Маин ваньмыз йылпумъяськиз, тӥ тододы берлогес. Нош али вераме потэ, кызьы мон вань дырме сётыса ужаны-тыршыны кутски.

Мон вордӥськи 1942-тӥ арын Кариб зарезьысь Кюрасао шормуӵын. Мынам атае Суринамын вордӥськиз. Кюрасао шормуӵе со лыктӥз коньдон поттыны. Со Иеговалэн пылатӥськем Адӟись-Ивортӥсез луиз мынам вордӥськемелэсь кык арлы азьлогес. Атае сяна, Кюрасао шормуӵын пылатӥськем ивортӥсьёс ӧй вал на a. Котькуд арняе атаймы люказ милемыз, вить нылпиоссэ, Библиез ӵош дышетыны, милям котьку ик уг поты вал ке но. 14 арес дыръям атае быдэс семьязэ Суринаме вайиз, арлыдо анаез сярысь сюлмаськон понна.

Суринамын мон эшъяськыны кутски егит агайёсын но сузэръёсын, кудъёсыз ӟырдыт мылкыдын Иеговалы ужазы-тыршизы. Соос мынэсьтым ӧжыт бадӟымгес вал но пионеръёс луыса ужазы-тыршизы. Соос шумпотыса вераллязы ужан-тыршонысьтызы учыръёссэс. Кенешлэн пумиськонэз бере, куддыръя кизилиё инбам улын пукыса, ми эшъёсынымы вераськимы со сярысь, кызьы Библия пӧртэм юанъёслы валэктонъёс сётэ. Та эшъёсы мыным валаны юрттӥзы, кыӵе ужпумъёс мынам улонам пуктэме потэ — мынам потэ вал Иегова понна трос лэсьтэме. Соин ик 16 арес дыръям мон пылатӥськи, нош 18 арес дыръям пионер луи.

Пионер луыса ужакум-тыршыкум, мон тросэзлы дышетски. Та юрттӥз мыным азьланяз но, вань дырме сётыса ужан-тыршонэ ӵоже. Кылсярысь, мон соку ик валай, макем кулэ мукетъёсты дышетыны. Куке мон пионер луи, мыным юрттыны кутскиз Виллем ван Сейел нимо  миссионер b. Со дышетӥз монэ кенешысь пӧртэм ужъёсты быдэсъяны. Соку мон ӧй но малпа, ӝоген та мыным кулэ луоз шуыса. Вуоно араз мон нимысьтыз пионер луи но юрттыны кутски пичи группаосысь агайёслы но сузэръёслы, кудъёсыз тропической нюлэсъёсын улӥзы. Мон туж тау карисько, агайёс монэ дырыз дыръя дышетӥзы шуыса! Со дырысен мон но, соослэсь адӟем карыса, мукетъёсты дышетыны тыршисько.

Со сяна, мон дышетски огшоры улыны но ваньзэ радъяны. Котькуд толэзьлэн кутсконаз ми агаен, кудӥныз ӵош пионеръёс луыса ужамы-тыршимы, малпамы, мар милемлы кулэ луоз вуоно арняосы. Собере кудмы ке но мынӥськомы вал кыдёкысь шоркаре но ваньзэ кулэзэ басьтӥськомы вал. Милемлы ӝикыт улоно вал, ваньмыз толэзь пумозь мед тырмоз шуыса. Кылсярысь, милям кеньырмы яке майталмы бырысал ке, джунглиын сое нокытысь ӧд шедьтысалыд ини. Егит дыръям ик мон дышетски огшоры улыны но ваньзэ азьло ик радъяны. Та юрттӥз мыным быдэс улонэ ӵоже Иеговалы трос ужаны-тыршыны.

Озьы ик мон валай: умойгес, куке адямиосты анай кылынызы дышетӥськод. Пичи дырысеным ик мон вераськисько нидерланд, англи, папьяменто кылъёсын, озьы ик сранан-тонго кылын, кудӥз Суринамын туж вӧлмемын. Но мон валай: джунглиын адямиос ӟеч иворез умойгес кылзо, куке сое асьсэ кылынызы кыло. Куд-ог кылъёсты дышетыны мыным секытгес вал. Кылсярысь, сарамаккан кылэз, кудаз куараез векчи но зӧк карыса верасько. Но со трос пайда вайиз! Малы ке шуоно, Суринамын вӧлмем кылъёсты тодыса, мон тросгес адямиосты зэмлыклы дышетыны быгатӥ.

Тумошо учыръёс но вал. Тодӥсько на, кызьы сарамаккан кылын вераськись одӥг кышномуртлэн, кудӥныз ми Библиез дышетӥмы, кӧтыз висьыны кутскиз. Мынам тодэме потӥз, кызьы со ассэ шӧдэ. Нош со интые мон юаськем, со пияно ӧвӧл-а шуыса! Валамон, солы туж возьыт луиз. Но таӵе учыръёс шоры учкытэк, мон котьку тырши адямиосын анай кылынызы вераськыны.

1970-тӥ арын мон ёросэз чаклась луи. Со арын мон трос ветлӥ пичи группаосы, кудъёсыз джунглиын вал, но «Иеговалэн Адӟись-Ивортӥсьёсызлэн дунневыл валтӥсь кивалтонниязы ветлон» темая слайдъёсты возьматъяй. Кулэ интые ми агайёсын мынӥськомы вал пулэсь лэсьтэм кузь пыжъёсын. Отчы ми понӥськомы вал генераторез, бензинэн канистраез, керосиновой лампаосты но слайдъёсты возьматон понна тӥрлыкъёсты. Ярдуре вуыса, ваньзэ тае нюлэс пыр ми кулэ интые нуиськомы вал. Шуг-секытъёс тырмыт вал ке но, мынам тодам кылиз, кызьы джунглиын улӥсь адямиос та пумиськонъёсты дунъязы. Мон туж шумпотӥ юрттыны соослы Иегова сярысь но музъем вылысь организациез сярысь тодыны. Уже капчи ӧй вал ке но, мон  шумпотӥ адӟыны, кызьы адямиос Иеговаен кусыпъёссэс юнмато.

Мон валасько вал, кышнояськытэк улыса, ужан-тыршонын трос лэсьтыны луэ шуыса. Озьы ке но мынам кышно шедьтэме потэ вал. Соин ик мон вӧсяськыны кутски кышно сярысь, кудӥз джунглиын вань дырзэ сётыса ужаны-тыршыны ӧй кышкасал. Ог ар ортчыса, мон пумиськылыны кутски Этел сузэрен, кудӥз, ассэ жалятэк, нимысьтыз пионер луыса ужаз. Егит дырысеныз ик со тыршиз апостол Павеллэсь адӟем карыны но, мон кадь ик, вань сюлмысьтыз ужаны-тыршыны. 1971-тӥ арын, куарусёнэ, ми кузпалъяськимы но, Этел мыным юрттыны кутскиз ёросэз чаклась луыса ужаны-тыршыны.

Этел огшоры семьяын будӥз, соин ик шуг-секытъёслэсь со ӧз кышка. Кылсярысь, джунглиысь кыӵе ке кенеше мыныкумы, ми трос арбериосты сьӧрамы ӧм басьтылэ. Мисьтӥськимы но мисьтаськимы ми шуръёсын, нош сиимы ваньзэ, маин милемыз куноязы: игуанаосты, пираньяосты но ваньзэ, мае нюлэскысь но шурысь кутыны луэ вал. Тэркыос ӧй вал ке, ми сиськиськомы вал бананлэн куаръёсысьтыз, нош пуньыосмы ӧй вал ке, сиськиськомы вал киын. Асьмеды жалятэк Иеговалы ужаса-тыршыса, ми кышноеным шӧдӥськомы вал, «куинь полэс пӧлэстэм сӥньыс» кадь луиськомы шуыса (Екк. 4:12). Сыӵе улон милемлы туж кельше вал!

Огпол, куке ми джунглиысь агайёс но сузэръёс дорысь берытскиськомы вал, милемын луиз учыр, кудӥз сярысь мон кутсконаз верай ини. Шурлэн изо интыяз пыжмы вуэ зымиз, но соку ик берен потӥз. Ми спасательной жилетъёсын вал бере, вуэ ӧм усе. Но пыжамы трос ву пыриз. Соин ик ми пуртыосысьтымы вань сиёнмес куштӥмы но пыжысь вуэз омыръяны кутскимы.

 Сиёнтэк кылимы бере, ми чорыганы кутскимы, но номыре ӧм кутэ. Ми Иеговалы вӧсяськимы но солэсь та нуналлы сиён куримы. «Аминь» шуэммы бере ик одӥг агай визнанзэ чӧлтӥз но бадӟым чорыг кутӥз. Сое сиыса, ваньмылэн милям — куинь пиосмуртъёслэн но кык кышномуртъёслэн — кӧтъёсмы тыризы.

Вить ар ӵоже ёросэз чаклась луыса ужаме-тыршеме бере ми кышноеным тодӥмы, атай но анай луомы шуыса. Мон шумпотӥ ке но, мон ӧй тоды, кызьы со улонмес воштоз. Милям потэ вал азьланяз но вань дырмес сётыса ужаммы-тыршеммы. 1976-тӥ арын вордӥськиз нырысетӥез пимы Этниел, нош кык но ӝыны ар ортчыса — кыкетӥез пимы Гьофанни.

Со дыре Суринамын ёросэз чакласьёс уг тырмо вал. Мыным пиосмес но будэтоно вал ке но, филиал лэзиз мыным ёросэз чаклась луыса ужаны-тыршыны. Куке нылпиосмы пичиесь вал на, мыным сётӥзы сыӵе ёросъёсты, кудъёсаз кенешъёс трос ӧй вал. Соин ик мон быгатӥ толэзяз кык арня ӵоже ёросэз чаклась луыса ужаны-тыршыны, нош кылем дыре — аслам кенешам пионер луыса ужаны-тыршыны. Куке мон ветлӥ кенешъёсы, кудъёсыз улон интымылэсь кыдёкын ӧй вал, Этел но пиосмы монэн ӵош ветлӥзы. Нош куке мыноно вал тропической нюлэсъёсысь кенешъёсы но конгрессъёсы, мон огнам ветлылӥ.

Вань ужъёсме быдэсъян понна, мыным ваньзэ умой-умой малпано вал. Мон тырши, семьяен йыбырттонмы котькуд арняе мед ортчытӥськоз шуыса. Куке мон джунглиысь кенешъёсы кошкисько вал, пиосынымы Этел дышетонэз ортчытъяз. Но ми туж тыршиськомы вал дырмес ваньмы ӵош ортчытъяны но нылпиосынымы ӵош шутэтскыны: ми шудӥськомы вал яке кыре потаськомы вал. Ӵем дыръя кенешлэсь ужъёссэ мон берозь быдэсъяса пукылӥ. Нош Этел, умой кышно кадь, кудӥз сярысь Мадёнъёсын 31:15 вераське, вазь ӵукна султэ вал. Соин ик, пиосмы школае кошкытозь, ми быгатӥськомы вал ваньмы ӵош нуналлы кылбурез эскерыны но сиськыны. Мон туж тау карисько Иеговаез кышное понна, кудӥз, ассэ жалятэк, котьку юрттӥз мыным ужъёсме быдэсъяны!

Анай-атай луыса, ми лэсьтӥмы ваньзэ, мае быгатӥмы, пиосмы Иеговаез но солы ужан-тыршонэз мед яратозы шуыса. Милям потэ  вал, соос вань дырзэс сётыса мед ужалозы-тыршозы шуыса — ми косэмъя гинэ ӧвӧл, нош ас мылпотэмзыя. Ми котьку но соослы вераськомы вал, кыӵе шумпотон вае вань дырез сётыса ужан-тыршон. Ми шуг-секытъёс сярысь но вераллямы, но саклыкмес висъямы солы, кызьы Иегова семьямылы юрттылӥз но бакель карылӥз. Озьы ик ми тыршимы, пиосмы мед эшъяськозы шуыса со вын-агайёсын но сузэр-апайёсын, кудъёсызлэн улоназы Иегова нырысетӥ интыын вал.

Нылпиосмес будэтыкумы, Иегова котьку но ми сярысь сюлмаськиз. Мон ачим но тырши умой карт но атай луыны. Нимысьтыз пионер луыса ужакум-тыршыкум, мон дышетски ӝикыт улыны но самой кулэзэ гинэ басьтылыны. Ми туж тыршимы ке но, вал сыӵе дыръёс, куке милям ваньмыз кулэез ӧй вал. Но мон тодӥсько, соку но Иегова милемлы юрттылӥз шуыса. Кылсярысь, 1980-тӥ аръёслэн пумазы но 1990-тӥ аръёслэн кутсконазы Суринамын граждан ож мынӥз. Соку коньдонэз тырмытыны туж секыт вал. Но Иегова милемыз ноку ӧз кельтылы (Матф. 6:32).

Иегова котьку ми сярысь сюлмаськиз но милемлы шумпотыса улыны юрттӥз. Нылпиосмы — со Иеговалэн кузьымез. Соосты будэтыны — ми понна котьку но бадӟым дан вал. Ми туж шумпотӥськомы, соос но вань дырзэс сётыса ужало-тыршо шуыса. Этниел но Гьофанни библейской школаосын дышетскизы, нош али кышноосынызы ӵош Суринамысь филиалын ужало-тыршо.

Ми кышноеным арлыдоесь ини. Но ми али но нимысьтыз пионеръёс луыса ужаськомы-тыршиськомы. Милям туж трос ужъёсмы. Соин ик, уяны дышетскон понна, мон нокызьы дыр ӧй шедьты. Но мон номыр сярысь уг жаляськы! Ортчемез шоры учкыса, мон вераны быгатӥсько: куке мон егит дыръям вань дырме сётыса ужаны-тыршыны ужпум кутӥ, мон самой умой быръён лэсьтӥ!