Келиң, әлчи Паулниң һаятини сақлап қалған жигит тоғрисида биливалайли. У Паулниң җийәни болған. Биз униң исмини билмәймиз, лекин униң наһайити җасарәтлик болғанлиғини билимиз. У немә қилғанлиғи тоғрисида билишни халамсиз? ~

Паул Әйса тоғрисида вәз қилғанлиғи үчүн, тутқунға елинип, Йерусалимдики түрмигә ташланди. Бәзи яман адәмләр Паулни өч көргәнликтин, уни өлтүргүси кәлгән. Шуниң үчүн улар бир-биригә: «Әскәр бешиға берип, Паулни сотниң алдиға кәлтүрүшини сорайли. Биз болсақ йол бойида йошурунуп, Паул өтүватқанда, уни өлтүримиз!»— дейишти.

Бу гәпни Паулниң җийәни аңлап қалиду. Әнди у немә қилмақчи? У түрмигә берип, Паулға уларниң бу һарам ойини ейтип бәрди. Паул уни дәрру әскәр бешиға әвәтип, бу тоғрилиқ ейтип беришни тапшурди. Қандақ ойлайсиз, Паулниң җийәнигә әскәр беши билән сөзлишиш оңай болдиму? ~ Яқ, чүнки әскәр беши абройлуқ адәм болған. Лекин жигит җасарәт көрситип, униң билән сөзләшти.

Әскәр беши немә қилиш керәклигини яхши билгән. У Паулни қоғдаш үчүн тәхминән 500 әскирини тәйярлап, уни шу кечидә Қәйсәрийә дегән шәһәргә йәткүзүшни буйриди. Паул аман қалдиму? ~ Һә, аман қалди. Яман кишиләр униңға һуҗум қилалмиди. Уларниң һарам ойи әмәлгә ашмиди.

Сиз бу вақиәдин қандақ савақ алалайсиз? ~ Сизму Паулниң җийәнигә охшаш батур болалайсиз. Башқиларға Йәһва тоғрисида ейтқанда, җасарәтлик болушимиз керәк. Сизму җасарәтлик болуп, Йәһва тоғрисида сөзләшни давамлаштурамсиз? ~ Шундақ қилсиңиз, адәмләрниң һаятини сақлап қелишиңиз мүмкин.