22-بۆلەك
ئەلچىلەرنىڭ يۈرەكلىك بىلەن خۇش خەۋەر تارقىتىشى
زىيانكەشلىككە قارىماستىن ئەيسانىڭ ئەگەشكۈچىلىرى جامائەتچىلىكىنىڭ تېزلىكتە كۆپۈيۈشى
ئەيسا ئاسمانغا چىقىپ كېتىپ ئون كۈندىن كېيىن، يەنى مىلادى 33-يىلى يەھۇدىيلارنىڭ ئورما ھېيتىدا، تەخمىنەن 120گە يېقىن شاگىرت يېرۇسالېمدىكى بىر ئۆيگە يىغىلىپ جەم بولۇشقان ئىدى. تۇيۇقسىز گويا قاتتىق شامال چىققاندەك بىر ئاۋاز ئاڭلىنىپ، ئۇلار ئولتۇرغان ئۆينى قاپلىدى. ھەمدە ئاجايىپ مۆجىزە يۈز بېرىپ، شاگىرتلار ئۆزلىرىگە نامەلۇم بولغان تىللاردا سۆزلەشكە باشلىدى. مۇشۇ غەلىتە ۋەقە، ئەيسانىڭ شاگىرتلىرىنى خۇدانىڭ مۇقەددەس روھقا چۆمۈلدۈرگەنلىكىنى كۆرسەتكەن ئىدى.
سىرتتا، ھېيت ئۆتكۈزۈش ئۈچۈن باشقا دۆلەتلەردىن كەلگەن بىر توپ كىشىلەر بار ئىدى. ئاشۇ كىشىلەر، ئەيسانىڭ شاگىرتلىرىنىڭ ئۆزلىرىنىڭ تىللىرىدا راۋان سۆزلەۋاتقانلىقىنى ئاڭلاپ ھەيران بولۇشتى. پېترۇس نېمە ئىش بولغانلىقىنى چۈشەندۈرۈپ، يوئېل پەيغەمبەرنىڭ بېشارەتلىرىنى نەقىل كەلتۈرۈپ، خۇدا ئۆز روھىنى ئۈستىگە ‹تۆككەن› كىشىنىڭ شۇنداق ئاجايىپ مۆجىزىلەرنى كۆرسىتەلەيدىغانلىقىنى ئېيتقان ئىدى (يوئېل 2:28، 29). مۇقەددەس روھنىڭ مۇشۇ كۈچلۈك گۇۋاھلىقى مۇھىم بىر ئۆزگىرىشنىڭ بولغانلىقىنى ئېنىق كۆرسەتكەن: خۇدا ئىسرائىللارغا ئىلتىپات قىلىشنى توختىتىپ، يېڭىدىن بارلىققا كەلگەن ئەيسانىڭ ئەگەشكۈچىلىرى جامائەتچىلىكىگە ئىلتىپات قىلىشنى باشلىغان. شۇ ۋاقىتتىن باشلاپ، خۇداغا مەقبۇل بولىدىغان ئۇسۇلدا ئىبادەت قىلىشنى خالايدىغانلار، ئەيسانىڭ ئەگەشكۈچىلىرى بولۇشقان ئىدى.
شۇنىڭ بىلەن بىر ۋاقىتتا، قارشىلىقلار كۈچىيىپ، دۈشمەنلەشكۈچىلەر بەزى ئەلچىلەرنى زىندانغا تاشلىدى. بىراق، كېچىدە خۇدانىڭ پەرىشتىسى زىنداننىڭ ئىشىكىنى ئېچىپ، ئۇلارغا داۋاملىق خۇش خەۋەر تارقىتىشنى ئېيتتى. تاڭ ئاتقاندا، ئۇلار ئىبادەتخانىغا كىرىپ داۋاملىق ئەيسا توغرىسىدا خۇش خەۋەر تارقاتتى. ئۇلارغا قارشى تۇرغۇچى دىنىي يېتەكچىلەر قاتتىق غەزەبلىنىپ، ئۇلارنى خۇش خەۋەر تارقىتىشنى توختىتىشقا بۇيرىغاندا، ئەلچىلەر يۈرەكلىك بىلەن: «خۇداغا ئادەملەردىن ئۇشۇغراق بويۇنسۇنماق كېرەكتۇر»، دەپ جاۋاب قايتۇرغان ئىدى.—ئەلچىلەر 5:28، 29.
زىيانكەشلىك تېخىمۇ كۈچىيىپ كەتتى. بەزى يەھۇدىيلار شاگىرت ئىستىپاننى خۇداغا كۇپۇرلۇق قىلدى، دەپ شىكايەت قىلدى ۋە ئۇنى چالما-كېسەك قىلىپ ئۆلتۈردى. تارسۇسلۇق سائۇل دېگەن ياش كىشى ئىستىپاننىڭ ئۆلتۈرۈلگەنلىكىنى ئۆز كۆزى بىلەن كۆرگەن ۋە ئۆلتۈرگۈچىلەرنى قوللىغان ئىدى. ھەمدە ئۇ، ئەيسانىڭ ئەگەشكۈچىلىرى بولغانلارنى تۇتقۇن قىلىش ئۈچۈن دەمەشققە ماڭدى. سائۇل سەپەر قىلىپ ماڭغان يول ئۈستىدە، ئاسماندىن بىر نۇر چۈشۈپ، ئۇنىڭ ئەتراپىنى يورۇتۇۋەتتى ۋە ئۇنىڭغا: «ئەي سائۇل ئەي سائۇل نېمە ئىشقا مېنى قوغلارسەن؟ [ماڭا زىيانكەشلىك قىلىسەن، ھ. ز.]»، دېگەن بىر ئاۋاز ئاڭلاندى. نۇردا كۆزى قارغۇ بولغان سائۇل: «كىم دۇر سەن؟» دەپ سورىدى. ھېلىقى ئاۋاز: «ئەيسا دۇرمەن»، دەپ جاۋاب بەردى.—ئەلچىلەر 9:3–5.
ئۈچ كۈندىن كېيىن، ئەيسا ھانانىيا ئىسىملىك بىر شاگىرتنى سائۇلنىڭ كۆزىنى ساقايتىشقا ئەۋەتتى. سائۇل چۆمۈلدۈرۈلدى ۋە ئەيسا توغرىسىدا يۈرەكلىك بىلەن خۇش خەۋەر يەتكۈزۈشكە باشلىدى. كېيىن سائۇل، ئەلچى پاۋلۇس دېگەن نام بىلەن ھەممىگە تونۇلۇپ، ئەيسانىڭ ئەگەشكۈچىلىرى جامائەتچلىكىنىڭ قىزغىن بىر ئەزاسىغا ئايلانغان ئىدى.
ئەيسانىڭ شاگىرتلىرى خۇدا پادىشاھلىقى ھەققىدىكى خۇش خەۋەرنى پەقەت يەھۇدىيلار ۋە سامارىيىلىكلەرگە تارقىتىپ كەلگەن ئىدى. ئەمدىلىكتە، خۇدادىن ئەيمىنىدىغان رىملىق ئەسكەر باشلىقى كورنىلىيغا بىر پەرىشتە كۆرۈنۈپ، ئۇنىڭ ئەلچى پېترۇسقا ئادەم ئەۋەتىشىنى ئېيتتى. باشقىلار بىلەن بىرلىكتە، پېترۇس كورنىلىيغا ۋە ئۇنىڭ ئائىلىسىدىكىلەرگە خۇش خەۋەر تارقاتتى. پېترۇس سۆزلەۋاتقىنىدا، مۇقەددەس روھ ئاشۇ يەھۇدىي ئەمەسلەرنىڭ ئۈستىگە چۈشتى ۋە پېترۇس ئاشۇلارنى ئەيسانىڭ ئىسمى بىلەن سۇغا چۆمۈلدۈرۈشكە بۇيرۇلدى. مانا ئەمدى، مەڭگۈلۈك ھاياتلىق يولى بارچە مىللەت كىشىلىرىگە ئېچىلدى. شۇنىڭ بىلەن، جامائەتچىلىك خۇش خەۋەرنى يىراقلارغا كەڭ تارقىتىشقا تەييارلاندى.
—ئەلچىلەر 1:1–11:21-ئايەتلەرگە ئاساسەن.
