ТРОСЭЗ тодо, Иисусэз юбо борды кортӵогазы, нош солэн кык палаз но йыруж лэсьтӥсьёс кортӵогамын вал шуыса (Матф. 27:35—38). Библиын вераське, собере Иисуслэсь мугорзэ ватон понна дасязы но гурезь пушкын лэсьтэм шайгуэ понӥзы шуыса (Марк 15:42—46). Но куд-огъёсыз талы уг оско.

Куд-ог адямиос верало, юбо борды кортӵогам адямиез умой адямиез сямен ватыны уг лэзё вал шуыса. Соослэн верамзыя, сыӵе адямиосты мукет сямен вато вал. Тани мар вера Ариэль Сабар журналист «Смитсониан» журналын a: «Юбо борды кортӵогало вал туж урод адямиосты. Соин ик куд-огъёсыз уг оско, Римын улӥсьёс сыӵе адямиосты умой адямиосты сямен вато вал шуыса». Римын улӥсьёс юбо борды кортӵогам адямиосты юбо борды ик кельто вал. Со адямиослэсь мугорзэс шӧйёсты сиись пӧйшуръёс сиыны кутско вал. Озьы Римын улӥсьёс сыӵе адямиосты ултӥяло вал. Собере юбо борды кортӵогам адямиосты нимаз уг вато вал. Нош кушто вал йыруж лэсьтӥсь адямиослы дасям шайгуэ.

Но гудыса утчаськонъёс возьматӥзы, озьы котьку но уг каро вал шуыса. 1968-тӥ арын шедьтэмын вал одӥг пиосмуртлэн лысьӧмъёсыз, кудзэ нырысетӥ даурын казнить каризы. Сое шедьтӥзы Иерусалим котырысь одӥг еврей семьялэн шайгуысьтыз. Та пиосмуртлэн лысьӧмъёсыз понэмын вал оссуарие, нимысьтыз ящике, кудаз кулэм адямилэсь лыоссэ тыро вал. Шедьтэмын вал пыдтыш лы, кудӥз 11,5 см кузьда кортӵоген пул борды шуккемын вал. Сабар журналист вера: «Иехоханан нимо пиосмуртлэн пыдтыш лыэз возьматэ, Иисусэз зэмзэ ик шайгуэ поныса ватӥзы шуыса. [...] Та шедьтэм возьматэ, Иисус улон нуналъёсы рим кивалтӥсьёс юбо борды кортӵогам адямиез умой адямиез сямен ватыны лэзё вал шуыса».

Иехохананлэн пыдтыш лыэз рос-прос уг возьматы, кызьы интыямын вал Иисуслэн киосыз но пыдъёсыз, куке сое юбо борды кортӵогазы. Но валаны луэ, юбо борды кортӵогам куд-ог адямиосты умой адямиосты сямен вато вал шуыса, нош урод адямиослы дасям шайгуэ гинэ уг кушто вал шуыса. Соин ик, куке Библиын вераське, Иисусэз шайгуэ поныса ватӥзы шуыса, талы быдэсак оскыны луэ.

Озьыен, гудыса утчаськонъёс дыръя шедьтэмъёс возьмато, Библилы оскыны луэ шуыса. Нош тужгес но валтӥсез, тае возьмато Иеговалэн кылъёсыз. Инмар азьло ик вераз, Иисусэз узыр адямилэн шайгуаз ватозы но солы аслэсьтыз кылъёссэ быдэстыны нокин уз люкеты шуыса (Ис. 53:9; 55:11).