1. Мар сярысь милемыз юаны быгато ужан интыямы яке школаын?

 КЫЗЬЫ тӥ асьтэды шӧдӥськоды, куке ӵош ужасьты яке ӵош дышетскисьты тӥледлы осконды сярысь юан сётэ? Зэм, таӵе учыре тросэз сюлмаськыны кутско. Но сыӵе юанъёслэсь кышкано ӧвӧл. Соос валаны юртто, малы оске адями. Нош сое валаса, капчигес луоз солы ӟеч иворез вераны. Но куддыръя адямиос сыӵе юанъёс сётъяло, малы ке шуоно соос милемын соглаш ӧвӧл яке соослэн споръяськемзы потэ. Ӵем дыръя соос асьсэды озьы возё Иеговалэн Адӟись-Ивортӥсьёсыз сярысь шонертэм информацилы оскеменызы (Ап. уж. 28:22). Со сяна, Библиын азьло ик гожтэмын вал, берпум нуналъёсы адямиос «уродэсь-лекесь, ӟечез-уродэз валасьтэмесь луозы» шуыса (2 Тим. 3:1, 3).

2. Малы кулэ зӥбыт-востэм луыны?

² Оло нош, тӥ малпаськоды: «Кызьы мон быгато асме киям кутыны но лякыт луыны, куке кин ке но, споръяськон вылысь, осконэ сярысь юанъёс сётъя?» Тӥледлы юрттоз зӥбыт-востэм луон. Куке зӥбыт-востэм адямиен споръяськыны туртто яке малпамтэ шорысь юан сёто, со ассэ кутыны быгатэ (Мад. 16:32). Но тӥ малпаськоды, вылды: «Вераны капчи, нош лэсьтыны секыт». Соку мар кароно, зӥбыт-востэм луон понна? Мар юрттоз асьмеды лякытэн возьыны, куке кин ке но осконмы сярысь уродзэ вера? Тӥляд нылпиосты вань ке, кызьы соосты дышетоно осконзэс утьыны но со дыре ик зӥбыт-востэм луыны? Ойдолэ тодомы.

3. Малы вераны луэ, зӥбыт-востэм адямиос кужмоесь шуыса? (2 Тимофейлы 2:24, 25).

³ Зӥбыт-востэм адями ляб ӧвӧл, со кужмо. Секыт югдурын зӥбыт-востэм луон понна, юн луыны кулэ. Та сям «духлэн емышез» пӧлы пыре (Гал. 5:22, 23). Грек кыл, кудӥз «зӥбыт-востэм» шуыса берыктӥське, куддыръя кутӥськиз кыр вал сярысь вераку, кудзэ кортнаны быгатӥзы. Пуктэ син-азяды, кызьы кырын ворттылӥсь вал востэм луиз. Со азьло сямен ик кужмо, но табере кылзӥськись. Адямиос но зӥбыт-востэмесь, но со дыре ик кужмоесь луыны быгато. Нош аслад тыршеменыд гинэ зӥбыт-востэм уд луы. Со понна святой дух сярысь вӧсяськоно но Инмарлэсь юрттэтсэ куроно. Трос учыръёс возьмато, адями зӥбыт-востэм луыны быгатэ шуыса. Кылсярысь, трос агайёсмы но сузэръёсмы асьсэды зӥбыт-востэм возизы, куке адямиос соосын споръяськыны турттӥзы. Талы луыса адямиос Адӟись-Ивортӥсьёс сярысь умой малпаны кутско. (Лыдӟе 2 Тимофейлы 2:24, 25.) Мар юрттоз зӥбыт-востэм луыны?

4. Малы дышетскыны луэ Исааклэсь зӥбыт-востэм луон пумысен?

⁴ Библиын вераське трос зӥбыт-востэм адямиос сярысь. Соос пӧлысь одӥгез — Исаак. Куке со филистим пиослэн Герар нёжалазы интыяськиз, вожъяськись бускельёсыз сюен ӵоксазы колодчаосты, кудъёссэ атаезлэн ляльчиосыз гудӟизы вал. Исаак соосын ӧз ченгешы. Со мукет интые кошкиз но выль колодчаосты гудӟиз (Ул.-выл. 26:12—18). Но филистим пиос веразы, та колодчаос но соослэн шуыса. Соку но Исаак соосын ченгешыны ӧз кутскы (Ул.-выл. 26:19—25). Мар юрттӥз солы зӥбыт-востэм луыны, мукетъёсыз соин ченгешыны турттӥзы ке но? Со адӟем кариз Авраам но Сарра анай-атаезлэсь. Со адӟиз, кызьы атаез пӧртэм учыръёсын мукетъёсыныз тупаса улӥз, нош анаез «зӥбыт, востэм духен» улӥз (1 Пётр 3:4—6; Ул.-выл. 21:22—34).

5. Кыӵе учыр возьматэ, христиан анай-атайёс нылпиоссэс зӥбыт-востэм луонлы дышетыны быгато шуыса?

⁵ Анай-атайёс, тӥ но быгатӥськоды нылпиостэс дышетыны зӥбыт-востэмесь луыны. Тани 17 аресъем Макса́нс агайлэн учырез. Школаын но ужан-тыршонын со ӵем пумиськылӥз лек адямиосын. Анай-атаез чидаса юрттӥзы солы зӥбыт-востэм луыны. Соос верало: «Максанс валаз, куке адямиос соин споръяськыны туртто, лек кыл веран яке жугиськон интые, астэ кияд кутыны тросгес кужым кулэ шуыса». Ми шумпотӥськомы, Максанс ассэ зӥбыт-востэм возе шуыса.

6. Кызьы вӧсяськон юрттыны быгатэ зӥбыт-востэм сяммес будэтыны?

⁶ Кызьы асьмеды возёно, куке кин ке но Инмармы сярысь уродзэ вера яке Библиез мыскыл каре? Асьмеды лякытэн возён понна, Иеговалэсь святой духсэ но визьлыксэ куроно. Нош мар кароно, берлогес валамы ке, асьмеды туж ик шонер ӧм возе шуыса? Соку ми быгатӥськомы эшшо огпол вӧсяськыны но малпаськыны, кызьы асьмеды возёмы, сыӵе учыр нош ик кылдӥз ке. Нош Иегова милемлы святой духсэ сётоз, ми асьмеды киямы кутыны но зӥбыт-востэмесь луыны мед быгатомы шуыса.

7. Кыӵе пайда ваёз, ми Библиысь кылбуръёсты дышетӥмы ке? (Мадёнъёс 15:1, 18).

⁷ Куддыръя кылмес пинь сьӧрамы возьыны секыт луэ. Соку милемлы юрттыны быгато Библиысь кылбуръёс. Инмарлэн духез милемлы соосты тодамы вайытоз (Иоанн 14:26). Кылсярысь, трос пайдаё визь-кенешъёс гожтэмын Мадёнъёсын книгаын. Соослэсь кылзӥськыса, ми зӥбыт-востэм  сяммес будэтомы. (Лыдӟе Мадёнъёсты 15:1, 18.) Озьы ик Библиысь та книга возьматэ, макем кулэ секыт учыръёсын асьмеды киямы кутыны (Мад. 10:19; 17:27; 21:23; 25:15).

8. Малы валаны кулэ, кыӵе муген адями юан сётэ?

⁸ Югдурез валатэк, зэмзэ ик зӥбыт-востэм луыны уг луы (Мад. 19:11). Куке югдурез валаны тыршись адямилы осконэз сярысь юанъёс сётъяло, со йылпумъянъёс лэсьтыны уг дырты. Ӵем дыръя, куке адямиос милемлы юанъёс сётъяло, соос милемлы уг верало, малы соос милемыз та сярысь юало. Соин ик мае ке верамлэсь азьло валаны тыршоно, кыӵе муген соос милемлы сыӵе юан сёто (Мад. 16:23).

9. Кызьы Гедеон, Ефрем выжыысь адямиосын вераськыкуз, валась но зӥбыт-востэм луэмзэ возьматӥз?

⁹ Тодамы ваёмы, кызьы Гедеон Ефрем выжыысь адямиосын вераськиз. Соос вожзы потыса солэсь юазы, малы со соосты Израильлэн тушмонъёсыныз ожмаськыны туж бер ӧтиз. Нош малы соос зэмзэ ик вожзэс поттӥзы? Оло нош, соослэн вылтӥяськон сямзы вал? Гедеон валаны тыршиз Ефрем выжыысь адямиослэсь шӧдонъёссэс. Соин ик соосын зӥбыт-востэмен вераськиз. Талы  луыса соослэн «вожпотонзы сӥяз» (Суд. 8:1—3).

10. Мар юрттоз лякытэн вераськыны соин, кин вера, осконмы шонертэм шуыса? (1 Пётр 3:15).

¹⁰ Кызьы асьмеды возёно, куке ӵош ужасьмы яке ӵош дышетскисьмы милесьтым юа, малы ми Библиысь куронъёсъя улӥськомы? Ми тыршомы валэктыны, малы ми озьы улӥськомы, нош со дыре ик адямилэсь учконъёссэ но гажаломы. (Лыдӟе 1 Пётрлэсь 3:15.) Эн малпалэ, аслаз юанэныз адями возьматыны турттэ, милям осконмы шонертэм шуыса. Со интые малпаське, кызьы солэн юанэз валаны юрттэ, мар сое зэмзэ ик сюлмаськытэ. Кыӵе гинэ муген адями юан медаз сёты, милям асьмеды котьку но зӥбыт-востэмен воземмы потэ. Оло нош, соку адямилэн мылкыдыз ӝутскоз аслэсьтыз малпанъёссэ воштыны. Ми малпамъя, адями милемын лекъяськыса яке мыскыл карыса вераське ке но, ми тыршиськомы асьмеды лякытэн возьыны (Рим. 12:17).

11, 12. а) Мар сярысь малпаськоно секыт юанлы ответ сётэмлэсь азьло? (Озьы ик учке суредэз.) б) Вералэ, кызьы кинлэн ке юанэз юрттыны быгатэ умой вераськон кутскыны.

¹¹ Ӵош ужасьты юа ке, малы Адӟись-Ивортӥсьёс вордӥськем нуналъёсты уг пусъё, малпаське: оло нош, со малпа, милемлы воксё шутэтскыны уг яра шуыса? Яке со кышка, ӵош ужасьёслэн умой кусыпъёссы сӧриськозы шуыса? Ма кароно, сое буйгатон понна? Ми вераны быгатӥськомы, ӵош ужасьёсыз сярысь сюлмаськемзэ дунъяськомы, озьы ик милям но огкылысь ужаммы потэ шуыса. Талы луыса умой вераськон потыны быгатэ но милям валэктэммы луоз, мар гожтэмын Библиын вордӥськем нуналъёсты пусъён сярысь.

¹² Таӵе ик амалэз кутыны луэ, куке мукет секыт юанъёсты сётъяло. Кылсярысь, ӵош дышетскисьты вера, Иеговалэн Адӟись-Ивортӥсьёсызлы гомосексуализм шоры мукет сямен учконо шуыса. Малы со озьы вера? Со Иеговалэн Адӟись-Ивортӥсьёсыз сярысь шонертэм малпа-а? Яке матысь адямиосыз пӧлысь кин ке но гомосексуалист-а? Яке, солэн малпамезъя, ми адӟемпотостэм кариськомы соосты, кинъёс сыӵе ужен выро? Сыӵе адямиез оскытыны кулэ, вылды, ми вань адямиосты яратӥськомы но котькуд адямилэсь бырйыны правозэ гажаськомы шуыса (1 Пётр 2:17) b. Оло нош, собере ми вераны быгатомы, кызьы Библиысь вылӥ эсэпъёс шудогес луыны юртто.

13. Кызьы асьмеды возёно, куке кин ке но Инмарлы оскеммес серем каре?

¹³ Куке кин ке но Библиысь зэмлыкен соглаш уг кариськы, соку ик малпано ӧвӧл, ми тодӥськомы шуыса, малы со оске (Титлы 3:2). Шуом, ӵош дышетскисьты Инмарлы оскемдэс серем каре. Возьматэ-а та, со эволюцилы оске но сое умой вала шуыса? Яке со вера сое гинэ, мае мукетъёсызлэсь кылӥз? Эволюция сярысь вераськем интые, ӵектэ солы малпаськон понна куд-ог темаос. Кылсярысь, возьматэ солы, мар вераське кылдытон сярысь jw.org сайтамы, яке сайтэ пырон понна ссылка ыстэ. Оло нош, берлогес солэн вераськемез потоз со сярысь, мае со лыдӟиз яке адӟиз та сайтысь. Гажаса вераськеммы адямилэсь мылкыдзэ ӝутыны быгатэ Библия сярысь тросгес тодыны.

14. Кызьы Нилл пияш сайтмес уже кутӥз, ӵош дышетскисезлэсь Иеговалэн Адӟись-Ивортӥсьёсыз сярысь малпанзэ воштон понна?

¹⁴ Нилл нимо пияш сайтмес быгатыса уже кутэ. Та солы юрттэ Иеговалэн Адӟись-Ивортӥсьёсыз сярысь адямиослэсь шонертэм  малпанъёссэс воштыны. Со вера: «Ӵош дышетскисе мыным ялан вералляз, наукалы оскем интые, мон выжыкылъёсын книгалы оскисько шуыса». Ӵош дышетскисез Нилл пияшлы малы оскемзэ валэктыны уг сёты вал бере, Нилл солэсь саклыксэ висъяз jw.org сайтысь «Наука но Библия» люкетлы. Берлогес Нилл валаз, ӵош дышетскисез сайтэ пыраз шуыса. Малы ке шуоно соин луиз ини кӧня ке вераськыны улонэз кылдытон сярысь. Таӵе ик амалэз уже кутыса, тӥ но трос пайда басьтоды.

15. Кызьы анай-атайёс нылпиоссэс дышетыны быгато осконзы сярысь юанъёслы лякытэн ответ сётыны?

¹⁵ Школаын егит агайёслы но сузэръёслы осконзы сярысь юанъёс сётъяны быгато. Кызьы анай-атайёс нылпиоссэс дышетыны быгато лякытэн вераськыны? (Иак. 3:13). Куд-ог анай-атайёс нылпиосынызы ӵош семьяен йыбырттонзы дыръя пӧртэм адямиосын вераськыны дасясько. Соос быръё юанъёсты, кудъёссэ школаын сётыны быгато, соосты эскеро но возьмато, кызьы лякытэн но гажаса ответ сётыны луэ. (Учке « Дасяське семьяен йыбырттонды дыръя» рамкаез.)

16, 17. Кызьы семьяен йыбырттонзы дыръя дасяськон егит агайёслы но сузэръёслы юрттэ?

¹⁶ Семьяен йыбырттонзы дыръя нылпиос дышетско валэктыны, малы соос оско. Соку соослэн асьсэлэн Библилы осконзы юнма. «Вопросы молодёжи» серияысь трос статьяослы, кудъёссэ jw.org сайтысь шедьтыны луэ, нылпиос понна схемаос дасямын. Соос юртто егит агайёслы но сузэръёслы осконзэс юнматыны но ас кылъёсынызы валэктон сётыны. Та статьяосты быдэс семьяен эскерыса, нылпиос но, анай-атайёс но дышетско лякытэн но зӥбыт-востэмен осконзэс утьыны.

 ¹⁷ Мэ́тью пияш валэктэ, кызьы солы юрттэ семьяен йыбырттонзы дыръя дасяськон. Ӵем дыръя соос анай-атаенызы эскеро юанъёсты, кудъёссэ школаын сётъяны быгато. Со вера: «Ми малпаськомы, кыӵе учыръёс кылдыны быгато, эскерон ортчытӥськомы но возьматӥськомы, кызьы астэ возёно но мар верано сыӵе учырын. Куке мон умой валасько, малы Библиысь зэмлыклы оскисько, мон уг сюлмаськиськы но мыным капчигес асме зӥбыт-востэм возьыны, куке мыным юанъёс сёто».

18. Кыӵе визь-кенеш гожтэмын Колоссыослы 4:6?

¹⁸ Адями Библиысь зэмлыклы мед оскоз шуыса, куддыръя валамон валэктэммы гинэ тырмыт ӧвӧл. Со сяна, лякыт но зӥбыт-востэм луыны кулэ на. (Лыдӟе Колоссыослы 4:6.) Кинэн ке вераськонэз ӵошатыны луэ тупен шудонэн. Ми быгатӥськомы тупез каньылля куштыны, озьы ик быгатӥськомы вань кужмысьтымы сое сэрпалтыны. Тупез каньылля куштӥмы ке, мукет адямилы сое кутыны капчигес луоз но шудон азьланьтӥськоз. Ӵапак озьы ик ми но малпанъёсмес лякытэн но зӥбыт-востэмен валэктӥмы ке, адямиослы милемыз кылзыны но вераськонэз азьланьтыны капчигес луоз. Нош кин ке но милемын ченгешыны турттэ яке осконмес серем каре ке, милемлы соин одно ик вераськоно ӧвӧл (Мад. 26:4). Но сыӵе адямиос туж ӧжыт. Зэмзэ вераса, кылзӥськись адямиос тросгес.

19. Малы, осконмес утьыкумы, милям зӥбыт-востэмесь луэммы потэ?

¹⁹ Кызьы ми адӟимы, зӥбыт-востэм сям туж кулэ. Куке адямиос милемын споръяськыны туртто яке верало, милям осконмы шонертэм шуыса, асьтэды кияды кутон понна, Иеговалы вӧсяське. Эн вунэтэ: зӥбыт-востэм луэмды споръяськонлэсь палэнскыны юрттоз. Лякытэн но гажаса вераськемды куд-ог адямиослэсь мылкыдзэс ӝутоз ми шоры но Библия шоры мукет сямен учкыны. «Оскиськонды пумысен котькудӥзлы кылдэс юасьлы востэмен, гажась мылкыдын ответ сётыны котьку но дась луэ» (1 Пётр 3:15). Ойдолэ азьланяз но зӥбыт-востэм сяммес будэтомы, малы ке шуоно со милемыз зэмзэ ик кужмо каре!