Анай-атайёс нылпизэс визьмало-нодъяло, куке солы визь-кенеш сёто яке дышето. Куддыръя соос нылпизэс кылкутыто, со ассэ умой мед возёз шуыса. Но ӵем дыръя анай-атайёс нылпизэс кылкутыто, малы ке шуоно соослэн сое дышетэмзы потэ, мар ӟечез, нош мар уродэз луэ, азьланяз нылпизы ачиз шонер ужпумъёс кутыны мед быгатоз шуыса.

Берло аръёсы куд-ог анай-атайёс нылпиоссэс ӧжытгес но ӧжытгес кылкутыто, малы ке шуоно соос кышкало, нылпиоссы асьсэды номыр карыны быгатӥсьтэмен лыдъяны кутскозы шуыса. Нош анай-атайёс, кудъёсыз зэмзэ ик сюлмасько нылпиоссы сярысь, уг кышкало куронъёс пуктыны но дышето нылпиоссэс со куронъёсты быдэсъяны.

«Нылпи умой адями мед луоз шуыса, солы валамон верано, мар карыны яра, нош мар карыны уг яра. Нылпиосыз ӧд дышеты ке, соос уз быгатэ шонер ужпумъёс кутыны» (Памела).

Верам кылдэс быдэстэ. Нылпиды куронъёстэс уг быдэсъя ке, кылкутытэ сое. Нош нылпиды ассэ умой возе ке, одно ик ушъялэ.

«Мон ӵем нылпиосме ушъясько кылзӥськемзы понна, малы ке шуоно асьме вакытэ туж шерез нылпи кылзӥське. Нылпиез ушъяськод ке, со юрттэ солы, кулэ дыръяз, тупатэмлэсь кылзӥськыны» (Кристин).

БИБЛИЫСЬ ВИЗЬ-КЕНЕШ: «Адями мае кизе, сое ик со ара» (Галатъёслы 6:7).

Визьмо лэсьтэ. Визьмалэ-нодъялэ нылпидэс, лыдэ басьтыса сое, кӧня арес нылпидылы но мае со карыны быгатэ ини. Кылкутытэ нылпидэс со удысын ик, кыӵе удысын со ӧз кылзӥськы. Соку со тросгес пайда ваёз. Кылсярысь, тӥ нылпидылы телефонэн шудон пумысен куронъёс пуктӥды, нош нылпиды тӥлесьтыд ӧз кылзӥськы. Соин тӥ солэсь телефонзэ огдырлы басьтыны быгатоды, нылпиды янгышсэ мед валалоз шуыса. Нылпидылэн ассэ воземез тӥледлы ӧз кельшы шуыса гинэ, нылпидэс кыл эн кутытэ.

«Мон валаны тыршисько: нылпие юри ӧз кылзӥськы яке янгышаз гинэ. Нылпи ӵем юри уг кылзӥськы ке, со сямзэ быдтыны тыршоно. Нош со янгышен ӧз кылзӥськы ке, соин вераськыны кулэ, озьы лэсьтыны уг яра шуыса» (Уэндэл).

БИБЛИЫСЬ ВИЗЬ-КЕНЕШ: «Асьтэлэсь нылпиостэс эн керӟегъяськытэ, соос ӝоже усёно медаз луэ» (Колоссыослы 3:21).

Яратыса визьмалэ-нодъялэ. Нылпиослы капчигес кылзӥськыны, куке соос тодо, анай-атайёссы соосты ярато шуыса.

«Куке пимы кыӵе ке но янгыш лэсьтэ вал, ми солы вераськомы вал, сое яратӥськомы шуыса. Озьы ик тодаз вайытӥськомы вал, со трос умой ужпумъёс кутӥз ини шуыса. Ми солы валэктылӥмы, со янгышсэ тупатыны тыршиз ке, солэн ӟеч нимыз уз саптаськы шуыса. Собере ми солы вераськомы вал, солы одно ик юрттомы шуыса» (Дэниел).

БИБЛИЫСЬ ВИЗЬ-КЕНЕШ: «Яратон кема чида, гажа-жаля» (1 Коринфъёслы 13:4).