1, 2. Кыӵе югдур кылдэмын вал Иерусалимын еврейёс пӧлын, куке Захария сизьыметӥ адӟонзэ адӟиз?

 СИЗЬЫМЕТӤ адӟонзэ адӟемез бере Захариялы тросэз сярысь малпаськоно вал. Иегова возьматӥз, пӧяськись адямиосты одно ик кыл кутытоз шуыса. Иеговалэн кылъёсыз Захарияез юнматӥзы ке но, номыр ӧз воштӥськы. Израиль калык азьло сямен ик пӧяськыса но лек ужъёс лэсьтыса улӥз. Иеговалэсь Иерусалимысь храмзэ пуктыса быдтытозь, туж кема на вал. Малы еврейёс сокем ӝог вунэтӥзы сое, мае Инмар соосты лэсьтыны косӥз вал? Соос асьсэлы умой улон лэсьтон вылысь ас музъемазы берытскизы шат?

² Захария тодэ вал, Иерусалиме улыны лыктэм пиосмуртъёслэн но кышномуртъёслэн осконзы юн вал шуыса. Вавилонын соослэн коркаоссы но ужзы вал, отын соос кышкатэк улӥзы. Но Инмарлэн духез мылкыдзэс ӝутӥз ваньзэ сое кельтыны (Езд. 1:2, 3, 5). Соос кельтӥзы шаерез, кудӥз соослы асьсэлэн кадь потэ вал ини, но  кошкизы музъеме, кудзэ соос пӧлысь тросэз ноку но ӧз адӟе. Еврейёс гурезё но секыт сюрестӥ ог 1 600 иськем ортчизы. Иеговалэсь храмзэ пуктонэз туж кулэ луись ужен ӧй лыдъясалзы ке, соос сокем секыт сюрес вылэ ӧй потысалзы.

3, 4. Кыӵе шуг-секытъёсын пумиськизы пленысь берытскем еврейёс?

³ Пуктэ син азяды израиль калыклэсь Вавилонысь Иерусалиме мынэмзэс. Израиль пиослэн сюрес вылын трос дырзы вал малпаськыны но вераськыны выль улон интызы сярысь. Нош арлыдоослэн, кудъёсыз ас синмынызы адӟизы, макем бадӟым но чебер вал Иерусалим но храм, трос дырзы вал вераны со сярысь (Езд. 3:12). Тырше асьтэды пуктыны со еврейёс интые. Мар тӥ шӧдысалды, кыдёкын азьпалады Иерусалим адӟиськысал ке? Тӥляд сюлэмды вӧсь луысал, дыр, куашкам карез но отын будӥсь ӝужыт турынэз адӟыса. Тӥ умой тодӥськоды на Вавилонлэсь кык полэс ӝужыт борддоръёссэ. Нош кыӵе шӧдонъёсты кылдо табере, Иерусалимлэсь куашкатэм борддоръёссэ адӟыса, кудъёсаз капкаос но возьмаськон башняос интые бадӟым пасьёс кылемын? Но ваньмыз со Израиль калыклэсь мылкыдзэ ӧз куашкаты, малы ке шуоно кузь сюрес вылазы Иегова соослы юрттӥз но утиз соосты. Иерусалиме лыктыса, соос нырысь ик храмлэн интыяз курбон сётон ӝӧк пуктӥзы, котькуд нунал курбонъёс сётон понна (Езд. 3:1, 2). Соос дась вал уж борды басьтӥськыны, но шӧдске вал, соослы номыр люкетыны уз быгаты шуыса.

⁴ Израиль калыклы храмез выльысь ӝутэм сяна, каръёсты но выльысь пуктоно на вал. Соослы коркаос лэсьтоно, бусыосазы ужано но семьязэс сюдоно вал (Езд. 2:70). Ужзы соослэн туж трос вал. Ӝоген соослы люкетыны кутскизы тушмонъёссы. Соос 15 ар ӵоже еврейёслэсь ужзэс дугдытыны тыршизы. Нырысь еврейёслэн мылкыдзы юн вал ке но, дыр ортчемъя соослэн киоссы лэзиськизы (Езд. 4:1—4). А. э. азьло 522-тӥ арын Персиялэн эксэез Иерусалимез выльысь ӝутон ужез дугдытыны косӥз. Со еврейёслы бадӟым шуг-секыт кылдытӥз. Нокин уг тоды вал, мар луоз азьланяз (Езд. 4:21—24).

5. Кызьы Иегова аслэсьтыз калыксэ юнматӥз?

⁵ Иегова тодэ вал, калыксэ юнматыны но солэсь мылкыдзэ ӝутыны кулэ шуыса. Аслэсьтыз яратэмзэ возьматон понна, со Захариялы эшшо одӥг адӟон сётӥз на. Таиз адӟон берпуметӥез вал. Иегова возьматӥз: со дунъя ваньзэ, мае еврейёс со понна лэсьтӥзы ини, но, соос выльысь сётэм ужзы борды кутскизы ке, со одно ик утёз соосты. Иегова кылзэ сётӥз, храм выльысь пуктэмын луоз шуыса. Со вераз: «Та луоз, сюлмысь тыршыса, Инмардылэсь Кузё-Инмарлэсь верамзэ кылзӥськыса улӥды ке» (Зах. 6:15).

6. а) Мае нырысь ик адӟе Захария тямысэтӥ адӟоназ? (Учке статья кутсконысь суредэз.) б) Малы ожмаськон уробоосы пӧртэм валъёс кыткемын?

⁶ Захариялэн тямыс адӟонъёсыз пӧлысь тужгес но умой осконэз юнматэ, луоз, берпуметӥез. (Лыдӟы Захариялэсь 6:1—3.) Пуктэ ай син азяды: кык ыргон гурезьёс вискысь ньыль ожмаськон уробоос пото, кудъёсыз ожмаськонлы дасямын, вылды. Ожмаськон уробоосы кыткем валъёс пӧртэмесь. Солы луыса одӥг ожмаськон уробоез мукетызлэсь  висъяны луэ. Захария юа кылчинлэсь: «Мар со, кузёе?» (Зах. 6:4). Со милемлы но тунсыко, малы ке шуоно со адӟон милемын но герӟаськемын.

7, 8. а) Мае возьмато кык гурезьёс? б) Малы со гурезьёс ыргонлэсь?

⁷ Библиын гурезьёс ӵем дыръя эксэйлыкъёсты, яке кивалтэтъёсты, возьмато. Захариялэн адӟонысьтыз кык гурезьёс тупало со гурезьёслы, кудъёсыз сярысь Данииллэн азьпалзэ ивортоназ верамын. Одӥгез гурезь — со Иеговалэн ноку бырисьтэм кивалтэтэз, кудӥз кивалтэ ваньмыныз, мар вань инмын но музъем вылын. Кыкетӥез гурезь — со Мессия Эксэйлык, кудаз йыр луэ Иисус Христос (Дан. 2:35, 45). Со дырысен, куке 1914-тӥ арын сӥзьыл Иисус эксэй луиз, та кык гурезьёс ӵош нимысьтыз инты басьто Инмарлэн музъем пумысен малпанзэ быдэстоназ.

⁸ Малы со гурезьёс ыргонлэсь? Ыргон, зарни кадь ик, туж дуно металл. Иегова косӥз чилясь ыргонэз скинияез пуктонын уже кутыны, нош берлогес Иерусалимысь храмез пуктонын но (Пот. 27:1—3; 3 Экс. 7:13—16). Соин ик, гурезьёслэн ыргонлэсь луэмзы тодамы вайытэ, Иеговалэн кивалтэтэз но Мессия Эксэйлык, кудъёсыз азьланяз адямиослы кышкатэк но шумпотыса улон ваёзы, ваньмызлэсь умой но вылӥ луо шуыса.

9. Кинэ возьмато ожмаськон уробоос но отын пукисьёс? Кыӵе уж соослы сётэмын?

⁹ Нош кинэ возьмато ожмаськон уробоос но отын пукисьёс? Соос возьмато кылчинъёсты, трос кылчинъёсты, вылды. (Лыдӟы Захариялэсь 6:5—8.) Соос быдэс музъемлэн Кузё-Инмарез дорысь лыкто, но соослы нимысьтыз уж сётэмын. Кыӵе? Котькудӥз вал пӧртэм интыосы лэземын, Иеговалэсь калыксэ утён понна. Тужгес но соослы калыкез утёно «уйпал музъемлэсь», Вавилонлэсь. Иегова уз сёты Вавилонлы аслэсьтыз калыксэ выльысь киултыны. Макем со мылкыдзэс ӝутӥз, вылды, соослэсь, кинъёс Захария улон нуналъёсы храмез выльысь пуктонэ пыриськизы! Соослы тушмонъёслэсь кышкано ӧй вал.

10. Кызьы Захариялэн ожмаськон уробоос сярысь адӟонэз Инмарлэсь ужась-тыршисьёссэ юнматыны быгатоз?

¹⁰ Туннэ но, Захария улон нуналъёсы кадь ик, аслэсьтыз калыксэ юнматон но утён понна, ожгарчиослэн Инмарзы Иегова кылчинъёсты уже кутэ (Мал. 3:6; Евр. 1:7, 14). Со дырысен, куке 1919-тӥ арын Инмарлэн калыкез Быдӟым Вавилонлэн ки улысьтыз мозмытэмын вал, тушмонъёс ялан солы люкетыны тыршо, озьы ке но нокин но, номыр но тодытон ужез дугдытыны уг быгаты (Усьт. 18:4). Милемыз кылчинъёс утё бере, кышкано ӧвӧл, Иеговалэн организациез выльысь зэмос луисьтэм религилэн ки улаз сюроз шуыса (Пс. 33:8). Ми оскиськомы, быдэс дунне вылын Инмарлэн ужась-тыршисьёсыз азьланяз но шумпотыса улозы но Инмарлы ужалозы-тыршозы шуыса. Захариялэн азьпалзэ ивортонэз вылын  малпаськыса, ми валаськомы, кышканы номырлэсь шуыса, малы ке шуоно милемыз «кык гурезьёс» утё.

11. Малы милемлы кышкано ӧвӧл, азьланяз Инмарлэн калыкезлы пумит ӝутскозы шуыса?

¹¹ Ӝоген Шайтан дуннелэн политика удысаз тыршисьёс огазеяськозы, Инмарлэн калыкез вылэ урдскон но сое быдтон вылысь (Иез. 38:2, 10—12; Дан. 11:40, 44, 45; Усьт. 19:19). Иезекиильлэн азьпалзэ ивортоназ верамын, соос милемлы пумит, пилем кадь, музъемез шобыртон вылысь, вожомыса ӝутскозы но вал вылын лыктозы шуыса (Иез. 38:15, 16) a. Милемлы солэсь кышкано-а? Ӧвӧл, малы ке шуоно ми палан инмысь ожгарчиос. Бадӟым куректон дыръя кылчинъёс Иеговалэн калыкез пала пыриськозы но Инмарлэн кивалтэтэзлы пумитъяськисьёсты быдтозы (2 Фес. 1:7, 8). Макем бадӟым шумпотон ваёз со нунал! Нош кин кивалтэ Иеговалэн инмысь ожгарчиосыныз?

12, 13. а) Мар карыны косэ Иегова Захарияез? б) Валэктэ, малы Захариялэн азьпалзэ ивортонысьтыз Пушъет — со Иисус Христос.

¹² Иеговалэсь Захариялы возьматэм тямыс адӟонъёссэ, Захария сяна, нокин ӧз адӟы ни. Табере Захария лэсьтэ сое, мае мукетъёсыз адӟозы но мар мылкыдзэс ӝутыны быгатоз израиль  пиослэсь, кудъёсыз Иеговалэсь храмзэ ӝуто. (Лыдӟы Захариялэсь 6:9—12.) Иегова Захарияез косэ вавилон пленысь алигес берытскем Хелдайлэсь, Товиялэсь но Иедайлэсь азвесьсэс но зарнизэс басьтыны но «венец изьы» лэсьтыны (Зах. 6:11). Кинлэн йыраз Захариялы пононо вал со венец изьыез? Зоровавель кивалтӥсьлэн йыраз-а, кудӥз Иуда выжыысь Давидлэн пиез вал? Ӧвӧл. Соос, кинъёс Захария сьӧры учкыса улӥзы, паймизы, луоз, куке адӟизы, венец изьыез со быдӟым священник Иисуслэн, Иоседеклэн пиезлэн, йыраз понӥз шуыса.

¹³ Собере быдӟым священник Иисус эксэй луиз-а? Ӧз. Со Давид эксэйлэн выжыысьтыз ӧй вал, соин ик эксэй луыны уг быгаты вал. Венец изьыез Иисуслэн йыраз понон со азьпалзэ ивортон вал, кудӥз возьматӥз, азьланяз луоз шуыса со, кин пырак дауръёс ӵожелы эксэй но священник луоз. Иегова сое «Пушъет» шуыса нимаз. Библия валамон вера, Пушъет — со Иисус Христос шуыса (Ис. 11:1; Матф. 2:23 b).

14. Мар каре Иисус, Эксэй но Быдӟым священник луыса?

¹⁴ Иисус Христос огдыре Эксэй но, Быдӟым священник но луэ. Со Иеговалэн инмысь ожгарчиосыныз кивалтэ бере, лэсьтэ ваньзэ, Инмарлэн ужась-тыршисьёсыз, кудъёсыз тушмонъяськыса улӥсь дуннеын уло, кышкатэк мед улозы шуыса (Иер. 23:5, 6). Ӝоген Христос Инмарлэн кивалтэтэзлы пумитъяськисьёсты вормоз но Иеговалэсь калыксэ утёз (Усьт. 17:12—14; 19:11, 14, 15). Но нырысь Пушъетлы туж кулэ луись ужез быдэстоно на.

15, 16. а) Кызьы асьме нуналъёсы выльысь христиан кенеш кылдӥз? Кин сое кылдытӥз но чылкытатӥз? б) Кыӵе улон луоз музъем вылын Иисус Христос сюрс ар ӵоже кивалтэм бере?

¹⁵ Инмар Иисус Христосэз Эксэй но быдӟым священник гинэ ӧз кары, со сое «Кузё-Инмарлэсь храмзэ» пуктыны косӥз на. (Лыдӟы Захариялэсь 6:13.) Кызьы Иисус асьме нуналъёсы со ужез быдэстӥз? 1919-тӥ арын со Иеговалэсь зэмос ужась-тыршисьёссэ Быдӟым Вавилонлэн ки улысьтыз мозмытӥз но христиан кенешез выльысь кылдытӥз. Со озьы ик «оскиськымон, визьмо ляльчиез» пуктӥз, кудӥз музъем вылын чылкыт йыбырттонэн кивалтэ (Матф. 24:45). Со сяна, Иисус туж тыршыса  ужа, Инмарлэсь калыксэ сузян-чылкытатон понна но солы Иеговалы ярамон амалэн ужаны-тыршыны юрттон понна (Мал. 3:1—3).

¹⁶ Иисус Христос но солэн 144 000 ӵош кивалтӥсьёсыз, кудъёсыз озьы ик священникъёс но луозы, сюрс ар ӵоже кивалтозы. Со вакытэ соос Инмарлы оскымон адямиослы тырбыдэс луыны юрттозы. Со бере рай музъем вылын Инмарлэн зэмос ужась-тыршисьёсыз гинэ улозы. Соку вань адямиос зэмос Инмарлы гинэ йыбыртъялозы!

17. Мар карыны Иегова кылзэ сётӥз но кызьы солэн кылъёсыз еврейёс вылын шӧдӥськизы?

¹⁷ Кызьы Захариялэн иворез со улон нуналъёсы еврейёс вылын шӧдӥськиз? Иегова кылзэ сётӥз, со соослы юрттоз но соосты утёз шуыса. Со оскытӥз соосты, храм пуктэмын луоз шуыса. Озьы соослэн осконзы выльысь будӥз, луоз. Но быгатоз-а сокем ӧжыт калык собыдӟа ужез быдэстыны? Со, мае Захария азьланяз гожтэ, оскытэ, быгатоз шуыса. Иегова верамъя, Хелдай, Товия но Иедай сяна, лэсьтӥськон уже трос мукет адямиос но пыриськозы. (Лыдӟы Захариялэсь 6:15.) Табере еврей калык оске вал, Инмар солы юрттоз шуыса, соин соку ик уж борды басьтӥськиз. Лэсьтӥськон уж лэземын ӧй вал ке но, соос ужзэс азьланьтӥзы. Ӝоген Иегова соослэн сюрес вылысьтызы люкетӥсь «бадӟым гурезез» палэнтӥз: лэсьтӥськон ужез азьланьтыны лэзизы но а. э. азьло 515-тӥ арын храм выльысь ӝутэмын вал (Езд. 6:22; Зах. 4:6, 7). Нош Иеговалэн кылъёсыз тросгес герӟаськемын милям улон вакытэнымы.

18. Кызьы асьме нуналъёсы Захариялэн книгаысьтыз 6:15 кылъёс быдэсмо?

¹⁸ Асьме дыръёсы зэмос Инмарлы трос миллион адямиос ужало-тыршо. Чылкыт йыбырттонэз азинтонын юрттӥськон понна, соос вань сюлмысьтызы сёто ваньзэ дунозэ, марзы соослэн вань: дырзэс, кужымзэс но ваньбурзэс (Мад. 3:9). Мар юрттоз милемлы оскыны, Иегова тыршеммес туж дунъя шуыса? Тодамы ваёмы, Хелдай, Товия но Иедай зарни но азвесь вайизы шуыса, кудъёсызлэсь Захария венец изьы лэсьтӥз. Со венец изьы ялан тодазы вайытыны кулэ вал со сярысь, мар каризы соос, зэмос Инмарлы йыбырттонэз азинтонын юрттӥськон понна (Зах. 6:14). Озьы ик Иегова но ноку уз вунэты милесьтым тыршеммес но сое яратэммес (Евр. 6:10).

19. Кызьы Захариялэн адӟонъёсыз ми вылын шӧдӥськыны кулэ?

¹⁹ Та берпум нуналъёсы Иеговалэн калыкез троссэ лэсьтӥз ини. Со возьматэ, милемын Христос кивалтэ шуыса, нош Иегова — бакель каре. Ми пыриськомы со организация пӧлы, кудӥз оскымон луэ но ноку уз быры. Иегова одно ик быдэстоз чылкыт йыбырттон пумысен малпанзэ. Дунъялэ, тӥ Инмарлэн калыкез пӧлын луыны быгатӥськоды шуыса, но котьку Иеговалэсь кылзӥське. Соку тӥ Эксэймылэн но Быдӟым священникмылэн, нош озьы ик кылчинъёслэн, бурд улазы луоды. Лэсьтэ ваньзэ, мае быгатӥськоды, Иеговалы йыбырттонэз азинтонын юрттӥськон понна. Озьы улӥды ке, оскыны быгатоды, ожгарчиослэн Инмарзы Иегова тӥледыз утёз шуыса али, та лек дунне бырытозь, но азьланяз, пырак дауръёс ӵоже.