Инмарлэн нимыз — Иегова. Со ним возьматэ «Со ваньмызлы луыны сётэ». Иегова — Ваньмызлэсь Кужмо Инмар. Со ваньзэ кылдытӥз бере, со котькуд кыл сётонзэ но малпанзэ быдэстыны быгатэ.

Вашкала еврей кылын со ним ньыль букваен гожтӥське. Удмурт кылын со гожтӥське ЙХВХ яке ИГВГ букваосын. Нырысь, куке Вуж Сӥзён еврей кылын гожтэмын вал, отын Инмарлэн нимыз ог 7 000 пол пумиськиз. Пӧртэм шаеръёсын Иеговалэсь нимзэ пӧртэм сямен верало, малы ке шуоно пӧртэм кылъёсын со пӧртэм сямен лыдӟиське.

▸ 1-тӥ люкет, 15-тӥ абзац

Библиез адямиос гожъязы ке но, со Инмарлэн Кылыз. Озьы ик, кызьы кивалтӥсь секретарьзэ гожтэт гожтыны курысал ке, отын секретарьлэн ӧвӧл, нош кивалтӥсьлэн малпанъёсыз гожтэмын луысалзы. Библия сярысь но озьы ик вераны луоз.Отын Инмарлэн малпанъёсыз гожтэмын. Соос, кинъёс Библиез гожъязы, Инмарлэсь малпанъёссэ святой духлэн кивалтэмез улсын гожтӥзы. Инмар аслэсьтыз малпанъёссэ пӧртэм сямен вера вал: кылсярысь, со адямилы адӟон яке вӧт сётэ, нош адями собере сое гожтэ.

▸ 2-тӥ люкет, 5-тӥ абзац

Библиысь возет — со дышетон, кудӥз шонер ужпумъёс кутыны юрттэ. Кылсярысь, таӵе возет: «Урод эшъёс ӟеч сямъёсты саптало-сӧро». Та возет дышетэ милемыз, ми вылын шӧдӥське шуыса со, кыӵе адямиосын ми  эшъяськиськомы (1 Коринфъёслы 15:33). Мукетыз возет: «Адями мае кизе, сое ик со ара». Таиз возет дышетэ милемыз, адями лэсьтэм ужъёсызлэн бервылъёсызлэсь нокызьы пегӟыны уг быгаты шуыса (Галатъёслы 6:7).

▸ 2-тӥ люкет, 12-тӥ абзац

Азьпалзэ ивортон, яке азьпалзэ тодытыса веран,— со Инмарлэсь ивор, кудӥз солэсь эриксэ валэктэ. Азьпалзэ ивортон луыны быгатэ визьман-нодъян выллем, курон-косон яке судъян выллем. Куд-ог азьпалзэ ивортонъёс — со веранъёс со сярысь, мар луоз азьланяз. Библиысь тросэз азьпалзэ ивортонъёс быдэсмизы ини.

▸ 2-тӥ люкет, 13-тӥ абзац

Библиысь Мессия сярысь трос азьпалзэ ивортонъёс Иисус Христос вылын быдэсмизы. Учке « Мессия сярысь азьпалзэ ивортонъёс» рамкаез.

▸ 2-тӥ люкет, 17-тӥ абзац, сноска

Иегова музъемез нимысьтыз ужпумен кылдытӥз: солэн потэ вал, музъем рай мед луоз но со вылын Инмарез яратӥсь адямиос мед улозы шуыса. Инмарлэн малпанэз ӧз воштӥськы. Ӝоген со ваньзэ уродзэ быдтоз но адямиослы пумтэм вапумъёс ӵоже улон кузьмалоз.

▸ 3-тӥ люкет, 1-тӥ абзац

Шайтан — со кылчин, кудӥз вал нырысетӥез, кин Инмарлы пумит ӝутскиз. Со «Шайтан» шуыса нимамын, мар «пумит султӥсь» шуэм луэ, малы ке шуоно со Иеговалы пумит султӥз. Озьы ик со «Дьявол» шуыса нимамын, мар «кыл нуллӥсь» шуэм луэ, малы ке шуоно со Инмар сярысь пӧяса вера но адямиосты пӧя.

▸ 3-тӥ люкет, 4-тӥ абзац

Музъемез кылдытэмезлэсь трослы азьлогес Иегова сю миллионлэсь тросгес кылчинъёсты кылдытӥз (Даниил 7:10). Соос инмын улыны кылдытэмын вал. Котькудӥзлэн соос пӧлысь аслаз нимыз но аслаз сямъёсыз. Инмын соос пӧртэм инты басьто. Инмарлы оскымон кылчинъёс зӥбыт-востэмесь бере, соос кулэ уг каро адямиослэсь соослы йыбыртъяны тыршемзэс. Кылчинъёс пӧртэм ужъёсты быдэсъяло, кылсярысь: Иеговалэн престол азяз ужало-тыршо, солэсь иворъёссэ верало, музъем вылысь ужась-тыршисьёссэ валто но утё, Иеговалэсь судъёссэ быдэсъяло но тодытон ужын юрттӥсько (Псалтирь 33:8; Усьтӥськон 14:6; 22:8, 9). Вуонояз, Армагеддон ож дыръя, соос Иисус Христос палан ожмаськозы (Усьтӥськон 16:14, 16; 19:14, 15).

▸ 3-тӥ люкет, 5-тӥ абзац; 10-тӥ люкет, 1-тӥ абзац

Котькыӵе шӧдон, малпан яке уж, кудӥз Иеговалэн эрикезлы пумит луэ,— со сьӧлык. Сьӧлык Инмарен кусыпъёсмес сӧре бере, Инмар законъёс но возетъёс сётӥз, кудъёсыз юрттӥзы милемлы валаны, мае Инмар сьӧлыкен лыдъя. Соосъя улыса, ми ум сьӧлыкаське. Нырысь ваньмыз, мае кылдытӥз Иегова, шектэм, яке тырбыдэс, вал. Но куке Адам но Ева, валаса вылысь, Иеговалэсь  ӧз кылзӥське, соос сьӧлыказы но тырбыдэстэм луизы. Соин сэрен соос пересьмизы но кулӥзы. Вань адямиослы Адамлэсь сьӧлык выжиз бере, соин ик ми ваньмы пересьмиськомы но кулӥськомы.

▸ 3-тӥ люкет, 7-тӥ абзац; 5-тӥ люкет, 3-тӥ абзац

Ож, кудаз Инмар быдтоз ваньзэ уродзэ но соосты, кинъёс Шайтан палан.

▸ 3-тӥ люкет, 13-тӥ абзац; 8-тӥ люкет, 18-тӥ абзац

Инмарлэн Эксэйлыкез — со кивалтэт, кудзэ Иегова инмын кылдытӥз. Солэн эксэез — Иисус Христос. Со Эксэйлык пыр Иегова азьланяз ваньзэ уродзэ быдтоз. Инмарлэн Эксэйлыкез быдэс музъемен кивалтоз.

▸ 3-тӥ люкет, 14-тӥ абзац

Иисус со нырысетӥез, кинэ Инмар кылдытӥз. Иегова сое музъем вылэ ыстӥз, со адямиос понна мед кулоз шуыса. Иисусэз виемзы бере Иегова сое улӟытӥз. Али Иисус Христос — Эксэй. Со инмын Инмарлэн Эксэйлыказ кивалтэ.

▸ 4-тӥ люкет, 2-тӥ абзац

Библиын верамын вал, ку музъем вылэ Мессия лыктоз. Мессия лыктыны кулэ вал 483 ар ӵоже кыстӥськись вапумлэн пумаз. Со кутскиз асьме вакытлэсь азьло 455-тӥ арын но йылпумъяськиз асьме вакытысь 29-тӥ арын.

 Кытысь ми тодӥськомы, со вапум асьме вакытысь 29-тӥ арын йылпумъяськиз шуыса? Азьпалзэ ивортонысь «сизьым пол сизьым ар но куатьтон кык пол сизьым ар», яке 69 пол сизьым ар,— со вапум, кудӥз кыстӥське 483 ар (69 х 7). Со кутскиз асьме вакытлэсь азьло 455-тӥ арын, куке Неемия Иерусалиме лыктӥз но куашкатэм карез выльысь ӝутыны кутскиз  (Даниил 9:25; Неемия 2:1, 5—8). Асьме вакытлэсь азьло 455-тӥ арысен кутскыса 483 ар лыдъямы ке, асьме вакытысь 29-тӥ аре вуомы. Ӵапак со арын Иисус пылатӥськиз но Мессия луиз! (Лука 3:1, 2, 21, 22).

Со азьпалзэ ивортонын ик мукет вапум сярысь верамын на, кудӥз сизьым ар кыстӥськоз. Азьпалзэ ивортон верамъя, со вапумлэн шораз, асьме вакытысь 33-тӥ арын, Мессия виемын луоз. Нош асьме вакытысь 36-тӥ арын со вапум йылпумъяськоз. Со дырысен кутскыса, Инмар Эксэйлык сярысь ӟеч иворез, иудейёслы гинэ уз, вань калыкъёслы вераны кутскозы (Даниил 9:24—27).

▸ 4-тӥ люкет, 7-тӥ абзац

Библия дышетэ, Иегова Инмар со Кылдытӥсь шуыса, нош Иисус Христос — солэн нырысетӥ кылдытэмез (Колоссыослы 1:15, 16). Иисус Ваньмызлэсь Кужмо Инмар ӧвӧл. Со ноку но ассэ Инмарен одӥг радэ ӧз пукты. Со вераз: «Мынам Атае Мынэсьтым быдӟымгес» (Иоанн 14:28; 1 Коринфъёслы 15:28). Но куд-ог религиос верало, Инмар, Пи но святой дух — со одӥг шуыса. Со зэмос луисьтэм дышетон.

Инмар, Пи но святой дух со одӥг ӧвӧл. Библия валамон вера, Иегова одӥг гинэ зэмос Инмар шуыса, Иисус Христос — солэн одӥг вордӥськем Пиез, нош святой дух — Иеговалэн кужымез, кудзэ со аслэсьтыз эриксэ быдэстон понна уже кутэ. Тани мар верамын Библиын со сярысь, кызьы Инмар со кужымзэ уже кутэ. Нырысетӥ даурысь христианъёс сярысь верамын вал, соос «Святой Духен тыр луизы» шуыса. Озьы ик Иегова  вераз: «Аслэсьтым Духме вань адямиос вылэ кисьто» (Апостолъёслэн ужъёссы 2:1—4, 17).

▸ 4-тӥ люкет, 12-тӥ абзац; 15-тӥ люкет, 17-тӥ абзац

Малы зэмос христианъёс кирослы уг йыбыртъяло?

1.  Кема дыр ӵоже киросэз уже кутӥзы зэмос луисьтэм религиын. Иисус Христос музъем вылэ лыктэмлэсь азьло ик ини адямиос киросэз уже кутӥзы инкуазьлы йыбырттонын но языческой обрядъёсын, кудъёсаз азон-калгон вӧлмемын вал. Христос кулэм бере куинь сю ар ӵоже солэн дышетскисьёсыз кирослы ӧз йыбыртъялэ. Берлогес, куке Римын император Константин кивалтӥз, со христианъёсты Инмарлы йыбырттыкузы киросэз уже кутыны косӥз. Кирос Инмарлы оскисьтэм адямиослэсь мылкыдзэс ӝутыны кулэ вал черке ветлыны. Но Иисус кирос вылын ӧз кулы. Одӥг справочникын валэктэмын, Иисус музъем вылэ лыктэмлэсь азьло ик ини адямиос киросэз уже кутӥзы шуыса. Озьы ик верамын, киросэз Христослы оскисьтэм адямиос но уже кутӥзы шуыса.

2.  Кызьы верамын вал ини, Иисус кирос вылын ӧз кулы. Куд-ог Библиосын, куке пумиське «кирос» кыл, со возьматэ «юбо», «кор» яке «писпу» шуэмез. Одӥг справочникын валэктэмын, Выль Сӥзёнын «кирос» кыл одӥг пол но уг пумиськы шуыса. Иисус кирос борды ӧвӧл, юбо борды кортӵогамын вал.

3.  Иеговалэн уг поты, ми сульдэр-идолъёслы, тус-суредъёслы яке кирослы мед йыбыртъяломы шуыса (Потон 20:4, 5; 1 Коринфъёслы 10:14).

▸ 5-тӥ люкет, 12-тӥ абзац

Иисус аслэсьтыз дышетскисьёссэ кулонзэ Тодэ ваён ӝытанэз пусйыны косӥз. Сое пусъё арлы быдэ 14-тӥ нисанэ — нуналэ, ку израиль калык Пасхаез пусъе вал. Асьме дыре со южтолэзе яке оштолэзе тупа. Ӝытанэз пусйыку, лыктэмъёс киысь кие нянь но вина сётъяло, кудъёсыз символъёс луо но Христослэсь мугорзэ но вирзэ возьмато. Нянез сиё но винаез юо соос гинэ, кинъёс Иисусэн ӵош инмын кивалтозы. Нош соос, кинъёс пырак дауръёс ӵоже музъем вылын улыны оско, нянез уг сиё но винаез уг юо. Соос гажаса учко, кызьы ваньмыз со ортче. Ӝытанэ лыктыса, соос тау каремзэс возьмато.

▸ 5-тӥ люкет, 21-тӥ абзац

Еврей но грек кылъёс, кудъёсыз Библиын «лул» шуыса берыктӥсько, возьматыны быгато: 1) адямиез, 2) пудо-животэз яке 3) адямилэсь яке пудо-животлэсь улонзэ. Тани куд-ог примеръёс:

• Адями. «Ной улон нуналъёсы... тямыс лул гинэ ву пыр утиськыны быгатӥзы» (1 Пётр 3:20). Татын «лул» кыл возьматэ адямиосты — Ноез, солэсь кышнозэ, куинь пиоссэ но соослэсь кышнооссэс.

• Пудо-живот. «Инмар шуиз: „Уяса, нюж кыстӥськыса ветлӥсь улэп лулъёсын вуос мед пачылмозы; музъем вылтӥ, инметӥ тылобурдоос мед лобалозы“» (Улон-вылон 1:20).

• Адямилэн яке пудо-животлэн улонэз. Мадёнъёсын 16:17 гожтэмын: «Улон сюрессэ чакласа-эскерыса улӥсь мурт лулзэ уте». Озьы ик, Исаиялэн 44:20 верамын: «Ӧрекчаськон улэ сюрем сюлэм сое йыромытӥз, табере со лулзэ уг ни быгаты мозмытыны».

   Со сяна, «лул» кыл кутӥське куд-ог веранъёсын но. Кылсярысь, адями вань кужымзэ поныса но мылысь-кыдысь тырше ке, верало, со «лулысь-сюлмысь» сое лэсьтэ шуыса (Ефесъёслы 6:6; Колоссыослы 3:23). Библиын верамын, лул кулэ шуыса (Иезекииль 18:20; Иаков 5:20).

▸ 6-тӥ люкет, 5-тӥ абзац; 15-тӥ люкет, 17-тӥ абзац

Еврей но грек кылъёс, кудъёсыз Библиын «дух» шуыса берыктӥсько, пӧртэм мае ке возьматыны быгато. Соос котьку но возьмато сое, мае адями адӟыны уг быгаты, кылсярысь, кылчинъёсты, периосты яке святой духез (со Инмарлэн кужымез). Библия уг дышеты, дух — со адямилэн кыӵе ке люкетэз, кудӥз адями кулэм бере кытын ке но улэ на шуыса (Потон 35:21; Кыкетӥ Закон 18:11; Лука 11:13; Еврейёслы 1:14).

▸ 6-тӥ люкет, 5-тӥ абзац; 15-тӥ люкет, 17-тӥ абзац

«Геенна» — со грек кыл. Куке со Библиын кутӥське, со пыраклы быдтонэз возьматэ. Удмурт Библиын куд-ог интыосын со кыл «кысылӥсьтэм тыл» шуыса берыктэмын. Но со шонертэм. «Геенна» шуыса нимало вал Иерусалим вӧзысь нёжалэз, кытын жуг-жаг суто вал. Нокыӵе муг ӧвӧл малпаны, Иисус Христос улон вакытэ отын адямиосты яке пудо-животъёсты курадӟытӥзы но улэпкын сутылӥзы шуыса. Соин ик Библиысь «геенна» кыл уг возьматы кыӵе ке адӟиськисьтэм интыез, кытын кулэм муртъёс курадӟо но пырак дауръёс ӵоже тылын ӝуало. Озьыен, куке Иисус вераз, кинэ ке гееннае кушто шуыса, со вераз пыраклы быдтон сярысь (Матфей 5:22; 10:28).

▸ 7-тӥ люкет, 20-тӥ абзац

Со вӧсяськон, кудӥз вылын Иисус возьматӥз дышетскисьёсызлы, кызьы вӧсяськоно. Тани кыӵе куронъёсын Инмарлы вазиськыны дышетӥз Иисус:

• «Тынад нимыд дано мед луоз»

  Ми куриськомы Иеговаез, со аслэсьтыз нимзэ котькыӵе пӧяськонлэсь мед чылкытатоз, яке ӟеч нимзэ мед берыктоз, шуыса. Соку ваньмыз инмын но, музъем вылын но Инмарез мур гажалозы.

• «Тынад Эксэйлыкед мед лыктоз»

  Ми куриськомы, Инмарлэн Эксэйлыкез Шайтанлэсь лек дуннезэ мед быдтоз, быдэс музъемен мед кивалтоз но музъемез райлы мед пӧрмытоз шуыса.

• «Тынад эрикедъя мед луоз музъем вылын но инмын кадь ик»

  Ми куриськомы, Инмарлэн музъем пумысен малпанэз мед быдэсмоз шуыса но тырбыдэс, Инмарлэсь кылзӥськись адямиос райын пырак дауръёс ӵоже мед улозы шуыса. Ӵапак сыӵе малпанэн Инмар адямиосты кылдытӥз вал.

▸ 8-тӥ люкет, 2-тӥ абзац

Иегова дун тыриз, адямиосты сьӧлыклэсь но кулонлэсь мозмытон понна. Адам тырбыдэс вал. Но со Инмарлэсь ӧз кылзӥськы но сьӧлыко луиз. Озьы со Иеговаен матысь кусыпъёссэ сӧриз, тырбыдэс луэмысь дугдӥз но райын улыны луонлыксэ ыштӥз. Ми солэн нылпиосыз бере, ми но сьӧлыкоесь. Нош милемыз сьӧлыклэсь мозмытон понна, кулэ вал мукетыз сьӧлыктэм адями, кудӥз ми понна аслэсьтыз улонзэ сётысал. Соин ик Инмар Иисусэз музъем вылэ ыстӥз, со аслэсьтыз улонзэ вань сьӧлыко адямиос понна мед сётоз шуыса. Озьы, Иисуслэн кулэмезлы луыса, вань адямиослэн  луонлыксы кылдӥз тырбыдэс луыны но пырак дауръёс ӵоже улыны.

▸ 8-тӥ люкет, 21-тӥ абзац; 9-тӥ люкет, 13-тӥ абзац

Кызьы верамын азьпалзэ ивортонын, кудӥз гожтэмын Данииллэн книгаяз 4-тӥ люкетын, 1914-тӥ арын Инмар аслэсьтыз Эксэйлыксэ кылдытыны кулэ вал.

Азьпалзэ ивортон. Иегова Навуходоносор эксэйлы уйвӧтаз азьпалэз сярысь адӟон возьматӥз. Навуходоносор адӟиз ӝужыт писпуэз, кудӥз погыртэмын вал. Писпу «сизьым дыр-вапумъёс» ӵоже медаз буды шуыса, солэн лӥялэз кортэн но ыргонэн эгесамын вал. Берлогес со писпу выльысь будыны кулэ вал (Даниил 3:98; 4:7—13).

Кызьы та азьпалзэ ивортон милемын герӟаськемын? Писпу Инмарлэсь кивалтэтсэ возьматэ. Кема дыр ӵоже Инмар Израиль калыкен эксэйёс пыр кивалтӥз, кудъёсыз Иерусалимын кивалтӥзы (1 Паралипоменон 29:23). Но тросэз со эксэйёс Иеговалэсь палэнскизы, соин ик соослэн кивалтэмзылы пум вуиз. Асьме вакытлэсь азьло 607-тӥ арын Иерусалим куашкатэмын вал. Со вал «сизьым дыр-вапумъёслэн» кутсконзы (4 Эксэйлыкъёслэн 25:1, 8—10; Иезекииль 21:25—27). Куке Иисус Христос вераз: «Язычникъёслэн дырзы бырытозь, Иерусалимез язычникъёс лёгаса возёзы», со вераз ӵапак со «сизьым дыр-вапумъёс» сярысь (Лука 21:24). Соин ик вераны луоз, куке Иисус музъем вылын вал, «сизьым дыр-вапумъёс» ӧз ортче на вал шуыса. Иегова кылзэ сётӥз, «сизьым дыр-вапумъёслэн» пумаз выльысь аслэсьтыз эксэйзэ пуктоз шуыса. Со эксэен луиз Иисус Христос. Солэн кивалтэмез Инмарлэн калыкезлы пумтэм вапумъёс ӵоже бакель каронъёс ваёз (Лука 1:30—33).

 Кӧня кыстӥськизы «сизьым дыр-вапумъёс»? «Сизьым дыр-вапумъёс» 2 520 ар ӵоже кыстӥськизы. Кытысь ми сое тодӥськомы? Библиын верамын, куинь но ӝыны дыр — со 1 260 нунал (Усьтӥськон 12:6, 14). Озьыен, «сизьым дыр-вапумъёс», кудъёсыз кык поллы кемагес кыстӥсько,— со 2 520 нунал (1 260 х 2). Библиысь «одӥг нунал интые одӥг ар» веранэз лыдэ басьтыса, 2 520 нунал 2 520 ар луэ (Лыдпусъёс 14:34; Иезекииль 4:6).

Асьме вакытлэсь азьло 607-тӥ арысен кутскыса 2 520 ар лыдъямы ке, 1914-тӥ аре вуомы. Со арын Иегова Иисус Христосэз инмысь Эксэйлыказ эксэе пуктӥз.

▸ 8-тӥ люкет, 23-тӥ абзац

«Архангел» кыл «валтӥсь кылчин» шуэмез возьматэ. Библиын одӥг гинэ архангел сярысь верамын. Солэн нимыз Михаил (Даниил 12:1; Иуда 9).

Усьтӥськонын 12:7 гожтэмын: «Михаил аслаз Кылчинъёсыныз лобась кыйлы пумит ожмаськизы, нош лобась кый аслаз кылчинъёсыныз соослы пумит ожмаськизы». Та кылбурысь адӟиське, Михаил — инмысь ожгарчиослэн, Инмарлы оскымон кылчинъёслэн, йырзы шуыса. Усьтӥськон книгаын озьы ик Иисус Христос сярысь но верамын, со инмысь ожмаськисьёсын кивалтэ шуыса. Озьыен, Михаил — со Иисус Христос. Михаил — со Иисуслэн эшшо одӥг нимыз (Усьтӥськон 19:14—16).

▸ 9-тӥ люкет, 4-тӥ абзац

Со Шайтанлэсь дуннезэ быдтон азьысь вакыт. Азьло ик верамын вал, со вакытэ музъем вылын нимысьтыз югдур кылдоз шуыса. Библиын со вакыт озьы ик «дунне бырон» но «Адями Пилэн лыктонэз [«Эксэй луонэз»,  ВД]» шуыса нимамын (Матфей 24:3, 27, 37). «Берпум аръёс», яке «берпуметӥ нуналъёс», кутскизы 1914-тӥ арын, куке инмын Инмарлэн Эксэйлыкез кивалтыны кутскиз. Соос йылпумъяськозы, куке со Эксэйлык Шайтанлэсь дуннезэ Армагеддонын быдтоз (2 Тимофейлы 3:1; 2 Пётр 3:3).

▸ 9-тӥ люкет, 5-тӥ абзац

Куке Инмар кулэм адямиез выльысь улонэ берыктэ, со улӟыса султон шуыса нимаське. Библиын укмыс учыръёс сярысь гожтэмын, ку адямиос улӟытэмын вал. Кулэмъёсты улӟытъязы Илия, Елисей, Иисус Христос, Пётр но Павел. Соос улӟытъяны быгатӥзы Инмарлэн кужымезлы луыса гинэ. Иегова кылзэ сётэ «шонер улэмъёсты но, шонер улымтэосты но» улӟытыны, соос музъем вылын мед улозы шуыса (Апостолъёслэн ужъёссы 24:15). Библиын озьы ик верамын на, куд-огъёсыз инмын улон понна улӟытэмын луозы шуыса. Со Инмарен быръем адямиос — зырӟемъёс — инмын Иисус Христосэн ӵош кивалтозы (Иоанн 5:28, 29; 11:25; Филиппыослы 3:11; Усьтӥськон 20:5, 6).

▸ 9-тӥ люкет, 13-тӥ абзац

Спиритизм — со периосын кусып возён. Адямиос периосын пӧртэм сямен герӟаськыны тыршо, яке асьсэос, яке мукет адямиос пыр, кылсярысь, туно-пеллё яке ведӥн пыр. Соос оско, кулэмез бере адями сопал дуннее кошке но юрттыны яке мае ке уродзэ лэсьтыны быгатэ шуыса. Но со озьы ӧвӧл. Периосын вераськон шонертэм луэ, малы ке шуоно соос адямиосты Инмарлэсь кылзӥськытэк улыны косо. Спиритизм пӧлы пыре астрология, тунаськон-пелляськон, веднаськон,  пӧртэм тодметъёсты чаклан, паймымон-валантэм ужъёслы оскон. Со сяна, спиритизмен герӟаськемын тросэз адямиез ватон сямъёс, кылсярысь, кисьтон карон, кулэмъёслы кузьымъёс сётон яке, адямиез ватыку, трос пӧртэм сямъёсты чаклан. Книгаосын, журналъёсын, гороскопъёсын, фильмъёсын но кырӟанъёсын периос, веднаськон но паймымон-валантэм ужъёс тунсыкоен но кышкыттэмен возьматӥсько. Периосын герӟаськыны тыршыса, адямиос ӵем дыръя наркотикъёсты куто (Галатъёслы 5:20, 21; Усьтӥськон 21:8).

▸ 10-тӥ люкет, 10-тӥ абзац; 16-тӥ люкет, 4-тӥ абзац

Иегова — Дунне Кутӥсь, со Кылдытӥсь (Усьтӥськон 15:3). Со ваньзэ кылдытӥз бере, ваньмыз, мар вань, солэн луэ но солэн правоез вань кивалтыны (Псалтирь 23:1; Исаия 40:21—23; Усьтӥськон 4:11). Со законъёс пуктӥз, кудъёсызлэсь вань кылдытэмъёс кылзӥськыны кулэ. Озьы ик Иегова мукетъёсызлы но кивалтыны право сётыны быгатэ. Ми Иеговаез яратӥськомы но солэсь кылзӥськиськомы ке, озьы возьматӥськомы, солэн кивалтыны правоеныз соглаш луиськомы шуыса (1 Паралипоменон 29:11).

▸ 11-тӥ люкет, 10-тӥ абзац

Вордӥськымтэ пиналэз юри виён шонертэм луэ. Анайлэн пушказ нылпи кылдэм бере ик Инмар сое адямиен лыдъя ини.

▸ 13-тӥ люкет, 5-тӥ абзац

Со эмъян амал, куке адямилэн мугораз вир лэзё яке вирлэн ньыль валтӥсь компонентъёсыз пӧлысь кудзэ ке одӥгзэ. Адямилэн мугораз лэзьыны быгато яке адямилэсь аслэсьтыз вирзэ, яке мукет адямилэсь вирзэ. Вирлэн валтӥсь компонентъёсыз: плазма, эритроцитъёс, лейкоцитъёс но тромбоцитъёс.

▸ 13-тӥ люкет, 13-тӥ абзац

Библия верамъя, визьман-нодъян но кыл кутытон со пӧртэм. Визьман-нодъян пӧлы пыре дышетон, визьман но тупатон. Куке Иегова кинэ ке визьма-нодъя, со ассэ ноку но лек уг возьы (Мадёнъёс 4:1, 2). Со анай-атайёслы умой пример возьматэ, кызьы нылпиоссэс визьмано-нодъяно. Инмарлэн визьмамез-нодъямез котьку пайда гинэ вае, соин ик ми визьмамез-нодъямез яратыны но быгатӥськомы (Мадёнъёс 12:1). Иегова яратэ аслэсьтыз калыксэ но дышетэ сое. Визь-кенешъёс сётыса, со тупатэ аслаз ужась-тыршисьёсызлэсь шонертэм малпанъёссэс но дышетэ соосты шонер улыны. Кызьы анай-атайёс асьсэлэсь нылпиоссэс визьманы-нодъяны быгато? Нырысь нылпиослы юрттоно валаны, малы туж кулэ кылзӥськыны. Со сяна, анай-атайёс нылпиоссэс дышетыны кулэ яратыны Иеговаез но солэсь Кылзэ, Библиез. Озьы ик соос дышетыны кулэ нылпиоссэс Библиысь возетъёсты валаны.

▸ 14-тӥ люкет, 13-тӥ абзац

Периос — со духовной кылдытэмъёс, кудъёссэ синмын адӟыны уг луы. Со туж кужмо но лек кылчинъёс. Соос Инмарлэсь ӧз кылзӥське но солэн тушмонъёсыз луизы (Улон-вылон 6:2; Иуда 6). Периос Шайтанлэн пумит ӝутсконаз итӥськизы (Кыкетӥ Закон 32:17; Лука 8:30; Апостолъёслэн ужъёссы 16:16; Иаков 2:19).

▸ 16-тӥ люкет, 4-тӥ абзац