1. Адишип қалғанларниң бири қайтип кәлгәндә, Йәһва Худа қандақ һис-туйғида болиду?

 ӨТКӘН МАҚАЛИДӘ көрүп чиққандәк, Йәһва Худа Өзини һәр бир қойиға ғәмхорлуқ қилидиған меһрибан падичиға охшатқан. У адишип қалғанларниң һәммисини издәйду. Йәһва Униңдин жирақлишип кәткән исраилларға мундақ дегән: «Мениң йенимға қайтип келиңлар, Мән йениңларға қайтимән». Биз Атимиз Йәһваниң мошу кәмгичә охшаш һис-туйғуда болуватқанлиғини билимиз, чүнки У: «Мәнки Пәрвәрдигар өзгәрмәстурмән»,— дәйду (Мал. 3:6, 7, КТ). Әйса адишип қалғанларниң бирси болсиму қайтип кәлгәндә, Йәһва билән пәриштиләр интайин хошал болуватқанлиғини ейтқан (Луқа 15:10, 32).

2. Бу мақалидә биз немини көрүп чиқимиз?

² Әйсаниң үч мисалидин Йәһвадин жирақлишип кәткәнләргә ярдәм беришни үгитидиған муһим савақларни көрүп чиқайли. Уларниң Йәһваға қайтип келишигә ярдәм бериш үчүн алаһидә үч пәзиләтни муһакимә қилимиз. Шундақла паалийәтсиз вәз ейтқучиларға ярдәм үчүн бар күчимизни чиқарсақ, буниңдин зор хошаллиқ тапидиғанлиғимизни биливалимиз.

3, 4. Луқа 15:8—10 айтләрдә тилға елинған аял немә үчүн шунчә тиришип күмүч тәңгисини издигән?

³ Йәһва Худаға қайтишни халайдиғанларни издәш үчүн биз бар күчимизни чиқиришимиз керәк. Луқа китавида Әйса қиммәт бир күмүч тәңгисини жүтүрүп қойған аял тоғрисида тәмсилни кәлтүргән. Бу тәмсилдә аялниң күмүч тәңгисини қандақ тиришип издигәнлиги тәсвирлиниду (Луқа 15:8—10ни оқуң).

⁴ Әйса бу тәмсил арқилиқ аялниң күмүч тәңгисини тапқандин  кейин немини һис қилғанлиғини көрсәткән. Әйсаниң заманида бәзи йәһудий анилар қизиниң тойи болғанда, униңға он күмүч тәңгә соға қилатти. Бәлким бу аялниң жүтүрүп қойған тәңгиси әшу он тәңгиниң бири болған. Шу аял бир күмүч тәңгиси йәргә чүшүп кәтти дәп ойлиған еди. Чириғини яндуруп, йәрдин һечнәрсә тапалмай қалған. Бир күмүч тәңгисини тепиш үчүн униң қолидики чириғиниң йоруғи йәтмигән. Ахирида у еһтиятчанлиқ билән өйни пүтүнләй сүпүрүп, ахтуруп чиққан. Бу аял чирақниң нурида пақирап турған күмүч тәңгисини көрүп қалған еди. Уһ, униң көңли җайиға чүшти! У бу хуш хәвәр билән бөлүшүш үчүн достлирини вә хошнилирини чақирған.

5. Немә үчүн җамаәттин жирақлишип кәткәнләрни издәш қийин?

⁵ Әйсаниң тәмсилидин биз бир нәрсини жүтүрүп қойсақ, уни издәш үчүн күч чиқириш керәклигини үгинимиз. Буниңға охшаш җамаәттин жирақлишип кәткәнләрни издәш үчүн биз тиришип һәрикәт қилишимиз керәк. Уларниң биз билән арилашмай жүргинигә хелә жиллар болған болуши мүмкин. Еһтимал, уларниң көчүп барған җайида йәрлик қериндашлар уларни тонумайду. Шәк-шүбһисизки, уларниң бәзибирлири Йәһва Худаға қайтип келишни халайду. Уларниң қериндашлар билән Йәһваға хизмәт қилғуси келиду. Бирақ улар ярдимимизгә муһтаҗ.

6. Җамаәтикиләрниң һәммиси паалийәтсиз вәз ейтқучиларни издәш ишиға қандақ ярдәм берәләйду?

⁶ Кимләр паалийәтсиз вәз ейтқучиларни издәш ишиға қатнишалайду? Һәммимиз, ақсақаллар, пионерлар, аилә әзалири һәм вәз ейтқучилар бу ишқа ярдәм берәләйду. Сизниң җамаәттин жирақлишип кәткән дост яки уруқ-туққанлириңиз барму? Өйму-өй яки аммивий орунларда вәз қиливатқанда, уларни учратсиңиз немә қилишиңиз керәк? Әгәр у ақсақаллар билән көрүшүшни халиса, биз униңдин адресини яки телефон номерини сорап, бу мәлуматни хошаллиқ билән ақсақалларға беридиғанлиғимизни униңға чүшәндүримиз.

7. Томас исмилиқ ақсақалниң сөзлиридин немини үгинисиз?

⁷ Ақсақалларниң Йәһва Худаға қайтишини халайдиған паалийәтсиз вәз ейтқучиларни издәш вәзиписи бар. Улар бу вәзиписини қандақ ада қилалайду? Испаниядә яшайдиған Томас b исимлиқ ақсақалниң сөзлиригә диққәт қилайли. У 40тин ошуқ Гувачиниң Йәһваға қайтишиға ярдәм бәргән. У мундақ дәйду: «Биринчидин, мән қериндашлардин паалийәтсиз вәз ейтқучиларниң адресини сораштуримән. Йә болмиса, улардин узақ вақит учришишларға кәлмәйдиған қериндашлар есиңлардиму дәп сораймән. Қеринидашларниң көпинчиси бу ишқа хошаллиқ билән өз һәссисини қошуватқанлиғини чүшиниду. Униңдин башқа паалийәтсиз вәз ейтқучиларға келип, уларниң балилири вә уруқ-туққанлириниң әһвалини сораймән. Бәзи паалийәтсиз вәз ейтқучилар җамаәткә өз балилирини елип келәтти. Балиларниң бәзилири өз вақтида вәз ейтқучи болған, шуңа уларниңму Йәһваға қайтишиға ярдәм бәрсәк болиду».

8. Луқа 15:17—24 айәтләрдә, дада товва қилған балисиға қандақ муамилә қилған?

⁸ Йәһваға қайтишни халайдиғаларға ярдәм бериш үчүн биз қандақ пәзиләтләргә егә болушимиз керәк? Әйсаниң өйни ташлап кетип қалған оғли һәққидики тәмсилидин бирнәччә савақларни алалаймиз (Луқа 15:17—24ни оқуң). Әйса бу оғлиниң яман әһвалға қандақ чүшкәнлигини вә өйгә қайтишқа қарар қилғанлиғини чүшәндүргән. Дадиси оғлиниң алдиға жүгрәп берип,  уни бағриға бесип яхши көридиғанлиғини көрсәткән. Оғли қилған ишлар сәвәвидин өзини әйипләп, әнди дадисиниң оғли болушқа лайиқ әмәс дәп ойлиған. Кейин, у дадисиға ич бағрини төккәндә, дадиси униңға ичи ағрип, оғлини қулдәк яки ялланған ишчидәк әмәс, бәлки аилисиниң қәдирлик бир оғли сүпитидә өйгә қайтишини халайдиғанлиғини көрситиш үчүн, дадиси зияпәтни уюштурған вә товва қилған балисиға есил узун тонни кийдүргән еди.

9. Паалийәтсиз вәз ейтқучиларниң Йәһва Худаға қайтишиға ярдәм бериш үчүн қандақ пәзиләтләргә егә болушимиз лазим? (« Қайтип кәлгәнләргә ярдәм бериң?» намлиқ рамкиға қараң.)

⁹ Йәһва Худани бу тәмсилидики атисиға охшитишқа болиду. У паалийәтсиз вәз ейтқучиларни бәк яхши көриду вә уларниң қайтип келишини халайду. Йәһвани үлгә қилип, бизму уларниң қайтип келишигә өз һәссимизни қошумиз. Буни қилиш үчүн сәвирчанлиқ, һисдашлиқ вә меһир-муһәббәтлик болушимиз лазим. Немә үчүн биз мошу алаһидә пәзиләтләрни көрситишимиз керәк вә буни қандақ қилалаймиз?

10. Йәһва Худаға қайтишни халайдиғанларға немә үчүн сәвирчанлиқ көрситишимиз керәк?

¹⁰ Адәмниң Йәһва Худаға қайтиши үчүн көп вақит керәк. Шуңа биз сәвирчан болушимиз зөрүр. Ақсақаллар вә җамаәттики башқа қериндашлар, җамаәттин жирақлишип кәткәнләргә бирнәччә қетим йолуққандин кейин, улар Йәһваға хизмәт қилишни қайтидин башлиған. Шәрқий җәнубий Азиядики Нэнси исмилиқ қериндаш мундақ дегән: «Җамаәттики йеқин достум маңа көп ярдәм қилди. У маңа һәдәмдәк болди. Биз әҗайип яхши күнләрни биллә өткүзгәнлигимизни есимгә салди. Мән дәрдимни төккәндә у мени зәң қоюп тиңшиди. У тартинмай маңа мәслиһәт берәтти. Бешимға күн чүшкәндә, у әсқатқан дост болуп чиқти».

11. Немә үчүн көңли рәнҗигәнләргә һисдашлиқ көрситиш керәк?

 ¹¹ Һисдашлиқ бу езилгән җанниң дәрдигә шипа болидиған майға охшайду. Бәзи паалийәтсиз вәз ейтқучилар җамаәттикиләрниң бири уларниң көңлини рәнҗиткинигә нурғун жиллар өтсиму, техичә қосиғи көпүп жүриватиду. Мундақ сезимләр Йәһва Худаға қайтишқа тосалғулуқ қилиду. Бәзиләр адаләтсиз муамилигә учридим, дәп ойлиши мүмкин. Шундақ қериндашларға уларни тиңшайдиған вә һис-туйғуларни чүшинидиған адәм керәк болуши мүмкин (Яқуп 1:19). Бираз вақит җамаәткә бармиған Мария: «Мени тиңшайдиған, илһам вә мәслиһәт беридиған адәмгә муһтаҗ болдум»,— дегән.

12. Худаниң меһир-муһәббити қандақ ағамчиға охшайду?

¹² Муқәддәс китап Йәһва Худаниң Өз хәлқигә болған меһир-муһәббитини бир ағамчиға охшаш тәсвирлигән. Қайси җәһәттин Худаниң меһир-муһәббити ағамчиға охшаш? Бир мисални көрүп чиқайли. Чоңқур азгалға чүшүп кәткәнлигиңизни тәсәввур қилиң. Башқа бирсиниң ярдимисиз шу чоңқур азгалдин чиқалмайсиз. Бирси сизгә пәқәт ағамчини ташлисила, шу хәтәрлик йәрдин аман-есән чиқалайсиз. Йәһва Худа адишип қалған исраиллар һәққидә мундақ дегән: «Сөйгүниң тарлири [ағамчиси] билән уларниң көңлини тартивалдим» (Һошия 11:4, КТ). Худа Униңға хизмәт қилишни тохтатқанларғиму вә қийинчилиқлар һәм ғәм-қайғулар түпәйли егилип мүкчәйгәнләргиму охшаш һис-туйғида. Улар өзлирини чоңқур азгалға чүшкәндәк һис қилишиду. Йәһва Худа уларни яхши көридиғанлиғини, уларниң билишини вә Униңға йеқинлишишини халайду. Худа сиз арқилиқ меһир-муһәббитини көрситәләйду.

13. Қериндашчилиқ меһир-муһәббәтниң күчини көрсәткән мисални ейтип бериң?

 ¹³ Җамаәттин жирақлишип кәткән қериндашларға Йәһва Худаниң уларни яхши көридиғанлиғини дайим ейтип туруш бәк муһим. Бизму уларға меһир-муһәббәтни давамлиқ көрситишимиз керәк. Өткән мақалидә тилға елинған Пабло 30 жилдин көпирәк җамаәттин жирақлишип жүргән. У мундақ дегән: «Бир күни әтигәнлиги өйдин чиққинимда, йеши чоң бир қериндаш мени көрүп, меһрибанлиқ билән маңа сөз қилди. Мән кичик балидәк жиғлап кәттим. Мән у қериндашқа уни Йәһва Худа Өзи маңа әвәтти дедим. Мән шу пәйттә Йәһваға қайтишни қарар қилдим».

14. Луқа 15:4, 5-айәтләрдики мисалға асасән, падичи адишип қалған қойни тепивалғанда немә қилған?

¹⁴ Җамаәттин жирақлишип кәткәнләрни давамлиқ қоллап-қувәтлишимиз керәк. Әйсаниң тәмсилидики адишип қалған оғулға охшаш, уларниңму узаққа созулуп җараһәтләнгән қәлб ярисиниң сақийишиға көп вақит кетиду. Бәлким улар Шәйтанниң дуниясида жүргәнликтин, роһий җәһәттин аҗиз болуп қалғанду. Биз уларға Йәһваға болған ишәнчисини қайтидин мустәһкәмләшкә ярдәм беришимиз лазим. Әйса жүтүп кәткән қой тоғрилиқ мисалида падичи қойни қучиғиға елип, падиға елип кәлгәнлигини ейтқан. Бу қойчи адишип қалған қойни тепиш үчүн көп вақтини вә күчини чиқарди. У адишип қалған қойни тепипла қалмай, қойниң өзи падиға баралмайдиғанлиғини билип, уни көтүрүп елип кәлгән еди (Луқа 15:4, 5ни оқуң).

15. Йәһва Худаға қайтишни халайдиғанларни қандақ қоллап-қувәтләләймиз? (« Бебаһа қурал» намлиқ рамкиға қараң.)

¹⁵ Җамаәттин жирақлишип кәткәнләргә аҗизлиқ тәрәплирини йеңишкә ярдәм бериш үчүн биз вақит вә күчимизни чиқиришимиз  лазим. Амма Худаниң роһи, Униң Сөзи вә Униң тәшкилатидин келидиған нәширләр арқилиқ биз уларға роһий җәһәттин қайтидин күчлүк болушқа ярдәм берәләймиз (Рим. 15:1). Буни қандақ қилсақ болиду? Бир тәҗрибилик ақсақал мундақ дегән: «Паалийәтсиз вәз ейтқучиларниң көпинчиси Йәһва Худаға һәқиқәтән қайтишни қарар қилғанда, Муқәддәс китапни үгинишигә муһтаҗ c». Ундақта сиздин җамаәттин жирақлишип кәткән киши билән үгинишни өткүзүшни сориса, буни хошаллиқ билән қобул қилиң. Бу ақсақал йәнә шундақ дәйду: «Үгинишни өткүзидиған қериндаш паалийәтсиз болған вәз ейтқучи билән йеқин дост болуши муһим, сәвәви үгәнгүчи униңға ишинип, ич-сирини төкүп очуқ сөзлишәлиши керәк».

16. Пәриштиләрниң бизгә ярдәм берәләйдиғанлиғини нәдин билимиз?

¹⁶ Нурғунлири Йәһва Худаға қайтишни халайдиған қериндашларни тепишқа пәриштиләрниңму өз һәссилирини қошуватқанлиғини көрүшкә болиду (Вәһ. 14:6). Мәсилән, Эквадорда яшайдиған Сильвио Йәһва Худаға ялвуруп, җамаәткә қайтиш үчүн ярдәм беридиған бирсини сориди. У техи дуа қиливатқанда, ишикни бирси қақти. Қариса, ишик алдида икки ақсақал турған екән. Шу чағдин башлап ақсақаллар хошаллиқ билән униңға керәклик ярдәмни көрсәткән.

17. Роһий җәһәттин аҗизлишип кәткәнләргә ярдәм бәргәнлигиңиз үчүн қандақ мукапатқа еришисиз?

¹⁷ Роһий җәһәттин аҗизлишип қалғанларға Йәһваға қайтишқа ярдәм берип, көп хошаллиқ тапимиз. Паалийәтсиз вәз ейтқучиларға алаһидә күч чиқириватқан Сальводор исимлиқ пионер мундақ дәйду: «Бәзидә хошаллиқтин көзлиримгә яш келиду. Йәһва Худа Өзиниң қәдирлик бир қойини Шәйтанниң дуниясидин қутқузувалғанлиғи вә Униң билән һәмкарлишиш шан-шәрипигә егә болғанлиғим һәққидә ойланғанда қәлбим шатлинип қалиду» (Әлч. 20:35).

18. Сиз паалийәтсиз вәз ейтқучи болсиңиз, немигә ишинәләйсиз?

¹⁸ Әгәр сиз Йәһва Худаниң хәлқидин жирақлишип қалғанларниң бири болсиңиз, Йәһва сизни техичә яхши көридиғанлиғиға ишәнч қилиң. У сизниң қайтип келишиңизни халайду. Униңға қайтиш үчүн бәзи қәдәмләрни қилишиңиз керәк. Бирақ Әйсаниң мисалидики атиға охшаш Йәһва Худаму сизни хошаллиқ билән қобул қилиду.