقىلىق ئۆزىمىزنىڭ ياردەم قولىنى سۇنالايمىز. خۇددى شۇنىڭغا ئوخشاش، ھەممىمىز گەپ-سۆزلىرىمىز ۋە ئىش-ھەرىكەتلىرىمىز ئارقىلىق ھەم ياردەمچى خىزمەتچىلەر، جامائەت ئاقساقاللىرى ۋە رايونغا مەسئۇل ئاقساقاللارنى قوللاپ-قۇۋۋەتلىيەلەيمىز. ھازىر شۇ جاپالىق خىزمەت قىلىۋاتقان كىشىلەرنىڭ ئەجىر-مېھنىتىنىڭ جامائەت ئۈچۈن قانداق پايدىسى بارلىقىنى كۆرۈپ باقايلى. ئاندىن، «ھەدىيەلەر سۈپىتىدە» بېرىلگەن ئىنسانلارغا ۋە ئۇلارنى بەرگەن ئەيساغا مىننەتدارلىقىمىزنى بىلدۈرۈش ئۈچۈن نېمە قىلالايدىغانلىقىمىزنى كۆرۈپ چىقىمىز.
قېرىنداشلارغا ياردەم قولىنى سۇنغان ياردەمچى خىزمەتچىلەر
4. بىرىنچى ئەسىردە، جامائەتتە ياردەمچى خىزمەتچىلەر باشقىلارغا قانداق ياردەملەرنى بەرگەن؟
4 بىرىنچى ئەسىردە، بەزى بۇرادەرلەر ياردەمچى خىزمەتچىلەر بولۇپ تەيىنلەنگەنىدى (1-تىموت. 3:8). قارىماققا، ئەلچى پاۋلۇس 1-كورىنتلىقلار 12:28-ئايەتتە «ياردەم بەرگۈچىلەر» دەپ، ئۇلارنى نەزەردە تۇتقان. ياردەمچى خىزمەتچىلەر نۇرغۇن زۆرۈر ئىشلارنىڭ ھۆددىسىدىن چىققاچ، ئاقساقاللار دىققىتىنى تەلىم بېرىش ۋە پادىلاردىن خەۋەر ئېلىش ئىشلىرىغا قارىتالىغان. مەسىلەن، ياردەمچى خىزمەتچىلەر مۇقەددەس يازمىلارنى قولدا كۆچۈرۈپ كۆپەيتىش ياكى كۆچۈرۈپ كۆپەيتىش خىزمىتىگە ئىشلىتىدىغان لازىمەتلىك ماتېرىياللارنى سېتىۋېلىشقا ياردەملەشكەنىدى.
5. بۈگۈنكى كۈندە ياردەمچى خىزمەتچىلەر جامائەتتە قانداق ياردەملەرنى بېرىدۇ؟
5 جامائىتىڭىزدىكى ياردەمچى خىزمەتچىلەر قانداق ئىشلاردا ياردەم قىلىۋاتقانلىقىنى ھەققىدە ئويلاپ كۆرۈڭ (1-پېتر. 4:10). ئۇلارغا جامائەتنىڭ كىرىم-چىقىم ھېساباتى ۋە ۋەز قىلىشقا بەلگىلەنگەن رايونلارغا مۇناسىۋەتلىك ئىشلارغا مەسئۇل بولۇش، نەشىر ماتېرىياللارنى زاكاز قىلىش، ئۇلارنى ۋەز ئېيتقۇچىلارنىڭ قولىغا يەتكۈزۈش، ئاۋاز كۈچەيتىش ئۈسكۈنلىرىنى باشقۇرۇش، يىغىلىش زالىنى ئاسراش ۋە پاكىزە تۇتۇشتەك ۋەزىپىلەر تاپشۇرۇلىشى مۇمكىن. بۇلارنىڭ ھەممىسى جامائەتلەرنى قوللاپ-قۇۋۋەتلەش ئۈچۈندۇر (1-كورىنت. 14:40). ئۇنىڭدىن باشقا، بەزى ياردەمچى خىزمەتچىلەر ئىبادەت يىغىلىشىمىزنىڭ ۋەز خىزمىتىمىز ۋە ھاياتىمىز دېگەن بۆلىكىدىكى مەزمۇنلارغا يېتەكچىلىك قىلىدۇ ۋە ئاممىۋىي نۇتۇقلارنى ئېيتىدۇ. بەزى ياردەمچى خىزمەتچىلەر ۋەز خىزمەت گۇرۇپپىلىرىغا مەسئۇل ئاقساقالغا ياردەمچى بولۇشقا تەيىنلىنىدۇ. بەزى چاغلاردا، پادىلارنى يوقلاپ سۆھبەتلىشىپ كېلىشكە، ئاقساقاللار ياردەمچى خىزمەتچىلەر بىلەن بارىدۇ.
6. نېمە ئۈچۈن جامائەتتە تىرىشىپ خىزمەت قىلۋاتقان ياردەمچى خىزمەتچىلەرگە مىننەتدارلىق بىلدۈرىمىز؟
6 ياردەمچى خىزمەتچىلەرنىڭ قىلغان ئىشلىرىنىڭ جامائەت ئۈچۈن قانداق پايدىسى بار؟ بولىۋىيىدە ياشايدىغان بېبېرلى b ئىسىملىك قېرىنداش مۇنداق دەيدۇ: «ياردەمچى خىزمەتچىلەرنىڭ ياردىمىدە، مەدھىيە ناخشىلىرى ئېيتالايمەن، ئۆي-پىكىر بايان قىلالايمەن، نۇتۇقلارنى ئاڭلىيالايمەن، فىلىم ۋە رەسىملەردىن ئۆگىنەلەيمەن. جامائەت يىغىلىشلىرى ئۆتكۈزۈلۈۋاتقاندا، ئۇلار قېرىنداشلارنىڭ بىخەتەرلىكىنى قوغدايدۇ. يىغىلىشلارغا كېلەلمەيدىغان قېرىنداشلارنىڭ ئۆيىدە ئولتۇرۇپ، ئىنتېرنېت ئارقىلىق يىغىلىشىغا قاتنىشىشىغا ياردەم بېرىدۇ. يىغىلىشلاردىن كېيىن، ئۇلار يىغىلىش زالىنى تازىلاش، ئىئانە پۇللىرىنى بىر تەرەپ قىلىش ۋە بىزنىڭ نەشىر ماتېرىياللارنىڭ زاكاز قىلىش ۋە قولىمىزغا يەتكۈزۈش دېگەندەك ۋەزىپىلەرنى ئورۇندايدۇ. ئۇلار ئۈچۈن كۆپ مىننەتدارمەن!». كولۇمبىيىدە ياشايدىغان ئېرى ئاقساقال خىزمەت قىلىۋاتقان لېسلى ئىسىملىك قېرىنداش مۇنداق دەيدۇ: «مېنىڭ يولدىشىم ھەر تۈرلۈك ئىشلاردا ياردەمچى خىزمەتچىلەرنىڭ ياردىمىگە بەك مۇھتاج. ئۇلار بولمىغان بولسا، يولدىشىم تېخىمۇ ئالدىراش بولۇپ كېتەتتى. ياردەمچى خىزمەتچىلەر ھەردائىم قىزغىن ۋە ياردەم بېرىشكە تەييار. ئۇلارنىڭ ياردىمى ئۈچۈن چىن قەلبىمدىن رەھمەت ئېيتىمەن». ئەلۋەتتە، ھەممىمىز ئۇلارغا مىننەتدارلىق بىلدۈرىمىز!—1-تىموت. 3:13.
7. بىز ياردەمچى خىزمەتچىلەرگە مىننەتدارلىقىمىزنى قانداق كۆرسىتەلەيمىز؟ (رەسىملەرگە ھەم قاراڭ).
7 ئەلۋەتتە، ھەممىمىز قەلبىمىزدە ياردەمچى خىزمەتچىلەرگە مىننەتدارلىق بىلدۈرىمىز، بىراق بۇ يېتەرلىك ئەمەس. مۇقەددەس كىتاب بىزگە مۇنداق نەسىھەت بېرىدۇ: «مىننەتدارلىقىڭلارنى كۆرسىتىڭلار» (كولوسى. 3:15). فىنلاندىيىدە خىزمەت قىلىۋاتقان كىرىستوف ئىسىملىك ئاقساقال ئۆز مىننەتدارلىقىنى ئىپادىلىگەن. ئۇ مۇنداق دەيدۇ: «مەن ياردەمچى خىزمەتچىلەرگە خەت يېزىپ، بىر كارتا ياكى قىسقا ئۇچۇر ئەۋەتىمەن. خېتىمدە مۇقەددەس كىتابتىكى ئايەتلەرنى نەقىل كەلتۈرۈپ، ئۇلارنىڭ ماڭا ئىلھام بەرگەن گەپ-سۆزى ۋە ئىشلىرىنى ياكى نېمە ئۈچۈن ئۇلارنىڭ ياردىمىگە مىننەتدار بولغانلىقىمنى ئېنىق تىلغا ئالىمەن». يېڭى كالېدونىيىدە ياشايدىغان پاسكال ئايالى جائېل بىلەن ياردەمچى خىزمەتچىلەر ئۈچۈن، دائىم يەھۋاغا دۇئا قىلىدۇ. پاسكال چۈشەندۈرۈپ مۇنداق دەيدۇ: «يېقىندىن بۇيان، جامائەتتە مەسئۇلىيەتلەر تاپشۇرۇلغان بۇرادەرلەر ئۈچۈن دۇئا قىلىپ، يەھۋادىن ئۇلارغا ياردەم بېرىشنى سورىدۇق، ئۆتۈندۇق. دۇئا قىلىشنى داۋاملاشتۇرۇپ كېلىۋاتىمىز». يەھۋا شۇنداق دۇئالىرىغا قۇلاق سالىدۇ ۋە نەتىجىدە پۈتۈن جامائەت ئۇلارنىڭ قىلىۋاتقان ئىشلىرىنىڭ پايدىسىنى كۆرىدۇ.—2-كورىنت. 1:11.
ئاراڭلاردا جاپالىق ئىشلەۋاتقان ئاقساقاللار
8. نېمە ئەلچى پاۋلۇس بىرىنچى ئەسىردىكى ئاقساقاللارنى جاپالىق ئىشلىگەن دېگەن؟ (1-سالونىكالىقلار 5:12، 13)
8 بىرىنچى ئەسىردىكى ئاقساقاللار جامائەت ئۈچۈن جاپالىق ئىشلىگەن (1-سالونىكالىقلار 5:12، 13-نى ئوقۇڭ؛ 1-تىموت. 5:17). ئۇلار جامائەتكە يېتەكچىلىك قىلىشنى، يەنى يىغىلىشلاردىكى پروگراممىلارغا رىياسەتچىلىك قىلىش ۋە ئاقساقاللار كېڭىشى بىرلىكتە قارار چىقىرىش قاتارلىق ۋەزىپىلەرنى زىممىسىگە ئالغان. ئۇنىڭدىن باشقا، جامائەتتىكى قېرىنداشلارنىڭ ئىمان-ئېتىقادتا مەھكەم تۇرۇشى ئۈچۈن، ئۇلارغا مېھىر-مۇھەببەت بىلەن نەسىھەتلەرنى بەرگەن (1-سالونىكا. 2:11، 12؛ 2-تىموت. 4:2). ئەلۋەتتە، بۇ تىرىشچان ئاقساقاللار ئۆز ئائىلىسىنىڭ ئېھتىياجلىرىنى قامداش ۋە ئۇلارنىڭ ئىمان-ئېتىقادى ۋە يەھۋا بىلەن بولغان دوستلۇق مۇناسىۋىتىنى كۈچەيتىشىگە ياردەم بېرى ئۈچۈن كۆپ كۈچ چىقارغان.—1-تىموت. 3:2، 4؛ تىتۇس 1:6–9.
9. بۈگۈنكى كۈندە، ئاقساقاللارنىڭ قانداق مەسئۇلىيەتلەرنى زىممىسىگە ئالغان؟
9 بۈگۈنكى كۈندىكى ئاقساقاللار ناھايىتى ئالدىراش كىشىلەر. ئۇلار قىزغىنلىق بىلەن ۋەز ئېيتىدۇ (2-تىموت. 4:5). ئۇلار يەرلىك جامائەتنىڭ ۋەز خىزمىتىنى تەشكىللەيدۇ ۋە ۋەز خىزمەتكە ئۆزلىرى باش بولۇپ قاتنىشىدۇ ۋە بىزگە ئۈنۈملۈك ئۇسۇلدا ۋەز قىلىشنى ئۆگىتىدۇ. ئاقساقاللار يەنە جامائەتتە تەرەپ مېھىر-شەپقەتلىك ۋە تەرەپ تۇتمايدىغان سوتچىلاردۇر. جامائەتتە بىر ئېتىقادچى ئېغىر گۇناھ ئۆتكۈزگەن بولسا، ئاقساقاللار ئۇنىڭ يەھۋا بىلەن بولغان مۇناسىۋىتىنى ئەسلىگە كەلتۈرۈشىگە ياردەم بېرىشىدۇ. شۇنىڭ بىلەن بىرگە، ئۇلار جامائەتنىڭ پاكلىقىنى ساقلاش ئۈچۈن كۆڭۈل بۆلىدۇ (1-كورىنت. 5:12، 13؛ گالاتىيا. 6:1). ئاقساقاللار پادىچىلار كەبى، جامائەتتىكى ئېتىقادچىلارنىڭ ئەھۋالىدىن خەۋەر ئېلىپ تۇرىدۇ (1-پېتر. 5:1–3). ئۇلار كۆڭۈل قويۇپ مۇقەددەس كىتابقا ئاساسلانغان نۇتۇقلارنى تەييارلايدۇ ۋە جامائەتتە كۆپچىلىك ئالدىدا ئېيتىدۇ. جامائەتتىكى ھەربىر ئېتىقادچى بىلەن تونۇشقا تىرىشىدۇ ۋە ئۇلارنى يوقلاپ پادىچىلىق زىيارەت سۆھبىتىدە بولىدۇ. بەزى ئاقساقاللار يىغىلىش زاللىرىنى سېلىش ۋە ئاسراش ئىشلىرىغا قاتنىشىدۇ، چوڭ يىغىلىشلارنى ئۇيۇشتۇرىدۇ ۋە دوختۇرخانىلار بىلەن ئالاقىلىشىش ھەيئەتلىرى ياكى كېسەللەرنى يوقلاش گۇرۇپپىلىرىدا خىزمەت قىلىشىدۇ. ئاقساقاللار ھەقىقەتەن ئارىمىزدىكى مېھنەتكەش ئىنسانلاردۇر!
10. نېمە ئۈچۈن جامائەتتە جاپالىق خىزمەت قىلىۋاتقان ئاقساقاللارغا مىننەتدارلىق بىلدۈرىمىز؟
10 يەھۋا ئالدىن بېشارەت قىلغان، ئۇ پادىچىلارنى تەيىنلەپ، بىزگە ياخشى كۆڭۈل بولىدۇ ۋە بىز ئەمدى قورقۇنچ ئىچىدە تىترەپ تۇرمايمىز (يەرەم. 23:4). فىنلاندىيىدە ياشايدىغان جوئاننا ئىسىملىك قېرىنداشنىڭ ئانىسى ئېغىر كېسەل بولۇپ قالغاندا، بۇ سۆزلەرنىڭ راستلىقىغا كۆز يەتكۈزگەن. ئۇ مۇنداق دەيدۇ: «بىر ئاقساقال ماڭا كۆڭۈل بۆلدى، مەن ئۇنى ئانچە تونۇپ كەتمىسەممۇ ۋە ھېس-تۇيغۇلىرىمنى ئېنىق ئىپادىلەشتە قىينالساممۇ، ئۇ سەۋرچانلىق بىلەن سۆزلىرىمنى كۆڭۈل قويۇپ تىڭشىدى، مېنىڭ بىلەن بىللە دۇئا قىلىپ، يەھۋانىڭ مېنى سۆيىدىغانلىقىغا، مېنى ئىشەندۈردى. ئۇنىڭ نېمە دېگەنلىكى، ھازىرمۇ ئېنىق يادىمدا بار. شۇ چاغدا، ئۆزۈمنى بىخەتەر، تىنچ-ئامان ھېس قىلغانلىقىم ھەم ئېسىمدە. مەن شۇنىڭغا ئىشىنىمەنكى، يەھۋا شۇ ئاقساقالنى مەن دەل ياردەمگە مۇھتاج بولغان ۋاقىتتا ئەۋەتكەن ئىدى». سىزنىڭ جامائىتىڭىزدىكى ئاقساقاللار سىزگە قانداق ياردەم بەرگەن؟
11. ئاقساقاللارغا مىننەتدارلىقىمىزنى قانداق بىلدۈرەلەيمىز؟ (رەسىمگە ھەم قاراڭ).
11 ئاقساقاللار «ئۇلارنىڭ خىزمەتلىرى ئۈچۈن» چىن يۈرەكتىن مىننەتدارلىق بىلدۈرۈشىمىزگە ئەرزىيدۇ ۋە يەھۋا بىزنىڭ شۇنداق قىلىشىمىزنى خالايدۇ (1-سالونىكا. 5:12، 13). فىنلاندىيىدە ياشايدىغان ھېنرېتتا ئىسىملىك قېرىنداش مۇنداق دەيدۇ: «ئاقساقاللار باشقىلارغا ياردەم بېرىشكە تەييار، بىراق بۇ باشقىلارغا قارىغاندا، ئۇلارنىڭ كۆپ ۋاقتى ۋە كۈچ-قۇۋۋىتى بارلىقىنى ياكى ھاياتىدا ھېچقانداق قىيىنچىلىقلىرى يوقلىقىنى بىلدۈرمەيدۇ. بەزىدە مەن ئۇلارغا ئۇدۇل شۇنداق دەيمەن: «سىزگە شۇنى ئېيتىپ قوياي دېگەن ئىدىم، بىلەمسىز، سىز بەك ياخشى ئاقساقال!». تۈركىيىدە ياشايدىغان سېرا ئىسىملىك قېرىنداش مۇنداق دەيدۇ: «ئاقساقاللار داۋاملىق ئۆز ۋەزىپىلىرىنىڭ ھۆددىسىدىن چىقالىشى ئۈچۈن ئىلھام-مەدەتكە مۇھتاج. شۇڭا، ئۇلارغا بىر-ئىككى ئېغىز ئىللىق سۆزلەرنى يېزىپ ئەۋەتسەك، تاماققا چاقىرساق ۋە بىرلىكتە ۋەز قىلىشقا تەكلىپ قىلساق بولىدۇ. شۇنداق قىلساق، ئۇلار تېخىمۇ قىزغىنلىق بىلەن خىزمەت قىلىدۇ». جامائىتىڭىزدە تىرىشىپ خىزمەت قىلىۋاتقان مەلۇم بىر ئاقساقالغا مىننەتدارلىقىڭىزنى بىلدۈرۈش توغرۇلۇق ئويلىنىپ باققانمۇسىز؟ ئۇنداقتا، ئۇنىڭغا مىننەتدارلىقىڭىزنى بىلدۈرۈشنىڭ يولىنى ئىزدەپ كۆرۈڭ.—1-كورىنت. 16:18.
سىز تەيىنلەنگەن بۇرادەرلەرنىڭ خىزمىتىنى داۋاملاشتۇرۇشىغا ياردەم بېرىدىغان «ئىلھام-مەدەت»نى بېرەلەيسىز (7، 11، 15-ئابزاسلارغا قاراڭ)
جامائەتلەرنى مۇستەھكەملەيدىغان رايونغا مەسئۇل ئاقساقاللار
12. ئەيسا مەسىھ جامائەتلەرنى مۇستەھكەملەش ئۈچۈن يەنە كىملەرنى ھەدىيە سۈپىتىدە بەرگەن؟ (1-سالونىكالىقلار 2:7، 8)
12 ئەيسا مەسىھ بىرىنچى ئەسىردە جامائەتلەرگە «ھەدىيەلەر سۈپىتىدە ئىنسانلارنى» بەرگەندە، ئۇلارنىڭ ئارىسىدا جامائەتلەرنى يوقلاپ ياردەم بېرىدىغان رايونغا مەسئۇل ئاقساقاللارمۇ بار ئىدى. ئەيسانىڭ يېتەكچىلىكىدە، يېرۇسالىمدىكى ئاقساقاللار پاۋلۇس، بارنابا ۋە باشقا بۇرادەرلەرنى جامائەتلەرنى زىيارەت قىلىشقا ئەۋەتكەن (ئەلچى. 11:22). نېمە ئۈچۈن؟ سەۋەبى، ياردەمچى خىزمەتچىلەر ۋە ئاقساقاللارغا ئوخشاش، ئۇلارمۇ جامائەتلەرنى مۇستەھكەملەش ئۈچۈن خىزمەت قىلاتتى (ئەلچى. 15:40، 41). ئېتىقادچى قېرىنداشلارغا تەلىم ۋە ئىلھام-مەدەت بېرىش ئۈچۈن، رايونغا مەسئۇل ئاقساقاللار نۇرغۇن قۇربانلىقلارنى بەرگەن، ھەتتا ئۆز ھاياتىنى خەۋپ-خەتەرگە تەۋەككۈل قىلغان.—1-سالونىكالىقلار 2:7، 8-نى ئوقۇڭ.
13. رايونغا مەسئۇل ئاقساقاللار قانداق مەسئۇلىيەتلەرنى زىممىسىگە ئالغان؟
13 بۈگۈنكى كۈندە، رايونغا مەسئۇل ئاقساقاللار جامائەتلەرنى زىيارەت قىلىش ئۈچۈن دائىم سەپەرگە چىقىدۇ. بەزىدە بىر جامائەتنى يوقلاپ، يەنە بىر جامائەتكە بېرىش ئۈچۈن بىرنەچچە يۈز كىلومېتىر سەپەر قىلىدۇ. رايونغا مەسئۇل ئاقساقاللار ھەر ھەپتىسى بىرقانچە نۇتۇق ئېيتىدۇ، پادىچىلىق زىيارىتى قىلىپ، قېرىنداشلارنى بىلەن سۆھبەتلىشىدۇ. پىدائىي ۋەز ئېيتقۇچىلار بىلەن، ئاقساقاللار بىلەن يىغىلىش ئۆتكۈزىدۇ. بىرقانچە قېتىم ۋەز خىزمەت يىغىلىشلىرىغا يېتەكچىلىك قىلىدۇ. ئۇنىڭدىن باشقا، چوڭ يىغىلىشلارنى تەشكىللەپ، كۆڭۈل قويۇپ چوڭ يىغىلىشلارنىڭ نۇتۇقلىرىنى تەييارلايدۇ. پىدائىي ۋەز ئېيتقۇچىلارنى تەربىيىلەش مەكتىپىدە تەلىم بېرىدۇ ۋە ئۆزى مەسئۇل رايوندىكى پىدائىي ۋەز ئېيتقۇچىلار بىلەن يىلدا بىر قېتىم يىللىق يىغىلىش ئۆتكۈزىدۇ. ئۇنىڭدىن باشقا، يەرلىك بەيتەل تاپشۇرغان مۇھىم ئىشلارنى، بەزىدە جىددىي ئىشلارنى بىر تەرەپ قىلىدۇ.
14. نېمە ئۈچۈن جاپالىق ئىشلەۋاتقان رايونغا مەسئۇل ئاقساقاللارغا مىننەتدارلىقىمىزنى بىلدۈرىمىز؟
14 سوۋغات سۈپىتىدە بېرىلگەن رايونغا مەسئۇل ئاقساقاللارنىڭ خىزمىتىنىڭ جامائەتلەر ئۈچۈن قانداق پايدىسى بار؟ تۈركىيىدە ياشاۋاتقان بىر بۇرادەر مۇنداق دەيدۇ: «رايونغا مەسئۇل ئاقساقاللارنىڭ ھەر قېتىملىق زىيارىتى مېنى قېرىنداشلىرىمغا كۆپرەك ياردەم بېرىشكە دەۋەت قىلىدۇ. مەن نۇرغۇن رايونغا مەسئۇل ئاقساقاللارنى كۆردۈم. بىراق، ھېچبىرىنىڭ بەك ئالدىراش ۋە پاراڭلىشىش ئۈچۈن ۋاقتى يوقتەك ھېس قىلمىدىم». يۇقىرىدا تىلغا ئېلىنغان جوئاننا ئىسىملىك قېرىنداش رايونغا مەسئۇل ئاقساقال بىلەن ئۆيمۇ-ئۆي ۋەز قىلغان. لېكىن، شۇ كۈنى ئۇلار ھېچكىم بىلەن پاراڭلىشالمىغان. ئۇ مۇنداق دەيدۇ: «مەن شۇ كۈننى ھېچقاچان ئۇنتالمايمەن. يېقىندا ئىككى ھەدەم باشقا يەرگە كۆچۈپ كەتكەچ، ئۇلارنى بەك سېغىنغان ئىدىم. رايونغا مەسئۇل ئاقساقال مېنى ئىلھاملاندۇرۇپ، ھازىر يەھۋاغا خىزمەت قىلىۋاتقاندا، ئۇرۇق-تۇغقانلىرىمىز ياكى دوستلىرىمىز بىلەن بىر جايدا ياشاشقا مۇمكىن بولماي قالىدىغانلىقى چۈشىنىپ يېتىشىمگە ياردەم بەردى. بىراق، يېڭى دۇنيادا ئۇلار بىلەن ۋاقىت ئۆتكۈزۈشكە مەڭگۈ ئىمكانىيىتىمىز بولىدىغانلىقىنى ئېيتتى». ئەلۋەتتە، كۆپچىلىكىمىزنىڭ رايونغا مەسئۇل ئاقساقاللار بىلەن خۇشال ۋاقىتلارنى ئۆتكۈزگەن گۈزەل ئەسلىمىلىرى بار!—ئەلچى. 20:37–21:1.
15. (1) 3-يۇھاننا 5–8-ئايەتلەرگە ئاساسلانغاندا، رايونغا مەسئۇل ئاقساقاللارغا مىننەتدارلىقىمىزنى قانداق بىلدۈرەلەيمىز؟ (رەسىمگە ھەم قاراڭ). (2) نېمە ئۈچۈن مەسئۇلىيەتلەرنى زىممىسىگە ئالغان بۇرادەرلەرنىڭ ئاياللىرىغا مىننەتدارلىق بىلدۈرۈشىمىز كېرەك؟ (« ئۇلارنىڭ ئاياللىرىنى ئېسىڭىزدە تۇتۇڭ» دېگەن رامكىغا قاراڭ).
15 ئەلچى يۇھاننا گايۇسنى جامائەتنى يوقلاپ كەلگەن بۇرادەرلەرگە مېھماندوستلۇق كۆرسىتىشكە ۋە ئۇلارنى خۇدانى خۇرسەن قىلغۇدەك ھالدا يول سېلىشقا دەۋەت قىلغان (3-يۇھاننا 5–8-نى ئوقۇڭ). مېھماندوستلۇق كۆرسىتىشنىڭ بىر يولى — رايونغا مەسئۇل ئاقساقالنى تاماققا تەكلىپ قىلىش. يەنە بىر يولى، ئۇ جامائەتنى يوقلاپ كەلگەن مەزگىلىدە، ئورۇنلاشتۇرۇلغان ۋەز قىلىش يىغىلىشلىرىغا قاتنىشىش. يۇقىرىدا تىلغا ئېلىنغان لېسلى ئىسىملىك قېرىنداش مىننەتدارلىقىنى باشقا ئۇسۇللار ئارقىلىق بىلدۈرگەن. ئۇ مۇنداق دەيدۇ: «مەن يەھۋاغا دۇئا قىلىپ، ئۇلارنىڭ ئېھتىياجلىرىنى تەمىنلەپ بېرىشنى سورايمەن. يولدىشىم ئىككىمىز بىرلىكتە خەت يېزىپ، ئۇلارنىڭ زىيارىتى بىزگە كۆپ ياردەم بەرگەنلىكىنى ئېيتىمىز». ئېسىڭىزدە بولسۇنكى، رايونغا مەسئۇل ئاقساقاللارمۇ بىزگە ئوخشاشلا ئىنسان، بەزىدە ئۇلارمۇ ئاغرىيدۇ ۋە غەم-ئەندىشە قىلىدۇ ۋە ھەتتا چۈشكۈنلۈككە چۈشىدۇ. بەلكىم، سىزنىڭ ئىللىق سۆزلىرىڭىز ياكى كىچىككىنە سوۋغىتىڭىز رايونغا مەسئۇل ئاقساقالنىڭ دۇئاسىغا بېرىلگەن جاۋاب بولۇپ قالىدۇ.—پەند. نە 12:25.
بىز «ھەدىيەلەر سۈپىتىدە» بېرىلگەن ئىنسانلارغا مۇھتاج
16. پەندى-نەسىھەت 3:27-ئايەتكە ئاساسلانغاندا، بۇرادەرلەر ئۆز-ئۆزىدىن قانداق سوئاللارنى سوراپ كۆرسە بولىدۇ؟
16 دۇنيانىڭ ھەرقايسى جايلىرىدا، جامائەت تېخىمۇ كۆپ «ھەدىيەلەر سۈپىتىدە» بېرىلگەن بۇرادەرلەرگە مۇھتاج. سۇغا چۆمۈلدۈرۈلۈشتىن ئۆتكەن بىر بۇرادەر بولسىڭىز، «ھەدىيەلەر سۈپىتىدە» بېرىلگەن كىشىلەر قاتارىغا قوشۇلۇپ، ئېتىقادچى قېرىنداشلارغا ياردەم بېرىشكە ئىمكانىيىتىڭىز بارمۇ؟ (پەندى-نەسىھەت 3:27-نى ئوقۇڭ). خىزمەت ياردەمچىسى بولۇشقا لاياقەتلىك بولۇش ئۈچۈن تىرىشچانلىق كۆرسىتەلەمسىز؟ ئاقساقال بولۇپ تەيىنلىنىپ، قېرىنداشلارغا خىزمەت قىلىشنى مەقسەت قىلىپ، قىزغىنلىق بىلەن خىزمەت قىلالامسىز؟ c سىزنى پادىشاھلىق ۋەز ئېيتقۇچىلىرىنى تەربىيىلەش مەكتىپىدە ئوقۇش ئۈچۈن، ھاياتىڭىزدا بەزى ئۆزگەرتىشلەرنى قىلىش ئىمكانىيىتىڭىز بارمۇ؟ بۇ مەكتەپ سىزنى تېخىمۇ ياخشى تەلىم-تەربىيىگە ئىگە قىلىپ، مەسىھ پادىشاھ ئۈچۈن كۆپرەك خىزمەت قىلىشقا تەييارلايدۇ. ئەگەر ئۆزىڭىزنى لاياقەتسىز دەپ ھېس قىلسىڭىز، يەھۋاغا دۇئا قىلىڭ. ئۆزىڭىزگە تاپشۇرۇلغان بارلىق ۋەزىپىلەرنى مۇۋەپپەقىيەتلىك ئورۇنلاش ئۈچۈن، ئۇنىڭدىن مۇقەددەس روھنى سوراڭ.—لۇقا 11:13؛ ئەلچى. 20:28.
17. «ھەدىيەلەر سۈپىتىدە» بېرىلگەن ئىنسانلار بىزنىڭ نېمىنى كۆرۈپ يېتىشىمىزگە ياردەم بېرىدۇ؟
17 ئەيسا مەسىھ ھەدىيەلەر سۈپىتىدە تەيىنلىگەن بۇرادەرلەر ئۇنىڭ ئاخىرقى زاماندا بىزنى يېتەكلەۋاتقانلىقىنى ئىسپاتلايدۇ (مەتتا 28:20). ئېھتىياجلىرىمىزنى بىلىدىغان ۋە بىزگە ياردەم بېرىش ئۈچۈن بۇرادەرلەرنى بەرگەن سۆيگۈ-مۇھەببەتكە تولغان ۋە سېخىي پادىشاھىمىزغا مىننەتدارمۇسىز؟ ئەگەر شۇنداق بولسا، ئاشۇ ھەدىيەلەر سۈپىتىدە بېرىلگەن كىشىلەرنىڭ ئەجىر-مېھنىتى ئۈچۈن مىننەتدارلىق بىلدۈرۈشنىڭ يوللىرىنى ئىزدەڭ. شۇنىڭ بىلەن بىرگە، «ھەربىر ياخشى ھەدىيە ۋە ھەربىر مۇكەممەل سوۋغات»نىڭ مەڭگۈلۈك مەنبەسى بولغان يەھۋا خۇداغا تەشەككۈر ئېيتىشنى ئۇنتۇماڭ!—ياقۇپ 1:17.
31-ناخشا بىز — يەھۋا گۇۋاھچىلىرى
a يېتەكچى كېڭەشتىكى ئاقساقاللار، ئۇلارنىڭ ياردەمچىلىرى، بەيتەل كېڭەش ئەزالىرى ۋە باشقا ۋەزىپىلەرنى زىممىسىگە ئالغان بۇرادەرلەر ھەدىيەلەر سۈپىتىدە بېرىلگەن ئىنسانلاردۇر.
b بەزى ئىسىملار ئۆزگەرتىلگەن.
c «كۈزىتىش مۇنارى» ژۇرنىلى، 2024-يىل نويابىر سانىدا، «بۇرادەرلەر ياردەمچى خىزمەتچى بولۇشقا ئىنتىلىۋاتامسىلەر؟» ياكى «بۇرادەرلەر ئاقساقال بولۇشقا ئىنتىلىۋاتامسىلەر؟» دېگەن ماۋزۇلاردىكى ماقالىلەردىن، ياردەمچى خىزمەتچى ياكى ئاقساقال بولۇپ خىزمەت قىلىشقا لاياقەتلىك بولۇش توغرۇلۇق مەلۇماتلارنى تېپىشقا بولىدۇ.
