Куд-ог христианъёс уже куто туала технологиосты, семьяенызы, озьы ик вын-агайёсын но сузэр-апайёсын герӟаськон понна. Зэм но, христиан мурт, кудӥзлэн Инмарен юн кусыпъёсыз, тодаз возёз Библиысь таӵе визьмо кылъёсты: «Визьмо-нодо адями шугадӟон вуэмез адӟе но ватӥське, нош улон-вылонэз йӧназ валасьтэмъёс азьпала мыно но вӧсь карон улэ сюро» (Мад. 27:12).

Ми валаськомы, Иеговалэн милемыз утемез потэ шуыса. Соин ик ми кусып ум возиське «люкиськонъёс... лэсьтӥсьёсын», соосын, кинъёсты кенешысь поттӥзы яке кинъёс Библиысь зэмлыкъёсты сурало (Рим. 16:17; 1 Кор. 5:11; 2 Иоанн 10, 11). Кенешын но вань сыӵе вын-агайёс но сузэр-апайёс, кудъёсыз асьсэды адӟем карымон уг возё (2 Тим. 2:20, 21). Эшъёс бырйыку, милемлы тае лыдэ басьтоно. Нош ми адямиен мессенджеръёс пыр гинэ вераськиськомы ке, соку секыт валаны, со милемлы умой эш луоз-а, уз-а шуыса.

Та сярысь тодамы возьыны кулэ тужгес но соку, куке вераськон мынэ группаос сярысь, кудъёсаз трос адямиос пыро. Куд-ог христианъёс сыӵе группаосы пыризы но, со урод бервылъёсы вуттӥз. Быгатомы-а ми сак луыны, куке одӥг группае трос сю яке трос сюрс адямиос пыро? Сыӵе учыре уг луы умой тодыны, кыӵе адямиос отчы пыро но кыӵе соослэн Инмарен кусыпъёссы. Псалтирьын 25:4 гожтэмын: «Ӧрекчи адямиосын огазьын мон ӧй пукы, кескичъёсын но ӵош уг мыны». Уг возьматы-а та кылбур: умой луоз мессенджеръёс пыр ми вераськимы ке соосын гинэ, кинэ тодӥськомы?

Группаос бадӟымесь ӧвӧл ке но, христиан муртлы чаклано, кӧня дырзэ со быдтэ мессенджеръёс пыр вераськон понна, озьы ик сое, мар сярысь отын верасько. Мар сярысь гинэ группаосын медам вераське но кӧня гинэ дыр солы медаз кошкы, эн малпалэ, группаын вань верамъёслы тӥледлы мар ке но гожтоно шуыса. Павел Тимофейлы вераз «супыльтӥсесь, котьмаин тунсыкъяськисесь» адямиос сярысь (1 Тим. 5:13). Туннэ но, мессенджеръёс пыр вераськыкузы, куд-огъёсыз асьсэды озьы возё.

Христиан мурт, кудӥзлэн юн осконэз, вын-агайёс но сузэр-апайёс сярысь уродзэ уз вера яке соос сярысь вераны лэзьымтэ мае ке уз вӧлмыты. Со сяна, со мессенджеръёс пыр ыстэм сыӵе веранъёсты но уз лыдӟы (Пс. 14:3; Мад 20:19). Озьы ик со тодыны уз туртты паймымон яке эскерымтэ иворъёсты но соосты мукетъёсызлы уз лэзьы (Еф. 4:25). Библия вылэ пыкиськыса гожтэм информациез но эскерем иворъёсты шедьтыны луэ jw.org сайтысь но котькуд толэзе потӥсь JW Broadcasting^® программаосысь.

Куд-ог Адӟись-Ивортӥсьёс мессенджеръёсты уже куто, мае ке вузан, басьтон яке ӵектон понна. Та удыс герӟаськемын ужен. Сое Иеговалы йыбыртъянэн сурано ӧвӧл. Христиан мурт, кудӥзлэн потэ, сюлмаз коньдонэз яратон медаз луы шуыса, мессенджеръёсты вузкарон понна кутыкуз, вын-агайёс но сузэр-апайёс пыр коньдон поттыны уз тыршы (Евр. 13:5).

Нош мар карыны луэ, милям юрттэммы потэ ке вын-агайёслы, кудъёсыз шуг-секытэн пумиськизы яке инкуазь шимучыре сюризы. Быгатӥськомы-а ми сыӵе учыре мессенджеръёс пыр коньдон люканы? Ми вын-агайёсмес яратӥськомы, милям потэ, соослэн ваньмыз умой мед луоз шуыса. Соин ик ми ог-огмылы юрттыны тыршиськомы (Иак. 2:15, 16). Но ми, мессенджеръёсын бадӟым группаос кылдытыса, коньдон люкамы ке, соку люкетомы юрттӥськон ужлы, кудзэ радъяз филиал яке тӧроос (1 Тим. 5:3, 4, 9, 10, 16). Со сяна, мукетъёсыз малпаны быгатозы, Инмарлэн калыкезлы юрттон понна, милемлы кыӵе ке нимысьтыз уж сётэмын шуыса.

Вань ужъёсынымы милям Инмарез данъяммы потэ (1 Кор. 10:31). Соин ик, мессенджеръёсты уже кутыку, малпаське, кыӵе кышкытлыкъёс кылдыны быгато, но сак луэ.