14-ТӤ УРОК

Кыӵе религия Инмарлы яра?

ЛЭЗЁНО

Кылем урокысь ми тодӥмы, Инмарлы вань религиос уг ярало шуыса. Озьы ке но ми быгатӥськомы Кылдытӥсьмылы йыбыртъяны озьы, кызьы солы яра (Иаков 1:27). Мар со понна кароно? Ойдолэ учкомы, мар вера Библия.

1. Кытысь тодоно, кызьы Инмарлы шонер йыбыртъяно?

Милемлы Инмарлы йыбыртъяно озьы, кызьы дышетэ Библия. Иисус Христос вераз Инмарлы: «Тынад кылыд — зэмлык» (Иоанн 17:17). Зэмлык гожтэмын Инмарлэн Кылаз, Библиын. Но куд-ог религиос Библиысь зэмлыкез кулэ уг каро. Соос Инмарлы йыбыртъяло адямиосын малпам дышетонъёсъя но вашкала сямъёсъя. Иеговалы туж уг кельшы, куке кин ке солэсь курон-косонзэ палэнтэ. (Лыдӟе Марклэсь 7:9.) Нош ми Инмарлы йыбыртъяськомы ке озьы, кызьы дышетэ Библия, но тыршиськомы ке соя улыны, Инмар туж шумпотэ.

2. Кызьы Иеговалы йыбыртъяно?

Иегова — милям Кылдытӥсьмы, соин ик ми солы гинэ йыбыртъяны кулэ (Усьтӥськон 4:11). Милемлы сое яратоно но, солы йыбыртъяку, вӧлыса лэсьтэм сульдэръёс азе но мудор азе султыса, вӧсяськоно ӧвӧл. (Лыдӟе Исаиялэсь 42:8.)

Иеговалы йыбыртъясь адями дун-чылкыт но Иеговалы ярамон улыны кулэ (Римъёслы 12:1). Со понна милемлы солэсь законъёссэ яратоно но соослэсь кылзӥськоно. Кылсярысь, соос, кинъёс Иеговаез ярато, азыса-калгыса уг уло. Озьы ик соос тамак уг кыско, наркотикъёсты уг куто но мултэс вина юыса уг уло a.

3. Малы Иеговалы мукетъёсыныз ӵош йыбыртъяно?

Милям пумиськонъёсмы котькуд арняе ортчо. Отын ми быгатӥськомы Иеговаез кенешен ӵош данъяны (Псалтирь 110:1, 2). Кылсярысь, отын ми, Инмарез данъяса, кырӟаськомы (Псалтирь 103:33). Иеговалэн потэ, ми сыӵе пумиськонъёсы мед ветломы шуыса, малы ке шуоно со милемыз яратэ но тодэ, кенешлэн пумиськонъёсыз милемыз пумтэм вапумъёс ӵоже шумпотыса улыны дасяло шуыса. Куке ми огазе люкаськиськомы, ми ог-огмес буйгатӥськомы но юнматӥськомы.

МУРГЕС ЭСКЕРЕ

Малы Иеговалы уг кельшы, куке адямиос, солы йыбыртъякузы, сульдэр-идолъёс но мудоръёс азьын вӧсясько? Тодэ, кызьы Инмарез данъяны луоз.

4. Сульдэр-идолъёс но мудоръёс азьын Инмарлы вӧсяськоно ӧвӧл

Кытысь ми тодӥськомы, Инмарлы со уг кельшы шуыса? Учке ВИДЕОРОЛИКЕЗ но та юанлы валэктон сётэ:

ВИДЕОРОЛИК: «Кельше-а Инмарлы, куке адямиос, солы йыбыртъякузы, сульдэр-идолъёс но мудоръёс азьын вӧсясько?» (3:26)

Мар луиз, куке куд-огъёсыз, Инмарлы йыбыртъякузы, сульдэр-идол азьын вӧсяськыны кутскизы?

Куд-ог адямиос сульдэр-идолъёс яке мудоръёс азьын вӧсясько, малы ке шуоно малпало, озьы соос Инмарлы матэгес луо шуыса. Но зэмзэ вераса, со соосты Инмарлэсь палэнтэ гинэ. Кызьы? Лыдӟе Потонэз 20:4—6 но Псалтирез 105:35, 36 но та юанъёслы валэктонъёс сётэ:

Мар азьын адямиос Инмарлы вӧсясько?
Кызьы Иегова со шоры учке?
Кызьы тӥ учкиськоды сульдэр-идолъёс яке мудоръёс азьын вӧсяськон шоры?

5. Иеговалы гинэ йыбыртъяса, ми ӧрекчи дышетонъёслэсь мозмытскиськомы

Тодэ, кызьы Иегова сярысь зэмлык ӧрекчи дышетонъёслэсь мозмытэ. Учке ВИДЕОРОЛИКЕЗ.

ВИДЕОРОЛИК: «Зэмлык монэ мозмытӥз» (5:16)

Лыдӟе Псалтирез 90:14 но та юанлы валэктон сётэ:

Кызьы Иегова милемлы юрттоз, ми сое яратӥськомы но солы гинэ йыбыртъяськомы ке?

6. Кенешлэн пумиськонъёсаз ми Иегова Инмарлы йыбыртъяськомы

Кенешлэн пумиськонъёсаз ми, кырӟанъёс кырӟаса но юанъёслы валэктонъёс сётъяса, Иеговаез данъяськомы но ог-огмес юнматӥськомы. Лыдӟе Псалтирез 21:23 но та юанъёслы валэктонъёс сётэ: