8-ТӤ УРОК
Малы Инмар курадӟонъёсты уг быдты?
1. Мар бордысен лек ужъёс кутскизы?
Инмар кема дыр ӵоже лэзе ини адямиослы кивалтыны. Солы луыса яркыт адӟиське, адямиос асьсэос шуг-секытъёссэс сэрттыны-пертчыны уг быгато шуыса
Музъем вылын вань лек ужъёс Шайтанлэн нырысетӥзэ пӧяськемез бордысен кутскизы. Инмар Шайтанэз урод кылчин карыса ӧз кылдыты. Нырысь со умой кылчин вал, но со «зэмлыкын сылыны ӧз быгаты» (Иоанн 8:44). Солэн потӥз, солы Инмарлы кадь мед йыбыртъялозы шуыса. Нош йыбыртъяны кулэ Инмарлы гинэ. Шайтан нырысетӥ кышномуртэз, Еваез, пӧяз но, Инмарлэсь кылзӥськем интые, Ева Шайтанлэсь кылзӥськиз. Адам Ева пала кариськиз. Адамлэн кутэм ужпумез курадӟонъёс но кулон вайиз. (Лыдӟе Улон-вылонэз 3:1—6, 19.)
Шайтан оскытӥз Еваез, со Инмарлэсь медаз кылзӥськы шуыса. Озьы Шайтан Инмарлэн кивалтэтэзлы пумит бугыръяськон ӝутӥз. Тросэз адямиос Шайтан сьӧры мынӥзы но Инмарлэсь палэнскизы, сое асьсэлэн Кивалтӥсенызы лыдъямысь дугдӥзы. Озьы «та дуннелэн эксэез» луиз Шайтан. (Лыдӟе Иоаннлэсь 14:30; 1 Иоаннлэсь 5:19.)
2. Вал-а кыӵе ке изъянэз Инмарлэн кылдытэмаз?
Инмар котьку но котьмае шонер, чик изъянтэк лэсьтэ. Соин ик адямиос но кылчинъёс Инмарлэсь котьма ласянь, быдэсак, кылзӥськыны быгато вал (Кыкетӥ Закон 32:4, 5). Озьы ик Инмар милемлы асьмелы бырйыны право сётӥз, мар кароно со яке та учырын. Солы луыса ми ужъёсмы вылын возьматыны быгатӥськомы, сое яратӥськомы шуыса. (Лыдӟе Иаковлэсь 1:13—15; 1 Иоаннлэсь 5:3.)
3. Малы Инмар али ке но курадӟонъёсты уг быдты на?
Огдырлы Иегова лэзиз, солэн кивалтэтэзлы пумит мед ӝутскозы шуыса. Нош малы? Озьы солэн возьматэмез потӥз, адямиос сотэк котькӧня кивалтыны мед тыршозы, со соослы шуд уз вайы шуыса. Адямиослэн 6 000 ар ӵоже улэмзы возьматэ, со озьы ик вань шуыса. Одӥг кивалтӥсь но ӧз быгаты быдтыны ожъёсты, йыружъёсты, шонертэм ужъёсты но висёнъёсты. (Лыдӟе Екклесиастэз 7:29; 8:9; Римъёслы 9:17.)
Адями кивалтӥсьёсын ӵошатоно ке, Инмарлэн кивалтэмез шуд вае соослы, кинъёс солэсь кылзӥсько (Исаия 48:17, 18). Ӝоген Иегова вань адями кивалтэтъёсты быдтоз. Музъем вылын улозы соос гинэ, кинъёс Инмарез асьсэлы Кивалтӥсе бырйизы (Исаия 11:9). (Лыдӟе Данииллэсь 2:44.)
Учке «Малы Инмар курадӟонъёсты уг быдты?» видеороликез.
4. Кыӵе луонлык сётэ Инмарлэн чидамез?
Шайтан вераз, адямиос асьсэлы пайда басьтон понна гинэ Иеговалы ужало-тыршо шуыса. Потэ-а тӥляд возьматэмды, со озьы ӧвӧл шуыса? Тӥляд вань сыӵе луонлыкты! Инмарлэн чидамезлы луыса, котькуд адями возьматыны быгатэ, кинэ со аслыз кивалтӥсе быръе: Инмарез яке адямиез. Асьмелэн улонэнымы ми возьматӥськомы, кинэ ми бырйиськомы. (Лыдӟе Иов книгаез 1:8—12; Мадёнъёсты 27:11.)
5. Мар кароно, Инмарез аслыд Кивалтӥсе быръён понна?
Кутэм ужпумъёсмы возьмато, потэ-а милям, Инмар Кивалтӥсьмы мед луоз шуыса
Инмарез аслыд Кивалтӥсе быръён понна, зэмос религиез шедьтоно — религиез, кудӥз Инмарлэн Кылыз вылэ, Библия вылэ, пыкиське. Озьы ик Библия дышетэмъя улыны кулэ (Иоанн 4:23). Шайтанлэн кивалтэмез улсысь потон понна, политикалэсь палэнын возиськоно но ожъёсы пыриськоно ӧвӧл. Озьы улӥз ачиз Иисус. (Лыдӟе Иоаннлэсь 17:14.)
Шайтан аслэсьтыз кужымзэ кутэ, азон-калгонэз но мукет умойтэм ужъёсты умоен возьматон понна. Ми со ужъёсты кулэ ӧм каре ке, милям куд-ог эшъёсмы но ӵыжы-выжыосмы Библиез дышетэммы понна милемыз серекъяны яке милемлы люкетыны но быгатозы (1 Пётр 4:3, 4). Соин ик бырйыны кулэ, кин милемлы дуногес. Утчаломы-а ми эшъёс соос пӧлысь, кинъёс Инмарез ярато? Кылзӥськомы-а ми Инмарлэн визьмо законъёсызлэсь? Ми шонер быръён лэсьтӥмы ке, возьматомы, Шайтан пӧяськись шуыса но адямиос, шуг-секытъёсын пумиськыса но, Инмарлы оскымон кыльыны быгато шуыса. (Лыдӟе 1 Коринфъёслы 6:9, 10; 15:33.)
Инмарлэн адямиосты яратэмез возьматэ, лек ужъёс но курадӟонъёс одно ик бырозы шуыса. Соос, кинъёс Инмарлэн сюрестӥз мыно, рай музъем вылын пырак дауръёс ӵоже улозы. (Лыдӟе Иоаннлэсь 3:16.)
