26-تەتقىق ماقالىسى
قىيىنچىلىقلارغا دۇچ كېلىۋاتقانلارغا ياردەم بېرىڭ
«ئاخىرى، ھەممىڭلار بىر نىيەت-مەقسەتتە بولۇڭلار. ھەمدەرت بولۇپ، بىر-بىرىڭلارغا قېرىنداشلارچە سۆيۈپ، مېھرىبان ۋە كەمتەر بولۇڭلار».—1-پېتر. 3:8.
50-ناخشا خۇدانىڭ سۆيگۇ-مۇھەببەت ئۈلگىسى
بۇ ماقالىدە a
1. كۆيۈمچان ئاتىمىز يەھۋانى قانداق ئۈلگە قىلالايمىز؟
يەھۋا خۇدا بىزنى بەك ياخشى كۆرىدۇ (يۇھاننا 3:16). بىز كۆيۈمچان ئاتىمىزدىن ئۈلگە ئېلىشنى خالايمىز. شۇڭا، بىز ھەممە ئادەملەرگە، بولۇپمۇ ئېتىقادداشلىرىمىزغا ھېسداشلىق، قېرىنداشلارچە سۆيگۈ-مۇھەببەت ۋە مېھرىبانلىق كۆرسىتىشىمىز كېرەك (1-پېتر. 3:8؛ گالاتىيا. 6:10). ئەزىز قېرىنداشلىرىمىز ئېغىر قىيىنچىلىقلارغا ئۇچرىغاندا، بىز ئۇلارغا ياردەم بېرىشنى خالايمىز.
2. بۇ ماقالىدە نېمىلەرنى كۆرۈپ چىقىمىز؟
2 يەھۋانىڭ ئائىلىسىگە قوشۇلماقچى بولغانلار بۈگۈن ياكى ئەتە، قاچانلا بولمىسۇن بىر كۈنى قىيىنچىلىققا دۇچ كېلىدۇ (ماركۇس 10:29، 30). بۇ دۇنيانىڭ ئاخىرى يېقىنلاشقانسېرى، قىيىنچىلىقلىرىمىز كۆپىيىدۇ. ئېغىر كۈنلەردە بىر-بىرىمىزگە قانداق ياردەم بېرەلەيمىز؟ كېلىڭلار، لۇت، ئايۇپ ۋە نائومىلارنىڭ مىساللىرىدىن قانداق ساۋاق ئالالايدىغانلىقىمىزنى كۆرۈپ چىقىمىز. شۇنىڭ بىلەن، بۈگۈنكى كۈندە ئېتىقادداشلىرىمىز قانداق سىناقلارنى باشتىن كەچۈرۈۋاتقانلىقىنى ۋە ئۇلارغا قانداق ياردەم بېرەلەيدىغانلىقىمىزنى بىلىۋالىمىز.
سەۋرچان بولۇڭ
3. 2-پېترۇس 2:7، 8-ئايەتلىرىدە يېزىلغاندەك، لۇت قانداق قارار قىلغان؟ بۇنىڭ ئاقىۋىتى قانداق بولغان؟
3 لۇتنىڭ ئەخلاقسىزلىققا تولغان سودوم شەھىرىگە كۆچكەنلىكى دانا قارار بولمىغان (2-پېترۇس 2:7، 8-نى ئوقۇڭ). ئاشۇ ناھايىتى چىرايلىق يەردە ياشايمەن، دەپ لۇت بېشىغا بالا تېپىۋالغان (يارىت. 13:8—13؛ 14:12). ئۇنىڭ ئايالى شۇ شەھەرنى ياكى ئۇنىڭ بەزى كىشىلىرىنى ياخشى كۆرۈپ قالغاچ، ھەتتا يەھۋانىڭ بۇيرۇقىغا قۇلاق سالماي، خۇدا شەھەرگە «ئوت بىلەن گۇڭگۇتنى» ياغدۇرغاندا، ئۇ ئۆلۈپ كەتكەن. لۇتنىڭ ئىككى قىزىنىڭ ۋەدىلىشىپ قويغان بولغۇسى ئەرلىرىمۇ ئۆلۈپ كەتكەن. لۇت ئۆي-ماكانىدىن، مال-دۇنياسىدىن ۋە ئۇنىڭغا ئەڭ ئېغىر كەلگىنى، ئايالىدىن ئايرىلغان (يارىت. 19:12—14، 17، 26). شۇ قىيىن ۋاقىتلاردا، يەھۋا خۇدا لۇتقا سەۋچانلىقىنى قانداق كۆرسەتكەن؟
يەھۋا خۇدا لۇت ۋە ئۇنىڭ ئائىلىسىگە مېھرىبانلىق كۆرسىتىپ، ئۇلارنى قۇتقۇزۇش ئۈچۈن پەرىشتىلەرنى ئەۋەتكەن (4-ئابزاسىغا قاراڭ)
4. يەھۋا لۇتقا سەۋرچانلىقنى قانداق كۆرسەتتى؟ (مۇقاۋىدىكى رەسىمگە قاراڭ)
4 لۇت سودومدا ياشاشنى ئۆزى تاللىسىمۇ، يەھۋانىڭ ئۇنىڭغا ۋە ئۇنىڭ ئائىلىسىگە ئىچى ئاغرىپ، ئۇلارنى قۇتۇلدۇرۇش ئۈچۈن پەرىشتىلىرىنى ئەۋەتكەن. بىراق، پەرىشتىلەرگە دەرھال قۇلاق سېلىشنىڭ ئورنىغا، لۇت شەھەردىن چىقىشقا ئالدىرىمىغانىدى. پەرىشتىلەر ئۇلارنىڭ قوللىرىنى تۇتۇپ، لۇتنىڭ ئائىلىسىنى شەھەردىن ئېلىپ چىقىشقا مەجبۇر بولغان (يارىت. 19:15، 16). ئاندىن كېيىن، پەرىشتىلەر لۇتقا تاغقا قېچىشنى بۇيرىغان. بىراق، يەھۋاغا بويسۇنۇشنىڭ ئورنىغا، ئۇ يېقىنراق جايلاشقان كىچىك شەھەرگە بېرىشقا رۇخسەت سورىغان (يارىت. 19:17—20). يەھۋا لۇتنى سەۋرچانلىق بىلەن تىڭشاپ، شۇ شەھەرگە بېرىشىغا يول قويغان. كېيىن، لۇت شۇ شەھەردە ياشاشتىن قورقۇپ، يەھۋا ئەڭ بېشىدا ئېيتقان تاغقا بارغان (يارىت. 19:30). يەھۋا تەڭداشسىز سەۋر-تاقىتىنى كۆرسەتتى! بىز ئۇنىڭدىن قانداق ئۈلگە ئالالايمىز؟
5، 6. خۇدادىن ئۈلگە ئېلىپ، 1-سالونىكالىقلار 5:14-ئايەتتىكى مەسلىھەتنى قانداق قوللىنالايمىز؟
5 لۇتقا ئوخشاش، ئېتىقاددىشىمىز ناتوغرا قارار چىقىرىپ، شۇنىڭ ئاچچىق ئاقىۋىتىنى كۆرۈشى مۇمكىن. شۇنداق ئەھۋالدا، نېمە قىلساق بولىدۇ؟ بىز ئۇنىڭغا «نېمە تېرىغان بولساڭ، شۇنى ئالدىڭ»، دەپ ئېيتقۇمىز كېلىدىغاندۇ (گالاتىيا. 6:7). بەلكىم، ئويىمىز توغرىدۇ، لېكىن يەھۋانىڭ لۇتقا ياردەم بەرگەنلىكىدىن ئۈلگە ئالساق ياخشى قىلغان بولىمىز. بۇنى قانداق قىلالايمىز؟
6 يەھۋا ئۆز پەرىشتىسىنى لۇتنى ئاگاھلاندۇرۇش ئۈچۈنلا ئەمەس، ئۇنىڭ سودوم شەھىرىدىن قېچىپ چىقىشىغا ياردەم بېرىش ئۈچۈنمۇ ئەۋەتكەن. شۇنىڭغا ئوخشاش، بىز قېرىنداشنىڭ ئۆز بېشىغا بالا تېپىۋالىدىغان قارارنى قىلماقچى بولغانلىقىنى كۆرسەك، ئۇنى ئاگاھلاندۇرۇشىمىز كېرەك. شۇنداقلا، بىز ئۇنىڭغا ياردەم بېرىشكە تەييار بولۇشىمىز مۇھىم. ھەتتا، ئۇ مۇقەددەس كىتابقا ئاساسلانغان نەسىھەتكە قۇلاق سېلىشقا ئالدىرىمىسىمۇ، سەۋرچان بولۇشقا تىرىشىڭ. ئىككى پەرىشتىدىن ئۈلگە ئېلىڭ. بۇ ئادەم بولمايدۇ دەپ قېرىندىشىڭىزدىن ئۈمىد ئۈزۈشنىڭ ئورنىغا، ئۇنىڭغا ئەمەلىي ياردەم بېرىشنىڭ يوللىرىنى ئىزدەڭ (1-يۇھاننا 3:18). مۇقەددەس كىتابنىڭ نەسىھەتلىرىگە ماس ھەرىكەت قىلىشىغا ياردەم بېرىش ئۈچۈن، كۆچمە مەنىدە، ئۇنىڭ قولىنى تۇتۇشىمىزغا توغرا كېلىشى مۇمكىن.—1-سالونىكالىقلار 5:14نى ئوقۇڭ.
7. يەھۋانىڭ لۇتقا قىلغان مۇئامىلىسىدىن نېمىنى ئۆگىنەلەيمىز؟
7 يەھۋا لۇتنىڭ كەمچىلىكلىرىگە دىققەت بۆلۈشنىڭ ئورنىغا، ئەلچى پاۋلۇسنى لۇت توغرۇلۇق ھەققانىي كىشى دەپ يېزىشقا روھلاندۇرغان. يەھۋا خۇدا خاتالىقلىرىمىزنى كەچۈرىدۇ، بۇ قەلبىمىزنى بەكمۇ خۇشال قىلىدۇ! (زەبۇر 130:3). بىز يەھۋادىن نېمىنى ئۆگىنەلەيمىز؟ قېرىنداشلىرىمىزنىڭ ياخشى تەرەپلىرىگە دىققەت ئاغدۇرساق، ئۇلارغا كۆپرەك سەۋر-تاقەت كۆرسىتەلەيمىز. شۇ چاغدا، ئۇلارنىڭ ياردىمىمىزنى قوبۇل قىلىشى ئاسانراق بولىدۇ.
ھېسداشلىق قىلىڭ
8. ھېسداشلىقنى بىلدۈرۈش ئۈچۈن نېمە قىلىشىمىز كېرەك؟
8 ئايۇپ لۇتقا قارىغاندا باشقىچە قارار چىقارغان. شۇنداق بولسىمۇ، ئۇ كۆپ ئازاب-ئوقۇبەتلەرنى چەككەن: مال-مۈلكىدىن، يۇرت ئالدىدىكى نام-ئابرويىدىن ئايرىلغان ۋە ئېغىر كېسەل بىلەن ئاغرىغان. ئەڭ ئېچىنارلىقى شۇكى، ھەممە بالىلىرى ئۆلۈپ كەتكەن. بۇنىڭدىن باشقا، ئايۇپنىڭ ئۈچ ساختا دوستى ئۇنى ئەيىبلىگەن. نېمە ئۈچۈن ئۇلار ئايۇپقا ھېسداشلىق كۆرسەتمىگەن؟ چۈنكى، ئۇلار ئايۇپ نېمە ئۈچۈن شۇنداق قىيىنچىلىقلارنى باشتىن كەچۈرۈۋاتقانلىقىنى چۈشىنىشكە تىرىشمىغان. ئۇلار مەسىلىنى تولۇق چۈشەنمەي، ئۇنى رەھىمسىزلارچە تەنقىد قىلىشقا باشلىغان. بۇنىڭدىن قانداق ساۋاق ئالىمىز؟ ئادەمنىڭ ئەھۋالىنىڭ تېگى تەكتىنى پەقەت يەھۋا بىلىدىغانلىقىنى ئەستىن چىقارماسلىقىمىز مۇھىم. ئازاب چېكىۋاتقان ئادەمنى زېھىن قويۇپ تىڭشاشتىن باشقا، ئۆزىڭىزنى ئۇنىڭ ئورنىغا قويۇپ، دەردىنى چۈشىنىشكىمۇ تىرىشىڭ. شۇنداق قىلسىڭىزلا، قېرىندىشىڭىزنىڭ قايغۇسىغا ئورتاق بولالايسىز.
9. ھېسداشلىق بىلدۈرسەك، نېمە قىلىشتىن يىراق بولىمىز ۋە نېمە ئۈچۈن؟
9 ھېسداشلىق بىلدۈرسەك، قېرىنداشلارنىڭ قىيىنچىلىقلىرى توغرۇلۇق سۆز-چۆچەك تارقاتمايمىز. غەيۋەت-شىكايەت جامائەتتە ئىناق-ئىتتىپاقلىق ئەمەس، ئەكسىچە بۆلگۈنچىلىكنى پەيدا قىلىدۇ (پەند. نە 20:19؛ رىملىقلار 14:19). غەيۋەتخورنىڭ يېنىكلىك بىلەن قىلغان سۆزلىرى خۇددى كىشىنىڭ قەلب يارىسى ئۈستىگە تۇز چاچقانغا ئوخشاش (پەند. نە 12:18؛ ئەفەس. 4:31، 32). ئادەمنىڭ ياخشى خىسلەتلىرىگە دىققەت ئاغدۇرۇپ، ئۇنىڭغا قانداق ياردەم بېرىشكە بولىدىغانلىقىنى ئويلاش نەقەدەر ياخشى، شۇنداق ئەمەسمۇ؟!
قېرىنداش ئويلانماي سۆزلىسە، ئۇنى سەۋرچانلىق بىلەن تىڭشاڭ ۋە قولايلىق پۇرسەتتىن پايدىلىنىپ، تەسەللىي بېرىڭ (10، 11-ئابزاسلارغا قاراڭ) c
10. ئايۇب 6:2، 3-ئايەتتىكى سۆزلەردىن قانداق ساۋاق ئالىمىز؟
10 ئايۇپ 6:2، 3-نى ئوقۇڭ. بەزىدە ئايۇپ «تەلۋىلەرچە»، يەنى ئويلانماستىن سۆزلەپ، كېيىن ئېيتقان سۆزلىرىگە پۇشايمان قىلغان (ئايۇپ 42:6). ئايۇپقا ئوخشاش، قىيىنچىلىققا ئۇچرىغان كىشى ئويلانماي سۆزلەپ، كېيىن پۇشايمان قىلىشى مۇمكىن. شۇ چاغدا، نېمە قىلساق بولىدۇ؟ قېرىنداشنى ئەيىبلەشنىڭ ئورنىغا، ھېسداشلىق بىلدۈرسەك ياخشى. يەھۋا ئادەملەرنى ياراتقاندا، ئۇلارنىڭ ئازاب چېكىشىنى نىيەت قىلمىغان. شۇنىڭ ئۈچۈن، قاتتىق قىينالغاندا، يەھۋانىڭ سادىق خىزمەتچىسى ئويلانماي سۆزلىشى مۇمكىن. ھەتتا يەھۋا خۇداغا ياكى بىزگە قارشى سۆزلەرنى ئېيتىشى مۇمكىن. شۇ چاغدا دەرھال ئاچچىقلانماسلىقىمىز ۋە ئېيتقان سۆزلىرى ئۈچۈن ئەيىبلىمەسلىكىمىز كېرەك.—پەند. نە 19:11.
11. ئاقساقاللار نەسىھەت بەرگەندە، ئېلىخۇدىن قانداق ئۈلگە ئالالايدۇ؟
11 بەزىدە قىيىنچىلىقلارغا دۇچ كەلگەن ئادەم نەسىھەتكە ياكى تۈزىتىشكە موھتاج بولۇشى مۇمكىن (گالاتىيا. 6:1). شۇنداق ئەھۋالدا، ئاقساقاللار نېمە قىلسا بولىدۇ؟ ئۇلار ئايۇپنى دىققەت بىلەن تىڭشىغان ئېلىخۇدىن ئۈلگە ئالالايدۇ (ئايۇپ 33:6، 7). ئېلىخۇ ئايۇپنىڭ ئوي-پىكىرىنى تولۇق چۈشەنگەندىن كېيىنلا ئۇنىڭغا نەسىھەت بەرگەن. ئېلىخۇدىن ئۈلگە ئالىدىغان ئاقساقاللار قېرىنداشنى دىققەت بىلەن تىڭشاپ، ئۇنىڭ ئەھۋالىنى چۈشىنىشكە تىرىشىدۇ. شۇنداق قىلسا، ئاقساقاللارنىڭ سۆزلىرى قېرىنداشنىڭ يۈرىكىگە تەسىر قىلىپ، ئۇ نەسىھەتنى ئوڭايراق قوبۇل قىلالايدۇ.
تەسەللىي بېرىڭلار
12. يولدىشى ۋە ئىككى ئوغلىنىڭ ئۆلۈمى نائومىغا قانداق تەسىر قىلغان؟
12 نائومى يەھۋا خۇدانى ياخشى كۆرىدىغان، سادىق ئايال ئىدى. بىراق، يولدىشى ۋە ئىككى ئوغلى ئۆلۈپ كەتكەندىن كېيىن، ئۇ ئۆزىنى «ئاچچىق» دېگەننى بىلدۈرىدىغان «مارا» دېگەن ئىسىمغا ئۆزگەرتىشنى خالىغان (رۇت 1:3، 5، 20). قىيىن ۋاقىتلاردا نائومىنىڭ كېلىنى رۇت قېشىدا بولۇپ، ئۇنىڭغا يار-يۆلەك بولغان. رۇت ئۇنىڭغا ياردەم بېرىپلا قويماي، تەسەللىي بەرگەن. ئۇ چىن يۈرەكتىن چىققان يېقىملىق سۆزلەر بىلەن قېيىنانىسىنى ياخشى كۆرىدىغانلىقىنى ئېيتقان ۋە ئۇنى ھېچقاچان تاشلىمايدىغانلىقىغا ئىشەندۈرگەنىدى.—رۇت 1:16، 17.
13. ئۆمۈرلۈك ھەمراھىدىن ئايرىلغانلار نېمە ئۈچۈن تەسەللىيگە موھتاج؟
13 قېرىندىشىمىز ئۆمۈرلۈك ھەمراھىدىن ئايرىلسا، ئۇ تەسەللىيگە موھتاج بولىدۇ. ئەر-ئايالنى بىللە ئۆسۈۋاتقان ئىككى دەرەخكە ئوخشىتىشقا بولىدۇ. يىللار ئۆتۈپ ئۇلارنىڭ يىلتىزلىرى ئۆزئارا چىرمىلىشىپ كېتىدۇ. دەرەخلەرنىڭ بىرى يىلتىزىدىن قومۇرۇلۇپ،، قۇرۇپ كەتسە، ياندىكى يەنە بىرىمۇ قاتتىق زىيانغا ئۇچرايدۇ. شۇنىڭغا ئوخشاش، بىرسىنىڭ ئۆمۈرلۈك ھەمراھى ئۆلۈپ كەتسە، ئۇ ئۇزۇن يىللار قايغۇرۇشى مۇمكىن. يولدىشى تۇيۇقسىز ئۆلۈپ كەتكەن پاتەم b ئىسىملىك قېرىندىشىمىز مۇنداق دەيدۇ: «ھاياتىم ئاستىن-ئۈستۈن بولۇپ، مەن تايانچىسىز قالغاندەك بولدۇم. مەن جان دوستۇمدىن ئايرىلدىم. ھەمراھىمغا ئىچ سىرىمنى ئېيتىپ، ئۇنىڭ بىلەن مۇڭدىشاتتىم. ئىككىلىمىز خۇشاللىق-قايغۇلۇق، ئىسسىق-سوغوق كۈنلەردە بىللە بولدۇق. ئۇ ھەرقاچان دەردىمنى تىڭشاشقا تەييار بولغان. مېنى خۇددى قاق ئوتتۇرىدىن يېرىۋەتكەندەك بولدۇم».
ئۆز ھەمراھىدىن ئايرىلغانلارغا قانداق ياردەم بېرەلەيمىز؟ (14، 15-ئابزاسلارغا قاراڭ) d
14، 15. ئۆمۈرلۈك ھەمراھىدىن ئايرىلغان قېرىنداشلارغا قانداق تەسەللىي بېرەلەيمىز؟
14 ئۆمۈرلۈك ھەمراھىدىن ئايرىلغان قېرىنداشلارغا قانداق تەسەللىي بېرەلەيمىز؟ ئۆزىڭىزنى قولايسىز ھېس قىلىپ، نېمە ئېيتىشىڭىزنى بىلمىسىڭىزمۇ، شۇ ئادەم بىلەن سۆزلىشىشكە تىرىشىڭ. يۇقىرىدا تىلغا ئېلىنغان پاتەم مۇنداق دەيدۇ: «ئادەتتە، بىرسى ئۆلگەندە، كۆپلىرى نېمە ئېيتىشىنى بىلمەي، ئۆزىنى قولايسىز ھېس قىلىدۇ. ئۇلار ئورۇنسىز سۆزلەرنى ئېيتىپ قويۇشتىن قورقىدۇ. جىم-جىت تۇرغاندىن كۆرە، ئورۇنسىز بولسىمۇ، بىر نەرسىنى ئېيتقان ياخشى». قايغۇرۇۋاتقان ئادەم بىزدىن ئالاھىدە بىر نەرسە ئېيتىشىمىزنى كۈتمەيدۇ. پاتەم: «دوستلىرىمنىڭ «مەن سىزنىڭ قايغۇلىرىڭىزغا ئورتاق» دېگەن بىر ئېغىز سۆزى ماڭا يېتەرلىك بولغان».
15 ئايالى بىرنەچچە يىل بۇرۇن ئۆلۈپ كەتكەن ۋاھىدىن مۇنداق دەيدۇ: «باشقىلار مېنىڭ ئايالىم توغرۇلۇق ياخشى نەرسىلەرنى ئېيتقاندا خۇشال بولۇپ قالىمەن. باشقىلار ئۇنى ياخشى كۆرگەنلىكىنى ۋە ھۆرمەتلىگەنلىكىنى بىلىش مېنىڭ ئۈچۈن زور ياردەم. رەپىقەمنىڭ ئورنى ئۆزگىچە بولغان». تۇل قالغان باھارگۈل مۇنداق دەپ ئېيتقان: «باشقىلار مېنىڭ بىلەن دۇئا قىلغاندا، مۇقەددەس كىتابتىن بىر-ئىككى ئايەتنى ئوقۇغاندا، ھەمراھىمنى ئەسلىگەندە، ئۇنىڭ توغرۇلۇق ئېيتىپ بەرگەنلىرىمنى دىققەت قويۇپ تىڭشىغاندا، مەن يېنىكلەپ قالىمەن».
16. (1) يېقىنىدىن ئايرىلغان ئادەمنى نېمە ئۈچۈن داۋاملىق قوللاپ-قۇۋۋەتلىشىمىز كېرەك؟ (2) ياقۇپ 1:27-ئايەتكە ئاساسلانغاندا، بىزگە قانداق ۋەزىپە تاپشۇرۇلغان؟
16 رۇت دائىم نائومىنىڭ قېشىدا بولغاندەك، بىزمۇ يېقىنىدىن ئايرىلغانلارنى دائىم قوللاپ-قۇۋۋەتلىشىمىز كېرەك. يۇقىرىدا تىلغا ئېلىنغان پاتەم مۇنداق دەيدۇ: «ھەمراھىم ئۆلۈپ كەتكەندە، ھەممىسى ماڭا يار-يۆلەك بولغان. ۋاقىت ئۆتۈپ، ھەممىسى كۈندىلىك تۇرمۇشىغا قايتتى، مېنىڭ ھاياتىم بولسا، تۈپ يىلتىزى بىلەن ئۆزگەرگەنىدى. بىراق، باشقىلار يېقىنىدىن ئايرىلغان ئادەم ئايلار، ھەتتا يىللار داۋامىدا قوللاپ-قۇۋۋەتلەشكە موھتاج ئىكەنلىكىنى چۈشەنسە، بۇ ئۇنىڭغا كۆپ ياردەم بېرەيتتى». ئەلۋەتتە، ئادەملەر ھەرتۈرلۈك بولىدۇ. بەزىلىرى ۋەزىيەتنىڭ ئۆزگەرگىنىگە چاپسان كۆنۈپ كېتىدۇ. باشقىلار بۇرۇن سۆيگەن يارى بىلەن قىلغان ئىشلارنى قىلغاندا، ئۇنىڭ يوقلىقىنى چۈشىنىپ روھىي كەيپىياتى يامان بولۇپ كېتىدۇ. ھەربىر ئادەم ھەر تۈرلۈك قايغۇرىدۇ. كېلىڭلار، يېقىنىدىن ئايرىلغان ئادەمگە قولىمىزدىن كەلگىنىچە ياردەم كۆرسىتەيلى. بۇ — يەھۋا خۇدا ھەربىرىمىزگە تاپشۇرغان شەرەپلىك ۋە مەسئۇلىيەتلىك ۋەزىپە.—ياقۇپ 1:27-نى ئوقۇڭ.
17. ئۆز ھەمراھى تاشلاپ كەتكەن قېرىنداشلارغا نېمە ئۈچۈن ياردەم بېرىشىمىز مۇھىم؟
17 ئېرى ياكى ئايالى تاشلاپ كەتكەن قېرىنداشلارمۇ قاتتىق ئازاب چېكىدۇ. يولدىشى تاشلاپ كەتكەن بۇھەجەر مۇنداق دەيدۇ: «ھەمراھىم ئۆلۈپ قالغان بولسا، مەن ئۇنچىلىك قاتتىق ئازابلانمايتتىم. قاتناش ۋەقەسىگە ئۇچراپ ياكى قاتتىق ئاغرىپ ئۆلۈپ كەتكەن بولسا، ئۇنىڭ ئامالى يوق بولاتتى. لېكىن، ھەمراھىم مېنى تاشلاپ كېتىشنى ئۆزى قارار قىلدى. بۇ ماڭا بەك ئېغىر كەلدى، يۈزۈم تۆكۈلۈپ يەر بولغاندەك ھېس قىلدىم».
18. يالغۇز قالغان قېرىنداشلارغا قانداق ياردەم بېرەلەيمىز؟
18 شۇنداق قېرىنداشلارغا ئازراق بولسىمۇ ياخشىلىق قىلساق، ئۇلارغا مېھىر-مۇھەببىتىمىزنى كۆرسىتىمىز. ھازىر ئۇلار يالغۇز بولغانلىقتىن، ياخشى دوستلارغا ئالاھىدە موھتاج (پەند. نە 17:17). سىز ھەقىقىي دوست ئىكەنلىكىڭىزنى قانداق كۆرسىتەلەيسىز؟ ئۇلارنى بىر چىنە چايغا، بىر يەردە بىللە دەم ئېلىشقا ياكى ۋەز خىزمىتىگە چاقىرسىڭىز بولىدۇ. بەلكىم، بەزىدە ئۇلارنى ئائىلىۋى ئىبادىتىڭىزگە تەكلىپ قىلىڭ. شۇنداق قىلسىڭىز، يەھۋانىڭ يۈرىكىنى خۇرسەن قىلىسىز، چۈنكى ئۇ «تۇل خوتۇنلارنىڭ قوغدىغۇچىسى» ۋە «كۆڭلى سۇنۇقلارغا يېقىندۇر».—زەبۇر 34:18؛ 68:5.
19. 1-پېترۇس 3:8-ئايەتتىكى سۆزلەر سىزنى نېمە قىلىشقا دەۋەت قىلىدۇ؟
19 پات-ئارىدا يەر يۈزىدە خۇدا پادىشاھلىقى ھۆكۈمرانلىق قىلغاندا، «بۇرۇنقى دەرت-ئەلەملەر ئۇنتۇلغان بولىدۇ» ۋە «ئىلگىرىكى ئىشلار ھېچ ئەسلەنمەيدۇ، ھەتتا ئەسكە كەلمەيدۇ». بىز شۇ ۋاقىتنى تاقەتسىزلىك بىلەن كۈتىمىز! (يەشايا 65:16، 17) شۇ كۈن كەلگىچە، بىر-بىرىمىزنى قوللاپ-قۇۋۋەتلەپ، ھەممە قېرىنداشلىرىمىزنى چىن قەلبىمىزدىن سۆيىدىغانلىقىمىزنى سۆزلىرىمىز ۋە ئىشلىرىمىز بىلەن كۆرسىتەيلى.—1-پېترۇس 3:8-نى ئوقۇڭ.
28-ناخشا يېڭى ناخشا
a لۇت، ئايۇپ ۋە نائومى يەھۋانىڭ سادىق خىزمەتچىلىرى ئىدى، لېكىن ئۇلار ئېغىر سىناقلارغا دۇچ كەلگەن. ئۇلارنىڭ مىسالىدىن نېمىنى ئۆگىنەلەيدىغانلىقىمىزنى بىلىۋالىمىز. شۇنداقلا غەم-قايغۇغا پاتقان قېرىنداشلىرىمىزغا سەۋرچانلىق كۆرسىتىش، ھېسداشلىق قىلىش ۋە تەسەللىي بېرىشنىڭ قانچىلىك مۇھىم ئىكەنلىكىنى كۆرىمىز.
b بۇ ماقالىدىكى بەزى ئىسىملار ئۆزگەرتىلگەن.
c سۈرەتتە: كۆڭلى يېرىم بولغان بۇرادەر ئويلانماي سۆزلەۋاتىدۇ ۋە ئاقساقال ئۇنى سەۋرچانلىق بىلەن تىڭشاۋاتىدۇ. كېيىنرەك كۆڭلى ئورنىغا چۈشكەندە، ئاقساقال ئۇنىڭغا مېھرىبانلىق بىلەن مەسلىھەت بېرىدۇ.
d سۈرەتتە: ياش ئەر-ئايال، يېقىندا ئايالىدىن ئايرىلغان بۇرادەر بىلەن ۋاقىت ئۆتكۈزىۋاتىدۇ. ئۇلار سۈرەتلەرگە قاراپ، ئايالى توغرۇلۇق سۆزلىشىپ، خۇشال ۋاقىتلارنى ئەسلەۋاتىدۇ.
