Иисус вераз дышетскисьёсызлы: «Тӥ дуннелэн ӧвӧл» (Иоанн 15:19). Та кылъёс возьмато, христианъёслы нейтралитет возьыны кулэ шуыса, яке нокин пала кариськоно ӧвӧл политика удысын но ожъёсын. Но нейтралитет возьыны капчи ӧвӧл. Со понна милемыз адӟемпотостэм карыны но серекъяны быгато. Кызьы нейтралитет возёно но Иегова Инмарлы оскымон кылёно?

1. Кызьы зэмос христианъёс кивалтӥсьёс шоры учко?

Зэмос христианъёс кивалтӥсьёсты гажало, малы ке шуоно озьы дышетӥз Иисус. Со вераз: «Кесарьлэсьсэ кесарьлы сётэлэ» (Марк 12:17). Нош кызьы ми возьматыны быгатомы, кивалтӥсьёсты гажаськомы шуыса? Соослэсь кылзӥськимы ке. Кылсярысь, вытъёсты тыримы ке. Библиын верамын, кивалтӥсьёс кивалто, малы ке шуоно соослы кивалтыны лэзиз Иегова (Римъёслы 13:1). Но ми кивалтӥсьёслы быдэсак оскиськыны ум быгатӥське, малы ке шуоно соос адямиослэсь вань шуг-секытъёссэс быдтыны уз быгатэ. Соосты быдтоз Иегова но солэн Эксэйлыкез гинэ.

2. Кытысь адӟиськоз нейтралитет воземмы?

Ми политикае ум пыриськиське. Озьы ми Иисуслэсь адӟем кариськомы. Кылсярысь, куке адямиос адӟизы, Иисус паймымон ужъёс лэсьтэ шуыса, соослэн сое эксэй каремзы потӥз. Но Иисус кошкиз (Иоанн 6:15). Берлогес со валэктӥз: «Мынам Эксэйлыке та дуннелэсь ӧвӧл» (Иоанн 18:36). Нейтралитет воземмес мукет сямен но возьматыны быгатомы на. Кылсярысь, ожмаськыны ӧм мынэ ке. (Лыдӟе Михейлэсь 4:3.) Озьы ик возьматомы, нейтралитет возиськомы шуыса, кункышетлы дан ӧм сётэ ке (1 Иоанн 5:21). Со сяна, нейтралитет воземмы адӟиськоз, ми нокыӵе политической партилы яке кивалтӥсе бырйиськись адямилы дур ӧм басьтэ ке. Ваньмыныз таин ми возьматомы, Инмарлэн кивалтэтэз пала — Инмарлэн Эксэйлыкез пала — пыриськомы шуыса.

 МУРГЕС ЭСКЕРЕ

3. Зэмос христианъёс нейтралитет возё

Иисус но нырысетӥ даурысь христианъёс туж умой пример возьматӥзы, кызьы нейтралитет возёно. Лыдӟе Римъёслы 13:1, 5—7 но 1 Пётрлэсь 2:13, 14. Собере учке ВИДЕОРОЛИКЕЗ но та юанъёслы валэктонъёс сётэ:

• Малы кивалтӥсьёсты гажано?

• Кызьы возьматомы, кивалтӥсьёслэсь кылзӥськиськомы шуыса?

Куддыръя, кык шаеръёс ог-огенызы ожмаськыку, куинетӥез шаер вера: «Мон таиз шаер пала но, соиз шаер пала но уг пыриськиськы». Нош ачиз шыпытэн кыкезлы ик шаерлы ожмаськыны юрттӥське. Луоз-а вераны, та шаер зэмзэ ик нейтралитет возе шуыса? Лыдӟе Иоаннлэсь 17:16. Собере учке ВИДЕОРОЛИКЕЗ но та юанлы валэктон сётэ:

• Кытысь адӟиськоз, адями нейтралитет возе шуыса?

Нош мар кароно, кивалтӥсьёс куро ке лэсьтыны сое, мар Инмарлэн куронэзлы пумит луэ? Лыдӟе Апостолъёслэсь ужъёссэс 5:28, 29. Собере учке ВИДЕОРОЛИКЕЗ но та юанъёслы валэктонъёс сётэ:

• Кивалтӥсьёсын кутэм закон пумит луэ ке Инмарлэн законэзлы, кинлэсь милемлы кылзӥськоно?

• Кыӵе учыръёсы христиан мурт кивалтӥсьёслэсь уз кылзӥськы?

 4. Малпанъёсты но ужъёсты мед возьматозы, тӥ нейтралитет возиськоды шуыса

Лыдӟе 1 Иоаннлэсь 5:21. Собере учке ВИДЕОРОЛИКЕЗ но та юанъёслы валэктонъёс сётэ:

• Малы Айенге политической партие ӧз пыры но кункышетлы дан ӧз сёты?

• Кызьы тӥ малпаськоды, шонер-а со лэсьтӥз?

Кыӵе эшшо учыръёсын эскериськыны быгатоз на, возиськомы-а ми нейтралитет, ум-а? Учке ВИДЕОРОЛИКЕЗ но та юанъёслы валэктонъёс сётэ:

• Мар возьматоз нейтралитет воземмес, куке учкиськомы ӵошатсконъёсты, кудъёсаз пырисько пӧртэм шаеръёсысь спортсменъёс?

• Мар юрттоз нейтралитет возьыны, куке кивалтӥсьёс куто ужпумъёс, кудъёсыз ми вылын но шӧдӥськозы?

• Кызьы со, мае мон тодӥсько иворъёсысь яке котырысь адямиослэсь, люкетыны быгатоз нейтралитет возьыны?

 ТОДЭ ВАЁН

Христианъёс нейтралитет возё малпанъёсазы но нейтралитет воземзэс возьмато кылъёсынызы но ужъёсынызы.

Мае тон тодӥд?

• Кулэ-а кивалтӥсьёслэсь кылзӥськыны но малы?

• Малы ми политикаен герӟаськем юанъёсын нейтралитет возиськомы?

• Кыӵе учыръёсын секыт луыны быгатэ нейтралитет возьыны?