1, 2. Мае ӵем адӟыны луэ пылатӥськон дыръя но мар сярысь малпаськоно?

 ПУКТЭ син азяды: тӥ учкиськоды, кызьы пылатӥськон ортче. Тӥ кылӥськоды, кызьы пылатӥськыны мылкыд карисьёс юн осконэн кык юанъёслы валэктонъёс сёто. Тӥ адӟиськоды соослэсь эшъёссэс но матысьёссэс, кудъёсыз соосын туж данъясько. Нош куке выль агайёс но сузэръёс вуысь пото, тӥ мукетъёсызлэсь чабемзэс но шумпотэмзэс адӟиськоды. Котькуд арняе кӧня ке сюрс адямиос асьсэлэсь улонзэс Иеговалы сӥзё но пылатӥсько.

² Нош мар вераны луоз тӥ сярысь? Тӥ пылатӥськыны малпаськоды ке, тӥ туж висъяськиськоды та лек дуннелэсь, малы ке шуоно тӥ Иеговаез утчаськоды (Пс. 13:1, 2). Кӧня гинэ арес тӥледлы медам луы, та статья тӥледлы гожтэмын. Соослэн но, кинъёс пылатӥськизы ини, мылкыдзэс юнматэмзы потэ пырак дауръёс ӵоже Иеговалы ужаны-тыршыны. Соин ик ойдолэ ваньмы эскеромы куинь мугъёсты, малы милям Иеговалы ужаммы-тыршеммы потэ.

3. Малы Иеговалэн ужась-тыршисьёсыз зэмлыкез но шонерлыкез ярато? (Псалтирь 118:128, 163).

³ Иегова ужась-тыршисьёссэ косӥз: «Зэмлыкез... яратэ» (Зах. 8:19). Иисус дышетскисьёсызлэсь мылкыдзэс ӝутӥз шонерлыкез утчаны (Матф. 5:6). Озьыен, милям юн мылкыдмы луыны кулэ лэсьтыны сое, мар Инмарлэн син азяз шонер луэ. Яратӥськоды-а тӥ зэмлыкез но шонерлыкез? Ми оскиськомы, яратӥськоды шуыса. Тӥ адӟемпотостэм кариськоды пӧяськонэз но лек ужъёсты. (Лыдӟе Псалтирез 118:128, 163.) Соос, кинъёс пӧяськонэз ярато,  адӟем каро Шайтанлэсь — та дуннелэн эксэезлэсь (Иоанн 8:44; 12:31). Солэн одӥгез ужпумез — Инмарлэсь святой нимзэ саптаны. Едем садын Шайтан Инмармы сярысь пӧяськыса вераны кутскиз. Солэн верамезъя, Иегова — ассэ гинэ яратӥсь но пӧяськись кивалтӥсь, кудӥз адямиослэсь мае ке умойзэ ватыса возе (Ул.-выл. 3:1, 4, 5). Иегова сярысь Шайтанлэн пӧяськонэз али но адямиосты Инмар дорысь палэнтэ. Куке адямиос та пӧяськонэз кылзо, Шайтан соослэсь мылкыдзэс ӝутэ лек ужъёс лэсьтыны (Рим. 1:25—31).

4. Кызьы Иегова возьматӥз, со «зэмлыклэн Инмарез» шуыса? (Озьы ик учке суредэз.)

⁴ Иегова — «зэмлыклэн Инмарез». Ужась-тыршисьёсызлэсь со зэмлыкез уг ваты (Пс. 30:6). Озьы Инмар уте соосты пӧяськонлэсь, кудзэ вӧлмытэ Шайтан. Со сяна, Иегова аслэсьтыз калыксэ дышетэ пӧяськытэк но шонерлыко улыны. Соин ик соос асьсэды гажало но каньыл сюлмын уло (Мад. 13:5, 6). Библиез дышетыкуды, тӥ но адӟиды, дыр, кызьы Иегова тӥледлы юрттӥз Шайтанлэсь пӧяськемзэ валаны но каньыл сюлмын улыны. Тӥ тодӥды: Иеговалэн законъёсыз но возетъёсыз самой бадӟым пайда ваё вань адямиослы но, тӥледлы но (Пс. 76:14). Соин ик тӥляд мылкыдды кылдӥз Иеговалэн шонерлыко курон-косонъёсызъя улыны (Матф. 6:33). Тӥляд мукет адямиослы но верамды потӥз Иегова Инмар сярысь зэмлыкез. Ойдолэ учкомы, кызьы сое лэсьтыны луэ.

5. Кызьы тӥ зэмлык но шонерлык пала кариськыны быгатӥськоды?

⁵ Тӥ ас улонэныды вераны быгатӥськоды: «Мон Шайтанлэсь пӧяськемзэ палэнтӥсько но зэмлыкъя улӥсько. Мынам потэ, Иегова мынам Кивалтӥсе мед луоз шуыса. Озьы ик мынам лэсьтэме потэ сое гинэ, мар шонер луэ солэн син азяз». Кызьы таӵе быръён лэсьтоно? Нырысь Иеговалы сӥзиськоно, яке нимысьтыз вӧсяськонын кылдэ сётоно пырак дауръёс ӵоже солы ужаны-тыршыны. Нош собере пылатӥськоно. Зэмлыкез но шонерлыкез яратонлэн бадӟым кужымез вань, кудӥз тӥлесьтыд мылкыддэс ӝутыны быгатэ пылатӥськыны.

6. Псалтирьын 44:5 верамъя, малы Иисус Христосэз яратоно?

⁶ Малы тӥ Иисус Христосэз яратӥськоды?  Куд-ог мугъёс гожтэмын Псалтирьын 44:5 (лыдӟе). Иисус «зэмлыкез, зӥбытлыкез, шонерлыкез» яратэ. Тӥ зэмлыкез но шонерлыкез яратӥськоды ке, соку валамон, тӥ Иисус Христосэз но яратӥськоды шуыса. Малпаське, кызьы Иисус зэмлыкез но шонерлыкез кышкатэк утьылӥз (Иоанн 18:37). Со сяна, Иисус дышетэ милемыз зӥбыт-востэмесь луыны. Кызьы?

7. Малы тӥледлы Иисуслэн зӥбыт-востэм луэмез кельше?

⁷ Иисус милемлы адӟем карон возьматэ. Со зӥбыт-востэмен аслэсьтыз Атайзэ данъя, нош ассэ — уг (Марк 10:17, 18; Иоанн 5:19). Мар тӥ малпаськоды таӵе зӥбыт-востэм сям сярысь? Та сям тӥлесьтыд мылкыддэс ӝутэ Инмарлэсь Пизэ яратыны но со сьӧры мыныны. Нош малы Иисус зӥбыт-востэм? Малы ке шуоно со яратэ зӥбыт-востэм Атайзэ но быдэсак солэсь адӟем каре (Пс. 17:36; Евр. 1:3). Тае тодыса, потэ-а тӥляд Иисус кадь луэмды?

8. Малы ми Иисус Эксэймес яратӥськомы?

⁸ Ми яратӥськомы Иисус Эксэймес, малы ке шуоно со туж умой Кивалтӥсь. Ачиз Иегова сое дышетӥз но солы кивалтон уж сётӥз (Ис. 50:4, 5). Малпаське, кызьы Иисус, ассэ жалятэк, мукетъёсызлы яратонзэ возьматӥз (Иоанн 13:1). Иисус тӥляд Эксэйды луэ бере, тӥ сое яратыны кулэ. Иисус валэктӥз: соос, кинъёс сое зэмзэ ик ярато, солэсь кылзӥськыса, яратонзэс уж вылын возьмато. Иисус соосты аслаз эшъёсыныз нима (Иоанн 14:15; 15:14, 15). Макем бадӟым дан Иеговалэн Пиеныз эшъяськыны!

9. Маин огкадь луо Иисуслэн но дышетскисьёсызлэн пылатӥськонъёссы?

⁹ Иисус дышетскисьёссэ пылатӥськыны косӥз (Матф. 28:19, 20). Со ачиз адӟем карон возьматӥз. Солэн пылатӥськонэз дышетскисьёсызлэн пылатӥськонзылэсь пӧртэм луэ. (Учке « Маин пӧртэм луо Иисуслэн но дышетскисьёсызлэн пылатӥськонъёссы?» рамкаез.) Но соослэн огкадез но вань. Пылатӥськыкуз Иисус аслэсьтыз улонзэ сӥзиз, Атаезлэсь эриксэ быдэсъян понна (Евр. 10:7). Христослэн дышетскисьёсыз но пылатӥськыкузы ваньмызлы возьмато, пырак дауръёс ӵоже Инмарлы ужаны-тыршыны кылзэс сётӥзы шуыса. Табере соос Иеговалэсь эриксэ быдэсъяны тыршоно, нош асьсэлэсь — уг. Озьы соос Иисуслэсь адӟем каро.

10. Малы тӥ Иисусэз яратӥськоды но мар карыны мылкыддэс ӝутэ та яратон?

¹⁰ Тӥ тодӥськоды: Иисус — Иеговалэн одӥг вордӥськем Пиез но Эксэй, кудзэ Инмар милемын кивалтыны пуктӥз. Тӥ адӟиды, Иисус зӥбыт-востэм но быдэсак Атаезлэсь адӟем каре шуыса. Тӥ тодӥды, со сютэмъёсты сюдылӥз, куректӥсьёсты буйгатылӥз но висисьёсты бурмытъяз шуыса (Матф. 14:14—21). Тӥ адӟиськоды, кызьы со туннэ кенешен кивалтэ (Матф. 23:10). Озьы ик тӥ тодӥськоды: Инмарлэн Эксэйлыказ Эксэй луыса, азьланяз со эшшо но тросгес лэсьтоз. Кызьы тӥ возьматыны быгатӥськоды, Иисусэз яратӥськоды шуыса? Солэсь адӟем карыса (Иоанн 14:21). Со понна тӥледлы улондэс Иеговалы сӥзёно но пылатӥськоно.

11. Кыӵе валтӥсез муг, малы пылатӥськыны кулэ? Валэктэ.

¹¹ Кыӵе валтӥсез муг, малы пылатӥськыны кулэ? Иисуслэн верамезъя, Инмарлэн курон-косонъёсыз пӧлысь самой валтӥсез таиз: «Инмардэ Кузё-Инмарез вань сюлмыныд, вань лулыныд, вань визьмыныд, вань кужмыныд яраты» (Марк 12:30). Та кылъёслэсь  кылзӥськыса, тӥ но Инмарлы яратондэс возьматоды.

12. Малы тӥ Иеговаез яратӥськоды? (Озьы ик учке суредэз.)

¹² Иеговаез яратыны туж трос мугъёс вань. Кылсярысь, тӥ валады, Инмар — «улонлэн ошмесэз» но «котькудӥз ик ӟеч, дун-шектэм кузьым» со бордысь потэ шуыса (Пс. 35:10; Иак. 1:17). Ваньзэ умойзэ, марды тӥляд вань, тӥледлы сётӥз шырыт сямо но яратӥсь Инмар.

13. Малы вераны луоз, дун тырон — со Инмарлэн дуно кузьымез шуыса?

¹³ Иеговалэн одӥгез дуно кузьымез — со дун тырон. Малы озьы вераны луоз? Малпаське, макем юн кусыпъёссы Иеговалэн но Пиезлэн. Иисус вераз: «Монэ Атае... яратэ» но «Мон Атайме яратӥсько» (Иоанн 10:17; 14:31). Трос миллиард аръёс ортчыса, соослэн кусыпъёссы эшшо но юнгес луизы (Мад. 8:22, 23, 30). Нош табере малпаське, макем вӧсь вал Инмарлы, куке Пиез курадӟиз но кулӥз. Но Иегова туж яратэ адямиосты, тӥледыз но. Тӥ но, мукет адямиос но пырак улыны мед быгатозы шуыса, со аслэсьтыз яратоно Пизэ сётӥз (Иоанн 3:16; Гал. 2:20). Та валтӥсез муг Инмарез яратыны.

14. Кыӵе ужпум тужгес но кулэ луисез?

¹⁴ Иеговаен матэгес тодматскыса, тӥ сое эшшо но золгес яратыны кутскиськоды.  Валамон, али но, вуонояз но тӥляд солы матэ кариськемды потэ. Тӥ быгатӥськоды сое лэсьтыны! Инмар яратыса ӧте тӥледыз сюлэмзэ шумпоттыны (Мад. 23:15, 16). Тӥ тае лэсьтыны быгатӥськоды кылъёсыныды но, ужъёсыныды но. Асьтэлэн улонэныды тӥ возьматоды, Иеговаез зэмзэ ик яратӥськоды шуыса (1 Иоанн 5:3). Инмарез шумпоттыны — со тужгес но кулэ луись ужпум!

15. Кызьы тӥ Иеговалы яратэмдэс возьматыны быгатӥськоды?

¹⁵ Кызьы тӥ Иеговалы яратэмдэс возьматыны быгатӥськоды? Нырысетӥез, нимысьтыз вӧсяськонын солы вералэ, асьтэлэсь улондэс солы сӥзиськоды шуыса (Пс. 39:9). Кыкетӥез, пылатӥське. Озьы тӥ вань адямиослы возьматоды, улондэс Иеговалы сӥзиды шуыса. Кызьы ми эскеримы ини, та улонады бадӟым вамыш луоз но трос шумпотон ваёз. Со дырысен тӥ Иегова понна улоды, нош асьтэ понна — уд (1 Пётр 4:1, 2; Рим. 14:8). Зэм но, та туж кулэ луись ужпум. Солы луыса тӥляд самой умой улонды луоз. Малы тазьы вераны луэ?

16. Псалтирьын 40:13 верамъя, кызьы Иегова бакель кароз соосты, кинъёс асьсэлэсь улонзэс солы сӥзизы?

¹⁶ Иегова — туж шырыт сямо Инмар. Кӧня гинэ тӥ солы медад сётэ, со котьку эшшо но тросгес берыктоз (Марк 10:29, 30). Али ик ини, та бырись дуннеын, со кузьмалоз тӥледлы шудо но тунсыко улон. Но та кутсконэз гинэ. Пылатӥськемды бере кутскоз ноку бырисьтэм улонды. Тӥ быгатоды пырак дауръёс ӵоже яратоно Атайдылы ужаны. Тӥляд кусыпъёсты эшшо но юнгес луозы. Тӥ со кадь ик пырак улоды. (Лыдӟе Псалтирез 40:13.)

17. Луэ-а Иеговалы сётыны сое, маиз солэн ӧвӧл? Валэктэ.

¹⁷ Пылатӥськемез бере адями инмысь Атаезлы мае ке туж дунозэ сётыны быгатэ. Ваньмыз умоез, мармы милям вань, котькуд шумпотон дыръёс, кудъёссэ ми тодамы вайыны быгатӥськомы,— Инмарлэсь. Ваньмыз та понна инлэн но музъемлэн Кузёезлы ми сётыны быгатӥськомы сое, маиз солэн ӧвӧл — вань сюлмысьтымы ужан-тыршонмес (Иов 1:8; 41:3; Мад. 27:11). Та  самой умой улон! Зэм но, Иеговаез яратон — пылатӥськон понна самой кулэ луись муг.

18. Мар сярысь малпаськыны кулэ?

¹⁸ Нош табере мар тӥ верасалды: «Дась-а мон пылатӥськыны?» Тӥ интые та юанлы валэктон нокин но уз сёты. Валэктон сётыны капчигес мед луоз шуыса, юалэ асьтэлэсь: «Мар мыным люкетэ пылатӥськыны?» (Ап. уж. 8:36). Тодады вае куинь мугъёсты, малы пылатӥськыны кулэ. Нырысетӥез: тӥ зэмлыкез но шонерлыкез яратӥськоды. Малпаське: «Потэ-а мынам адӟеме нуналэз, куке нокин уз пӧяськы но ваньзы шонер улозы?» Кыкетӥез: тӥ Иисус Христосэз яратӥськоды. Малпаське: «Потэ-а мынам, Инмарлэн Пиез мынам Эксэе мед луоз шуыса? Потэ-а мынам солэсь адӟем кареме?» Куинетӥез, самой валтӥсез: тӥ Иеговаез яратӥськоды. Малпаське: «Потэ-а мынам Иеговаез шумпоттэме, солы ужаса-тыршыса?» Та юанъёслы «потэ» шуиды ке, соку кулэ-а пылатӥськондэс берлолы кельтыны? (Ап. уж. 16:33).

19. Малы пылатӥськонэз берлолы кельтоно ӧвӧл? Вералэ пример (Иоанн 4:34).

¹⁹ Тӥ пылатӥськыны уд ке дӥсьтӥське, учке, кыӵе ӵошатон сярысь вераз Иисус. (Лыдӟе Иоаннлэсь 4:34.) Атаезлэсь эриксэ быдэсъянэз Иисус ӵошатӥз сиёнэн. Малы? Малы ке шуоно сиён милемлы пайда вае. Иисус тодӥз, Иеговалэн вань курон-косонъёсыз но милемлы пайда гинэ ваё шуыса. Нош куре-а Иегова тӥледыз пылатӥськыны? Зэм, куре (Ап. уж. 2:38). Озьыен, пылатӥськон тӥледлы пайда ваёз. Кылсярысь, тӥ шумпотоды, дыр, усто пӧраськисьлэсь ческыт сиёнзэ сиыны. Ӵапак озьы ик пылатӥськон но тӥледлы шумпотон ваёз.

20. Мае ми эскеромы вуоно статьяын?

²⁰ Малы куд-огъёсыз пылатӥськыны уг дырто? Кин ке но вералоз: «Мон дась ӧвӧл на». Зэм но, улондэ Иеговалы сӥзьыны но пылатӥськыны — со самой кулэ луись ужпум. Та сярысь умой-умой малпаськоно. Пылатӥськонлы дасяськон понна, дыр но кужым кулэ. Тӥляд пылатӥськыны юн мылкыдды вань ке, кызьы дасяськыны луоз? Валэктон ми шедьтомы вуоно статьяысь.