1. Бүгүнки күндә көпинчә адәмләр немигә көңүл бөлиду?

 БҮГҮНКИ КҮНДӘ көпинчә адәмләрниң өзлиринила ойлайдиғанлиғини байқиғансиз? Мәсилән, бәзилири иҗтимаий тор арқилиқ өзлирини вә йәткән утуқлирини көрситип махтиниду. Лекин бүгүнки күндә камдин-кам адәмләр Йәһва Худани мәдһийиләшни халайду. Бу мақалидә биз Йәһвани мәдһийиләш немини билдүридиғанлиғини вә бизни буниңға немә дәвәт қилидиғанлиғини көрүп чиқимиз. Шундақла, Худа келәчәктә Өз исмини қандақ улуқлайдиғанлиғини биливалимиз.

ЙӘҺВАНИ МӘДҺИЙИЛӘШ ДЕГИНИМИЗ НЕМӘ?

2. Йәһва Худа Синай теғида немә қилған? ( рәсимгиму қараң.)

² Муқәддәс китапта Йәһва қудрәтлик Худа дәп йезилған. Худа Исраил хәлқини Мисир қуллиғидин азат қилғандин көп өтмәй, Өз «шөһритини» әҗайип нәмаян қилған. Миллионлиған адәмләр Худаниң сөзлирини аңлаш үчүн Синай теғиниң етигигә жиғилғанда, тағни қоюқ қара булут вә түтүн қаплиған. Йәр қаттиқ силкингән. Чақмақ чеқип, гүлдүрмома гүлдүрләп, канайниң қаттиқ авази чиққан (Чиқ. 19:16—18; 24:17; Зәб. 68:8). Исраил хәлқи Йәһва Худаниң күч-қудрити вә шан-шәривини көргәндә һәйран қалған еди.

3. Йәһвани мәдһийиләш немини билдүриду?

³ Адәмләрму Йәһва Худаға шан-шәрәп кәлтүрәләйду. Буниң  бир йоли — Униң күч-қудрити вә гөзәл хисләтлири тоғрисида башқиларға ейтиш. Утуқлиримизға Йәһва Худаниң ярдими билән йәткәнлигимизни етирап қилсақ, Уни мәдһийиләймиз (Йәшая 26:12). Биз Давут падишадин үлгә алалаймиз. У һәрдайим Йәһва Худани мәдһийилигән. У исраил җамаитиниң алдида мундақ дуа қилған: «Йәһва, Саңа улуқлуқ, қадирлиқ, гөзәллик, ғалибийәт, қәдир-қиммәт һәм шундақла асман билән йәрдики һәммә нәрсә тәәллуқтур». Давутниң дуасидин кейин «барлиқ җамаәт Йәһваға миннәтдарлиқ ейтти» (Тар. 1-яз. 29:11, 20).

4. Әйса Йәһва Худани қандақ мәдһийилигән?

⁴ Әйса йәрдә болғанда мөҗүзиләрни қилишқа Атиси күч бәргәнлигини ейтип, Уни мәдһийилигән (Марк 5:18—20). У башқиларға Атисиниң қанчилик яхши екәнлигини көрүшкә ярдәм бәргән. Шундақла, башқиларға яхши муамилә қилиши билән Йәһвани мәдһийилигән. Бир күни Әйса йәһудий Ибадәтханида тәлим бериватқанда, 18 жил бойи җин чаплишип қийнилип жүргән аялни байқап қалған. Җин чаплашқан аял мүкчийип, тамамән тик туралмиған. Униңға ичи ағриған Әйса мулайимлиқ билән: «“Сиз өз аҗизлиғиңиздин қутулдиңиз”,— деди. Андин у униңға қоллирини қойди һәм шу мәзгилдила аял дәрһал руслинип, Худани мәдһийиләшкә башлиди» (Луқа 13:10—13). Бу аялға охшаш, биздиму Йәһва Худани мәдһийиләшкә нурғун сәвәпләр бар.

БИЗ ЙӘҺВА ХУДАНИ НЕМӘ ҮЧҮН МӘДҺИЙИЛӘЙМИЗ?

5. Йәһва Худани немә үчүн һөрмәтләймиз?

⁵ Йәһваға чоңқур һөрмәт-еһтирам көрситимиз. Йәһва Худа бизниң һөрмитимизгә лайиқ. У қудрәтлик вә Һәммигә Қадир (Зәб. 96:4—7). Мәвҗудатлар Униң ешип ташқан даналиғини рошән қилиду. Йәһва Худа бизгә һаят вә һаятқа керәклик һәммә нәрсиләрни бәргән (Вәһ. 4:11). У Өз хизмәтчилиригә вападар (Вәһ. 15:4). Худа башлиған һәрқандақ ишини һеч тосалғусиз ахириға йәткүзиду (Йәшуа 23:14). Шуңа Йәрәмия пәйғәмбәр Йәһва Худа тоғрилиқ мундақ ейтқан: «Барчә хәлиқләрниң данишмәнлири һәм пүткүл шаһлиқлар арисида Саңа қияс қилидиған һечким йоқтур!» (Йәр. 10:6, 7) Һәқиқәтән, асмандики Атимизға һөрмәт көрситишимизниң нурғун сәвәплири бар. Лекин Худайимиз Йәһва һөрмитимиздин башқа, меһир-муһәббитимизгиму лайиқ.

6. Йәһва Худани немә үчүн яхши көрүмиз?

⁶ Йәһвани чин қәлбимиздин яхши көрүмиз. Биз Йәһва Худани Униң нурғунлиған есил пәзиләтлири үчүн яхши көрүмиз. У рәһимдил вә көйүмчан (Зәб. 103:13; Йәшая 49:15). Бизниң җенимиз ағриғанда, Униңму җени ағрийду (Зәк. 2:8). Яратқучимиз Уни яхши билип, Униң билән йеқин дост болушимизға ярдәм бериду (Зәб. 25:14; Әлч. 17:27). Шундақла У кичик пейил. «Асман билән йәрдә йүз бериватқан әһвални көрүш үчүн иңишиду, аҗизни топа-чаңдин көтирип, намратни әхләттин чиқириду» (Зәб. 113:6, 7). Буниң һәммисини билгәнликтин, Улуқ Худайимизни мәдһийиләшни халаймиз! (Зәб. 86:12)

7. Биздә қандақ мүмкинчилик бар?

⁷ Адәмләрниң Йәһва Худа тоғрилиқ билишини халаймиз. Йәһваниң һәқиқәтән қандақ Худа екәнлигини нурғун адәмләр билмәйду. Чүнки Шәйтан «әқиллирини қарғу» қилип, Худа тоғрилиқ ялған-явдақларни тарқитиду (Кор. 2-х. 4:4). Шәйтан адәмләрни Йәһваниң биз билән кари йоқ рәһимсиз  Худа екәнлигигә вә һәммә қайғу-һәсрәт Униңдин келидиғанлиғиға ишәндүрди. Лекин биз Худа тоғрилиқ һәқиқәтни билимиз. Биз адәмләрниң көзини ечип, Йәһваниң қанчилик әҗайип Худа екәнлигини ейталаймиз. Бу асмандики Атимизни мәдһийиләшниң әң яхши мүмкинчилиги әмәсму? (Йәшая 43:10) Зәбур 96-бап бизни Йәһвани мәдһийиләшни дәвәт қилиду. Бу баптин Йәһва Худаға У лайиқ болған шан-шөһрәтни билдүрүшниң йоллирини биливалайли.

ЙӘҺВАҒА ӨЗ ИСМИҒА ЛАЙИҚ ШАН-ШӘРӘПНИ ҚАНДАҚ БЕРӘЛӘЙМИЗ?

8. Йәһваға шан-шәрәп кәлтүрүшниң йоллириниң бири немә? (Зәбур 96:1—3)

⁸ Зәбур 96:1—3ни оқуң. Биз Йәһва Худаға сөзлиримиз билән шан-шәрәп кәлтүрәләймиз. Бу айәтләр бизни «Йәһва Худаға нахша ейтиңлар», «Йәһваниң исмини мәдһийиләп», «Униң қутқузуши һәққидә хуш хәвәр җакалаңлар», «хәлиқниң арисида Униң шөһритини» җакалаңлар дәп үндәйду. Буларниң һәммиси — асмандики Атимизға шан-шәрәп кәлтүрүшниң йоллири. Йәһва Худаниң қедимқи хизмәтчилири башқиларға Униң есил-пәзиләтлири вә уларға қилған һәммә яхшилиқлири тоғрисида ейтиштин тартинмиған (Дан. 3:16—18; Әлч. 4:29). Биз улардин қандақ үлгә алалаймиз?

9, 10. Анжелинаниң мисалидин немигә үгәнсәк болиду? (Рәсимгиму қараң.)

⁹ Америкида яшайдиған Анжелина a қериндишимизниң мисалини көрүп чиқайли. У ишида Йәһва Худа тоғрилиқ қорқмай ейтти. Бир жиғинда хизмәтдашлири бир-бирләп өзлирини көпчиликкә тонуштурди. Анжелина өзини Йәһва гувачиси болушқа қанчилик хошал екәнлигини көрситиш үчүн сүрәтләрни тәйярлиди. Лекин сөз башлаштин авал хизмәтдашлириниң бири өзини тонуштуруп, Йәһва гувачилириниң аилисидә чоң болғанлиғини ейтти. У Йәһва гувачилирини вә уларниң ишәнчисини заңлиқ қилишқа башлиди. Анжелина мундақ дегән: «Қорққинимдин жүригим ағзимға тиқилип қалди, лекин Йәһва Худа тоғрилиқ ялған ейтишиға йол қойғум кәлмиди. Шуңа мән Худа тоғрилиқ һәқиқәтни ейтишқа тоғра көрдүм».

¹⁰ Хизмәтдиши сөзләп болуп, Анжелина қисқа дуа қилди. Кейин у мулайимлиқ билән  мундақ деди: «Мәнму сизгә охшаш Йәһва гувачилириниң аилисидә чоң болуп, мошу кәмгичә Йәһва гувачиси». Көпчилик бир қисмән болуп қалсиму, Анжелина җиддийләшмәй сөзини давамлаштурди. У өзиниң Йәһва Худаға хизмәт қилишқа хошал екәнлигини чүшәндүрүп, достлири билән чүшкән сүрәтни көрсәтти вә ишәнчиси тоғрилиқ силиқ-сипайә ейтип бәрди (Пет. 1-х. 3:15). Нәтиҗидә, Анжелина сөзләп болғандин кейин, шу жигитниң қапиғи ечилди. У һәтта кичигидә Йәһва гувачилири билән арилашқанда болған яхши вақиәләрни ейтип бәрди. Анжелина: «Йәһва Худа Униң исмини қоғдишимизға лайиқ. Униң тоғрилиқ һәқиқәтни ейтиш — чоң шан-шәрәп». Башқилар Йәһва Худаға қарши сөзлигәндә, бизму Униң исмини мәдһийиләймиз. Бу биз үчүн чоң шан-шәрәптур.

11. Худаниң хизмәтчилири Зәбур 96:8ки принципқа қандақ әмәл қиливатиду?

¹¹ Зәбур 96:8ни оқуң. Биз Йәһва Худаға маддий нәрсилиримиз билән шан-шәрәп кәлтүрәләймиз. Худаниң хизмәтчилири қолида бар әң баһалиқ нәрсилири билән Униңға шан-шәрәп көрситип келиватиду (Пәнд н. 3:9). Мәсилән, исраиллар Ибадәтханини қуруш вә асрап күтүшни пул вә баһалиқ нәрсилири билән қоллап-қувәтлигән (Пад. 2-яз. 12:4, 5; Тар. 1-яз. 29:3—9). Әгәшкүчилири Әйса Мәсиһ вә әлчилирини «бар мал-мүлки» билән қоллиған (Луқа 8:1—3). Шуниңға охшаш, биринчи әсирдики мәсиһийләр ачарчилиқ вақтида етиқатдашлириға пул әвәткән (Әлч. 11:27—29). Бүгүнки күндә бизму Йәһвани ихтиярий ианилиримиз билән мәдһийиләләймиз.

12. Бизниң ианилиримиз Йәһваға қандақ мәдһийә әкелиду? (Рәсимгиму қараң.)

¹² Ианилиримиз Йәһва Худани қандақ мәдһийиләйду? Бир мисални көрүп чиқайли. 2020-жили Зимбабведа узақ вақит қурғақчилиқ болған. Шуңа миллионлиған адәмләр, униң ичидә қериндишимиз Прискаму, ачарчилиқтин өләй дәп қалған. Шуниңға қаримастин, у һәтта йәр һайдаш вақтидиму һәр сешәнбә вә җүмә вәз хизмитигә чиқатти. Хошнилири уни: «Етизда ишләшниң орниға хизмәт қилип жүрсәң, ачтин өлисәнғу»,— дәп заңлиқ қилатти. Приска иккиләнмәй, мундақ җавап бәрди: «Йәһва Худа Өз хизмәтчилирини һечқачан ташлимайду». Көп өтмәй,  бурадәрләр униңға озуқ-түлүк елип кәлди. Биз ианә қилғанлиқтин, тәшкилатимиз Приска вә башқа қериндашлиримизға ярдәм берәләйду. Присканиң хошнилири һәйран қелип униңға: «Худа сени ташлимиди, бизму Худайиң тоғрилиқ көпирәк билишни халаймиз»,— деди. Униң йәттә хошниси җамаәт учришишлириға келишкә башлиди.

13. Жүрүш-турушимиз Йәһваға қандақ шан-шәрәп кәлтүриду? (Зәбур 96:9)

¹³ Зәбур 96:9ни оқуң. Биз Йәһваға жүрүш-турушимиз билән шан-шәрәп кәлтүрәләймиз. Роһанийлар Ибадәтханида хизмәт қилиштин авал жуюнуп-тазилиниши керәк еди (Чиқ. 40:30—32). Лекин тән тазилиғидинму муһими — Йәһва Худа өч көргән нәрсиләрдин жирақ туруш (Зәб. 24:3, 4; Пет. 1-х. 1:15, 16). Муқәддәс китапта биз «кона шәхсни» йешип, «йеңи шәхскә» кийинишимиз керәклиги йезилған. Бу Йәһва Худаға яқмайдиған ойлар вә яман жүрүш-туруштин нери болушни билдүриду. Буниң орниға, Йәһва Худадәк ойлашни вә һәрикәт қилишни үгинип, Униңкигә охшаш яхши хисләтләрни риваҗландурғумиз келиду (Кол. 3:9, 10). Йәһваниң ярдими билән һәтта әң әхлақсиз вә зораван адәмләр йеңи шәхскә кийинип, өзгирәләйду.

14. Джекниң мисалидин немини үгинимиз? (Рәсимгиму қараң.)

¹⁴ Джек зораван вә наһайити қорқунучлуқ җинайәтчи болған. Униң «җин-шәйтан» дегән ләқими болуп, у өлүм җазасиға кесилгән. Лекин өлүм җазасини күтүватқанда, у түрмидә вәз қилишқа кәлгән бурадәр билән тонушуп, Муқәддәс китапни үгинишкә келишти. Өтмүштә нурғун рәзил ишларни қилсиму, Джек пүтүнләй өзгирип, бираздин кейин чөмдүрүлүштин өтти. Джекниң өзгәргәнлиги шунчә, өлүм җазаси болған күни бәзи қаравуллар һәтта көзигә яш алди. Түрмә ишчилириниң бири мундақ деди: «Джек түрмигә кәлгәндә, әң яман адәмләрниң бири еди. Һазир болса, у әң яхшиларниң бири». Түрмидә учришишларни өткүзгән бурадәрләр биринчи қетим кәлгән әр киши билән тонушти. Джекниң өзгәргәнлиги униңға қаттиқ тәсир қилип, уму Йәһва Худаға хизмәт қилиш үчүн немә қилиш керәклигини билишни халиған. Көргинимиздәк, биз иш-һәрикәтлиримиз билән асмандики Атимизға шан-шәрәп кәлтүрәләймиз (Пет. 1-х. 2:12).

 ЙӘҺВА ХУДА ПАТ ЙЕҚИНДА ӨЗ ИСМИНИ ҚАНДАҚ УЛУҚЛАЙДУ?

15. Йәһва Худа пат йеқинда Өз исмини қандақ улуқлайду? (Зәбур 96:10—13)

¹⁵ Зәбур 96:10—13ни оқуң. 96-Зәбурниң ахирқи айәтлири Йәһва Худани адил Падиша вә Сотчи дәп тәсвирләйду. Йәһва Худа пат йеқинда Өз исмини қандақ улуқлайду? У буни адаләтни орнитиш арқилиқ көрситиду. Жиркиничлик ишларни қилип, Йәһва Худа тоғрилиқ ялғанларни үгәткәнлиги үчүн У Бүйүк Бабилни көзидин йоқ қилиду (Вәһ. 17:5, 16; 19:1, 2). Бүйүк Бабилниң вәйран қилинғанлиғини көрүп, гайибир кишиләр биз билән биллә Йәһва Худаға ибадәт қилишни башлиши мүмкин. Армагедонда Йәһва Худа Униңға қарши чиққанларни вә Униң исмиға күпүрлүк қилғанларниң һәммисини һалак қилиду. Лекин Худайимиз Уни яхши көргән, бойсунған вә исмиға шан-шәрәп кәлтүргәнләрни аман қалдуриду (Марк 8:38; Сал. 2-х. 1:6—10). Мәсиһниң миң жиллиқ һөкүмранлиғиниң ахиридики әң ахирқи синақтин кейин Яратқучимиз пәқәт У ибадәткә лайиқ екәнлигини испатлайду (Вәһ. 20:7—10). Шу чағда «йәр-зимин худди сулар деңизни толтурғандәк, Йәһваниң шан-шәрипини билиш билән толиду» (Һаб. 2:14).

16. Сиз немә қилишқа қәтъий қарар қилдиңиз? (Рәсимгиму қараң.)

¹⁶ Инсанларниң һәммиси бирдәк Йәһваға Униң исмиға лайиқ шан-шәрәпни кәлтүргәндә, қанчилик хошал болумиз дәңа! Һәтта һазирниң өзидиму биз гәп-сөзләр вә иш-һәрикәтләр билән Худани улуқлалаймиз. Буниң қанчилик муһим екәнлигини унтумаслиғимиз үчүн, Рәһбәрлик кеңәш 2025-жилниң жиллиқ айити сүпитидә Зәбур 96:8ни (ЙД) таллиған: «Йәһваға Өз исмиға лайиқ шан-шәрәпни бериңлар».