ئىمان بىزنى كۈچلۈك قىلىدۇ
ئىماننىڭ كۈچى زور. مەسىلەن، شەيتان بىزنىڭ يەھۋا بىلەن بولغان مۇناسىۋىتىمىزنى يوق قىلماقچى بولسىمۇ، ئىمان ئۇنىڭ «بارچە ئوتلۇق ئوقلىرىنى» ئۆچۈرەلىشىمىزگە كۈچ بېرىدۇ (ئەفەس. 6:16). ئىمانىمىز مۇستەھكەم بولسا، ھەتتا تاغدەك چوڭ قىيىنچىلىقلارنى يېڭەلەيمىز. ئەيسا پەيغەمبەر شاگىرتلىرىغا: «ئەگەر سىلەردە قىچا ئۇرۇقىچە ئىمان بولسا، مۇنۇ تاققا: «بۇ يەردىن ئاۋۇ يەرگە كۆچكىن» دېسەڭلار، ئۇ كۆچىدۇ»،— دېگەن (مەتتا 17:20). ئىمان يەھۋا بىلەن مۇناسىۋىتىمىزنى مۇستەھكەملەشكە ياردەم بېرەلەيدۇ. شۇڭا، تۆۋەندىكى سوئاللارغا جاۋاب تېپىشىمىز مۇھىم: ئىمان ياكى ئىشەنچ دېگەن نېمە؟ ئوي-پىكىرىمىز ئىمانىمىزغا قانداق تەسىر قىلىدۇ؟ ئىمانىمىزنى قانداق كۈچەيتەلەيمىز؟ بىز كىمگە ئىشىنىشىمىز كېرەك؟—رىملىقلار 4:3.
ئىمان دېگەن نېمە؟
ئىمان پەقەت مۇقەددەس كىتابتا يېزىلغان ھەقىقەتنى بىلىپ، ئۇنى قوبۇل قىلىش ئەمەس، چۈنكى ھەتتا «بۇنىڭغا جىنلارمۇ ئىشىنىدۇ ھەم قورقۇپ تىترەيدۇ» (ياقۇپ 2:19). ئۇنداقتا، ئىمان دېگىنىمىز نېمە؟
بىز كېچە ھەم كۈندۈزنىڭ مەڭگۈ داۋام قىلىدىغانلىقىغا ئىشەنگىنىمىزدەك، خۇدانىڭ سۆزلىرى چوقۇم ئەمەلگە ئاشىدىغانلىقىغىمۇ ئىشىنىمىز
مۇقەددەس كىتابتا ئىماننىڭ ئىككى تەرىپى بار ئىكەنلىكى ئېيتىلغان. بىرىنچى، «ئېتىقاد ئۈمىد قىلىۋاتقان نەرسىلەرنىڭ ئەمەلگە ئېشىشىغا بولغان ئىشەنچ» (ئىبرانىي. 11:1). ئىمانىڭىز بولسا، يەھۋا خۇدانىڭ ئېيتقانلىرى ھەقىقەت ئىكەنلىكىگە ۋە چوقۇم ئەمەلگە ئاشىدىغانلىقىغا ئىشىنىسىز. مەسىلەن، يەھۋا ئىسرائىللارغا مۇنداق دېگەن: «ئەگەر سىلەر كۈن ۋە تۈن بىلەن تۈزگەن ئەھدەمنى بۇزالىساڭلار، كۈن بىلەن تۈننىڭ ئۆز ۋاقتىدا ئالمىشىشىنى توختىتىپ قويالىساڭلار، ئۇ چاغدا، قۇلۇم داۋۇت بىلەن تۈزگەن ئەھدەم بۇزۇلۇپ، … كېتىدۇ» (يەرەم. 33:20، 21). قاچاندۇ بىر ۋاقىتتا كۈن چىقماي ياكى پاتماي قېلىپ، كۈن بىلەن تۈن ئالماشماي قالىدۇ، دەپ قورققان چاغلىرىڭىز بولغانمۇ؟ ئەلۋەتتە، ياق. بىز كۈننىڭ سەھەردە چىقىپ، كەچتە پاتىدىغانلىقىغا ھېچ گۇمان قىلمايمىز. ئۇنداقتا، كۈن بىلەن تۈننى ياراتقان خۇدا ئۆز ۋەدىلىرىنى ئورۇنلايدىغانلىقىغا گۇمان قىلساق، توغرا بولامدۇ؟ ئەلۋەتتە، ياق!—يەشايا 55:10، 11؛ مەتتا 5:18.
ئىككىنچى، ئىمان «كۆزگە كۆرۈنمەس نەرسىلەرنىڭ ئېنىق دەلىل-ئىسپاتلىرىغا قايىل بولۇشتۇر» (ئىبرانىي. 11:1). بۇنى بىر مىسال بىلەن چۈشەندۈرۈشكە بولىدۇ. كىچىك بالا سىزدىن: «ھاۋانىڭ بار ئىكەنلىكىنى نەدىن بىلىسىز؟»— دەپ سورىدى دەيلى. سىز ھاۋانى كۆزۈڭىز بىلەن كۆرمىسىڭىزمۇ، بالىغا ئۇنىڭ بار ئىكەنلىكىگە مۇنداق دەلىللەرنى كەلتۈرىسىز: بىز ئۇنىڭ بىلەن دەم ئالىمىز، شامال چىققاندا ۋە باشقا ۋاقىتلاردا ئۇنى سېزىمىز. بالا بۇلارغا كۆز يەتكۈزگەندە، ھەتتا كۆرۈنمەيدىغان نەرسىلەرگە ئىشىنىش مۇمكىن ئىكەنلىكىنى چۈشىنىدۇ. دەل شۇنداق، ئىمانمۇ روشەن ئىسپاتلارغا ئاساسلانغان.—رىملىقلار 1:20.
ھەقىقەتنى قەدىرلەش كېرەك
ئىمان روشەن دەلىل-ئىسپاتلارغا ئاساسلانغان، شۇڭا، ئىمانىڭىز بولۇشى ئۈچۈن «توغرا بىلىمگە ئىگە» بولۇشى لازىم (1-تىموت. 2:4). لېكىن، بۇ يېتەرلىك ئەمەس. ئەلچى پاۋلۇس مۇنداق يازغان: «ئىنسان چىن قەلبىدىن ئىشىنىش ئارقىلىق ھەققانىي ئادەم بولىدۇ» (رىملىقلار 10:10). بىز ھەقىقەتكە ئىشىنىپلا قويماي، ئۇنى قەدىرلىشىمىز كېرەك. شۇ چاغدىلا ئىماننى ئەمەلىيەتتە كۆرسىتىشنى، يەنى خۇدانى خۇرسەن قىلىپ ياشاشنى خالايدىغان بولىمىز (ياقۇپ 2:20). قەلبىدە ھەقىقەت ئۈچۈن سەمىمىي مىننەتدارلىقى يوق ئادەم ھەتتا ئېنىق ئىسپاتلارنى رەت قىلىشى مۇمكىن. سەۋەبى، ئۇ كۆز قارىشىنى ئۆزگەرتىشكە ئۇنىمايدۇ ياكى تەن ھەۋەسلىرىگە بېرىلىشكە سەۋەب ئىزدەيدۇ (2-پېتر. 3:3، 4؛ يەھۇدا 18). شۇڭا، قەدىمدە ھەتتا مۆجىزىلەرنى ئۆز كۆزى بىلەن كۆرگەنلەرنىڭ ھەممىسىدە ئىمان بولمىغان (سانلار 14:11؛ يۇھاننا 12:37). خۇدانىڭ مۇقەددەس روھى پەقەت ھەقىقەتنى چىن يۈرەكتىن ياخشى كۆرىدىغان ئادەملەرگە تەسىر قىلىپ، ئىماننى يېتىلدۈرۈشىگە ياردەم بېرىدۇ.—گالاتىيا. 5:22؛ 2-سالونىكا. 2:10، 11.
داۋۇت كۈچلۈك ئىمانغا قانداق ئىگە بولغان؟
داۋۇت پادىشاھنىڭ ئىمانى بەك كۈچلۈك بولغان (ئىبرانىي. 11:32، 33). ئەمما، ئۇنىڭ ئائىلىسىدىكىلەرنىڭ ھەممىسى شۇنداق ئىمانغا ئىگە بولمىغان. مەسىلەن، داۋۇتنىڭ ئەڭ چوڭ ئاكىسى ئېلىيابنى ئالايلى. جوليات ئىسرائىل خەلقىنى ھاقارەتلىگەندە، داۋۇت ئاچچىقلانغان ئىدى. شۇ چاغدا ئېلىياب ئۇنى ئەيىبلەپ، يەھۋانىڭ قۇتۇلدۇرۇپ قېلىشىغا ئىشەنمىگەنلىكىنى كۆرسەتكەن (1-سام. 17:26—28). ھېچكىم ئىمان بىلەن تۇغۇلمايدۇ ياكى ئۇنى ئاتا-ئانىسىدىن مىراس قىلىپ ئالمايدۇ. داۋۇت ئۆزى خۇدا بىلەن يېقىن مۇناسىۋەتنى راۋاجلاندۇرغانلىقتىن، ئىمانى كۈچلۈك بولغان.
زەبۇرنىڭ 27-بابىدا، داۋۇتنىڭ كۈچلۈك ئىمانغا قانداق ئىگە بولغانلىقى كۆرسىتىلگەن (1-ئايەت). داۋۇت يەھۋانىڭ ئۆتمۈشتە ئۇنى دۈشمەنلىرىدىن قانداق قۇتقازغانلىقى توغرۇلۇق ئويلانغان (2، 3-ئايەتلەر). داۋۇت يەھۋانىڭ ئۆيىدە بولغانلىقىنى بەك قەدىرلىگەن (4-ئايەت). داۋۇت ئىمانداشلىرى بىلەن بىللە مۇقەددەس چېدىردا ئىبادەت قىلغان (6-ئايەت). ئۇ يەھۋاغا چىن يۈرەكتىن دۇئا قىلغان (7، 8-ئايەتلەر). ئۇنىڭدىن باشقا، داۋۇت خۇدانىڭ كۆرسەتمىلىرىگە بويسۇنۇشنى خالىغان (11-ئايەت). داۋۇت ئىمانىنى ناھايىتى مۇھىم دەپ قارىغاچ، مۇنداق دەپ يازغان: «ئىمانىم بولمىسا، مەن قەيەردە بولاتتىم؟».—13-ئايەت.
ئىماننى قانداق كۈچەيتەلەيمىز؟
داۋۇتنىڭكىگە ئوخشاش ئىمانغا ئىگە بولۇش ئۈچۈن، زەبۇرنىڭ 27-بابىدا يېزىلغاندەك، ئۇنىڭ ئوي-پىكىر قىلىش ئۇسۇلى بىلەن ئادەتلىرىنى ئۈلگە قىلساق بولىدۇ. ئىمان توغرا بىلىمگە ئاساسلانغان. شۇڭا، مۇقەددەس كىتاب ۋە ئۇنىڭغا ئاساسلانغان ماتېرىياللارنى قانچە كۆپ ئوقۇساق، ئىماننى يېتىلدۈرۈش شۇنچە ئاسان بولىدۇ (زەبۇر 1:2، 3). تەتقىق قىلغاندا چوڭقۇر ئويلىنىشقا ۋاقىت بۆلۈڭ. چوڭقۇر ئويلىنىشنى يەر دېسەك، مىننەتدارلىق — شۇ يەردە ئۆسىدىغان ئۆسۈملۈك. يەھۋاغا مىننەتدارلىقىمىز ئاشقانسېرى، ئۇنىڭغا جامائەت يىغىلىشلىرىدا ئىبادەت قىلىش ۋە باشقىلارغا ۋەز قىلىش ئىستىگىمىز كۈچىيىدۇ (ئىبرانىي. 10:23—25). ئىمانىمىزنى «دۇئا قىلىش» ۋە ئۈمىدسىزلەنمەسلىك ئارقىلىق كۆرسىتىمىز (لۇقا 18:1—8). يەھۋا بىزگە غەمخورلۇق قىلىدىغانلىقىغا ئىشىنىپ، ئۇنىڭغا «توختىماي دۇئا» قىلايلى (1-سالونىكا. 5:17؛ 1-پېتر. 5:7). ئىشەنچ بىزنى ئەمەلىي ھەرىكەت قىلىشقا ئۈندەيدۇ، ھەرىكەت قىلىش نەتىجىسىدە ئىمان-ئېتقادىمىز مۇستەھكەملىنىدۇ.—ياقۇپ 2:22.
ئەيساغا ئىشىنىڭ
ئۆلۈمىنىڭ ئالدىدىكى كەچتە، ئەيسا ئۆز شاگىرتلىرىغا: «خۇداغا ئىشىنىڭلار، ماڭا ھەم ئىشنىڭلار»،— دەپ ئېيتقان (يۇھاننا 14:1). بىز پەقەت يەھۋا خۇداغىلا ئەمەس، ئەيساغىمۇ ئىشەنچ باغلىشىمىز لازىم. ئەيساغا ئىشەنگەنلىكىمىزنى قانداق بىلدۈرەلەيمىز؟ ئۈچ ئۇسۇلنى كۆرۈپ چىقايلى.
ئەيساغا ئىشىنىش نېمىنى بىلدۈرىدۇ؟
بىرىنچى، تۆلەمنى خۇدا شەخسەن سىزگە بەرگەن سوۋغاتدەك قوبۇل قىلىڭ. ئەلچى پاۋلۇس مۇنداق ئېيتقان: «مېنى سۆيگەن ۋە ئۆزىنى مەن ئۈچۈن پىدا قىلغان خۇدانىڭ ئوغلىغا بولغان ئىشەنچ بىلەن ياشايمەن» (گالاتىيا. 2:20). ئەيساغا چىن كۆڭلۈڭىزدىن ئىشەنسىڭىز، تۆلەمنىڭ سىز ئۈچۈن بېرىلگەنلىكىگە، گۇناھلىرىڭىزنىڭ كەچۈرۈلگەنلىكىگە، مەڭگۈ ھاياتقا ئۈمىد بېرىدىغانلىقىغا ۋە تۆلەم خۇدانىڭ سىزگە بولغان مېھىر-مۇھەببىتىنىڭ ئەڭ كۈچلۈك ئىسپاتى ئىكەنلىكىگە بولغان ئىشەنچىڭىزنى كۆرسىتىسىز (رىملىقلار 8:32، 38، 39؛ ئەفەس. 1:7). ئەگەر تۆلەم سىزگە ياردەم بېرىدىغانلىقىغا ھەقىقەتەن ئىشەنسىڭىز، ئۆزىڭىزنى ئەيىبلىك ياكى يامان ھېس قىلمايسىز.—2-سالونىكا. 2:16، 17.
ئىككىنچىسى، ئەيسانىڭ قۇربانلىقى ئاساسىدا يەھۋاغا دۇئا قىلىپ، ئۇنىڭغا يېقىنلىشىڭ. يەھۋا خۇداغا تۆلەمنىڭ ئاساسىدا دۇئا قىلغىنىمىزدا، «تىلىمىز قىسىلماي، كۆڭلۈڭ خاتىرجەم ھالدا رەھىم-شەپقەت تەختىگە» يېقىنلىشالايمىز (ئىبرانىي. 4:15، 16؛ 10:19—22). دۇئا گۇناھ قىلىشقا ئازدۇرۇلۇشقا قارشى تۇرۇش قارارىمىزدىن قايتماسلىققا ياردەم بېرىدۇ.—لۇقا 22:40.
ئۈچىنچى، ئەيساغا بويسۇنۇڭ. ئەلچى يۇھاننا مۇنداق يازغان: «كىمكى ئوغۇلغا ئىشەنسە، ئۇ مەڭگۈلۈك ھاياتقا ئېرىشىدۇ؛ كىمكى ئوغۇلغا ئىشەنمىسە، ھاياتنى كۆرمەيدۇ، بەلكى ئۇنىڭ ئۈستىگە خۇدانىڭ غەزىپى كېلىدۇ» (يۇھاننا 3:36). بايقىسىڭىز، يۇھاننا ئىمان بىلەن ئىتائەت قىلىشنىڭ بىر-بىرىگە باغلىنىشلىق ئىكەنلىكىنى ئېيتقان. شۇنىڭ ئۈچۈن، سىز ئەيساغا ئىتائەت قىلغاندا، ئۇنىڭغا ئىشىنىدىغانلىقىڭىزنى كۆرسىتىسىز. «مەسىھنىڭ قانۇنىغا» بويسۇنۇش، يەنى ئۇنىڭ تەلىملىرىگە ۋە بۇيرۇقلىرىغا قۇلاق سېلىش ئارقىلىق بىز ئەيساغا ئىتائەت قىلىدىغانلىقىمىزنى كۆرسىتىمىز (گالاتىيا. 6:2). شۇنىڭ بىلەن بىرگە «سادىق ۋە ئەقىل-پاراسەتلىك قۇل» بېرىدىغان كۆرسەتمىلەرگە ماس ھەرىكەت قىلساق، ئەيساغا ئىتائەت قىلغان بولىمىز (مەتتا 24:45). ئەيساغا قۇلاق سالساق، بىز ھەتتا قاتتىق بوراندەك كەلگەن قىيىنچىلىقلارغا قارشى تۇرالايمىز.—لۇقا 6:47، 48.
مۇقەددەس ئىمانىڭلار ئاساسىدا مۇستەھكەملىنىڭلار
بىر كۈنى بىر كىشى ئەيساغا: «مەن ئىشىنىمەن! ئەگەر ئىمانىم سۇس بولسا، ماڭا ياردەم بېرىڭ!»— دەپ توۋلىغانىدى (ماركۇس 9:24). مەلۇم دەرىجىدە ئىمانى بولسىمۇ، بۇ كەمتەر كىشى ئۇنىڭغا ئىشەنچ يېتىشمىگەنلىكىنى ئېتىراپ قىلغانىدى. شۇ كىشىگە ئوخشاش، ھەممىمىزنىڭ ھاياتىدا بىزگە كۆپرەك ئىشەنچ كېرەك بولىدىغان ئەھۋاللار بولىدۇ. بىز ئىمانىمىزنى ھازىرنىڭ ئۆزىدە مۇستەھكەملىيەلەيمىز. كۆرگىنىمىزدەك، خۇدانىڭ سۆزىنى ئوقۇپ، ئوقۇغانلىرىمىز ئۈستىدە چوڭقۇر ئويلانغاندا، ئىمان-ئىمانىمىز مۇستەھكەملىنىدۇ ۋە يەھۋاغا تېخىمۇ مىننەتدار بولىمىز. ئىمانىمىزنى مۇستەھكەملەشنىڭ يەنە باشقا ئۇسۇللىرى: ئىمانداشلار بىلەن بىللە يەھۋاغا ئىبادەت قىلىش، باشقىلارغا ئۈمىدىمىز توغرۇلۇق ئېيتىش ۋە دائىم دۇئا قىلىش. ئۇنىڭدىن باشقا، ئىمانىمىزنى مۇستەھكەملەپ، بىز ئەڭ ياخشى مۇكاپاتقا ئېرىشىمىز. مۇقەددەس كىتاب بىزنى ئۈندەپ شۇنداق دەيدۇ: «ئەي ئەزىز قېرىنداشلىرىم، ئۆزۈڭلارنى ئەڭ مۇقەددەس ئىمانىڭلارنىڭ ئۇلى ئۈستىدە مۇستەھكەملەپ، … ئۆزۈڭلارنى خۇدانىڭ مۇھەببىتى ئىچىدە ساقلاڭلار».—يەھۇدا 20، 21.
بۇلارغىمۇ قىزىقىشىڭىز مۇمكىن
«كۆزىتىش مۇنارى» (تەتقىق قىلىش نەشىرى)
ياخشىلىق قىلىدىغان ئادەم بولۇشقا ئىنتىلەيلى!
ھىممەتلىك ئادەم قانداق بولىدۇ؟ نېمە ئۈچۈن بۇ ئېسىل پەزىلەتنى يېتىلدۈرۈشكە تىرىشىشىمىز كېرەك؟
