21-دەرس
خۇش خەۋەرنى كىملەر يەتكۈزۈۋاتىدۇ؟
يەھۋا ئۆز پادىشاھلىقى ئارقىلىق پات ئارىدا دۇنيادىكى بارلىق قىيىنچىلىقلارنى يوق قىلىدۇ. بۇ كىشىنى خۇش قىلىدىغان خەۋەر. ئەيسا ئۆز ئەگەشكۈچىلىرىنىڭ بۇ خەۋەرنى بارلىق ئادەملەرگە يەتكۈزۈشىنى خالايدۇ (مەتتا 28:19، 20). يەھۋا گۇۋاھچىلىرى ئەيسانىڭ بۇيرۇقىغا قانداق بويسۇنۇۋاتىدۇ؟
1. مەتتا 24:14-ئايەتتە يېزىلغان سۆزلەر، بۈگۈنكى كۈندە قانداق ئەمەلگە ئېشىۋاتىدۇ؟
ئەيسا مۇنداق بېشارەت قىلغان: «بۇ پادىشاھلىق خۇش خەۋىرى بارچە مىللەتلەرگە يەتكۈزۈلۈشى ئۈچۈن پۈتۈن دۇنيادا ۋەز قىلىنىدۇ ۋە ئاندىن كېيىن ئاخىرى كېلىدۇ» (مەتتا 24:14). يەھۋا گۇۋاھچىلىرى بۇ مۇھىم خىزمەتنى خۇشاللىق بىلەن قىلىۋاتىدۇ. خۇش خەۋەر پۈتۈن دۇنيادا 1000دىن ئارتۇق تىلدا يەتكۈزۈلىۋاتىدۇ. بۇ ئېلىپ بېرىلىۋاتقان كەڭ كۆلەملىك خىزمەتنى تەشكىللەش كۆپ كۈچ تەلەپ قىلىدۇ. يەھۋانىڭ ياردىمىسىز بىز بۇ ئىشنى قىلالمايمىز.
2. ئادەملەرگە خۇش خەۋەرنى يەتكۈزۈش ئۈچۈن قانداق تىرىشچانلىق كۆرسىتىۋاتىمىز؟
بىز قەيەردە ئادەم بولسا، شۇ يەردە ۋەز قىلىمىز. بىرىنچى ئەسىردىكى ئەيسانىڭ ئەگەشكۈچىلىرىگە ئوخشاش، بىزمۇ ئۆيمۇ-ئۆي خۇش خەۋەر ئېيتىمىز (ئەلچىلەر 5:42). مۇشۇ ئۇسۇل ئارقىلىق ھەر يىلى مىليونلىغان ئادەملەرگە خۇش خەۋەرنى يەتكۈزىمىز. ئادەملەر دائىم ئۆيدە بولمىغاچ، بىز يەنە ئاممىۋىي ئورۇنلاردىمۇ ۋەز قىلىمىز. ئادەملەرگە ياراتقۇچى يەھۋا ۋە ئۇنىڭ ئىرادىسىنى بىلدۈرۈش ئۈچۈن ھەربىر پۇرسەتنى قولدىن بەرمەيمىز.
3. كىملەرنىڭ خۇش خەۋەرنى ۋەز قىلىش مەجبۇرىيىتى بار؟
بارلىق ئەيسانىڭ ھەقىقىي ئەگەشكۈچىلىرىنىڭ باشقىلارغا خۇش خەۋەرنى يەتكۈزۈش مەجبۇرىيىتى بار. بىز بۇ ۋەزىپىنى بەك مۇھىم دەپ قارايمىز. ۋەز خىزمىتى باشقىلارنىڭ ھاياتىنى قۇتقۇزالايدۇ. شۇڭا، ھەربىرىمىز ئۆز شارائىتىمىزگە قاراپ، ئىمكانىيىتىمىزنىڭ بارىچە كۆپرەك ۋەز قىلىشقا تىرىشىمىز (1-تىموتىي 4:16-نى ئوقۇڭ). بىز بۇ خىزمەت ئۈچۈن ھەق ئالمايمىز. چۈنكى، مۇقەددەس كىتابتا، ھەقسىز ئالدىڭلار، ھەقسىز بېرىڭلار دېيىلگەن (مەتتا 10:7، 8). ھەممىلا كىشى خۇش خەۋەرگە قۇلاق سالمايدۇ. بىراق، بىز ۋەز قىلىشنى داۋاملاشتۇرۇش ئارقىلىق، يەھۋانىڭ بۇيرۇقىغا بۇيسۇنۇپ، ئۇنىڭ كۆڭلىنى خۇرسەن قىلىمىز.
چوڭقۇرراق قېزىڭ
يەھۋا گۇۋاھچىلىرى دۇنيانىڭ ھەرقايسى جايلىرىدا تىرىشىپ ۋەز قىلىۋاتقانلىقى ۋە يەھۋانىڭ بىزگە قانداق ياردەم بېرىۋاتقانلىقىنى كۆرۈڭ.
دۇنيا يۈزىدىكى ۋەز ئىشى: (1) كوستارىكا، (2) ئامېرىكا، (3) بېنىن، (4) تايلاند، (5) ياپ، (6) شۋېتسىيە
4. بارلىق ئادەملەرگە خۇش خەۋەرنى ئاڭلىتىش ئۈچۈن تىرىشچانلىق كۆرسىتىۋاتىمىز
دۇنيانىڭ جاي-جايلىرىدا خۇش خەۋەرنى ئاڭلىتىش ئۈچۈن، يەھۋا گۇۋاھچىلىرى ئىمكانىيىتىنىڭ بارىچە تىرىشچانلىق كۆرسىتىۋاتىدۇ. فىلىمنى كۆرۈڭ، كېيىن تۆۋەندىكى سوئال ئۈستىدە ئويلىنىپ كۆرۈڭ.
-
يەھۋا گۇۋاھچىلىرىنىڭ خۇش خەۋەرنى يەتكۈزۈش ئۈچۈن كۆرسەتكەن تىرىشچانلىقى، سىزدە قانداق تەسىرات قالدۇردى؟
مەتتا 22:39 ۋە رىملىقلار 10:13–15-نى ئوقۇڭ، كېيىن تۆۋەندىكى سوئاللارغا جاۋاب بېرىڭ:
-
ۋەز خىزمىتىمىز باشقىلارغا بولغان مېھىر-مۇھەببىتىمىزنى قانداق كۆرسىتىدۇ؟
-
تىرىشىپ خۇش خەۋەرنى يەتكۈزۈۋاتقانلارغا يەھۋا قانداق قارايدۇ؟—15-ئايەتكە قاراڭ.
5. بىز خۇدانىڭ خىزمەتداشلىرى
يەھۋا خۇدانىڭ ئۆزى ۋەز خىزمىتىمىزگە يېتەكچىلىك قىلىۋاتىدۇ. بۇنىڭغا نۇرغۇن مىساللار بار. مەسىلەن، يېڭى زېلاندىيىدىكى پائۇل ئىسىملىك بۇرادەر، بىر كۈنى چۈشتىن كېيىن ئۆيمۇ-ئۆي ۋەز قىلغاندا، بىر ئايال بىلەن سۆھبەتلەشكەن. ئەسلىدە ئۇ ئايال ئەتىگەندە. خۇدانىڭ يەھۋا دېگەن ئىسىمىنى ئىشلىتىپ دۇئا قىلغان ۋە ئۇنىڭدىن ياردەم بېرىشكە بىرىنى ئەۋەتىشنى سورىغان. پائۇل شۇنداق دەيدۇ: «ئۈچ سائەتتىن كېيىن، مەن ئۇنىڭ ئىشىكى ئالدىغا كەلگەن ئىدىم».
1-كورىنتلىقلار 3:9-نى ئوقۇڭ، كېيىن تۆۋەندىكى سوئالغا جاۋاب بېرىڭ:
-
مۇشۇنىڭغا ئوخشاش مىساللار ۋەز خىزمەتكە يەھۋانىڭ يېتەكچىلىك قىلىۋاتقانلىقىنى قانداق كۆرسىتىدۇ؟
ئەلچىلەر 1:8-نى ئوقۇڭ، كېيىن تۆۋەندىكى سوئالغا جاۋاب بېرىڭ:
-
نېمە ئۈچۈن خۇش خەۋەرنى يەتكۈزۈش مەجبۇرىيىتىمىزنى ئورۇنلاش ئۈچۈن، يەھۋانىڭ ياردىمىگە مۇھتاج بولىمىز؟
سىز بىلەمسىز؟
ھەر ھەپتە ئوتتۇرىسىدىكى جامائەت يىغىلىشلىرىدا، بىز باشقىلارغا قانداق ۋەز قىلىش ھەققىدە تەلىم-تەربىيە ئالىمىز. سىز شۇنداق جامائەت يىغىلىشلىرىغا قاتناشقان بولسىڭىز، ئاشۇ تەلىم-تەربىيە توغرۇلۇق نېمە ئويلايسىز؟
6. بىز خۇداغا بويسۇنۇپ، داۋاملىق ۋەز قىلىمىز
بىرىنچى ئەسىردە، بەزى ئادەملەر ئەيسانىڭ ئەگەشكۈچىلىرىنىڭ خۇش خەۋەرنى يەتكۈزۈشىنى توختىتىشقا ئۇرۇنغان. شۇ چاغدا، ئەيسانىڭ ئەگەشكۈچىلىرى خۇش خەۋەرنى يەتكۈزۈش ھوقۇقىنى قانۇن ئارقىلىق قوغدىغان ئىدى (فىلىپىلىكلەر 1:7). بۈگۈنكى كۈندە يەھۋا گۇۋاھچىلىرىمۇ شۇنداق قىلىۋاتىدۇ a.
ئەلچىلەر 5:27–42-نى ئوقۇڭ، كېيىن تۆۋەندىكى سوئالغا جاۋاب بېرىڭ:
-
نېمە ئۈچۈن بىز خۇش خەۋەرنى يەتكۈزۈشنى توختاتمايمىز؟—29، 38 ۋە 39-ئايەتلەرگە قاراڭ.
بەلكىم، بەزىلەر مۇنداق سورايدۇ: «نېمە ئۈچۈن يەھۋا گۇۋاھچىلىرى ئۆيمۇ-ئۆي ۋەز قىلىدۇ؟»
-
سىز قانداق جاۋاب بېرىسىز؟
خۇلاسە
ئەيسا ئەگەشكۈچىلىرىگە بارچە مىللەت كىشىلىرىگە خۇش خەۋەرنى يەتكۈزۈشنى بۇيرىغان. يەھۋا ئۆز خەلقىنىڭ بۇ خىزمەتنى قىلىشىغا ياردەم بېرىۋاتىدۇ.
تەكرارلاش
-
دۇنيانىڭ ھەرقايسى جايلىرىدا خۇش خەۋەر قانداق يەتكۈزۈلىۋاتىدۇ؟
-
ۋەز خىزمىتىمىزدە باشقىلارغا بولغان مېھىر-مۇھەببىتىمىز قانداق كۆرۈنىدۇ؟
-
سىزنىڭچە، ۋەز خىزمىتى بىزنى خۇشاللىققا ئېرىشتۈرەلەمدۇ؟ نېمە ئۈچۈن؟
ئىزدىنىپ كۆرۈڭ
يەھۋا گۇۋاھچىلىرى چوڭ شەھەرلەردە خۇش خەۋەرنى قانداق يەتكۈزۈۋاتقانلىقىنى كۆرۈڭ.
يەھۋا گۇۋاھچىلىرى مۇساپىرلارغا قانداق ياردەم بېرىدۇ؟
«مۇساپىرلارنىڭ روھىي ئېھتىياجلىرىنى قانائەتلەندۈرۈش» (59:5)
بىر قېرىنداش ھاياتىنى خۇش خەۋەر يەتكۈزۈش خىزمىتىگە ئاتاپ، زور خۇشاللىققا ئېرىشكەن. ئۇنىڭ نېمە دەيدىغانلىقىنى ئاڭلاپ بېقىڭ.
يەھۋا گۇۋاھچىلىرىنىڭ سوتلاردىكى غەلبىسى خۇش خەۋەرنىڭ تېخىمۇ كەڭ تارقىلىشىغا يول ئاچقان. بەزى مىساللارنى كۆرۈپ بېقىڭ.
«پادىشاھلىق خۇش خەۋىرىنى ۋەز قىلغۇچىلارنىڭ سوتقا سۇنغان ئەرزلىرى» («خۇدا پادىشاھلىقى ھۆكۈمرانلىق قىلماقتا!»، 13-باب)
a خۇدا بىزگە باشقىلارغا خۇش خەۋەرنى ۋەز قىلىش ھوقۇقىنى بەرگەن. شۇڭا، بىز تاپشۇرۇلغان ۋەزىپىنى ئورۇنلاش ئۈچۈن، ئىنسانلار قۇرغان ھۆكۈمەتنىڭ رۇخسىتىنى ئېلىشىمىزنىڭ ھاجىتى يوق.
بۇلارغىمۇ قىزىقىشىڭىز مۇمكىن
كۆپ سورالغان سوئاللار
مۇقەددەس كىتابنى تەتقىق قىلىش دېگەن نېمە؟
مۇقەددەس كىتابنى ھەقسىز تەتقىق قىلىش پروگراممىمىز ھەققىدە سوئاللارغا جاۋاب ئېلىڭ.
