14-بۆلەك
خۇدانىڭ ئۆز پەيغەمبەرلىرى ئارقىلىق سۆز قىلىشى
جازا ھۆكۈم قىلىش؛ توغرا ئىبادەت قىلىشنىڭ يولىنى كۆرسىتىش ۋە مەسىھ ئېلىپ كېلىدىغان ئۈمىد توغرىسىدىكى خەۋەرلەرنى يەتكۈزۈشى ئۈچۈن پەرۋەردىگار يەھۋانىڭ پەيغەمبەرلەرنى ئەۋەتىشى
شىمالىي ۋە جەنۇبىي پادىشاھلىق دەۋرىدە، خۇدا بەزى كىشىلەرنى تاللاپ پەيغەمبەرلىك قىلىشقا ئەۋەتكەن ئىدى. ئۇلارنىڭ ئىمان-ئېتقادى ناھايىتى كۈچلۈك بولۇپ، جاسارەتلىك بىلەن خۇدانىڭ سۆزلىرىنى يەتكۈزگەن ئىدى. خۇدانىڭ ئاشۇ پەيغەمبەرلىرى تەكىتلىگەن تۆت مۇھىم نۇقتا توغرىسىدا مۇلاھىزە قىلىپ باقايلى.
1. يېرۇسالېمنىڭ ۋەيران قىلىنىشى. خۇدانىڭ پەيغەمبەرلىرى بولۇپمۇ يەشايا ۋە يەرەمىيا، يېرۇسالېمنىڭ ۋەيران قىلىنىپ، قاقاس-چۆل تاشلىۋېتىلدىغانلىقى توغرىسىدا ناھايىتى ئۇزۇن زامانلار ئىلگىرى ئالدىن ئاگاھلاندۇرۇش بەرگەن ئىدى. ئۇلار، نېمە ئۈچۈن خۇدانىڭ مۇشۇ شەھەر خەلقىگە غەزەپلەنگەنلىكىنى جانلىق سۆز ئىبارىلەر بىلەن ئەينەن كۆرسەتكەن. يېرۇسالېم خەلقى خۇدا بىز بىلەن بىرگە دەپ جاكارلاشقان. ئەمما، ئۇلارنىڭ يالغان ئىلاھلارغا ئىبادەت قىلىشى، بۇزۇقچىلىق قىلىشى ۋە زوراۋانلىقى ئۇلارنىڭ ساختىپەز ئىكەنلىكىنى ئىسپاتلىغان ئىدى.—2-پادىشاھلار 21:10–15؛ يەشايا 3:1–8، 16–26؛ يەرەمىيا 2:1–3:13.
2. توغرا ئىبادەت قىلىش يولىغا قايتىش. 70 يىل بابىلوندا ئەسىر بولۇپ ياشىغاندىن كېيىن، خۇدانىڭ خەلقى ئەسىرلىكتىن ئازاد بولاتتى. ئۇلار قاقاس-چۆل تاشلىۋېتىلگەن يۇرتىغا قايتىپ، يېرۇسالېمدىكى يەھۋانىڭ ئىبادەتخانىسىنى قايتا ياسايتتى (يەرەمىيا 46:27؛ ئاموس 9:13–15). بىر پادىشاھنىڭ ئىسمىنىڭ كۇرس دەپ ئاتىلىدىغانلىقى ھەمدە ئۇنىڭ بابىلوننى ئىشغال قىلىپ، خۇدانىڭ خەلقىنىڭ توغرا ئىبادەت قىلىش يولىغا قايتىشىغا رۇخسەت قىلىدىغانلىقى، يەشايا پەيغەمبەر تەرىپىدىن ئاشۇ ئىشلار يۈز بېرىشتىن 200 ئىلگىرى ئالدىن بېشارەت بېرىلگەن. يەشايا ئۇ، ھەتتا كۇرسنىڭ قانداق جەڭ تەدبىرلىرىنى ئىشلىتىدىغانلىقىنى تەپسىلىي بايان قىلغان ئىدى.—يەشايا 44:24–45:3.
3. مەسىھنىڭ مەيدانغا كېلىشى ۋە ئۇنىڭ ھايات كەچۈرمىشى. مەسىھ بەيتلەھەم دېگەن شەھەردە تۇغۇلاتتى (مىخا 5:2). ئۇ كەمتەر بولۇپ، يېرۇسالېمغا بىر تەخەي مىنىپ كىرەتتى (زەكەرىيا 9:9). گەرچە ئۇ مۇلايىم ۋە مېھىرى-مۇھەببەتلىك بولسىمۇ، ئۇ قارشى ئېلىنمايتتى ۋە نۇرغۇن كىشىلەر ئۇنى رەت قىلاتتى (يەشايا 42:1–3؛ 53:1، 3). ئۇ ئېچىنىشلىق ئۆلۈمنى باشتىن كەچۈرەتتى. ئۇنداقتا، مەسىھنىڭ ھاياتى شۇنداقلا ئاخىرلىشامتى؟ ياق، ئۇنىڭ ئۆز ھاياتىنى قۇربان قىلىشى سەۋەبلىك نۇرغۇن ئىنسانلارنىڭ گۇناھى كەچۈرۈم قىلىنىش ئىمكانىيىتگە ئىگە قىلىناتتى (يەشايا 53:4، 5، 9–12). پەقەت ئۇنىڭ تىرىلىشى ئاشۇلارنى ئەمەلگە ئاشۇرالايتتى.
4. مەسىھنىڭ پادىشاھ بولۇپ يەر يۈزى ئۈستىدىن ھۆكۈمرانلىق قىلىشى. مۇكەممەل ئەمەس ئىنسانلارنىڭ ئۆز-ئۆزىگە تىنچ-ئامانلىق بىلەن ھۆكۈمرانلىق قىلالىشى راستىنلا مۇمكىن ئەمەس. بىراق، مەسىھ پادىشاھ تىنچ-ئامانلىقنىڭ ئەمىرى يەنى شاھى دەپ ئاتىلاتتى (يەشايا 9:6، 7؛ يەرەمىيا 10:23). ئۇنىڭ ھۆكۈمرانلىقى ئاستىدا، بارچە ئىنسانلار بىر-بىرى بىلەن ئىناق-ئىتتىپاق بولۇپ، ھەتتا جانلىقلار دۇنياسى بىلەن ئىنسانلار ئوتتۇرىسىدا تىنچ-ئامانلىق ئەسلىگە كېلەتتى (يەشايا 11:3–7). كېسەللىكلەر يەنە مەۋجۇت بولمايتتى (يەشايا 33:24). ھەتتا ئۆلۈم مەڭگۈ يوق بولاتتى (يەشايا 25:8). مەسىھ پادىشاھ بولۇپ ھاكىمىيەت يۈرگۈزگەن دەۋردە، ئۆلۈپ كەتكەنلەر يەر يۈزىدە قايتا ھاياتلىققا ئىگە قىلىنىشى ئۈچۈن تىرىلدۈرۈلەتتى.—دانىيال 12:13.
—يەشايا، يەرەمىيا، دانىيال، ئاموس مىخا ۋە زەكەرىيا كىتابلىرىغا ئاساسەن.
