35-ТӤ УРОК

Кызьы шонер ужпум кутоно?

ЛЭЗЁНО

Милемлы котькудмылы ужпумъёс кутоно луэ. Со, кыӵе ми ужпум кутомы, шӧдӥськоз асьме вылын но, Иеговаен кусыпъёсмы вылын но. Кылсярысь, милемлы быръёно луэ, кытын улоно, кыӵе ужын ужано, семья кылдытоно-а, ӧвӧл-а. Ми шонер ужпум кутӥмы ке, асьмеос но шудо луомы, Иеговаез но шумпоттомы.

1. Кызьы Библия юрттыны быгатоз шонер ужпум кутыны?

Ужпум кутон азьын Иеговалы вӧсяськоно но тодоно, мар вера Библия. Озьы ми тодыны быгатомы, мар со сярысь малпа Иегова. (Лыдӟе Мадёнъёсты 2:3—6.) Куд-ог учыръёсын Библиын шонерак верамын, мар кароно. Сыӵе дыръя умойгес луоз лэсьтыны озьы, кызьы вера Иегова.

Нош Библиын шонерак верамын ӧвӧл ке, мар кароно? Кызьы соку ужпум кутоно? Сыӵе учырын но Иегова милемлы сюрес возьматыны быгатэ (Исаия 48:17). Кызьы? Возетъёс пыр. Библиысь возетъёс Инмарлэсь малпанъёссэ валаны юртто. Ӵем дыръя мар малпа Иегова, тодыны луэ, Библиысь одӥг яке солэсь тросгес кылбуръёсты лыдӟыса. Ми валамы ке, кызьы учке Иегова соиз яке таиз уж шоры, ми шонер ужпум кутыны быгатомы.

2. Мар сярысь малпаськоно ужпум кутон азьын?

Библиын верамын: «Визьнодо адями улон сюрес вылаз сак улэ» (Мадёнъёс 14:15). Озьыен, ужпум кутыкумы сак луоно, дыртоно ӧвӧл. Нырысь малпаськоно: «Библиысь кыӵе возетъёс юрттозы та учырын? Мон таӵе быръён лэсьтӥ ке, быгато-а каньыл сюлмын улыны? Кызьы кутэм ужпуме мукетъёсыз вылын шӧдӥськоз? Мынам быръёнэлы Иегова шумпотоз-а?» (Кыкетӥ Закон 32:29).

Иеговалэн правоез вань вераны милемлы, мар шонер, нош мар шонертэм. Ми Инмарлэсь законъёссэ, возетъёссэ тодӥмы но соосъя улӥмы ке, асьмелэсь возьытлыкмес дышетомы. Возьытлык — со шӧдон-валан, мар шонер, нош мар шонертэм (Римъёслы 2:14, 15). Возьытлыкмес дышетӥмы ке, быгатомы умой ужпумъёс кутыны.

МУРГЕС ЭСКЕРЕ

Ойдолэ тодомы, кызьы Библиысь возетъёс но возьытлыкмы юртто ужпумъёс кутыны.

3. Библиысь возетъёс сюрес возьмато

Кызьы Библиысь возетъёс юртто милемлы умой ужпумъёс кутыны? Учке ВИДЕОРОЛИКЕЗ но юанъёслы валэктонъёс сётэ.

ВИДЕОРОЛИК: «Ужпум кутыкуды, Библиысь возетъёсты лыдэ басьтэ» (5:54)

Кыӵе кузьым кузьмаз Иегова?
Малы Иегова лэзиз милемлы асьмелы быръён лэсьтыны?
Мар сётӥз милемлы Иегова, ми шонер ужпумъёс кутыны мед быгатомы шуыса?

Учкомы Библиысь возетэз. Лыдӟе Ефесъёслы 5:15, 16 но вералэ, кызьы тӥ быгатысалды дырдэс юнме быдтытэк улыны но дыр шедьтыны:

Библиез лыдӟон понна;
умойгес карт яке кышно, умойгес атай яке анай, умойгес пи яке ныл луон понна;
кенешлэн пумиськонъёсаз ветлон понна.

4. Возьытлыктэс дышетэ

Куке Библиын шонерак верамын, мар кароно, соку ужпум кутыны капчи. Нош мар кароно, отын шонерак верамын ӧвӧл ке? Учке ВИДЕОРОЛИКЕЗ но юанлы валэктон сётэ.

ВИДЕОРОЛИК: «Возьытлыкты чылкыт мед луоз» (5:13)

Мар кариз сузэр, аслэсьтыз возьытлыксэ дышетон понна?

Малы уг яра курыны мукетъёссэ асьме интые ужпумъёс кутыны? Лыдӟе Еврейёслы 5:14 но та юанъёслы валэктонъёс сётэ:

Мар карыны ми ум дыше, ялан мукетъёссэ асьме интые ужпумъёс кутыны куримы ке?
Мар юрттоз тӥледлы возьытлыктэс дышетыны, тӥ шонер ужпумъёс кутыны мед быгатоды шуыса?

Дышетэм возьытлык навигатор выллем. Со юрттэ милемлы шонер сюрес бырйыны

5. Мукетъёсыз сярысь малпаське

Пӧртэм адямиос пӧртэм ужпумъёс куто. Кызьы возьматоно, ужпум кутыкумы ми мукетъёсыз сярысь малпаськиськомы шуыса? Учкомы кык учырез.

1-тӥез учыр. Буяськыны яратӥсь сузэр потэ кенеше, кытын тросэз сузэръёс уг ярато, куке буясько.

Лыдӟе Римъёслы 15:1 но 1 Коринфъёслы 10:23, 24 но та юанъёслы валэктонъёс сётэ:

Кыӵе ужпум кутыны быгатысал сузэр, та кылбуръёсты лыдэ басьтыса? Мар тӥ карысалды, тӥляд возьытлыкты лэзе ке лэсьтыны сое, мар карыны мукет адямилэн возьытлыкез пумит луэ?

2-тӥез учыр. Агай тодэ, Библия вина юыны лэзе шуыса. Нош ачиз агай малпа вина юытэк улыны. Тани со лыктэ куное но адӟе, мукет агайёс вина юо шуыса.

Лыдӟе Екклесиастэз 7:16 но Римъёслы 14:1, 10 но та юанъёслы валэктонъёс сётэ:

Кыӵе ужпум кутыны быгатысал агай, та кылбуръёсты лыдӟыса? Мар тӥ кароды, мукетъёсыз лэсьто ке сое, мае лэсьтыны тӥляд возьытлыкты тӥледыз уг лэзьы?

Кызьы шонер ужпум кутоно

1. Вӧсяське Иеговалы но куре юрттыны тӥледлы шонер ужпум кутыны (Иаков 1:5).

2. Утчалэ Библиысь но со вылэ пыкиськем публикациосысь тупась возетъёсты. Озьы ик луоз визь-кенеш курыны тодӥсь-валась христианъёслэсь.

3. Малпаське, кызьы кутэм ужпумды шӧдӥськоз тӥ вылын но мукетъёсыз вылын.

КИН КЕ НО ВЕРАНЫ БЫГАТОЗ: «Мар лэсьтэмед потэ, сое ик лэсьты. Мукетъёсыз сярысь эн малпаськы».

Малы малпаськыны кулэ Инмар сярысь но мукетъёсыз сярысь?

ТОДЭ ВАЁН

Шонер ужпум кутон понна, тодоно, мар малпа Иегова. Озьы ик малпаськоно, кызьы кутэм ужпуммы мукетъёсыз вылын шӧдӥськоз: шумпоттоз-а яке ӝоже уськытоз-а.